6
1 In moho, Diyeliko edaꞌeda sa gududi, be tabu Isalaela dodogadi ti luhulau e ti kalamahanoma, paꞌana iti adi waiyunu.
2 Guyau ya libalau Diyesuwa lisina, iyen,
Nuꞌu te haꞌa E nuwa afulen nimam yai, be edi baꞌisa laꞌilaꞌi yo ena hiyala tataudi haꞌa E lei hafihafitidi. 3 Lahai faligigi esega ganahewadi yai, Um yo em hiyala tataudi au lau nuꞌu ni au fataꞌiꞌili, be lahai esega, haba ma esega ami fataꞌiꞌili. 4 Tau antalasam faligigi luwaga edi bwagigi ti abidi,* Edi bwagigi mate, sipi donadi yai sa ginaginaulidi. be ti bwaꞌi. Na Laugagayo Aba Husaꞌina, mate ai mulidi.
In moho, lahai fafaligigi luwagana yai, fuyana bwagigi sa yufi, mahudoꞌimiu ami lau, ami taꞌiꞌili ma faligigi luwaga. 5 Haba sa yufi fawewehi, ma esega, tatau sa halahalabo, na Diyeliko ganana haba ya talopalopa. Habahim, mahudoꞌimiu ami dudulai, ami luhulau duhu balabalamumu yai.
6-7 Diyesuwa ya libalau tau antalasam lisidi, iyen,
“Tatau au falibadi, bena sa fatubu, be duhu balabalamumu sa fataꞌiꞌili.
Tau hiyala pele hesa sa bwaꞌi,
mulina yai bwagigi tau abina faligigi luwaga,
habahim, laugagayo tau baheina.”
8-9 Diyesuwa somo ya falibadi, doha sa ginaulidi:
Habahim, tau hiyala pele hesa sa bwaꞌi;
mulina yai, tau antalasam bwagigi sa yufi;
atipu yai, tau antalasam, iti laugagayo tau baheina,
mulidi yai, hiyala pele hesa.
Ma esega, bwagigi sa yufidi, dagugudi.
10 Na Diyesuwa tatau ya fatalahadi, iyen,
Tabu au halabo, yo tabu liba hesa au libaen, ya lau wee–, ana siga E falibamiu.
11 Habahim, tatau mahudoꞌidi ya falibadi, be Yaubada ena Laugagayo Aba Husaꞌina sa iloloi, be duhu balabalamumu sa fataꞌiꞌili ma esega, habahim, sa fiyoma edi aba miya yai; amainiya sa eno.
12-13 Bobon ma hwalahwalalana, Diyesuwa ya obiyo. Itete haba lahai fafaluwagana, tau antalasam yo hiyala tataudi duhu balabalamumu wa sa fataꞌiꞌili bodai gonogonowana doha bon:
Bwaꞌibwaꞌidi tau hiyala pele hesa;
mulina yai, tau antalasam faligigi luwaga, bwagigi tau yufidi;
atipu yai, Laugagayo tau baheina;
mulidi yai, hiyala pele hesa.
Itete, fafaluwagana, bwagigi sa yufidi, alinadi.
14 Lahaina yai, duhu balabalamumu sa fataꞌiꞌili bodai ma esega moho, be sa fuyoma edi aba miya. Doha ite sa ginaginauli, ya lau wee–, lahai faligigi esega.
15 Ya ifi tatatali, lahai fafaligigi luwagana yai, sa obiyo, be nuꞌu ni sa fataꞌiꞌili ma faligigi luwaga doha fuya bwaꞌibwaꞌina yai.
16 Fafaligigi luwagana yai sa taꞌiꞌili, tau antalasam begana haba bwagigi sa fadagugu, na Diyesuwa tatau mahudoꞌidi ya falibadi be sa halabo, yo iye,
Nuꞌu te Yaubada haꞌa ya feleda!
Duhu balabalamumu yo ginauli mahudoꞌidi ganahewana yai bena ami faheyaya esegahidi; ya famala eda antalasam Yaubada eda Guyau, enahena. 17 Na waihin matamata heyayana, Lahaba moho, ma afa efana, tabu ti faheyayadi, paꞌana in eda tau ita sipo ya simodi. 18 Tabu bena ginauli fafagabidi hesa au abidi. Yena ami ginauli doha, mate haba heyaheyaya ami leyama Isalaela ganahewada yai. (Diyesuwa 7:1)
19 Ginauli mahudoꞌidi mate, powati afaꞌafa doha: siluba, gole, kapa, yo ayan, mate te tole hudoꞌi, Yaubada enehena. Ya famala Guyau ena ainauya.
20 Yo fede, ma esega tau antalasam bwagigi sa yufidi sa atahiyedi. Habahim sa halabo laꞌilaꞌi. Yo fede, ganana ya talopalopa!† Diyeliko ganana wa ya laꞌi wananaha, yo hewana ya lofa. Umeꞌehu laꞌilaꞌidi sa katakatandi be sa ginaginauli. Tau hiyala mahudoꞌidi sa dudulai hasa duhu balabalamumu ganahewana yai be sa eli halaen. 21 Kepata yai duhu balabalamumu dodogadi: tatau lalaꞌi, wawahin lalaꞌi, yo wawaya kikiꞌina mahudoꞌidi sa lau funuhidi, yo bulumakau, sipi, yo donki mahudoꞌidi hinaga sa lau funuhidi.
22 Diyesuwa tau ita sipo luwaga wa ya faliba, iyen,
Au luhulau Lahaba ena luma, be ma afa efana au ledima, doha ami liba fasunumaꞌen.
23 Yo fede, hewahewali sa lau, be waihin matamata heyayana sa foyahiyama, ma tinana yo tamana, afa lofuna, yo ana boga mahudoꞌidi, be sa famiya komakomanidi edi tefa yai.
24 Duhu laꞌi sa gabu golu, habahim edi ginauli mahudoꞌidi sa gabu esegahidi. Na powapowati moho sa lau afuledi, Yaubada enehena: siluba, gole, kapa, yo ayan. 25 In moho, Diyesuwa Lahaba ya tole komakomani, ma afa efana, tabu ti talaidi, paꞌana luwaga wa haꞌa ya simodi, fuyanina yai ya fatamali lawedi Diyeliko yai. Fuyanna yai, Lahaba ena hiti mulita hola sa miyamiya Isalaela yai.
26 Lahaina yai, Diyesuwa ya angwala, iyen,
Yena sai ya anpate bena Diyeliko nuꞌuna te ya ginauli fuyoi,
mate haba Yaubada ya kaumananaen.
Sai laꞌi Yena gana paꞌana ya ginauli bodai, ena maisa mate haba natuna bwaꞌibwaꞌina ya peꞌi.
Sai laꞌi yena gana edaꞌedana ya ginauli bodai, haba natuna mulimulitana ya peꞌi. (1 Kin 16:34)
27 Yaubada mate Diyesuwa maꞌena. Wasana ya tadada, be nuꞌu dodogadi mahudoꞌidi sa sibai.