83
A ninge, a ninge na lotu ta Asap iakan.
1 God, waak u kis matien.
Waak u kis kunkun, God. Nu taman tut.
2 Nng 2:1-2Nes ira num ebar bia diet tut na kamahar,
ma diet ing diet malentakuane ugu diet hatamat habaling diet.
3 Diet keskes wara tangtange ira nianga kumaan uta diet ira num matanaiabar,
ma diet harpingit bia diet na hagahe diet ing u kalak tar.
4 Est 3:6Diet tange, “Mai, dahat gi haliare diet no kidilona huntunaan Israel,
waing daga lik luban hatikane no hinsang Israel.”
5 Dan 6:7Diet harpingit tika ma tiga lilik.
Diet tur tika pane ugu,
6 2Sto 20:10; Stt 25:12-16; 1Sto 5:10diet me Edom ma ira Ismael,
ira Moab, no huntunaan ta Hagar,
7 Jos 13:5; Ese 27:3,9; 1Sml 15:2; 4:1; 29:1; Amo 1:9ira Gebal, ira Ammon, ma ira Amalek,
no huntunaan ta Pilistia, ma ira matanaiabar me Taia.
8 2Kng 15:19; Lo 2:9Ma ira Asiria mah i te tur tika ma diet
wara harharahut ira Ammon ma ira Amalek, ira iruo huntunaan na bulumur tane Lot.
9 Het 7:1-24; 4:7,15,21-24Gil ta diet hoing u ga gil ta ira Midian,
ma hoing u ga gil tane Sisera ma Jabin kaia tano taah Kison,
10 ing dir ga maat ares Endor.
Ma ira palatamai diet ira udir umri ga marsang tano pise.
11 Het 7:25; 8:12,21Bu bing ira udiet lualua hoing u ga gil ta Oreb ma Seeb,
ma ira udiet kabinsit hoing u ga gil ta Seba ma Salmuna,
12 ing dal ga tange, “Dahat gi kap leh no bilai na pise tane God wara udahat.”
13 Ais 17:13Nugu God, se harbasiane diet hoing ira kaabus,
ma hoing ira pala wit no dadaip i puuh se tar.
14 Hoing ra iaah i iaan tano malit,
bia hoing tiga karamena iaah i hakarat ira uladih,
15 io, pasak mur diet ma no num tamat na dadaip
ma nu haramramin diet ma no num dadas na baiangin.
16 Watong, hamalahuan diet,
waing ira tunotuno diet naga silihe ugu.
17 I tahut be diet naga hirhir ma diet naga tapunuk hathatika.
I tahut be diet na maat ma ra hartakun,
18 Ais 45:21waing diet naga nunure be augu, nong no hinsaam no Watong,
bia augu sen mon Nong i Naliu Harsakit tano ula hanuo bakut.