5
Jon no buk ete dagou urai.
1 Fai waha no sia king langa yafa gainga, ji nomo owo hilou langa buk ete inyi gainga urene. Buk waha no fefa ufaro ete dorofe nere olilidu bode dagane, onodu fefa waha langa yeregou ulate-ulate inyina. Nere fefa olili wanenga matau 7 heigainga, kendel nomo laluwa langa danga bagu fidawane, onodu bode nere kendel laluwa 7 waha jaula langa naani isisiwou logosi waneha. 2 Onodu ji ensel danga bagu ete urene, no bolou oto bona benou yaurai, “Faiwei no fai hilobainga no edola buk olilidu bode kendel nomo laluwa langa fida wane waha oragedu bona, buk waha isebu wona?” 3 Onou wa, fai ete ha laluwa langa yo, oula langa yafana yo, oula gamu langa inyina yo, no edo langa buk waha isebudu, huwanya langa feelewei nomo edo uwa. 4 Ji ureni wa, fai ete no buk waha isebudu bona nomo huwanya langa feelewei nomo edo uwa, onodu boni ji merenga wene. 5 Ono gainga mora bagu nebere ete no benou lehiyai, “Ne adai merau. Isau. Laion Juda nebere gane langa heigai wa, no king Devit nomo asa gane langa Hui fuduwai, no oota feiyadu bona, no nomo honggoro fai ilei nigaiha. Onou waha bona, no edo langa kendel nomo laluwa 7 buk fidawou waha oragedu bona, isebu wonbona.”
Jon no Sipsip Magana uraiha.
6 Onodu ji Sipsip Magana ete oto gainga urene. Nomo urou wa nere no dukote wanenga umaiha dorofe. No sia king gama langa oto gainga, nere dada aise agenege auma yafade waha bagu, nere mora bagu nebere sia bagu, no kolili tudu oto wane. No nomo haraku 7, no nomo ago Magana 7, wa nere Itou nomo hauri 7. Itou no nere oula fere-fere oruwanga langa huuru nigainga goyane. 7 Ariya, Sipsip Magana no goidu bona, buk waha Fai sia king langa yafai waha nomo owo hilou langa inyi gainga tai. 8 No buk waha tainga, nere dada aise agenege auma yafade bagu, nere mora bagu 24 yafade waha bagu, nere Sipsip Magana hinomu langa afenege tuburu kutu waneha. Nere mora bagu etenga-etenga nere oruwanga musik ete gita dorofe bagu, gol haaya ete bagu yaasu wane, ono ganenga buutu agiya hilobainga haaya oruwa langa heigane. Wa no Itou nomo fai-aita bagu nebere hauyawou waha isisiwou dorofe. 9 Onodu bode nere moone eege ete benou taane,
“Ne buk edola tigini tedu bonahe,
kendel nomo laluwa buk fidawou waha oruwa
oragau ganga.
Taate bona, nere ne dute kote wanenga umeneha,
onodu ne fai-aita bagu Itou tuwei nomo boni,
ne name ganete langa
ege gidu ejiya nigene.
Yo, ne fai-aita oruwa nebere fai bagu,
beele oruwa nebere bagu,
genege gala hogo fere-fere nebere bagu,
kantri oruwanga nebere bagu,
ege gidu ejiya nigene.
10 Ne nere ono nigenenga, nere
king nebere gane, nebere pris heigedu bode,
ere ebere Itou nomo pris yafane.
Onodu nere king yafabode,
oulaha fai-aita oofa nigodbode.”
Nere Sipsip Magana nomo unyi jaimu wane.
11 Ariya, ji ege feeledu boni, nere ensel bolonege baingaro isene. Nebere lelege nigou wa, handret milion, onodu tausen-tausen gai baingaro dorofe. Nere sia king bagu, dada agenege auma yafade bagu nere mora bagu, kolili nigidu otowane. 12 Nere inyangaro benou yaurane,
“Sipsip Magana beha,
amina nere dukote wanenga umai waha,
no edo langa tigini unyi anyakaro bagu,
dada hilou‑hilou oruwa,
isou hilobainga bagu,
danga anyakaro bagu tonbona.
Fai-aita bagu oruwanga
nere edo no unyi jaimu bode,
no bode edega bode,
no hilobainga tuwodbode.”
13 Onodu ji dada hogo fere-fere Itou ati nigai waha, nere ha laluwa langa yafade, oula langa yafade, oula gamu langa jiride, hiiri langa golode waha, oruwanga bona beele isene. Yo, ha‑ha oruwa langa dada oruwanga inyide waha, ji nere benou leganenga isene,
“Fai no nomo sia king
langa yafa-yafana waha,
onodu Sipsip Magana fere,
nere hilobaingawou oruwanga,
unyinere anyakaro bagu,
edegawou bagu, danga bagu,
gai-gai edo todbodere.”
14 Onodu nere dada aise agenege auma yafade waha nere lewane, “Wa ngalenga.” Ono wanenga, nere mora bagu afenege tuburu kutudu bode, nere nga unyinere jaimu wane.