1 Make 10:1-12Jisasame pii dutupa lao etapala, baa Galali yakinatala, Judia yuu dokonya endaki Jodane yangitena pea. 2 Dokopa endakali kambu andake mendapuame baa watao epeaminopa, baame dokaitanya yaina dupa mee jakamaiya.

3 Dopa piamopa Parasi dupa baa katea dokonya ipupala baa makande pyaanya tipa pyoo, “Akali mendeme baanya enda doko-kisa tenge mende setapala yakinatamo doko, loome daa latae singi doko yalatape?” leami. 4-5 Jen 1:27; 2:24; 5:2Dopa leaminopa baame dokaitanya pii yanu pyakamaiyoo, “Tee pia dokopa, endakali wasingi dokome enda akalipa lao wasia. Wasepala baame lao pituu, ‘Tenge dokonya, akalimi baanya endangi takangepa dolapo yakinatala, baanya etanenge dokopa tole pyao pititambinopa, dolapo yonge mendai jetana’ leana lao pepa pyapae silyamo doko nyakamame itaki napiamipi? 6 Enda akalipa lao pilyambi gii dokonya pituu dolapo lapo joo napetenya, yonge mendai joo petengemba. Goteme nyoo pyasetae doko endakali mendeme wakale pyaloo napipengena” lea. 7 Diut 24:1-4; Matyu 5:31; Make 10:4Dopa leamopa dokaitame baa lamaiyoo, “Dopa-tamo doko, Mosesame mana setea dokonya, ‘Akali mendeme baanya enda doko yakinao pituu, enda yakinenge pepa mende pyao maipengena’ lao aipuma seteape?” leami. 8 Dokopa baame dokaita lamaiyoo, “Nyakama tuu pyoo mona kana jiaminosa, Mosesame nyakamanya enda dupa yakinalapale lao kaeya. Dopaka doko, wamba tee pia dokopa, mana doko nasia. 9 Matyu 5:32; Luku 16:18; 1 Kor 7:10-13Dopana, nambame nyakama dapa langilyo: Akali mendenya enda doko kepo kolala naelyamopa, akali dokome enda doko yakinatala, waka mende nyilya dokome, akali doko kepo kolenge. Akali mendenya enda yakinatae mende akali mendeme nyilya dokome baa kepoaka kolengena” lea.

10 Dopa leamopa baanya disaipolo dupame baa lamaiyoo, “Enda akalipa lao petenge mana doko dopale-tamo doko, akali dupa enda nyala naeyao katataminopa, auu pita-lumuna” leami. 11 Dopa leaminopa Jisasame dokaita lamaiyoo, “Akali pitakame kapa pao pii doko soo nyala naeyatami. Pii doko soo nyina lao Goteme maiyamo dupame iki soo nyetami. 12 Akali mendapu enda nanyepenge jepae mandeami dupa enda nanyoo katengema. Akali mendapu mamuni nyepae dupa enda nyala naengema. Akali mendapuame kingdom kaiti-kisa singi dokonya kalai doko pitoo lao masetala, enda nyala naengemaka. Dopana, pii doko soo nyepenge akali dupame soo nyina kaeyalapape” lea.

13 Make 10:13-16; Luku 18:15-17Jisasame wane wanakupi koo dupa-kisa kingi setapala loma sakamaina lao, endakali mendapuame baa katea dokonya laminao epeaminopa, disaipolo dupame endakali dupa pyalanya leami. 14 Dokopa Jisasame lao pituu, “Kingdom kaiti-kisa singi doko wane wanakupi koo dapale dupanyana, dokaita epekena kaita lyokala naeyalapa” lea. 15 Dopa latala baame wane wanakupi koo dokaita-kisa kingi setapala baa pea.

