2
Yesu, Doga Ahena Peꞌipeꞌina ya Faloholoho
Maleko 2:1-12
(Matiu 9:1-8; Luka 5:17-26)
1 Lahai fisa sa ofi mulidi yai, Yesu ya fuyo Kapanayum na wasana sa atahiyen mate In ya mahano fuyoma luma. 2 Yo fede dodoga boludi sa faꞌoigogoma be luma sa lau fafamohafu. Hige solasola laꞌi edaꞌeda hafohafona yai. Yesu mate Yaubada ena liba ya fafalibadi. 3 Yo fede tatau fati taumoho ahe peꞌipeꞌina sa baheiyama Yesu lisina. 4 Hige gonowadi bena ti lawen lisina paꞌana dodoga sa ouli wananaha. Yo fede luma hewana yai solasola sa ginauli be doga wa sa fadalolo Yesu ena aba obiꞌobiyo yai.
5 Edi sunuma laꞌina ya ita yo fede Yesu doga ahena sa peꞌipeꞌi ya faliba iyebom,
Natugu, em heyaheyaya haꞌa E liba afuledi.
6 Laugagayo tau lau faꞌataena haisa amainiya sa taꞌataꞌai nuwadi yai itebom,
7 Sidohana be ya liba doha? Ataꞌatahina doha Yaubada hesana i kaiwegowegogoꞌen! Yaubada iyabona gonowana heyaheyaya ya liba-afuledi!
8 Edi nuwanuwatuhu Yesu haꞌa ya sibai yo fede ya libalau lisidi,
Paꞌana somo be ami nuwanuwatuhu doha ite? 9 Somo ya malaha? Ibe tawa, “Taumoho tauna sa peꞌipeꞌi, em heyaheyaya E nuwatuhu afuledi,” e haba tawa, “U obiyo! Em aba eno u abi na u aulaha.”
10 Bena ami sibai mate Doga Natuna ena gigibwali tanoꞌubu yai te gonowana heyaya ya liba afuledi. 11 Logena tau asiyebo E faliba yawa, “U obiyo! Em aba eno u abi na u lau em luma.”
12 Matadi yai ya obiyo be ena aba eno ya abi na ya aulaha. Ouꞌoulidi sa noꞌo na Yaubada sa fadebasae tiyen,
Hige somo laꞌi ai ita doha ite!
Yesu, Takesi Tau Tanotano Hesana Lewi ya Yogai
Maleko 2:13-17
(Matiu 9:9-13; Luka 5:27-32)
13 Yesu ya fuyo Galili Gabogabona sadaina yai na baiwa laꞌilaꞌi sa laoma lisina be ya lau faꞌataidi. 14 Ya laulau na takesi tau tanotano Lewi, in Alefaiyesi Natuna, ena ofesi yai ya taꞌataꞌai ya ita.* Lewi hesana hesa mate Matiu. Yesu ya libalau lebena iyen,
U famuli watanigu.
Yo fede Lewi ya aulaha be Yesu ya famuli watan.
15 Dodoga boludi Yesu sa famuli watan. In hola Lewi ena luma yai na takesi tau tanotano yo dodoga heyaheyayadi maidadi Yesu yo tau famuli watanina sa kalahe gogo. 16 Laugagayo tau lau faꞌataenna yo Falesiya† Falesiya - au italau Liba Aba Yoꞌoi yai. Yesu sa ita ya kalakalahe maidana takesi tau tanotano yo dodoga heyaheyayadi. Yo fede sa fatiꞌo lau ana hewahewali lisidi, tiyen,
Paꞌana somo be maidana takesi tau tanotano yo tau heyaya sa kalahe?‡ Diusi edi kawawananaha mate iti bena haga sa loholoho wananaha be hige gonowana maidadi dodoga heyaheyayadi ti kalahe esega; doꞌata sa faꞌawadi. (Au italau Paisowa 10:28 yo Namba (Sensisi) 19:22 hinaga.)
17 Edi fatiꞌo Yesu ya atahiyen yo fede iyebom,
Yau hige ya laoma dodoga dudulaidi adi halulu. Tau heyaya debadi yai E laoma. Tau asiꞌasiyebo doketa sa fanuha. Tau asiꞌasiyebo gesa doketa hige ti fanuha.
Andabu Fatiꞌona
Maleko 2:18-22
(Matiu 9:14-17; Luka 5:33-39)
18 Diyon Babasito ana hewahewali yo Falesiya sa andabu na Yesu ana hewahewali higeꞌe. Yo fede dodoga haisa sa lau Yesu lisina be sa fatiꞌoi, iyen,
Paꞌana somo Diyon Babasito ana hewahewali yo Falesiya adi hewahewali sa andabu? Na um em hige.
19 Yesu alinadi ya bui iyebom,
Ami sibai bena taumana ibege ti kalahe fafanahi ganahewana yai? Hige gonowana! Tau nahi fwaufwau maꞌedi ibege ti ginauli doha. 20 In moho ana lahai ya laolaoma haba tau nahi ni sa lawe-hudoꞌiyen. Lahaina yai ni haba afa haidana sa andabu.
21 Hige hola sai laꞌi kaleko senana fwaufwau i abi be luhuluhu beyabeyana i lau polaꞌen. Paꞌana lau pola fwaufwauna haba ya tanoꞌunoꞌu be kaleko beyabeyana ya eli gigi falaꞌi.
22 Hige hola sai wain fwaufwauna i fagoi lawen ile beyabeyana yai. Paꞌana ile beyabeyana haba ya tamogigi. In moho yena wain fwaufwau ai ile fwaufwau wa fagoi, haba wain yo ile ibege ti heyaya.§ Diusi edi ile mate suisui ꞌwapidi yai sa ginaulidi.
Sabati Fatiꞌona
Maleko 2:23-28
(Matiu 12:1-8; Luka 6:1-5)
23 Sabati yai Yesu ya lau witi gabuna yai. Tau famuli watanina sa lau watan be witi anꞌandi sa fufudi. 24 Yo fede Falesiya dodogadi sa libalau Yesu lisina tiyen,
Am hewahewali hola u itadi! Eda Sabati laugagayona sa utusi. (Auꞌaulaha 34:21)
25 Yesu iyen,
Fuyana Deiwidi maꞌana hewahewali sa guliyam, somo sa ginauli? Bukana nuwana hige au fatili? (1 Samuwela 21:1-6) 26 Tau Antalasam Baꞌisana Abiyata ena fuya yai, Deiwidi ya lau Yaubada ena Luma yai be fwalawa fafatabuna ana ya an. Eda laugagayo ya libaen mate tau antalasam moho ibodi bena adi sa an. In moho Deiwidi ana hewahewali adi ya feledi sa an.
27 Habahim, Yesu ena liba ya falafusofa iyen,
Yaubada Sabati ya ginauli dodoga debadi yai. Hige dodoga i ginaulidi Sabati debana yai. (Auꞌaulaha 20:8-11: Auꞌaulaha 23:12; Kolosi 2:16)
28 Logena Doga Natuna mate Sabati Guyauna.
*2:14 Lewi hesana hesa mate Matiu.
†2:16 Falesiya - au italau Liba Aba Yoꞌoi yai.
‡2:16 Diusi edi kawawananaha mate iti bena haga sa loholoho wananaha be hige gonowana maidadi dodoga heyaheyayadi ti kalahe esega; doꞌata sa faꞌawadi. (Au italau Paisowa 10:28 yo Namba (Sensisi) 19:22 hinaga.)
§2:22 Diusi edi ile mate suisui ꞌwapidi yai sa ginaulidi.