1 Galali tange mendapuame Gote kundi maiyoo kateaminopa, Pailatame dokaita pyao kumasina leana lao, gii dokopa akali kateami dupanya mendapuame Jisasa lamaiyami. 2 Dokopa Jisasame dokaita lamaiyoo, “Galali tange pyapae kumiamino dutupanya koo piamino dupame Galali tange waka dupanya koo piamino dupa ita miniamosa, kenda doko dokaita-kisa epeana lao masilyamipi? 3 Daa, dopa napiana, nyakama mona kapilyala naeyatamino doko, endakali dokaita kumao alu piaminoli pyoo, nyakama apata alu pitamiakana lao nambame nyakama langilyo. 4 Yuu Siloame dokonya kandao isoo petenge anda ketae doko takyepala, endakali 18 pyambeamo dutupa kumiami. Endakali kumiamino dutupanya koo piamino dupame endakali yangi Jerusalema kateamino dupa pitakanya koo piamino dupa ita miniamosa pyambeana lao nyakamame masilyamipi? 5 Daa, dopa napiana, nyakama mona kapilyala naeyatamino doko, endakali dokaita kumao alu piaminoli pyoo, nyakama apata alu pitamiakana lao nambame nyakama langilyona” lea.

6 Dokopa Jisasame kongali mende lao pituu, “Akali mendeme baanya waene ee dokonya piki ita mende pokea dokonya dii lyilyape lao kanja peamopa, dii mende nalyia. 7 Dokopa baanya ee isakamaingi doko lamaiyoo, ‘Nambame piki ita dakenya dii lyao nyotoape lao ee kana tepo pitaka kanjangole pipupa, dii manja naelyamona, embame pokanya nepape. Yuu ipange dupa aipuma mee nyina kaeyambape?’ lea. 8 Dopa leamopa ee isakamaingi dokome yanu pyao, ‘Akali Andake, nambame ita tenge dokonya amapala ninu mandyoo setatoo, ee kana mendai dake katena kae. 9 Ee kana omonya dii nalyetamo doko, pokanya nepatena’ leana” lea.

10 Sambata gii mendenya, lotuu anda mendenya Jisasame mana lea. 11 Dokopa enda mende imambu koo mendeme ee kana 18 pitaka maita pongeamosa kapa pao etao tolapenge nanjiamopa petenge doko lotuu andaka dokonya petea. 12 Peteamo doko Jisasame kandatala epena lea. Ipateamopa baa lamaiyoo, “Enda, emba maita pongotae katenge doko tolasetekelyamona, emba mokao nyepae pilyinona” lea. 13 Dopa latala baanya kingi dolapo enda doko-kisa seteamopa, baanya maita doko tolalu pia. Dopa peteamopa enda dokome Gote kenge andake maiya. 14 Eks 20:9-10; Diut 5:13-14Jisasame Sambata dokonya enda doko auu pisilyamona latala, lotuu anda isingi doko imbu kaeya. Dopa petala endakali kambu doko lamaiyoo, “Yuu gii tokange dutupanya kalai pipenge. Yuu gii dutupanya yaina dupa mee jekena ipupape. Sambata gii dokonya daana” lea. 15 Dopa leamopa Kamongome baanya pii yanu pyakamaiyoo, “Nyakama mana tolatae miningi manemane pingima dupa pitakame Sambata gii dokonya nyakamanya kaowapi, dongipi mende nee nenge panda dokonya anjetae kalyamo doko tata latala, endaki nena lao laminao napengemape? 16 Enda dake Abraame wanenge mende, Sataneme ee kana 18 pitaka anjinya palyiamo doko Sambata gii dokonya mokao nanyepengepe?” lea. 17 Dopa leamopa, baanya yandapipi dupa elya kaeyami. Dopa piaminopa, Jisasame kalai tii pipae pia dupa endakali kambu pyao kateami dupa pitakame kandatala eteke piami.

18 Matyu 13:31-32; Make 4:30-32Dokopa Jisasame lao pituu, “Gotenya kingdom doko aipale? Nambame aki mendepa makande pyuu? 19 Gotenya kingdom doko, akali mendeme masete dii mende nyepala, baanya eenya lyandeamo dopale. Masete doko andao ita joo yale jiamopa, wangya dupanya yaka ketae paenge dupame anda piamina” lea.

