40
Kin ana Kapu Tau Lawelawenina yo Fwalawa Tau Gabugabu
Aba Fatubu 40:1-23
1 Fuya fisa mulidi yai, Idipi edi kin ana wain kapuna tau lawelawenina yo fwalawa tau gabugabu babaꞌisadi, lau pono sa ginauli kin lisina yai.* Kaputi tau lawenina, ana paisowa wain ya ita watan ya lawen, yo ya nom ina paꞌana tabu kin ti faꞌanlewa. 2 Ya manabala tau paisowa laꞌilaꞌidi luwaga te, lisidi yai, 3 be ya falau delidi gati edi baꞌisa ena luma yai, somo yai Diyosepa ena aba falau delina.
4-5 Gati edi baꞌisa, Diyosepa ya tole be ya ita watanidi.
Kaputi tau lawelawenina yo fwalawa tau gabugabu deli yai sa miya lahai fisa mulidi yai, sa faiꞌeno suwai iꞌipa esega yai. In moho eno suwaidi aniyodi hige gonogonowadi.
6 Bobonna Diyosepa ya laoma ya itadi mate sa nuwa dubu.
7 Yo fede ya fatiꞌoidi iyen,
Paꞌana somo nenemiu sa heyaya?
8 Alinana sa bui tiyen,
Tataumai luwaga ama eno suwai hige sai hesa haba aniyodi i liba famahatadi.
Habahim Diyosepa ya falibadi iyen,
Yaubada in ibona mate eno suwai aniyodi ya fafamahatadi! Ami eno suwaidi au falibagu.
9 Yo fede kapu tau lawenina ana eno suwai ya dedei Diyosepa lisina yai, iyen,
Agu eno suwai yai wain mahinana E ita nuwanuwagu yai, 10 lagana faihona. Hige walolona ya taya, na wain uludi dulidi sa nanau. 11 Falo ana kapu E abiꞌabiꞌi, na wain uludi E abidi be E folo kapu ni ganahewana yai na Falo E felen.
12 Diyosepa ya faliba iyen,
Am eno suwai aniyona doha ite: Laga faihona aniyona mate lahai faihona. 13 Lahai faihona mulidi yai Falo haba ya fafuyom be am paisowa wa abi fuyoi. Kapu haba wa felefelen doha ainiyadi. 14 Na yena ginauli sa lau dudulai lebem yai mate aee–, u nuwatuhuigu yo u nuwatohatohaegu. Falo u faliba be i kam fahigu deli yai te, 15 paꞌana Hebelu edi tanohi yai sa angafuhigu be sa laweguma amaiteꞌi. Amaiteꞌi hinaga hige somo hesa ya ginauli faheyaya be halana yai haba ti falau deligu.
16 Fuyana kaputi tau lawelawenina, ana eno suwai aniyona Diyosepa ya dedei mate fwalawa tau gabugabu nuwana yai ya mahata, yo fede iyen,
Yau hinaga agu eno suwai: Kulugu yai mate fwalawa noho faihona. 17 Noho hewa yai mate kalahe gabugabudi hudoꞌi - hudoꞌi Kin ana. In moho nohona hewa yai, kalahedi ataiꞌa sa anidi.
18 Diyosepa iyen,
Noho faihona aniyona mate lahai faihona. 19 Lahai fafaihonadi yai Falo haba gadom ya ibo na ya fakautim ai oyagi. Na ataiꞌa haba taum sa aniꞌi.
20 Lahai fafaihonana mate Falo ena fuya tubu fanuwa hitinina, be ena tau paisowa laꞌilaꞌidi mahudoꞌidi edi anꞌangogo ya ginauli. Kapu tau lawelawendi edi baꞌisa yo fwalawa tau gabugabudi edi baꞌisa deli yai Falo ya soꞌe fahidi be ya lawedi ena tau paisowa lalalaꞌi nuwanuwadi yai.
21 Kapu tau lawelawendi edi baꞌisa ana paisowa ya fele fuyoi, be haba kapu ya tole bodai Falo ai nimana.
22 Na fwalawa tau gabugabudi edi baꞌisa ya fakauti, doha eno suwaidi Diyosepa ya liba famahata lisidi yai.
23 In moho, kapu tau lawelawenina edi baꞌisa hige Diyosepa i nuwatuhui, ya nuwa fuiyen.
*40:1 Kaputi tau lawenina, ana paisowa wain ya ita watan ya lawen, yo ya nom ina paꞌana tabu kin ti faꞌanlewa.