41
Falo ana Eno Suwai
Aba Fatubu 41:1-36
Bolima luwaga sa ofi, Falo ya eno suwai: Eno suwai ganahewana yai bena haga ya obiꞌobiyo Naili Hoꞌowana sadaina yai, na bulumakau faligigi luwaga tubutubudi hoꞌowa yai sa kalamahanoma be sa an hawahawa.
Mulidi yai, hinaga faligigi luwaga golegoledi, hoꞌowana yai hinaga sa kalamahanoma be sa obiꞌobiyo hoꞌowa kanaꞌugaugana yai. Be golegoledi mate tubutubudi faligigi luwaga sa anidi. Yo fede Falo ya eno obiyo.
Habahim ya eno fuyo be ya eno suwai boda: Ana eno suwai mate witi maihawadi laꞌadi faligigi luwaga sa lau idahe sa in hewa esega yai.
Mulidi yai, kuludi laꞌadi faligigi luwaga sa in, sa kiu wananaha be yawana gigibwalina ya gabudi. Witi maihawadi kikiꞌina mate witi maihawadi lalaꞌi yo laulau idahedi faligigi luwaga sa domdi. Habahim Falo ya obiyo; ya nuwatuhu lobahi mate, eno suwai.
Hwalahwalalana nuwana ya faiꞌabi, yo fede dodoga sibasibadi yo ayaꞌayahan mahudoꞌidi Idipi yai adi liba ya fatamalidi be sa laoma. Falo ana eno suwai ya falibadi in moho hige sai gonowana aniyodi i liba famahatadi.
Habahim kapu tau lawelawendi edi baꞌisa ya libalau Falo lisina iyen,
Lau pono E ginauli matabahim haba E libaen. 10 Fuya ma esega, wa manabala, yau yo fwalawa tau gabuna lisimai yai be wa falau delimai gati edi baꞌisa ena luma yai. 11 Iꞌipa esega tataumai luwaga ꞌe faiꞌeno suwai, na eno suwaidi mate aniyodi sa laulau hudoꞌi. 12 Fuyana yai Hebelu hewalina, gati baꞌisana ena tau paisowa, mate maꞌemai. Ama eno suwai ꞌe faliba be aniyodi ya liba famahatadi lisimai yai. 13 Be aniyodi sa tubu: Yau agu paisowa E abi fuyoi, na hidagu sa fakauti.
 
14 Yo fede Diyosepa ana liba Falo ya fatamali, be feula deli yai sa leyama. Sapulana ya ibodi yo ena leli ya liꞌodi na ya laoma Falo lisina.
15 Falo ya libalau Diyosepa lisina iyen,
Agu eno suwaina, hige gonowana sai haba aniyona i falibagu. Na wasam egu sa liba mate yena eno suwai sa dedeidi lisim yai mate, gonowana aniyodi wa liba famahatadi.
 
16 Falo alinana Diyosepa ya bui, iyebom,
Hige gonowagu ya ginauli, in moho Yaubada haba em bui loholohona ya felen.
 
17 Habahim Falo ya libalau Diyosepa lebena iye,
Agu eno suwai yai mate Naili hoꞌowana bubuna yai E obiꞌobiyo, 18 fuyana yai bulumakau tinatinabawadi tubutubu loholohodi faligigi luwaga sa kepa hasaema hoꞌowa yai be sa anban hawahawa pwaludi yai. 19 Mulidi yai bulumakau faligigi luwaga yagayagadi yo nene heyaheyayadi hinaga sa kepa hasaema hoꞌowa yai. Hola hige bulumakau doha ya itadi Idipi tanohina yai. 20 Yagayagadi heyaheyayadi wa, bulumakau tubutubudi faligigi luwaga sa an faꞌofidi. 21 In moho sa an maꞌudaidi mulina yai, nenedi hige ti buidi, paꞌana bogadi hige ti iyaꞌiya. Hige gonowana sai i ita lobahidi, mate sa anidi.
Habahim E obiyo.
22 Agu eno suwai hesa doha ite, witi faligigi luwaga E itadi, sa lau idahe. Paꞌadi esega yai sa in. 23 Habahim mulidi yai witi faligigi luwaga hohohoyadi yo kikiꞌina wa, yawana ya towa be ya faheyayayadi, mate sa kala moꞌa. 24 Witi kikiꞌina wa witi laulau idahedi faligigi luwaga wa sa dom faꞌofidi.
Nesu tau-itaꞌita E falibadi, in moho hige sai gonowana i liba famahata lisigu yai.
 
