1 Ji Sipsip magana no buk 7, kendel laluwa langa fidawou waha yaasu gainga urene, onodu no kendel lalauwa amugou waha oragai. Ono gainga ji dada aise agenege auma yafade waha nebereha ete no beele lewainga isene, no nomo bolou wa, amili ayana dorofe. No benou lewai, “Ne mayau.” 2 Ono wainga, ji ege feeledu boni hoosi kaamba ete urene, fai no hoosi jaula langa yafai waha no ganya yaasuwai. Nere teteri ete fai no oota feiyawei nomo waha tuwanenga, no oota feiyawou fai dorofe goi bona, no oota gai baingaro feiya nigingawai.

3 Ariya Sipsip magana no kendel laluwa buk fidawou nga waha oragai, ono gainga dada agenege auma yafade nga waha no lewai, “Ne mayau.” 4 Ono gainga hoosi ete heigai, no giriwou. Nere fai hoosi waha jaula langa yafai waha danga tuwane, danga waha no oulaha fai-aita nebere saini hilobainga usumu nagei nomo bona, ono wonga, fai nere fai ila dunege kote wogunga umeru wodbode. Onodu nere oota kesebu anyakaro ete no haruwe waha onowei nomo bode tuwane.

5 Ariya, Sipsip magana no kendel laluwa buk eei fidawou waha oragai, ono gainga, dada ago auma eei yafana waha benou lewainga isene, “Ne mayau.” Ono wainga, ji ege igeidu boni, hoosi usuma ete urene. Onodu fai no hoosi jaula langa yafai waha, no skel ete ou haawegou waha nomo owo la yaasuwai. 6 Onodu ji dada ete fai bolou dorofe, dada aise agenege auma yafade waha gamanege langa beele malalamudu legainga isene, bolou waha no benou lewai, “Ne goidu bonahe name haruwe ono wahenga fai nere da bode tutu nigonbona. Ono wahenga nere fai agou fati etenga la tode waha, nere edo langa wit tauwe menakele etenga yo, bali tauwe mene-mene eeinga yo ejiya wodbode. Onou wa, ne oliv nauge bagu, wain nauge bagu, adai inyabamu nigau, ono bonahe oliv wain bagu neire faronga gai inyonbona.”

7 Ariya, Sipsip Magana no kendel laluwa buk fidawou aise waha oragai, ono wainga ji dada aise ago auma yafana waha no bolou benou lewainga isene, “Ne mayau.” 8 Ono wainga, ji ege igeidu boni, hoosi bailu bagu ete urene. Fai no hoosi jaula langa yafai waha nomo unyi, Umou. Ono gainga fai umou nebere Haumu fere, no Umou oojo tudu mayai. Nere nga danga nirane wa, nere fai-aita oruwa wesedu aise langa haawe nigidu bodere, nere aise waha nebereha ete oruwa dunege kote wogunga umeru wodbode. Nere oota kesebu langa fai-aita dunege kote bodere, maau saini anyakaro ono worunga heigedu, nere dunege kote gonga, taura anyakaro ono worunga heigedu dunege kote gonga, nere oulaha kaafa kui huuru nigorunga goi nere dunege kote wodbode.

9 Ariya Sipsip magana no kendel laluwa buk fidawou, anyimu kouwou waha orage gainga, ji fai-aita umeru wane waha nebere anunege, alta huuna langa yafa ganenga nerigene. Amina nere fai-aita waha Itou nomo beele danga bagu yaasu bode, nere beele waha malalamudu leganenga, honggoro fai dunege kote wane. 10 Nere anunege waha danga bagu yauredu benou lewane, “Dada oruwa nomo King Anyakaro, ne gai-gai onowou hilobainga tigini ono-ononi. Ne guuni yafani, onodu ne name onowou oruwa no tigini. Ere saini agonyi itari gedenga, ne fai-aita oula langa yafade waha kot langa tafa nigidu ere ebere ganege agou kabaka nere nigauga?” 11 Ariya nere kolos kaamba ufaaroro fai-aita bagu waha etenga-etenga nigi bode benou lenigane, “Tere menanga onou houwe tafagu. Nere honggoro fai tebere haruwe etenga tegou bagu, tebere baitege gane bagu, dunege kote wodbode, wa nere tere dutege kote wane dorofe. Itou no nere fai-aita agonyi dunege kote wodbode waha no amina hangadawai, onodu saini honggoro fai nere fai-aita waha oruwanga dunege kote boro wogunga, ariya, Itou no tere tebere ganetege agou kabaka nigonbona.”

12 Ariya Sipsip Magana no kendel laluwa buk fidawou 6 waha orage gainga, ji ege igeidu boni, oula langa mimi anyakaro heigainga urene. Ono gainga hoonga no beeke asari dorofe usuma heigai. Ono gainga ole no ganenege dorofe oruwanga giriwai. 13 Nere taene nomo baatu jagui fik nauge yoku tuganga nomo bidukula orosode dorofe, nere oula langa oroso wane. 14 Taene fere, nere tagaga olilidu dagede dorofe goi usuwaiha. Ono gainga muju nuuya bagu, nere oruwanga nebere haumu awadu bode, gurutudu goyane. 15 Nere oula nomo king bagu, nere fai unyinege anyakaro bagu, nere oota fai nebere kepten bagu, nere moni fai bagu, nere fai danga bagu, nere haruwe fai ewe yafade waha oruwanga, nere fai ewe nebere gauwou langa yafade waha, nere oruwanga gurarudu goi megebu u-u gamu langa megebu anyaroro muju langa otode waha mogonege langa huwari wane. 16 Onodu nere muju bagu megebu bagu oruwanga benou yauredu lenigane, “Tere Fai no nomo sia king langa yafana waha hogo langa kutau higidu, huwarimu higadenga, Sipsip Magana waha no nomo houmu mayou anyakaro bagu ada maidu ere inyabamu higona. 17 Wa taate bona, nere nga waha neire hounere mayou, nere fai-aita bagu nebere agou inyaba waha kabaka nigei nomo Fati anyakaro waha elebe amina heigaha. Ariya faiwei no neire danga waha edo langa feiyadu yafa dewonbona?”