4
Diyona ya Manabala, na Yaubada ya Nuwatohatoha
Diyona 4:1-11
1 Nuwatuhuna ni Diyona hige i fanuha, be ya famala ena manabala.
2 Yo fede, ya lauꞌuꞌula, iyen,
Guyau, doha haꞌa E falibam, fuyana hola hige egu nuꞌu ya lau afulen mate, bena doha ite wa ginauli?
Logena be E gela E lau Sipani!
E siba mate, um tauꞌulu yo nuwatohatoha Yaubadana. Fuya ouꞌouli wa nuwa talu, wa tauꞌulu, ma nuwa ofi fahim, yo fuya ouꞌouli hinaga nuwam wa bui, be ibege heyaheyaya u ginaulidi.
3 Guyau, aho te, E falibam ibe wa lau funuhigu mate, ya loholoho!
4 Yaubada wa, Diyona alinana ya bui, iyen,
Em dudulai somo be wa manabala?
5 Diyona ya finahe hasa duhu balabalamumuna ganamulina yai ya taꞌai.
Mulina yai ena gwaꞌu ya pei, be ya anlogulogu. Habahim ya bagibagi haba somo Ninewa ai lisidi ya tubu bena ya ita.
6 Habahim, Yaubada ya liba be mahina hudoꞌi ya in hasa, be Diyona ya faꞌanlogulogu, haba kamnana ya loholoho. Diyona nuwana ya amna wananaha mahina lisina yai.
7 Bobonna ya ifi tatatali, Yaubada ena nuwatuhu yai, mwatamwata mahina wa ya faheyaya, yo fede, ya peꞌi.
8 Maihala haꞌa ya kepama, Yaubada bolibolima gigibwalina ya fatowa, yo maihala gigibwalina Diyona kuluna ya sinai, be egoba ya tau peꞌipeꞌi, na iyen,
Ibe E peꞌi mate, ya loholoho.
9 Yo fede, Yaubada ya libalau lisina, iyen,
Em dudulai somo be mahina te wa luluwen?
Alinana Diyona ya bui, iyen,
Maꞌegu dudulai be E manabala. Manabalana ni, ibe ya kamfunuhigu!
10 Yaubada ya libalau lisina, iyen,
Mahina ni maihona esega ganahewana yai ya in, na bobonna ya peꞌi. Um hige somo u ginauli lisina yai, yo hige u faꞌin.
11 Egu nuwatohatoha laꞌina haba doha somo, Ninewa duhu balabalamumuna ni ai lisidi? In moho ganahewana yai mate, dodoga loholohodi 120,000 ya diꞌoi, yo edi yosiyosi hinaga oulina doha.