1 Jisasa baa Jeriko pyakamatala siti kaina dokonya-kaita pea. 2 Siti dokonya akali Sakiasa lenge mende katea. Akali doko baa takisa nyingi dupanya isingi mende. Baa oapi longo setenge. 3 Baame Jisasa doko apipi lao kandatoo latala kaitini kutiaka doko, endakali kambu mendeme Jisasa kakopao peaminopa, Sakiasa baa muu dokonyana, kapa pao Jisasa kandapenge nanjia. 4 Dopa piamosa, baame Jisasa kaitini dokonya-kaita epelyamo lao kandatala, baa alo pyao wambatala, Jisasa kandatoo lao sikamoo ita mendenya kisia. 5 Jisasa baa ita tenge dosa ipao pituu, ulu kandalyetala, Sakiasa kandea. Kandatala baa lamaiyoo, “Sakiasa, namba indupa embanya andaka palipengena, emba yapa isa ipu” lea. 6 Dopa leamopa baa pupae isa pyakanatala auu kaeyao Jisasa lanyia. 7 Dopa piamo kandatala endakali dupa pitakame mumu lao, “Akali koo pingi dokonya andaka Jisasa palima pelyamona” leami. 8 Dokopa Sakiasa katapala Kamongo lamaiyoo, “Kamongo, embame sepe! Nambanya oapi dupa kapa-kapa lao mokosetala, endakali daa jepae dupa maitoo. Nambame endakali mende minakasetala, oapi mendapu nyio-tamo doko, dupa wakao palyoo kitomendeme yanu pyakamaitoana” lea. 9 Dopa leamopa Jisasame baa lamaiyoo, “Akali dake baa Abraamenya ikiningiaka. Tenge dokonya, Gotenya pyoo nyingi doko indupa andaka dakenya ipatelyamo. 10 Matyu 18:11Aipumape, Akalinya Ikiningi dokome endakali alu petae dupa kutao pyoo nyalanya epeana” lea.

11 Matyu 25:14-30Jisasa baa Jerusalema tengesa katea dokonya, endakali dupame baanya pii dupa sepala, Gotenya kingdom doko gii dokopaka panala ipanya pyumuna lao masiami. Dopa lao masiaminosa Jisasame kongali pii dake lea. 12 Baame lao pituu, “Akali kenge singi mendeme kiŋi nyepala pilyotona latala, yuu londati mendenya pea. 13 Paanya pituu, kalai akali akalita epena latala, silipa muni akalita mendai-mendai lao akali dutupa maiya. Maitala kalai akali dutupa lamaiyoo, ‘Namba ipatopa kaeyatamina, nyakamame bisinisa pyakao kalyepape’ latala baa pea. 14 Pateamopa akali dokome isepenge endakali dokaitame baa imbu kaeyapala, ‘Akali doko baa naimanya kiŋi nakatena lao masilyamanona’ lao maitakao wai minao pena leami. 15 Baa kiŋi nyepala pilyiamopa, baanya kalai akali muni maiya dutupame bisinisa pyoo, wakao akipate nyekeamipi lao kandatoo latala, akali dokaita baa katea dokonya epena lena lea. 16 Dokopa kalai akali wambao doko baanya akali andake dokonya enombanya ipupala lao pituu, ‘Akali Andake, embanya silipa muni mendai doko minao kalai petakala, wakao silipa muni akalita nyekeona’ lea. 17 Dopa leamopa baame kalai akali doko lamaiyoo, ‘Emba kalai akali epe dokome yaka pyekee-lamo! Nambame leoli pyoo embame muni kuki dutupa minao kalai pyekee-lamo dokonya, embame siti akalita isoo katape’ lea. 18 Dopa lateamopa, kalai akali lapo pyoo doko ipupala lao pituu, ‘Akali Andake, embanya silipa muni mendai doko minao kalai petakala, wakao silipa muni yungi nyekeona’ lea. 19 Dopa leamopa baame kalai akali doko lamaiyoo, ‘Embame siti yungi isoo katape’ lea. 20-21 Dopa lateamopa, kalai akali tepo pyoo doko ipupala lao pituu, ‘Akali Andake, emba akali tomba napae mende. Wakamanya dopale setapae dupa embame nyingi. Wakamanya nee pokatae dupanya embame mandenge. Tenge dokonya, nambame emba paka kaeyapala, embanya silipa muni mendai doko lapalapame yaki petala setekeona kanda’ lea. 22 Dopa leamopa baame kalai akali doko lamaiyoo, ‘Emba kalai akali koo-lamo. Embanya pii lelyeno dutupameaka nambame emba-kisa tenge setatoo. Namba tomba napala, wakamanya dopale setapae dupa nyoo, wakamanya nee pokatae dupa mandyoo pilyopa embame kandenge-lumu doko, 23 wakao mendatupa apata nyema ipatenopa lao, aipuma nambanya muni doko beŋenya setakala naeyepe?’ lea. 24 Dopa latala baame akali tengesa kateami dupa lamaiyoo, ‘Silipa muni mendai baa-kisa silyamo doko nyepala, silipa muni akalita setelyamo akali doko maiyepa’ lea. 25 Dopa leamopa dokaitame akali andake doko lamaiyoo, ‘Akali Andake, akali doko-kisa silipa muni akalita silyamona’ leami. 26 Matyu 13:12; Make 4:25; Luku 8:18Dopa leaminopa akali andake dokome lao pituu, ‘Nambame nyakama langilyo: Longo lao singi endakali doko baa konda pyoo maita. Dopaka doko, nasingi endakali doko-kisa kuki seta dutupa baa-kisa nasina lao tange nyokonyeta. 27 Nambanya yandapipi dupame namba kiŋi nakalyale lao masiamino dupa asa laminao ipupala, nambanya enombanya pyao kumasalapa’ leana” Jisasame lea.

