3
Taumoho Nima Dagedagelona
Maleko 3:1-6
(Matiu 12:9-14; Luka 6:6-11)
1 Fuya hesa Yesu ya fuyo aba oiꞌoigogo lumana ganahewana yai. Amainiya taumoho hesa nima dagedagelona. 2 Dodoga amainiya edi fanuha bena Yesu sa au. Yo fede sa maisimo komakomaniꞌi haba ai Sabati taumoho nima dagedagelona ni ya faloholoho e higeꞌe?
3 Yesu ya libalau doga wa lisina iyen,
Ai matamai, u mwaito.
4 Habahim ya fatiꞌo lau dodoga lisidi, iyen,
Ai Sabati haba loholoho te ginauli e heyaya te ginauli? Bena doga te famwahuli e te wunui?
Hige sai laꞌi alinana i bui.
5 Yesu ya itaꞌita lau lisidi ma manabalana yo nuwana ya heyaya paꞌana sa nuwa poꞌi. Habahim taumoho nima dagedagelona ya faliba iyen,
Nimam u lolon.
Ya lolon yo fede ya loholoho fuyo. 6 Yo fede feula aba oigogo lumana Falesiya sa lau afulen be sa faꞌoigogo maidadi Heloda ena pele na sa oiliba bena Yesu sa wunui.
Baiwa Yesu sa Famuli Watan
Maleko 3:7-12
7-8 Yesu yo tau famuli watanna sa lau Galili Gabogabona na baiwa sa lau watanidi. Somo ouꞌouli ya ginaulidi wasadi sa atahiyedi. Yo fede Diudeya yo Idumeya Nuꞌudi yo Diyodan Tefa Saisaina, Yelusalem, Taya yo Saidon taondi yo nuꞌu hahaisa sadasadai yai, ana baiwa sa tuhuyama. 9-10 Baiwa ya laꞌi wananaha. Yo fede Yesu tau famuli watanna ya falibadi bena ena waga sa abi nonohai paꞌana tabu ena paisowa ti eli dogodogoi. Dodoga boludi haꞌa ya faloholohodi, debana yai safalumadi sa asiyebo mate sa andudu balabala be sa eliꞌona. 11 Yo hinaga yaluwa heyaheyayadi dodoga ganahewadi yai Yesu sa ita mate sa guli nuwanuwana yai na sa ꞌwalaꞌui tiyen,
Um mate Yaubada Natuna!
12 Yesu yaluwa heyaheyayadi ya falibadi iyen,
Tabu au libalibaegu.
Yesu, Tau Faꞌona Wasawasa 12 ya Fasinabodi
Maleko 3:13-19
(Matiu 10:1-4; Luka 6:12-16)
13 Yesu ya lau tuꞌa, na ena fanufanuha dodogadi ya yogaidi be sa laoma lisina. 14 Safuhudohudoꞌi luwaga ya siꞌoꞌinadi be iti sa famala tau faꞌona wasawasa be in maꞌedi na ya duidi be sa guguya. 15 Yo dudulai ya feledi be yaluwa heyaheyayadi sa liba duidi.
16 Safuhudohudoꞌi luwaga ya siꞌoꞌinadi mate hesadi itete:
Saimon (Hesana hesa Yesu ya tole, Pita.)*Pitaaniyona mate: “umeꞌehu.”
17 Diyemsi yo Diyon iti Sebedi nanatuna luwaga. (Yesu hesadi ya toledi: Bowanegesi. Aniyona mate Palele Nanatuna.)
18 Endulu,
Pilipi,
Batolomiu,
Matiu,
Tomasi,
Diyemsi, in Alefaiyesi natuna,
Tadiyesi,
Saimon Seloti,†Seloti aniyona mate, in ena nuꞌu ya fanuha wananahai.
19 yo Diudasi Isakaliyoti, in Yesu ana tau wewe.
Yesu yo Belesebulu
Maleko 3:20-30
(Matiu 12:22-32; Luka 11:14-23; 12:10)
20 Habahim Yesu ya luhulau luma hesa yai, na baiwa sa faꞌoigogo fuyo be In yo tau famuli watanina hige gonowana ti kalahe. 21 Dodoga sa kawa bwadebwadeꞌen be afa efana wasana sa atahiyen, yo fede sa lau bena sa aulen.
22 Laugagayo tau lau faꞌataenna Yelusalem yai sa laoma tiyen,
Yaluwa heyaheyayadi edi baꞌisa, Belesebulu, mate ganahewana yai!‡Belesebulu mate, yaluwa heyaheyayadi edi baꞌisa. Hesana haisa mate Satani yo Diyabolo. Logena gigibwali ya felen be yaluwa heyaheyayadi ya liba duidi.
23 Yo fede Yesu ya yogaidima lisina be heyaheyason yai ya falibadi iyebom,
Satani haba sidohana falena satani ya liba dui?
24-25 Yena nuꞌu esega dodogadi sa lulu fuyoꞌidi haba sa failaulauꞌidi yo boga esega yai doha haba hinaga sa failaulauꞌidi. 26 Yena Satani ena nuꞌu ya daili fakiukiu mate ibege i adidili. Haba ya failaulaui. 27 Hige gonowana sai hesa, doga adiꞌadidilina ena luma i lopa be ena ginauli i angafuhidi. Bena ya auꞌaui bwaꞌiyen, habahim ya angafu.
28 E liba dudulai mate sai heyaya ya ginauli yo sai Yaubada hesana ya liba faheyaya mate edi heyaheyaya ni Yaubada haba ya nuwa afuledi. 29 Na yena sai Yaluwa Tabuna ya liba faheyaya mate hige gonowana heyaheyaya ni i nuwa afulen paꞌana heyaya otaꞌotafahina ya ginauli.
30 (Yesu ya liba doha ite paꞌana dodoga haisa sa libaliba tiyen, “In mate yaluwa heyaheyayana ganahewana yai.”)
Yesu Tinana yo Tatasina
Maleko 3:31-35
(Matiu 12:46-50; Luka 8:19-21)
31 Habahim Yesu tinana yo tatasina sa mahanoma be luma ganamulina yai sa obiꞌobiyo. Wasa sa fatamali lawen ganahewa mate In sa laulau yoꞌoi.
32 Baiwa sa taꞌai fataꞌiꞌili na sa faliba tiyen,
Tinam, tatasim yo lolofum sa laulau yoꞌoim. Iti mate ganamuli yai.
33 Yesu alinadi ya bui iyen,
Tinagu sai yo tatasigu salumadi?
34 Habahim, ya itaꞌita lau lisidi na iyen,
Tinagu yo afa haidagu logedidi itete! 35 Yena sai Yaubada ena nuwatuhu ya lau watan mate hidagu, lofugu yo tinagu.