1 Ami segeyo odoa nelolahilä Yesu e bu Gabaniama obëgëi. Yesu obëgëla misi neala säi amo udia dolö nefolalo amoli sulubadelaea nabaha maadei. 2 Nabalahilä udia dolö yafie Yesu neebea ami mafula gegedoi amea mosö isogige idilibage fimolö fu maade negegi dibegi Yesuea ilima ado mala säla ïaha nelo. 3 Säla ïaha nebegi, dolö afädë fii si sulo amo e neebea ami, dolö biyidiaea iwasala gaula misi. 4 Udia dolö yafie negegi amea, ilia dolö amo Yesu neebea gaula moholö ulï gabugi, mosö fïgïdaia gaula fedalahilä, Yesu e neebe amo gaalu mosö fïgï dusuia galahilä dolö iwasala gaula misi dafu amo mumusogi salisi. 5 Ilia asigi afädë negei nea hamosebe amo bealahilä, Yesuea dolö fii si amoma sähalea, Nïe malö, dia nafade hamoi amoli na hësa maadeimelëla säi.

6 Amala säsebegi, mala dawadigi dolö odoa sefolalo amolia asigiamu helësësalea, 7 dolö goea ado egoweda abeahäla sähadu. Eada Gode gagadesa nea. Gode eamu udia dolöea nafade hamoi amoli hëmolöi neala helësësa sefolalo. 8 Ilia amala helësësa sebe amo ea asigia fodolofalï bealahilä, ilima sähalea, Edoïe dilia go helësësa dialea. 9 Dia nafade hamoi amoli hësa maadeila sämolöle ma, di nowela dïe fëo gaula nawesa namiëla sämolöle. Dolö fii si gowema ado aabeida abodo. 10 Amaimo, Dolöïe Malöea nagadaiawi nea, udia dolöea nafade hamoi amoli hëla digimolöïe geloi gaula neebe amo dilia helësëmäia olesagomelëla säi. Amala sälahilä ea dolö fii si amoma sähalea, 11 Na dima sähago. Di nowela dïe fëo neala gaula dihï mosöa mosalola säi. 12 Amala säsebegi, dolö amo nowelahilä, udia dolö sulubadelaïe sidaia ïe fëo amo neala gaula fodolofalï asi. Amala hamosebegi, ili sefolalo amoli sulubadelaea asigigi fudugilahilä Godeïe ëi gauia adala sähalea, Siiba nelebo gowe gadoi hamose nilïa melëlo mademelëla säla didigai.

13 Yesu e oeabo Galili agesu bu elö nedaha nebegi, udia dolö yafie e neebea ami mafula gegedoi. Gegedosebegi Yesuea ilima ado mala säla ïaha nelo. 14 Säla ïaha nelolahilä awäha nea, Alibiasaïe malö Ilibai e dagisi muni nelo mosöa sebe amo bealahilä, Yesuea ema sähalea, Ne bëgëla misiëla säi. Amala säsebegi, e Yesu bëgëla asi.

15 Yesu e Ilibaia mosöa molö naha sebegi, dolö dagisi nelo yafiege, dolö mala nafade hamolo yafiege, Yesula ïe bëgëla aulola ilibalä gedola salea molö naha sefolalo. Dolö yafie amo gadoi yafieada Yesu awäse amo gadola bëgëla awähamu nelo. 16 Ado säla negei olelelo Felesi dolö amolia beahamelebe, Yesu e dagisi muni neloge, mala nafade hamologe, nefolalo amolibalä gedola salea molö naha sebe melï. Bealahilä ilia Yesuïe bëgëla aulo amolima nabahalea, Mala nafade hamologe dagisi muni neloge, nefolalo amolibalä, e gedola salea molö naha sebegoda edoïela nabi. 17 Amala nabasebegi Yesuea ilima säla obëgësalea, Udia dolö oloi made nefolalebe amolida, alögoda neebea aulo made. Oloi sefolalebe amolimu alögoda neebea aulo. Amo gadola wäla, ne misi weda, udia dolö hedabi nefolalebe amoli wemolö misi made, udia dolö nafade hamolo nefolalebe amoli wemolö misimelëla säla ï.

18 Molö nülo made segeyo amogida, ödägi gelo Yoneïe bëgëla aulo amoliage Felesi dolö amoliage molö naala made aiala nefolalo. Udia dolö odoa maalahilä, Yesuma nabahalea, Yoneïe bëgëla aulo amoliage Felesi dolöïe bëgëla aulo amoliage molö made naala aligilo amogi, Dïe bëgëla aulo golia molö naha nebegoda mi edoïela nabi. 19 Amala nabasebegi, Yesuea ilima säla obëgësalea, Dolö afädëa udia neahalea, udia dolö e damelë molö molö gedoi hï ebalä sefolalebe amolima, dili molö made naala samialola samolöle. Udia nimolö dolö amo ilibalä seëda, ilia molö made naala made samolömelë. 20 Gaso, hobeala dolö amo odoaea sigi gaula asibua, ili molö made naala namolömelëla säi.

21 Amala sälahilä Yesuea ado elö sähalea, Afädëa fagulo goofogi fagulo gähea baala asogelo made. Amala hamoseda, fagulo gähe amea goofo amo nulimolömelë. Amalahilä dafidi nuli amo gadola made bu edela nulimolömelë. 22 Amo gadolamu, dolö afädëa sugua meme gafodoea ödä i hamoi goofo amogida, wani ödä gähe dibe amo söga salelo mademelë. Amala hamoseda, wani ödä amea ödä i sugua meme gafodoea hamoi goofo amo dusulahilä, ödä i amoge wani ödä amoge, hä, nafademolömelë. Amala hamoloea, wani ödä gähe dibe amoda sugua meme gafodoea ödä i hamoi gähegi oselola säi.

23 Segeyo Sabada gafegi Yesu e, ïe bëgëla aulo amolalibalä eladi gadoi ëi widi sagaido afiaha dilo. Afiaha dialea ïe bëgëla aulo amolia widi amoïe gägä faila nana awäha nelo. 24 Nana awäha neebe amo Felesi dolö ilia bealahilä Yesuma sähalea, Nilïle mala säla negei dibe ameada segeyo Sabada gafegi hamolo made amo dïe bëgëla aulo golia damula hamosa nebego bimola säi. 25 Amala säsebegi, Yesuea ilima säla obëgësalea, Siiba Debidia hamoi dëdëla negei dibe amo dilia nidela made neale. Debidige dolö odoa ebalä nefolalo amolige molö maadela sïdëa baagosalea, 26 Abiada e gobela ïlo Busa Edefade nebegi, Debidi e Godeïe mosöa nogila digalahilä beledi Godegali odala ï dilo amo neala mai. Beledi amoda odoaea nülo made, Gobela ïlo amoliamu nülo negei amo ea nalahilä, odoa ebalä nelo amoli muäia neala gaula awäla ïmelëla säi amo dilia made nidei neale. 27 Yesuea ilima säla wagala sähalea, Godea segeyo Sabada gafe hamoi amoda, Udia dolö fifii asi sefolalebe amolia segeyo Sabada gafe ugila negemäia hamoi mademelë. Udia dolö fifii asi sefolalebe amoli ugila negemäia hamoimelë. 28 Amala negei ameada, Dolöïe Malö amoda, segeyo Sabada gafeïe Dafidilo neamelëla säla ï.