No Pakpakat ta Pol tupas ira
EPESAS
Iakan ra pakpakat ta Pol i hasahesa palai ta ira mangana haridaan narako ta Karisito tupas dahat (nas Epesas 1.3-14). Narako ta Karisito, Kalou i ta pilak dahat (1.4), i ta halon hapatangen dahat (1.5), i ta kul halangalanga dahat (1.7), i ta lik luban sei ira nudahat magingin sakena (1.7), ma i ta barai bat dahat ma no Halhaliana Tanua (1.13) wara hamhaminis bia dahat na tinanei ira bilai na haridaan (1.11; 1.14). Ma Kalou ga halon dahat hua bia a pirlat na haan tupas ia (1.6, 12, 14). Io hua, Pol ga sasaring bia dahat ira Kristian dahat na nunurei timaan iakan ra mangana harhalon ta Kalou (1.15-23). Naluai dahat ga kis taar manapu ta ira nudahat magingin sakena senbia Kalou ga marsei dahat (2.1-7) ma siga tikai i nurnur ta Karisito, Kalou na tabar bia mon ia ma no tutun na nilon, ma pataia tikai pai tale bia na gil tiga linga naga kap iakano harhalon ta Kalou (2.8-10). Naluai, dahat ing pai Iudeia dahat, dahat ga helik ta Kalou, senbia narako ta Karisito i ta his pakur ira Iudeia ma dahat ing pai Iudeia dahat, ma dahat tiga sigara kapawena tunatuna kaiken (2.11-3.13). Iakanong a tamat na linga sakit ma ga kis susuhai ta ira haleng tinahon (3.3-6) ma Pol ga sasaring bia dahat naga tale wara nunurei kilam iakan ra bilai na harmarsai ta Karisito (3.14-21). Ma bia Kalou i ta halon dahat hua i tahut bia dahat na tatalen haruat ma no nudahat sigara nilon (4.1-6.20). Dahat na nas kilam bia dahat tiga kapawena palatamai Karisito (4.1-16) ma dahat na sigam no nudahat sigara nilon (4.17-32). Dahat na lon tano madaraas (5.1-21) ma dahat na gil ira bilbilai ta ira sua dahat, ira nati dahat, ira puasi dahat, ira adahat sus, ma ta ira nudahat watong ma ira tultulai (5.22-6.9). Ma wara haphapataam no nuna nianga, Pol ga tangai hadadas bia dahat na sigam ira bilai na linga na hinarubu maram ta Kalou hoing tiga umri ing dahat naga harubu timaan ma ira mangana sakana tanua ma dahat naga tur dadas talur ira sakena (6.10-20). I nanaas bia no suruna ta iakan ra pakpakat i hoken, bia dahat ira Kristian dahat na lon haruat ma no bilai na harhalon Kalou i ta tabar dahat ma ia narako ta Karisito.
1
Iau Pol tiga apostolo ta Iesu Karisito haruat tano nemnem ta Kalou. Ma iau pakat kaiken tupas muat ira mataniabar tus ta Kalou kaia Epesas, muat ira tena nurnur tano numuat kinkinis ta Iesu Karisito.
A harmarsai ma ra malum tupas muat maram ta Kalou no adahat Sus ma no nudahat Watong Iesu Karisito.
