1 Matyu 24:1-2; Luku 21:5-6Jisasa baa lotuu anda nee nyetae kamapu doko yakinatala peamopa, baanya disaipolo dupanya mendeme baa lamaiyoo, “Mana Lenge, anda yale epe datupa kana yale auu petae dupame petae kalyamo kanda” lea. 2 Dopa leamopa Jisasame baanya pii yanu pyakamaiyoo, “Anda yale epe petae kalyamo datupa kandelyepe? Datupa pitaka dopa petae katena lao kaeyala naenya kaluu nepataminopa, kana mendaipi mende namba-namba petae nakatatana” lea.

3 Matyu 24:3-14; Luku 21:7-19Jisasa Olipimanda pituu, lotuu anda nee nyetae doko katenge dokaita-kaita kandamatae petea. Peteamopa Pitapi, Jemesapi, Jonepi, Andruapi dutupame elyakalao baa tipa pyoo, 4 “Embame lelyeno dutupa gii andukupa pita? Embame naima langi. Dutupa pitaka pyaanya tengesa pitamopa, kongali aipale mende pitape?” leami. 5 Dopa leaminopa Jisasame tee pyao dokaitanya pii yanu pyakamaiyoo, “Endakali mendeme nyakama minakasetana, kandao kalyepape. 6 Aipumape, endakali longo mendapu nambanya kengenya ipupala lao pituu, ‘Namba akali dokona’ lao endakali longo minakasetami. 7 Dokopa yanda pilyamino lapaepi, yanda ingingi lapaepi, dupa sepala nyakama walu nalalapape. Tenge doko, dopale dupa ipupenge. Dopaka doko, yuu etapenge gii doko, dokopa ipa naeyata. 8 Akali tata mendeme akali tata mende yanda pimaita, kingdom mendeme kingdom mende yanda pimaita pitami. Yuu mendapuanya titiwali dupa minata, lopo andake dupa sepa, pundu dupa ipata pita. Dopa pita dupa, enda wane manjanya tee pyao maita pingi dopale.

9 Matyu 10:17-22“Endakali dupame nyakama anjetala laminao pao, kanjole dupa-kisa kotimi lata, lotuu anda dupanya nyakama pyao indyepa pitamina, kandao kalyepape. Nyakamame namba watao paelyamino latala, endakali dupame gapenapi, kiŋipi dupanya enombanya nyakama katasetami. Dopa pitaminopa, nyakamame kandelyaminopi, silyaminopi dupa akali dokaita panao lamaiyepape. 10 Wai pii epe doko wambao akali tata dupa pitaka lamaipenge. 11 Endakali dupame nyakama anjetala laminao kote anda dupanya pataminopa, nyakamame pii aipa lamanape lao wambao masepae longo nyala naeyalapape. Kote lapenge gii dokopa nyakama pii ditali pyoo lapape. Nyakamame pii latami dupa, nyakama tangeme masoo laa naeyatami. Oli Spiritame nyakama ditamopa latami. 12 Kaiminingi mendeme kaiminingi mende pyao kumasina lao anjoo maita. Takange dupame nyakamanya wane dupa dopaka pina lao anjoo maitami. Wane dupame nyakamanya endangi takangepi dupa yandapipi jetala, pyao kumasina lao maitamiaka. 13 Matyu 10:22Nyakamame nambanya kenge doko lao panelyamino latala, endakali dupa pitakame nyakama imbu kaeyatami. Dopaka doko, endakali mende kyeto joo katao, baa etata gii dokonya tuu latamo doko, baa pyoo nyetana” lea.

