50
Diyosepa Haidana Nuwadi ya Liba Faꞌadidilidi
Aba Fatubu 50:15-26
15 Fuyana Diyosepa afa haidana tamadi sa ita mate ya peꞌi, be tiyen,
Fuyana somo mahudoꞌina lisina yai te ginauli faheyaya, Be bena haba i manabalaꞌeda na i oilibaeda be haba ana hala i abi.
16 Be wasa tau lawenna sa fatamali lawen Diyosepa lisina be iyen,
Tamam hola hige i peꞌi na ya liba, iyen,
17 “Haidam, Tamam ena Yaubada ena tau paisowa, somo heyayana sa ginauli lisim yai mate edi heyayana u nuwatuhu afulen.”
Diyosepa wasa te ya atahiyen, yo fede ya tan, paꞌana hola hige ti sibai mate, edi heyaya haꞌa ya nuwatuhu afulen.
18 Habahim afa tuwahana sa laoma be sa hoba lidi nuwanuwana yai, na tiyen,
Ai em tau lau fayofayo.
19 Na Diyosepa ya falibadi iyen,
Tabu au ꞌwasabu. Yau hige Yaubada.
20 Umi emi nuwatuhu bena ami faheyayagu, in moho Yaubada ya bui be somo aho ite ami ginauli ya faloholoho be dodoga boludi ya fofofahidi.
21 Be tabu au ꞌwasabu! Umi yo nanatumiu haba E ita watanimiu.
Ena liba yai nuwadi ya liba faꞌadidilidi yo ya faliba komakomanꞌidi.
Diyosepa Idipi yai ya Peꞌi
Aba Fatubu 50:22-26
22 Diyosepa yo tamana ana boga mahudoꞌina sa miya Idipi yai. Ena bolima 110 na ya peꞌi.
23 Yo Ifelaim nanatuna hiti fafaihonana ya ita. Yo Manase natuna taumoho Makili nanatuna sa tubu sa toledi Diyosepa ahe paꞌana yai ya itadi hinaga.
24 Habahim Diyosepa haidana ya falibadi iyen,
Haba E peꞌi. Yaubada haba ya nuwatuhuimiu be nuꞌu yai te ya foyahimiu, ami lau tanohi ya liba fasunumaꞌen, Abelaham, Isako yo Iyakobo lisidi yai ainiya.
25 Habahim Diyosepa ya liba be Isalaela nanatuna sa angwala tiyen,
Yaubada haba ya saguhimiu, be siyadagu nuꞌu yai te ami baheidi.
26 Diyosepa ena bolima oulina 110 habahim ya peꞌi. Sa famaꞌi Idipi yai, na lati yai sa husan.