21
Kapa yai, Mose Weso ya Ginauli
Namba 21:4-9
4 Habahim Isalaela dodogadi Holai Tuꞌana sa lau afulen, na Idom sa gebaen, be Gabogabo Balebalelemna Edaꞌedana sa lau watan. Edaꞌeda yai sa laulau ee–, sa tau siꞌololo.* Beyabeyana Iyakobo godena Esau mate, Idom tanohina ya abi, enehena. 5 Sa fatalapili Yaubada yo Mose lisidi yai tiyen,
Idipi yai ami abimai be haba ai nuꞌu pitapitalina te ꞌe peꞌi! Amaiteꞌi hige kalahe yo hoꞌowa! Kalahe heyaheyayana te hige ai fanuha.† Kalahena sa kawa heyaheyayaꞌen mate mena.
6 Habahim, Guyau weso anꞌanlewadi ya fatamali lawedi ganahewadi yai be dodoga sa annalinidi be boludi sa peꞌi.
7 Habahim dodoga sa laoma Mose lisina na tiyen,
Heyaheyaya ꞌe ginauli. ꞌE fatalapili Guyau lisina yai yo um lisim yai. Guyau ai lisina ema u anꞌeta be weso te i abifahidi.
Yo fede Mose dodoga enehedi ya lauꞌuꞌula.
8 Guyau Mose ya faliba iyen,
Weso, ai kapa u ginauli be ai duhu duduna u oi fapatu lawen be u bono. Na yena sai laꞌi weso ya nali gonowana ya itaꞌita hasa weso kapa yai ni ya ita, haba ya loholoho. (Diyon 3:14-16)
9 Yo fede Yaubada somo ya libaen mate Mose ya lau watan be weso ya ginauli kapa yai.
Logena, safalumadi weso sa annalinidi na weso kapa yai ni sa ita, mate sa loholoho.
Isalaela Dodogadi sa Lau Mowabi Nuꞌuna.
Namba 21:10-13
10 Isalaela sa aulaha boda be Oboto nuꞌuna yai palai sa pei hitinidi. 11 Habahim, Oboto yai sa aulaha boda, be palai sa pei hitinidi nuꞌu pitapitalina yai, Iye-Abalim nuꞌuna yai, Mowabi tefa saisaina yai. 12 Amainiya sa lau Seledi Gonna yai palai sa pei hitinidi. 13 Muliyai, sa aulaha boda sa lau Alanon Hoꞌowana tefana, nuꞌu pitapitalina yai. Amoli dodogadi adi sigasiga sadaina yai palai sa pei hitinidi.
Kin Sihon yo Kin Oga sa Lei hafihafitidi
Namba 21:21-25, 31-35
21 Isalaela dodogadi wasa tau lawendi sa fatamali lawedi Amoli edi Kin hesana Sihon lisina, na tiyen,
22 U laliyemai be em tanohi yai ai bayawa. Ibege ai lau em wain gabudi yai yo em gabu hahaisa yai yo ibege am hoꞌowa ai puludi ai nom. Kin ena Edaꞌeda moho haba ꞌe lau watan ee–, em nuꞌu ꞌe famuli.‡ Beyabeyana Kin ena Edaꞌeda mate edaꞌeda loholohona wananahana, na edi nuꞌu ya bayawai.
23 In moho, Kin Sihon hige i fanuha bena ena ai tanohi ti lau. Be ena dodoga ya faꞌoi esegahidi na sa lau Dahasa taonna, nuꞌuna pitapitalina yai, Isalaela sa hiyalaidi. 24 In moho, Isalaela, Kin Sihon maꞌena dodoga mahudoꞌidi sa lei hafihafitidi be boludi sa peꞌi, na ena tanohi sa abi. Alanon Hoꞌowana yai ya lidi ee–, Daboki Hoꞌowana, Amon dodogadi adi sigasiga yai, paꞌana Amon dodogadi edi tanohi sigasigana sa gana buluhi komakomaniꞌi be Isalaela hige gonowana ti lau niya.
25 Amoli edi taon Hesibon yo nuꞌu hahaisa sa miya fataꞌiꞌili mate Isalaela sa abidi be sa gogoidi.
31 Logena Isalaela, Amoli edi tanohi yai sa miya.
32 Mose, tau ita sipo ya fatamalidi sa lau Dasa nuꞌuna mulina yai. Isalaela, Dasa taonna yo nuꞌu hahaisa sadaina yai sa lei hafihafitidi be Amoli dodogadi amainiya sa miyamiya sa lau weꞌaidi. 33 Habahim sa timuli bui, edaꞌeda ya lau Basan sa lau watan na Basan edi Kin, Oga, maꞌena ena tau hiyala mahudoꞌidi sa kalamahano be adi waiyunu sa tulufi lawedi Edelei nuꞌuna yai.
34 Guyau ya libalau Mose lisina iyen,
Tabu u ꞌwasabuwen! In yo ena dodoga mahudoꞌidi yo ena tanohi, E tole afuledi lisim yai: Amoli ena Kin, Sihon, Hesibon nuꞌuna ya ita watan na somo haꞌa ami ginauli lisina yai mate, laulauna gonogonowana au ginauli Kin Oga ai lisina hinaga. (Namba 21:25)
35 Yo fede, Isalaela dodogadi, Kin Oga yo nanatuna tatau yo ena nuꞌu dodogadi mahudoꞌidi sa wunuidi. Hige sai laꞌi i mwahumwahuli. Habahim, tanohi wa sa abi, aiꞌedi.