14 Matyu 24:15-28; Luku 21:20-24Dan 9:27; 11:31; 12:11“Lotuu anda nee nyetae koeyasingi, myuku pipae mende ipatana lao propeta Danieleme lea doko, nasepenge panda dokonya setamopa kandatami gii dokopa, endakali Judia katatami dupa yuu manda dupanya paka pupenge jeta.” (Pii dake itaki pyate dokome tenge doko kutao nyepe.) 15 Luku 17:31“Gii dokopa endakali mende baanya anda ketae katata dokome, baanya oapi andakote seta mende nyalanya isa pyakanala naeyapenge jeta. 16 Endakali mende eenya katata dokome, baanya yonge pee kisa pingi doko nyalanya pilyala naeyapenge jetaka. 17 Enda wane tongotapi, enda wane andu nengepi, dupa gii dokopa etete kondo pita. 18 Poo lao aiyuu epenge gii mendenya paka napataminopana nyakama loma soo kalyepape. 19 Dan 12:1; Rev 7:14Kenda wamba epea dupa pitaka ita minao, yuu gii dutupanya kenda andake mende ipata. Goteme yuupa kaitipa dolapo tee pyao wasia dokonya pituu, indupa tuu lao, kenda etete andake dopale mende naepea. Tanga-tangapi kenda etete andake dopale mende naipataka. 20 Yuu gii dutupa Kamongome muu pisala naeyatamo doko, endakali mendaipi mende pyoo nyepae nakatata. Dopaka doko, baanya yapao nyepae dupa masetala, yuu gii dutupa muu piseta. 21-22 Gii dokopa Kraisa manemane pingimapi, sambo propetapi dupa ipupala, Gotenya yapao nyepae endakali dupa apata kyakasetamano nakandenya latala, mirakolo andakepi, kalai paka pipaepi, dupa pitami. Dopana, endakali mendeme nyakama langyoo, ‘Kraisa doko asa kalyamo kanjepa, amasa kalyamo kanjepa’ lea-kandeno doko, kiningi lelyamona lao masala naeyalapape. 23 Tanga pita dupa pitaka nambame nyakama wambao langilyona, kandao kalyepape” lea.

24-25 Matyu 24:29-31; Luku 21:25-28Ais 13:10; 34:4; Esek 32:7; Joele 2:10,31; 3:15; Rev 6:12-13“Kenda andake dutupa ipao etapatamopa, yuu gii dutupanya niki doko iminjoo, kana doko tii napyoo, kaitinya bui dupa kondao isa ipao, kaitinya kyeto singi dupa ema-ema pyoaka pita. 26 Dan 7:13; Rev 1:7Dokopa Akalinya Ikiningi doko baanya kyeto andakepi, tii pipaepi dupanya pituu, kopa tambetambe ipatamopa endakali dupame kandatami. 27 Gii dokopa poo kitomende dutupapi, yuu lembapi, kaiti lembapi, dupanya baanya enjele dupa pupala, baanya endakali yapao nyepae dupa nyoo kambu pyekena latana” lea.

28 Matyu 24:32-35; Luku 21:29-33“Nyakamame piki ita dupanya mana dake nyalapape: Piki ita dupanya mange popo pilya dupa kandatala, paina pyaanya tengesa pilyamona lao nyakamame masingima. 29 Dopana, lelyo dutupa pitamopa nyakamame kandatala, Akalinya Ikiningi doko lome kambunya ipao tengesa katapelyamona lao masalapape. 30 Nambame nyakama kiningi langilyo: Endakali indupa palelyamino dupa kumao etala naeyataminopa, lelyo dutupa pitaka pita. 31 Yuupa kaitipa dolapo alu pita. Dopaka doko, nambanya pii dupa alu napitana” lea.

32 Matyu 24:36-44“Dutupa pipenge yuu giipa, awapa dolapo endakali mendeme masala naenge. Enjele kaiti-kisa katengema dupame apata masala naengemaka. Ikiningi dokome apata masala naengeaka. Takange dokome iki masingi. 33 Dopana, gii doko andukupa ipatape lao nyakamame masala naelyaminona, nyakama loma soo kandao isoo kalyepape. 34 Luku 12:36-38Gii doko akali mendeme baanya anda doko yakinatala, yuu londati mendakaita pao kateamo dopale. Paanya pituu baanya kalai akali dupame anda doko isoo katekena latala, mendai-mendai lao kalai mokosoo maiya. Dopa petala, akali lome kambu isoo katenge dokome lome kambu doko isokondape pyoo isoo katekena latala, baa pea. 35-36 Dopana, anda tange doko yuu kuita-kuita ipatape, kuka andatombe ipatape, pauli pii latamopa ipatape, yongama wamba ipatape lao nyakamame masala naengema. Baa yapa pyakaeyalu petala, nyakama luu paliu setaminopa kandatana kandao isoo kalyepape. 37 ‘Kandao isoo kalyepape!’ lelyo pii mendai dokoaka endakali dupa pitaka lamailyona” Jisasame lea.