16 Make 10:17-31; Luku 18:18-30Wane patange mende Jisasa katea dokonya ipupala baa lamaiyoo, “Mana Lenge Epe, mana epe aipale mende minatala, lete etete katenge doko nambame nyotope?” lea. 17 Dokopa Jisasame baa lamaiyoo, “Aipuma embame namba epe lelye? Endakali mende epe daa. Gote iki baa epe. Emba lete katenge doko nyotoo lao maseteno doko, mana setapae dupa wata-minape” lea. 18 Eks 20:13-16; Diut 5:17-20Dopa leamopa wane patange dokome baa lamaiyoo, “Mana setapae dupa andutupape?” lea. Dokopa Jisasame lao pituu, “Endakali pyao kumasala naeyape. Kepo kolala naeyape. Pake nala naeyape. Endakali mende sambo lao kotimi laa naeyape. 19 Eks 20:12; Lep 19:18; Diut 5:16Embanya endangi takangepa dolapo anda-anda semaiyoo katape. Emba tange auu kaengeli pyoo, embanya patali maki dupa auu kaeyape lapae silyamo dupana” lea. 20 Dokopa wane patange dokome baa lamaiyoo, “Namba wane kolesa pituu, mana setapae dutupa pitaka nambame wata-minio dopaka pyoo wata-minao kalyona, nambame aki mende apata pipengepe?” lea. 21 Dopa leamopa Jisasame baa lamaiyoo, “Emba akali etete tolatae mende katapu laka lao maseteno doko, emba pupala, embanya oapi dupa salimi latala, endakali daa jepae dupa maipi. Maitinopa oapi epe dupa embanya kaiti-kisa sakata. Dopana, emba namba watao ipu” lea. 22 Pii doko wane patange dokome sepala, baanya oapi etete longo setenge dokonyana, mona kenda kaeyapala, baa yakinatala pea.

23 Dokopa Jisasame disaipolo dupa lamaiyoo, “Nambame nyakama kiningi langilyo: Yuunya kamongo dupa kingdom kaiti-kisa singi dokonya kolandalanya lekeleke tatami. 24 Pii mende apata nambame nyakama langilyo: Kamele mendeme kepo tii mendenya lekeleke tao kolandapyaliaka doko, yuunya kamongo mendeme Gotenya kingdom dokonya kolandalanya eteteaka lekeleke tatana” lea. 25 Dokopa baanya disaipolo dupame pii dutupa soo etete walu lao paka kaeyapala lao pituu, “Dopa-tamo doko, endakali api pyoo nyetape?” leami. 26 Dopa leaminopa, Jisasame dokaita kandatae katao lamaiyoo, “Kalai doko endakalimi kapa pao napipenge. Dopaka doko, Goteme dupa pitaka pingina” lea. 27 Dopa leamopa Pitame yanu pyao, “Naimame dupa pitaka yakinatala emba watao epelyamano dokonya, naima aki mende nyetamape?” lea. 28 Matyu 25:31; Luku 22:30Dopa leamopa Jisasame dokaita lamaiyoo, “Nambame nyakama kiningi langilyo: Goteme yuupa kaitipa dolapo enenge jisetamo gii dokopa, Akalinya Ikiningi doko baanya kiŋi petenge toko dokonya tii pipae-pipa pitita. Gii dokopa nyakama namba watao paeyamino dupa kiŋi petenge toko 12 dutupanya pititami. Dokonya pituu, Israele tata 12 dutupanya pii lao tolasakamaitami. 29 Akali mendeme nambanya kenge doko masetala, baanya andapi, kaiminingipi, pimalengepi, takangepi, endangipi, endapi, wane wanakupi, eepi, dupa yakinatamo dokome wakao 100 lao nyeta. Baa lete etete katenge doko apata nyetaka. 30 Matyu 20:16; Luku 13:30Dopaka doko, endakali longo enomba nyoo kalyamino dupa tanga maita-kaita katatami. Endakali longo maita-kaita kalyamino dupa tanga enomba nyoo katatamina” lea.