5
Endakali Auu Pisingi Dokonya Leamo Doko
1 Luku 6:20-23Jisasame endakali kambu longo dupa kandatala, baa lalyoo pao yuu manda mendenya pea. Pupala dokonya peteamopa, baanya disaipolo dupa epeami. 2 Dokopa baame dokaita dapa lao mana lamaiya:
3 “Endakali imambunya daa jepae dupa Goteme auu pisingi. Kingdom kaiti-kisa singi doko auu pisetae dupanya.
4 Ais 61:2“Endakali ee lao katengema dupa Goteme auu pisingi. Auu pisetae dupanya mona tambo lasakamaita.
5 Sam 37:11“Endakali anasale joo katengema dupa Goteme auu pisingi. Auu pisetae dupame isa yuu dake etete nyetami.
6 Ais 55:1-2“Mana tolatae dupa wata-minapu laka lao masetala, nee kaengema endakali dupa Goteme auu pisingi. Auu pisetae dupa mana tolatae dupame tumbatamopa katatami.
7 “Endakali kondo kaeyao katengema dupa Goteme auu pisingi. Auu pisetae dupa Goteme kondo kaeyata.
8 Sam 24:3-4“Gote iki mona setao katengema endakali dupa Goteme auu pisingi. Auu pisetae dupame Gote kandatami.
9 “Endakali mona setao katamana lao akema lengema dupa Goteme auu pisingi. Auu pisetae dupa Gotenya ikiningina latami.
10 1 Pita 3:14“Gotenya mana tolatae dupa minilyaminosa tanda nyingima endakali dupa Goteme auu pisingi. Kingdom kaiti-kisa singi doko auu pisetae dupanya.
11 1 Pita 4:14“Nyakamame namba wata-minilyaminosa, endakali dupame nyakama pii koo lata, tanda dyoo koeyaseta, sambo pii tata dupa pitaka lata pilyaminopa, Goteme nyakama auu pisingi. 12 2 Kron 36:16; Ap 7:52Endakali dupame nyakama tanda dyoo koeyasetaminopa, yole andake mende kaiti-kisa setekelyamona lao masetala, nyakama eteke pyao mona yaepao kalyepape. Propeta wamba kateami dupa dopaka pyoo tanda maiyoo koeyasiamina” lea.
Solepa Tii Pipaepa Dolaponya Lao Kongali Leamo Doko
13 Make 9:50; Luku 14:34-35“Nyakama yuu dakenya sole jepae kalyamino. Sole dokonya tende patamo doko, nyakamame aipa petala dee tende pisetamipi? Sole tende patae dokome mende napingi. Doko kamaka soo nepatala, endakalimi moko katao nepengema.
14 Jone 8:12; 9:5“Nyakama yuu dakenya tii pyoo kalyamino. Yuu manda mendenya siti mende silya doko yalo pyoo nasingi. 15 Make 4:21; Luku 8:16; 11:33Endakali dupame lama kaiyepala, penge mendeme sanga pyambala naengema. Endakali andaka pititami dupa pitaka tii pisina lao toko-kisa panao setengema. 16 1 Pita 2:12Dopaka pyoo, tii pipae nyakama-kisa silyamo doko endakali waka dupame kandena lao kalyepape. Dopa pitaminopa, nyakamanya kalai epe pitami dupa endakali dupame kandatala, nyakamanya Takange kaiti-kisa katenge doko kenge andake maitamina” lea.
Mana Setapae Dupanya Leamo Doko
17 “Mosesanya loo dupapi, propeta dupame mana leami dupapi, dupa nambame nyoo nepalanya epeena lao masala naeyalapape. Dupa nambame nyoo nepalanya naepeo. Dupa angi jisalanya epeo. 18 Luku 16:17Nambame nyakama kiningi langilyo: Yuupa kaitipa dolapo etala naeyatamopa, Mosesanya loo dupanya kuki etete mendaipi mende alu napita. Dupa alu napyoo soaka pao, dupa pitaka pyoo etatamo gii dokonya tuu lata. 19 Dopana, mana setapae datupanya kuki etete mende endakali mendeme yalatala, endakali waka dupame dopaka pyoo yalena lao mana lamaitamo doko, kingdom kaiti-kisa singi dokonya baa kenge nasingi, etete daana latami. Dopaka doko, endakali mendeme mana setapae datupa wata-minatala, endakali waka dupame dopaka pyoo wata-minina lao mana lamaitamo doko, kingdom kaiti-kisa singi dokonya baa kenge andake singina latami. 20 Nambame nyakama langilyo: Mosesanya loo mana nyepaepi, Parasipi dupa ita minao nyakamame mana tolatae dupa minala naeyatamino doko, kingdom kaiti-kisa singi dokonya nyakama kolandala naeyatamina” lea.