28 Matyu 21:1-11; Make 11:1-11; Jone 12:12-19Jisasame pii dutupa lao etapala baa wambao Jerusalema lalyoo paanya pea. 29 Pao Olipimanda lenge dokonya taono Betepasapa, Betaniapa dolaponya tengesa pyakalyetala, baanya disaipolo lapoma wambao pena lea. 30 Pena latala dolapo lamaiyoo, “Yuu yakane nyakambanya enombatena silyamo dokonya pupa. Pao pyakamatambinopa, dongi ŋaŋa, paa mendaipi mende endakali napetenge mende anjetae katatamopa kanjambinona, doko tata lao minao dakenya ipupape. 31 Endakali mendeme tipa pyoo, ‘Aipuma dongi doko tata lelyambipi?’ lea-kandeno doko, nyakambame baa lamaiyoo, ‘Kamongome kalai mende dongi dakeme pipenge jilyamona’ lapape” lea. 32 Dopa lateamopa, pena lea akali dolapo pupala kandeambinopa, Jisasame leali petae katea. 33 Akali dolapome dongi ŋaŋa doko tata leambinopa, dongi tange dupame dolapo lamaiyoo, “Nyakambame dongi ŋaŋa doko aipuma tata lelyambipi?” leami. 34 Dokopa akali dolapome lao pituu, “Dongi dakeme Kamongome kalai mende pipenge jilyamona” leambi. 35 Dopa latala, akali dolapome dongi ŋaŋa doko minao Jisasa katea dokonya ipupala, dolaponya yonge pee kisa pingi dolapo lyokanya dongi maita dokonya setapala, Jisasa dokonya pisiami. 36 Baa pituu peamopa, endakali dupame nyakamanya yonge pee kisa pingi dupa kaitini dokonya kuiyami. 37 Jisasa baa yuu Olipimanda dokonya lanao ipao Jerusalema tengesa pea. Dokopa baame mirakolo piamopa kandeami dupa pitaka baanya disaipolo kambu andake dokome masetala, eteke pyatala puu lao Gote mambo pyao tee piami. 38 Sam 118:26Mambo pyao lao pituu, “Kamongonya kengenya epelyamo kiŋi dake Goteme auu pisetae. Kaiti-kisa mona yaepenge doko setamopa, Gotenya kenge andake doko etete ketae kaitinya sinana” leami. 39 Dokopa endakali kambu dokonya Parasi mendapu kateami dupame Jisasa lamaiyoo, “Mana Lenge, embanya disaipolo dupa pyalanya laa” leami. 40 Dopa leaminopa baame dokaitanya pii yanu pyakamaiyoo, “Endakali dakaitame pii nalamili doko, kana dupame puu lao wii lamilina lao nambame nyakama langilyona” lea.

41 Dopa latala, Jisasa Jerusalema tengesa pao pituu, baame siti doko kandatala, siti doko lao ee lao 42 dapa lea: “Nyakamanya mona yaepao katenge mana dupa indupa nyakamanya gii dakepa kandami laka lao nambame masilyo. Dopaka doko, mana dupa nyakamame nakanjepale lao yalo petae kalyamo. 43-44 Goteme nyakama kanja epelyamo gii doko dakena lao nyakamame nakandelyamino dokonya, nyakamanya yandapipi dupa ipupala, nyakama kakopanya palyetala, kame pimbao, kaitini dupa pitaka lyokata gii doko ipata. Ipatamopa yandapipi dupame kamepi, anda kaname namba-namba pyoo petaepi, dupa pitaka kaluu nepatala, nyakamapi, nyakamanya wanepi, nyakamanya siti dokopi, dupa pitaka koeyasetamina” lea.

45 Matyu 21:12-17; Make 11:15-19; Jone 2:13-22Jisasa lotuu anda nee nyetae kamapu dokonya pyakamatala, maketa setao kateamipi, sambao kateamipi, dupa tee pyao watao pia. 46 Ais 56:7; Jer 7:11Watao pyao pituu, “ ‘Nambanya anda doko loma singi anda mendena’ lao pepa pyapae silyamo. Dopaka doko, nyakamame nambanya anda doko pake nenge dupanya yalo pingi panda jetelyaminona” lea.

47 Luku 21:37Baame koteaka lao lotuu anda nee nyetae kamapu dokonya mana lamaiyoo kateamopa, prisa mupapi, Mosesanya loo mana nyepaepi, endakali dupanya isingi akalipi, dupame baa aipa petala pyao kumasemape lao kaitini kutiami. 48 Kutiamiaka doko, endakali dupa pitakame Jisasanya pii doko semana lao etete auu kaeyaminosa, baa pyao kumasepenge kaitini mende kandao nanyiami.