51
Liba Famahata: Samsi 51 Fuya hesa Kin Deiwidi maꞌena taumoho hudoꞌi hesana Ulaiya lahuna sa luma gwaꞌu. Waihinna hesana mate Betesiba. Yaubada ena peloweta hesa hesana Neitan, Deiwidi ya sagasagaliyen. Deiwidi nuwana ya heyaya paꞌana laulau heyayana ya ginauli be ena lauꞌuꞌula Yaubada lisina yai ya uli.
Nuwatuhu Afule Lauꞌuꞌulana
Deiwidi ana wana. Fuyanna maꞌena Betesiba heyaya sa ginauli mate Peloweta Neitan ya lau lisina. (2 Samuwela 11 yo 12)
1 Aee–, Guyau, em fanufanuha ya ota esegahi,
be u nuwa tohatohaꞌegu. Um tau fanuwatohatoha,
be egu heyaya u nuwatuhu afuledi,
2 Egu heyaya mahudoꞌidi u kaisu afuledi.
3 Egu heyaya E sibaidi
na fuya ouꞌouli E nuwanuwatuhuidi.
4 Um moho lisim yai heyaheyaya E ginauli,
laulau heyayana matam yai E ginauli;
be fuyanna wa falibagu uwen, “Heyaya wa ginauli!”
Mate, wa liba dudulai.
5 Hola tinagu bogana yai ya lau ee–,
ena fuya yosigu yai mate haꞌa E heyaya.
6 Um wa fanuha wananaha bena ma nuwa ofi fahigu
E laowa lisim,
tabu ya nuwa luwaluwaga;
sibasiba um wa fatalahagu.
7 Egu heyaheyaya u nuwa afuledi.
Na u kaisugu, haba E aꞌa.
8 Nuwagu wa fakamkamna
yo yaluwagu wa lau lidiyen,
in moho E atahi egu heyaheyaya wa nuwatuhu afuledi
be nuwagu ya amna wananaha yo E kwade.
9 Tabu egu heyaya u itaꞌita lau lisidi,
na mahudoꞌina u nuwatuhu afuledi.
10 Aee–, Yaubada, nuwagu
yo yaluwagu mahudoꞌina u fafwaufwau fuyoi.
11 Tabu u tole hudoꞌiyegu,
e Yaluwam Tabuna lisigu yai u lawe hudoꞌiyen.
12 U saguhigu be em liba, nuwa amnana i abigu.
Doha egu fuya nuwabui bwaꞌibwaꞌina yai.
Nuwagu u faloholoho fuyoi.
13 Habahim em laulau tau heyaya E faꞌatadi
be haba sa timuli bui lisim.
14 Aee–, Yaubada, lau pono yai u fofofahigu,
yo u bobodiyegu na em laulau dudulai
debadi yai haba E wana.
15 Aee–, Guyau, u saguhigu be ya libaliba
na haba E fadebasaem.
16 Suisui antalasamedi, yo antalasam gabugabudi hinaga
hige nuwam ti amnaedi.
17 Aee–, Yaubada, nuwagu ya tamo golugolu
mate egu antalasamna logena;
Yaubada um nuwa lidilidi yo nuwa talu wa fanuha.