Imbu Kaenge Dokonya Leamo Doko
21 Eks 20:13; Diut 5:17“ ‘Embame endakali pyao kumasala naeyape. Pyao kumaseta endakali doko-kisa tenge setapala tanda maipengena’ lao, wamba nyakamanya yumbange dupa lamaiyami doko nyakamame siami. 22 Dopaka doko, nambame nyakama dapa langilyo: Akali mendeme baanya kaiminingi mende yapa imbu kaeyatamo doko, baa-kisa tenge setapala baa tanda maipenge. Akali mendeme baanya kaiminingi mende pii koo latamo doko, kote andake dokome baa-kisa tenge setapala baa tanda maipenge. Akali mendeme endakali mende kyakaengena latamo doko, baa itate tao katenge ele panda koo dokonya pupenge. 23 Dopana, embame Gote kundi maiya alta tengesa patenopa, embanya kaiminingi mendeme emba imbu kaelyamona lao masepae epea-kandeno dokopa, 24 embanya kundi maiyanya piti doko alta tengesa dosa setapala, wambao embanya kaiminingi doko katata dokonya pupala, pii lao tolasalapape. Tolasetala kundi doko maiya pilyepe. 25 Luku 12:57-59Emba kotimi lata endakali doko-pipa kote laa pao pituu, kaitinisa embame yapa baanya mona auu pisakamaipi. Dopa napitino doko, baame emba laminao pao jasa doko maitamopa, jasa dokome emba yanda singi doko maita. Dokopa yanda singi dokome emba anjinya pyandata. 26 Anjetae paliu, koteme maipi latami dutupa maiyoo etatenopa, emba mokatamina lao nambame emba kiningi langilyona” lea.
Kepo Kolapu Laka Lao Masingi Dokonya Leamo Doko
27 Eks 20:14; Diut 5:18“ ‘Embame kepo kolala naeyape’ lapae singi doko nyakamame siami. 28 Dopaka doko, nambame nyakama dapa langilyo: Akali mendeme enda mende lengeme kandatala, moname nyipu laka lao masilya dokome angi kepo kolelyamosa pingi. 29 Matyu 18:9; Make 9:47Dopana, embanya lenge tolaetename emba koo pyaale lao mapusia-kandeno doko, lukunya nepape. Embanya yongenya katenge dupanya mendai mende lukunya nepateno doko auu pita. Embanya yonge doko pitaka ele panda koo dokonya soo pyandatamo doko auu napita. 30 Matyu 18:8; Make 9:43Embanya kingi tolaetename emba koo pyaale lao mapusia-kandeno doko, kepanya nepape. Embanya yongenya katenge dupanya mendai mende nepateno doko auu pita. Embanya yonge doko pitaka ele panda koo dokonya soo pyandatamo doko auu napitana” lea.
Enda Yakinenge Dokonya Leamo Doko
31 Matyu 19:9; Make 10:11-12; Luku 16:18; 1 Kor 7:10-11Diut 24:1-4; Matyu 19:7; Make 10:4“ ‘Akali mendeme baanya enda doko yakinao pituu, enda yakinenge pepa mende pyao maipengena’ lapae silyamo. 32 Dopaka doko, nambame nyakama dapa langilyo: Akali mendenya enda dokome kepo kolala naelyamopa, akali dokome enda doko yakinelyamopa, enda doko akali waka mendenya pelya dokome, akali wambatae doko mambele enda doko kepo kolenge. Akali mendenya enda yakinatae mende akali mendeme nyilya dokome baa kepoaka kolengena” lea.
