1 Yesu e gedolo mosöa bu elö nogila digai. Mosöa amida dolö naabo elö amo balägädöla nafadei afädë sulo. 2 Udia dolö odoa sefolalo amolia Yesuma dia nafadela hamoila sämolölahilä, segeyo Sabada gafegi Yesuea dolö amo wahisebelela bimolöïe ilia si dadaiaha sefolalo. 3 Yesuea dolö naabo nafadei amoma sähalea, Di nowela mogogi namolö misiëla säi. 4 Amala sälahilä ea ilima nabahalea, Nilïa segeyo Sabada gafegi hedabi hamomolö amo dofeale ma, nafade hamomolö amo dofeale. Udia dolö hedabola namiäia damula moholö amo dofeale ma, baagomäia nufulö amo dofealela nabi. Amala nabasebegi, ilia säla obëgëla made sefolalo. 5 Yesuea udia dolö sefolalo amoli sidawewela beahamelebe, ilile iso asigi geloi dibe amo beala yöi. Yölahilä ea dolö naabo nafadei amoma sähalea, Dïe naabo mogodigia gamola säi. Dolö amea naabo mogodigia gai amole ïe naabo amo wahimolöi wahi melï. 6 Amala hamosebe amo bealahilä, Felesi dolö sefolalo amoli segea fodolofalï doadigila awäla Heledo sosogo nefolalo amolibalä gegedolahilä, Yesu baagomäia abilia hamomolödula säla didiäha dilo.

7-8 Yesula ïe bëgëla aulola ili sege ili neloa amo fisila Galili oeabo dibea ami afiai. Ili afiasebegi udia dolö yafiea ili bëgëla afiai. Sege Yudialage, gaamu Yalusalemelage, sege Idumialage, ödä Yodona dëgëla alämadilage, gaamu Daiamadilage Saidonomadilage sege amoligila udia dolö yafie sämolö asusugai Yesuea hamoi amo nabala e bëgëla afialahilä e neebea ami gegedoi. 9 Amala gegedosebegi Yesuea ïe bëgëla aulo amolima sähalea, Udia dolö yafie gegedoi amea ne fëdöla dedelei gabugi, ne dudaia fedadelä dilia du afädë gaula maala ne neebe gaalu, ga made negesimola säi. 10 Ea udia dolö yafie dafidi wahilasi amo gadola, udia dolö oloi sefolalo amoliage ili wahilasimäialahilä, ilia e digimolöïe gegedoi amea dedelei. 11 Mugabe amolia e bealahilä ïe emo mia gumusula dia digalahilä, üalala digila sähalea, Dida Godeïe malömelëla säi. 12 Amala säsebegi, ea mugabe amolima gelola sähalea, Odoama ne Godeïe malö neala säla ïmabiola säi.

13 Yesu e segebidaia fedalahilä, dolö odoa hï hamei amoli misiäia wesebegi, ili e neebea ami misi. 14-15 Maasebegi ea dolö giwilasi amoli ebalä namolöïe ili memelelahilä, ea ilile ëi abosolo negei. Ilia Godeïe ado mala säla ïmolö mosäiage, mugabe fedai nesila digimolöïe geloi iligali ïmolöïege ea ili memelei. 16 Giwilasi memelei amolile ëida gowe ili. Saimono, Yesuea ïe ëi elö Fida negei amoge, 17 Sebediïe malö Yamesege, ïe edoo Yonege, Yesuea elele ëi elö Boaneyisi negei. Nilïle ado sälada sege gudusebeïe malöla säla negei amolege, 18 Äduluge, Filibige, Badolomiuge, Madiuge, Domasage, Alibiasaïe malö Yamesege, Dadiusige, Selodo sosogo Saimonoge, 19 Yudasa Isagaliada, Yesu hololölo amoge. Giwilasi amoli Yesuea memelei. Amala memelesa maadelahilä, Yesu e mosöa asi.

20 Udia dolö yafie bu gegedoi amea, Yesula ïe bëgëla aulola amolali molö molö fu made melï. 21 Amala hamoimelëla säi amo nabalahilä, Yesu sosogo nefolalo amolia e bea asi. Mida, odoa ilia e gagaosa neala säi amogi. 22 Mala dawadigi dolö Yalusalemela digafui amolia sähalea, Mugabe Belesabuluda Yesuma fedai nea.*Belesabuluïe ëi elöda, Saidani. Madiu 12.22-28 bimalo. Mugabe ilile busaea ema geloi ïasegi, ea mugabe nesila digisa neamelëla säi. 23 Amala säsebegi, Yesuea ili mofiamolahilä ilima ado besula sähalea, Mugabe Saidani hïmuda abilia nesila digimolöi gabu. 24 Sege afädëgi fii hilimu mogela nuduseda, fii amoda geloi made bimolömelë. 25 Mosö afädëgi fii hilimu mogela nuduseda, mosö amoda gelola namolö mademelë. 26 Mugabe Saidania hïmu ado neala, e sosogo neebe amoli mogeseda, amoda dofä geloi made aligila, hogosa helesa maademolömelë. 27 Afädëa dolö geloi neebe amoïe mosöa ïe nelegei dibe amo fa nimolö moholöi mademelë. Ea dolö geloi amo dafidi naabo emoge nafodola negesiä ïe mosöa nelegei dibe amo fa nimolö moholöi galë. 28 Na dilima dofä gelola sähago, Udia dolöea nafade hamoi amoli sulubadelage, gagadela ado nafade elö elöla säi amolige, hëla fisimolöi bimolömelë. 29 Be afädëa Eleloi Gesami gagadeseda, made hëmolö. Ïe nafade hamoi amoda, walioge hobealage hï ebalä diamolöi diamolömelëla Yesuea säi. 30 Ilia Yesu e mugabe fedai neala säi amo nabala ea ado amo amala säi.

31 Segeyo amo gala Yesuïe eme edoolali mafula segea ifo baagido nea. Odoa ilima sähalea, Yesu e nilï neebeawi misialasebela sämola säi. 32 Amala säsebegi, udia dolö yafie Yesu amalela sefolalo amolia ema sähalea, Nabahale. Dïe dieme didoo dialifilali misi segea nea. Ilia di misialala säsebela säi. 33 Amala säsebegi, ea säla obëgësalea, Nïe neme nedoolalida nowë gabula säi. 34 Ea e amalela sefolalebe amoli sidawewela bealahilä ilima sähalea, Bimo. Neme nedoolalida sefolalebe gowemelëla säi. 35 Udiaeage dolöeage, Godea hamese amo gadola hamolo nefolalebe amolida, nedooge nalifige nemege amolimelëla säi.