Ira haridaan narako ta Karisito
A pirharlat uram tupas Kalou. Ia no God ma no Tata tano nudahat Watong Iesu Karisito nong gata haidanei dahat aram ra mawai ma ira linga bakut i haruat wara harharahut ira tanua dahat tano nudahat kinkinis narako ta Iesu Karisito. Ma hua mah, ga pilak dahat tano nudahat kinkinis narako ta Karisito manaluai at tano hakhakisi tano ula hanua waing pa da tale bia da kilam tar tiga sakena ta dahat senbia dahat na gamgamatien ra matmataan tana. 5-6 Kalou ga manga sip dahat, kaikek gaam pua tar manaluai bia na halon hapatangen dahat wara natina tano nudahat kinkinis narako ta Karisito. Kanong warah, ga sip ma ga guama mah bia na gil hua bia dahat naga pirlat no nuna maririsuan na harmarsai nong ga tabar bia mon dahat ma ia tano nudahat kinkinis narako ta iakano tunatuna nong Kalou i la manga sip tar ia. 7-8 Dahat ing dahat narako ta Karisito, ga kul halangalanga dahat ma no gapina ing Kalou ga lik luban sei ira nudahat magingin sakena. Ma ing ga gil hua taar ta dahat ga gil haruat ma no nuna harmarsai nong i tamat sakit, iakano harmarsai nong Kalou ga manga tabar dahat ma ia ma ra tamat na mintota tikai ma ra nasnas kilam ta ira linga bakut. Ira linga Kalou ga guama bia na gil, ga bul no nuna lilik bia na gil sot narako tano nilon ta Karisito. Hokaiken, ga hapalainei dahat ta ira linga ing i sip bia na gil ing ga susuhai manaluai. 10 Ma na papalim haruat ma iakano lilik tano pakana bung tus ta kaiken ra linga bia ira linga bakut aram ra mawai ma makai tano ula hanua mah diet naga hanuat hulungai manapu ta Karisito. 11 Kalou i sala gilgil ira linga bakut haruat ma no nuna lilik i hanuat maram narako tano nuna nemnem. Hokaiken, tano nudahat kinkinis narako ta Karisito, Kalou ga pilak lah dahat bia dahat a nuna mataniabar tustus kanong ga pua tar at naluai hua haruat ma no nuna lilik. 12 Ma ga gil hua bia dahat ing dahat ta nanaho taar ma ra nurnur ta ira linga narako ta Karisito, dahat ra burena bia a pirharlat na tupas no minari Kalou. 13 Ma muat kis narako ta Karisito mah kanong muat ta hadadei no hinhinawas utano tutuna, no tahut na hinhinawas nong i kap hahuat no numuat harhalon. Ma ing muat ga nurnur, Kalou ga barai bat muat ma no Halhaliana Tanua wara nuna tus, iakano Tanua nong Kalou ga kukubus taar ta dahat utana. 14 Ga tabar dahat ma no Halhaliana Tanua wara tartar bat no pinlawe dahat ing dahat na kap namur. Hokaiken, no Tanua i sura haut bia Kalou na tinanei tutun dahat ira nuna tus at, dahat ing Kalou gata kul halangalanga dahat. Ma kaiken ra linga a burena bia a pirharlat na tupas no minari Kalou.
Pol ga sasaring bia dahat naga nunurei timaan Kalou
15-16 Ma iakanong no burena bia iau la saasaring uta muat. Iau ga ser lah ira numuat nurnur tano Watong Iesu ma ira numuat harmarsai uta ira mataniabar tus ta Kalou. Io, tuk taar kaiken pa iau sangeh wara tangtanga tahut ta Kalou uta muat ing iau la kilkilam muat narako ta ira nugu sinsaring. 17 Iau la sarsaring haitnei no God tano nudahat Watong Iesu Karisito, ia no nudahat tamat na Tata, bia na tabar muat ma ra mintota ma na hapuasnei ira tutuna utana taar ta muat, waing muat naga manga nunurei timaan ia. 18-20 Iau sasaring mah bia na hamadaraas ira bala muat, muat naga nunurei ira linga ing i tahuat tano nuna tintau tupas muat ing muat kis kahai ma ra nurnur utanei, ma bia muat naga nunurei no tamat na maririsuan na pinlawe muat ing muat ira nuna mataniabar tus, muat na kap ia maram tana, ma bia muat naga kilinganei mah no nuna tamat na dadas sakit nong i la paapalim nalamin ta dahat ira tena nurnur ma ia. Iakano dadas i haruat ma no nuna tamat na dadas nong Kalou ga papalim ma ia ing ga hatut habal Karisito talur ra minaat ma ga tar ra kinkinis tana tano sot na limana aram ra mawai. 21 Ma no nuna kinkinis hua i tamat sakit ta diet ing diet ta kap ra kinkinis na warkurai ma diet ira tena harbalaurai ma diet ira mes na lualua mah. Ma no hinsana i tamat sakit mah ta ira hinsang bakut kaiken ma ta iakano mes na pakana bung nong na hanuat namur. 22-23 Ma Kalou ga bul hasur ira linga bakut manapu ta ira lapar ra kaki Karisito. Ia no tamat na lualua ta ira linga bakut ma Kalou ga tar ia hua taar ta ira mataniabar na lotu, diet no palatamaina nong Karisito i hakidilona diet, ia nong i sala hakidilona tutun ira linga bakut.