34
Yaubada Tau Sunumaena ya Saguhidi
Fuya hesa Abimeleki matana yai Deiwidi doha yauyaule be ya fatamali ya lau. Muli yai, Yaubada sidohana Deiwidi ena sagusaguhina lahaina yai, mate lilina Deiwidi ya uli.
1 Fuya ouꞌouli haba Guyau E fafadebasae,
fadebasaena sopagu yai ibege ya fatautau.
2 Guyau haba E toletole hitin,
safalumadi sa abi faheyayadi, ti ataꞌatahi be ti kwade.
3 Mahudoꞌida Guyau te fadebasae,
yo hesana te lau hitin gogo.
4 E lauꞌuꞌula lau Guyau lisina be ya atahi;
yo egu ꞌwasabu mahudoꞌidi yai ya fasagu fahigu.
5 Salumadi Guyau sa sunumaꞌen bena ya saguhidi,
mate nuwadi ti kwade,
paꞌana fuya ouꞌouli haba ya sagusaguhidi.
6 Tau gogo gesagesa te, sa lauꞌuꞌula lau Guyau lisina,
be Guyau ya atahi,
edi pilipili mahudoꞌidi yai, ya fasagu fahidi.
7 Salumadi Guyau sa fafadebasae mate
Yaubada ena anelu ya bobodiyedi yo
heyaya yai ya fafasagufahidi.
8 Haga au lau dadai, haba ami ita lobahi, Guyau ya loholoho,
Tau sunusunumaꞌenna haba nuwadi sa amna.
9 Umi ena dodoga fafatabudi, Guyau au faꞌatitiyen
paꞌana salumadi sa fafaꞌatitiyen ibege ti kuꞌu.
10 Laiyon gonowana adi anꞌan ya ofi be haba sa guliyam,
na salumadi Guyau sa sunusunumaꞌen mate,
ibege ginauli loholohodi hesa lisina yai ti kuꞌu.
11 Nanatugu, au laoma be au ataꞌatahi;
Guyau fafaꞌatitina haba E fatalahamiu.
12 Sai ya fanuha ya miya lofalofa,
yo loholoho ya fahoina,
13 lelona yo sopana bena ya komanidi,
tabu i fapaisowa faheyayadi
yo tabu i laulau bwalabwala.
14 Heyaheyaya yai bena wa nuwabui,
yo bena wa anpate adidili,
be miyamiya daudaumwalina wa miyamiyaꞌedi.
15 Guyau tau laulau dudulai ya bobodiyedi,
na yena edi tan ya atahiyedi haba ya fasagufahidi;
16 na nenena ya fasana hudoꞌiyen, tau heyaya lisidi yai;
yo sa peꞌi, haba ya nuwa fuiyedi.
17 Guyau, tau laulau dudulai edi tan ya atahi.
Haba ya saguhidi,
edi pilipili mahudoꞌidi yai haba ya fasagu fahidi.
18 Guyau mate fadidi yai,
salumadi sa nuwa belubelu ya fasagu fahidi.
19 Tau laulau dudulai, pilipili boludi ya fahoinadi,
in moho Guyau ya fasagufahi pilipili lisidi yai.
20 Guyau ya ita watan komakomaniꞌi
be hige siyadana laꞌi i tapwai.
21 Heyaya tau ginaulina haba ya faheyaya fuyoi.
Na tau laulau dudulai adi waiyunu haba sa fakamkamnadi.
22 Guyau haba ena tau lau fayofayo ya sagu fahidi;
yo salumadi sa sunumaꞌen bena In tau saguhidi,
ibege heyaya ti fahoina.