25 Habahim Diyosepa ya libalau Falo lebena iyen,
Am eno suwaidi mate esega yo gonogonowadi. Yaubada somo haba ya ginauli mate ya famahata lebem yai. 26 Bulumakau tubutubudi faligigi luwaga aniyona mate bolima faligigi luwaga, yo hinaga witi kuludi laꞌadi loholohodi faligigi luwaga; aniyodi gonogonowadi. 27 Bulumakau golegoledi faligigi luwaga muli yai sa kepama aniyona mate bolima faligigi luwaga, yo witi kuludi laꞌadi heyaheyayadi yawana gigibwalina ya gabudi aniyona mate bolima faligigi luwaga: Aniyona mate haba bolima faligigi luwaga galamo wesawesasa.
 
28 Somo E fafalibam te haba ya tubu paꞌana Yaubada somo haba ya ginauli, mate ya famahata lisim yai. 29 Mahula laꞌilaꞌi haba ai Idipi tanohina bolima faligigi luwaga. 30 In moho ai muli haba galamo wesawesasa bolima faligigi luwaga. Haba mahula Idipi yai sa nuwa fuiyen, na galamo wesawesasa haba nuꞌuna ya faheyaya.
31 Mahula nuꞌuna haba sa nuwa fuiyen, paꞌana galamo wesawesasa muli yai ya laolaoma mate haba ya heyaya wananaha. 32 Baꞌisa! Eno suwai nene luwaga wa abidi, mata paꞌana mate Yaubada haꞌa ya nuwatuhu fatoha nonohai, be ibege walolona haba ya ginauli.
33 Be um Falo, bena doga nuwanuwatuhuna yo sibasibana wa yoꞌoi be wa tole be Idipi tanohina ya tanuwagai. 34 Bena tanohi tau ita watanidi wa faꞌobiyodi haba mahula bolima faligigi luwaga ganahewadi yai na Idipi sa lau gabu mate hesa - hesa ena pei faligigi yai mate ai ganahewadi nimagogo esega haba kin sa felen ya famala doha edi takesi. 35 Kin Falo ena gigibwali yai, mahula bolimandi matada yai, kalahena mahudoꞌina bena sa tano gogoidi be sa toledi siti yai, adi anꞌan. 36 Kalahe te bena gwalaidi nuꞌu te ana. Haba galamo wesawesasa bolima faligigi luwaga ai Idipi mate fapaisowadi, be ibege galamo wesawesasa nuꞌu i faheyaya.
Diyosepa ya Famala Idipi edi Gawana
Aba Fatubu 41:37-42, 45-51, 53-57
37 Nuwatuhu ni, Falo yo ena tau paisowa laꞌilaꞌidi mahudoꞌidi sa fanuha.
38 Yo fede Falo ya fatiꞌoidi iyebom,
Haba taumoho hesa te yoꞌoi doha Diyosepa. Taumohona bena Yaubada Yaluwana lisina yai.
 
39 Habahim Falo ya libalau Diyosepa lebena iyen,
Fuyana Yaubada ginaulidi te ya faꞌitam, hige sai hesa nuwanuwatuhuna yo sibasibana doha um.
40 Um haba egu luma loholohona wa ita watan, yo egu dodoga mahudoꞌidi haba em nuwatuhu sa lau watanidi. Aba taꞌai faꞌatitina debana yai yau haba E laꞌi, habahim um.
 
