27
Deiwidi ana Wana ya Uli
1 Guyau mate egu mala yo tau fafamwahuli.
In egu mwahuli tau faꞌadidilina
be sai haba E ꞌwasabuwen?
2 Yena agu waiyunu, heyaya dodogadi sa duhu mahanoꞌigu
bena sa faheyayagu,
iti moho haba sa faꞌalu betibeti be sa beꞌu.
3 Ibe sa fataꞌiꞌiligu;
ibege ya ꞌwasabu.
Yo yena agu halulu sa laoma,
haba nuwagu ya adidili.
4 Guyau lisina yai ginauli esega E anꞌetai
yo E fanuha wananahai mate,
bena Guyau, ena luma yai E miya,
fuya ouꞌouli, egu mwahuli ganahewana yai
be nenena loholohona E itaꞌitai
yo E laulauꞌuꞌula lau lisina ena Dubu Tabuna yai.
5 Yena pilipili E fahoina
haba ya bobodiyegu.
Haba ena palai fafatabuna yai ya simogu,
yo umeꞌehu hewa wananahana yai haba ya tolegu.
6 Habahim, E tamahiti,
be agu waiyunu sa fataꞌiꞌiligu E tiꞌe tawaidi be ibege ti lei hafihafitigu.
Em luma fatabuna yai haba egu antalasam E ginauli ma wowogu;
Haba E wana yo dagugu loholohona E ginauli be Guyau E fadebasae.
7 Aee–, Guyau, u nuwatohatohaegu,
yena E yoga laꞌilaꞌi alinagu u atahi be u bui.
8 Wa liba uwen, “U laoma u fadebasaegu!”
Logena e laoma.
9 Yau em tau lau fayofayo! Tabu u manabalaꞌegu
be u taꞌai mulimuliyegu.
Um tau sagusaguhigu,
Yaubada, um tau famwahuligu;
tabu u nuwa afulegu.
10 Ibe tamagu yo tinagu sa lau afulegu.
Guyau haba ya abi komakomanigu.
11 Aee–, Guyau! Agu waiyunu debadi yai em miyamiya, u faꞌatagu,
be laulau dudulaidi, ya miyamiyaꞌedi.
12 Agu waiyunu liba bwalabwaladi sa libaedi,
sa fanuha bena sa faheyayagu
be tabu u fele afulegu lebedi yai.
13 E sunumaꞌen mate Guyau ena loholoho haba E ita,
hola ma mwahuligu.
14 Be Guyau u sunumaꞌen yo nuwam i adidili.