85
A nianga tupas no tunotuno nong i kure ira ut na ninge: ira bulumur ta Korah diet ga pit iakan ra ninge na lotu.
1 Jer 30:18; Ese 39:25Watong, u ga hamines no num harmarsai tano num taman.
U ga bul pukus no bilai na nilon ta ira Israel.
2 Nam 14:19; Jer 31:34U ga lik luban ira tintalen ing pai takodas ta ira num matanaiabar
ma u ga tuh burung ira udiet magingin sakena bakut.
3 Lo 13:17U ga bul kapis ira num nginangahien bakut
ma u ga tahurus sukun no num tamat na ngalngaluan.
4 Dan 9:16God, no numehet Ut na Harhalon, hasigarine habaling mehet,
ma sangeh tano num nginangar taar ta het.
5 U lik tar bia nu ngalngaluan hatika taar ma mehet?
U lik bia nu halawaas mah no am kamahar taar ta ira bulumur?
6 A tutun saakit nu hasigarine habalin mehet,
waing ira num matanaiabar diet naga guama taam.
7 Watong, hamines no num harmarsai nong pai la patpataam ta mehet,
ma tabar mehet ma no num harhalon.
8 Hag 2:9; Sek 9:10Iau ni taram ta ira linge God no Watong na tange,
kanong i kukubus wara tar malum ta ira uno matanaiabar, diet ira uno tus.
Iesen waak bia diet tapukus taar ta ira udiet magingin na sakbatbat.
9 Sek 2:5; Jn 1:14Tutun saakit bia no uno harhalon i hutet ta diet ing diet urur tana,
waing no uno minamar naga tale bia na kis narako tano udahat taman.
10 No harmarsai ma no tutun na magingin dir hanuat harso.
A takodasuana magingin ma ra malum dir la kiskis tika.
11 Ais 45:8No tutun na magingin i puat puasa mekai tano ula hanuo,
ma no takodas na magingin i nanaas suur meram ra mawe.
12 Jm 1:17; WkP 26:4; Ese 34:27Masa, no Watong na tar ira bilbilai,
ma no udahat pise na hatahuat ira hunena.
13 No takodas na magingin i la hanahaan menalua tano Watong
ma i la tangtagure no uno ngaas na hinahaan.