41 Yo fede Falo ya libalau Diyosepa lisina iyen,
Yau aho te, E tolem tau itaꞌita wata be Idipi tanohina mahudoꞌina wa ita watan.
 
42 Habahim Falo ana nimakau nima gigina yai ya kamfahi na ya tole Diyosepa nimana gigina yai. Luhululu loholohona sa ginauli lisina yai ya faleli yo gadogado gole yai sa ginauli ya fagadoi.
45 Diyosepa hesana Falo ya tole, Safenata Paneya na Potifela natuna Asenata ya felen ya fai. Potifela mate in Idipi yaubadana edi tau anꞌantalasam On Nuꞌuna yai. Yo fede Diyosepa Idipi nuꞌuna mahudoꞌina ya ita watan.* Potifela mate doga hesa, na Potifa mate Diyosepa ena baꞌisa. Buka haisa yai sa uli: Heliyopolisi taonna aniyona mate Maihala Nuꞌuna. Hesana hesa mate On. Siti hesa na dodogadi mate maihala sa tabataba ohuwen.
46 Fuyana Diyosepa ena boliman 30 mate, ya paisowa fatubu Idipi edi Kin Falo, enehena.
Habahim Diyosepa Falo ya lau afulen na ya lau Idipi nuꞌuna mahudoꞌina ya ita. 47 Mahula, boliman faligigi luwaga.
48 Idipi yai, mahula bolima faligigi luwaga ganahewadi yai, kalahe mahudoꞌina Diyosepa ya tano gogoidi. Tefa hesa - hesa yai, kalahe sa uma mate hinaga ya pei gogonidi siti hesa - hesa yai.
49 Diyosepa kalahe boluna ya pei gogonidi, doha gabogabo gelegeledi; sa ouli wananaha, be fatili ya fatautau.
50 Hola galamo wesawesasa bolimanna hige i fatubu na, Diyosepa nanatuna tatau luwaga, lahuna Asenata ya yosidi. Tineꞌeuna tamana mate Potifela, Idipi edi yaubada hudoꞌi On nuꞌuna yai, edi tau antalasam hesa.
51 Tau tuwaha hesana ya tole Manase na iyen,
Paꞌana Yaubada ya ginauligu be egu pilipili ouꞌouli yo tamagu ana boga mahudoꞌidi E nuwa fuiyedi.
 
53 Mahula Idipi yai bolima faligigi luwaga ya ofi, 54 na galamo wesawesasa bolima faligigi luwaga ana fuya, doha haꞌa Diyosepa ya libaen. Nuꞌu hahaisa yai galamo wesawesasa. In moho, Idipi nuꞌuna yai dodoga mahudoꞌidi mate, adi sa soi. 55 Fuyanna Idipi mahudoꞌina sa fatubu galamo wesawesasa amnana sa abi, dodoga kalahe sa anꞌeta Falo lisina yai. Habahim Falo Idipi mahudoꞌidi ya falibadi iyen,
Au lau Diyosepa lisina, somo ya falibamiu, au lau watan.
 
56 Fuyana galamo wesawesasa nuꞌu mahudoꞌina ya nuhuli, Diyosepa kalahe lumadi ya soꞌedi be kalahe ya uneꞌuneꞌedi Idipi dodogadi lisidi yai. 57 Yo fede, nuꞌu mahudoꞌidi dodogadi sa laoma Idipi be witi sa unedi Diyosepa lebena yai.

*41:45 Potifela mate doga hesa, na Potifa mate Diyosepa ena baꞌisa. Buka haisa yai sa uli: Heliyopolisi taonna aniyona mate Maihala Nuꞌuna. Hesana hesa mate On. Siti hesa na dodogadi mate maihala sa tabataba ohuwen.