Kiningi Etete Pitona Lenge Dokonya Leamo Doko
33 Lep 19:12; Nambaa 30:2; Diut 23:21“ ‘Embanya pii dupa kyeto tasalanya, Kamongonya kenge doko latala, embame kiningi etete mende pitona late doko, kaeyala naeyao lateli pipi’ lao, wamba nyakamanya yumbange dupa lamaiyami doko nyakamame siami. 34-35 Sam 48:2; Ais 66:1; Matyu 23:22; Jem 5:12Dopaka doko, nambame nyakama dapa langilyo: Kaiti doko Gote petenge toko dokona, kaitinya kenge doko latala, kiningi etete mende pitona laa naeyape. Yuu dake Gotenya moko setenge toko dokona, yuu dakenya kenge doko latala, kiningi etete mende pitona laa naeyape. Jerusalema doko Kiŋi Andake dokonya siti dokona, Jerusalema kenge doko latala, kiningi etete mende pitona laa naeyape. Embanya pii late doko kyeto tasalanya, dopale mende kenge laa naeyape. Etete daa. 36 Embanya iti pumbuti mende kapo jina laa naeyate. Iti kapo mende pumbuti jina laa naeyateakana, embanya pii late doko kyeto tasalanya, embame langalu minatala kiningi etete mende pitona laa naeyape. 37 Pii kyeto tasalanya waipa sinyoo pii lelyamino dupa koo akali dokome waipa sinyingina, embame mende pitona lateno doko, pitona iki lape. Mende napitona lateno doko, napitona ikiaka lape” lea.
Itingi Yanu Pingi Dokonya Leamo Doko
38 Luku 6:29-30Eks 21:24; Lep 24:20; Diut 19:21“ ‘Akali mendeme embanya lenge lukutamopa, itingi lengeaka lukupi. Nenge longatamopa, itingi nengeaka longape’ lapae singi doko nyakamame siami. 39 Dopaka doko, nambame nyakama dapa langilyo: Endakali mendeme emba-kisa koo mende pia-kandeno doko, pina kaeyape. Endakali mendeme embanya wakena tolaetena kingi kapeme pia-kandeno doko, yangitena apata pina maipi. 40 Endakali mendeme embanya yonge pee isa pingi doko nyotoo lao emba kotimi lea-kandeno dokopa, yonge pee kisa pingi doko apata baa maipi. 41 Akali mendeme emba pyalanya latala, pinju soo tengesa amasa pao mapa lea-kandeno dokopa, londatili pao mapape. 42 Endakali mendeme emba-kisa dopale mende tee latamopa, embame maipi. Endakali mendeme emba-kisa yanu tee latamopa, embame daa nalape” lea.
Yandapipi Dupa Auu Kaeyapengena Leamo Doko
43 Luku 6:27-28,32-36“ ‘Embanya patali maki dupa auu kaeyapala, embanya yandapipi dupa imbu kaeyape’ lapae singi doko nyakamame siami. 44 Dopaka doko, nambame nyakama dapa langilyo: Nyakamanya yandapipi dupa auu kaeyalapape. Nyakama Goteme koeyasina latami endakali dupa pii epe lamaiyepape. Nyakama imbu kaeyatami endakali dupa auu pisalapape. Nyakama pii koo lao tanda dyoo koeyasetami dupanya loma sakamaiyepape. 45 Dopa pitami dokome, nyakamanya Takange kaiti-kisa katenge dokonya nyakama ikiningi katatami. Baame endakali koopi, epepi dupa pitaka-kisa baanya niki doko tapina lenge. Baame endakali mana tolatae miningipi, mana koo miningipi dupa pitakanya lao aiyuu epena lenge. 46 Nyakama auu kaeyatami endakali dupaka nyakamame auu kaeyatamino doko, yole aipale mende nyetami? Takisa nyingi dupame dopaka napingimape? 47 Nyakamanya kaita miningi dupaka nyakamame mambo pyao lanyetamino doko, mana aipale mendeme endakali waka dupa ita minatami? Takisa nyingi dupame dopaka napingimape? 48 Lep 19:2Nyakamanya Takange kaiti-kisa katenge doko etete tolataena, nyakama etete tolataeyaka kalyepape” Jisasame lea.
5:4: Ais 61:2
5:5: Sam 37:11
5:6: Ais 55:1-2
5:8: Sam 24:3-4
5:13: Make 9:50; Luku 14:34-35
5:15: Make 4:21; Luku 8:16; 11:33
5:21: Eks 20:13; Diut 5:17
5:27: Eks 20:14; Diut 5:18
5:31: Matyu 19:9; Make 10:11-12; Luku 16:18; 1 Kor 7:10-11
5:31: Diut 24:1-4; Matyu 19:7; Make 10:4
5:33: Lep 19:12; Nambaa 30:2; Diut 23:21
5:34-35: Sam 48:2; Ais 66:1; Matyu 23:22; Jem 5:12
5:38: Eks 21:24; Lep 24:20; Diut 19:21
5:48: Lep 19:2