20 Matyu 13:33Dopa latala baame deaka lao pituu, “Nambame Gotenya kingdom doko aki mendepa makande pyuu? 21 Gotenya kingdom doko, enda mendeme yisa mendalapo palao beke tepomanya pyasoo endaki minilyamopa, yisa dokome palao doko pitakanya taeyapala andasingi dopalena” lea.

22 Jisasa Jerusalema pao pituu, taonopi, yuu yakanepi dupanya endakali dupa mana lamaiyoo pea. 23 Peamopa endakali mendeme baa lamaiyoo, “Kamongo, endakali pyoo nyepae dupa kuki iki katatamipi?” lea. Dokopa Jisasame endakali dokaita lamaiyoo, 24 Matyu 7:13-14“Nambame nyakama langilyo: Endakali longome lome kaita tambukinatae dokonya kolandamana lao pitaminopa kapa kolandala naeyatamina, nyakamame lekeleke tao lome kaita tambukinatae dokonya kolandalapape. 25 Matyu 7:21-23Anda tange doko sakatatala kaita pai latatamopa, nyakama kamaka katapala, tee pyao anda kaita doko gata-gata lao, ‘Kamongo, Kamongo, naimanya anda kaita lumbakapoko’ latami. Dopa lataminopa baame nyakamanya pii yanu pyakao, ‘Nyakama anja tangepe lao nambame masala naelyona’ lata. 26 Dopa latamopa nyakamame lao pituu, ‘Naimanya kaitini yakane dupanya embame naima mana langiinopa, emba naima-pipa nee endakipi dupa nao kateamano dokona’ latami. 27 Sam 6:8Dopa lataminopa anda tange dokome lao pituu, ‘Nambame nyakama langilyo: Nyakama anja tangepe lao nambame masala naelyona, nyakama koo pingima dupa namba yakinatala pupa’ latana” lea. 28 Matyu 8:11-12Matyu 22:13; 25:30Dopa latala Jisasame lao pituu, “Nyakama watao pyata panda dokonya katao kandataminopa, Abraamepi, Aisakepi, Jekopepi, propeta dupa pitakapi, dupa Gotenya kingdom dokonya katatami kandatala, nyakama ee lao, nenge giti-gato lao nao katatami. 29 Gii dokopa endakali niki pyakaengesa tangepi, niki pambengesa tangepi, kingi tolaetena tangepi, kingi koeyatena tangepi, dupa ipupala Gotenya kingdom dokonya nee nao pititami. 30 Matyu 19:30; 20:16; Make 10:31Salapape! Endakali mendapu maita-kaita kalyamino dupa tanga enomba nyoo katatami. Endakali mendapu enomba nyoo kalyamino dupa tanga maita-kaita katatamina” lea.

31 Gii dokopaka Parasi mendapu ipupala Jisasa lamaiyoo, “Eroteme emba pyao kumasotoo lao masilyamona, yuu dake yakinatala puu” leami. 32 Dopa leaminopa baame dokaita lamaiyoo, “Nyakamame yana kapu doko lamaiyoo, ‘Indupa taitapa nambame imambu koo dupa watao pyao, yaina paleta dupa auu pisoo katapala, yuu gii tepo dokonya nambanya kalai doko pyoo etato lelyamona’ lamaiyepape. 33 Propeta mende yuu waka mendenya pyao kumasala naeyapenge, Jerusalemaka pyao kumasepengena, namba Jerusalema paanya indupapi, taitapi, dumapi dutupa kaita pupenge. 34 Matyu 23:37-39O Jerusalema, Jerusalema! Embanya endakali dupame propeta dupa pyao kumasoo, epena latae endakali dupa kaname pyao kumasoaka katengema. Nambame embanya wane dupa nyoo kambu pyatala, yaka matakaiyame ŋaŋa dupa papa pundipundi yapu nengeli pitoo lao, paa longosa masiopa, dupame tanga leami. 35 Sam 118:26Salapape! Nyakamanya anda doko kua kalyamo. ‘Akali mende Kamongonya kengenya epelyamo doko Goteme auu pisetaena’ lao nyakamame latami gii dokopa, nyakamame namba kandatamina lao nambame nyakama langilyona” lea.