6
1 Go kina Yauweyana ilatuwokoigu idigo kana,
‘Ame tuta bei kugite manakaegu aguinuwa Pero yaina. Moitamo. Nimagu toogagaina goi bei komi Isileli tubunao ivalilivemi kona. Ina kaba lovina goi bei ivatapiyemi!’
2 E tuwaina idigo kana,
‘Yau Yauwe.†Abv 17:1; Tat 3:13-15. 3 Tutayana boi toinigu akaiwoduwegu Eberamo be Aisake be Yakobo yaidi goi, alatuwokoidi Yau Yaubada Tokalika go, yoigu Yauwe, moe geya avatulukoidita. 4 Nakae boi akanasiukoidi go, akatótula bego da Kenani idi poyapoya bei avinidi. Boi poyapoyayana goi situliya nakae sieogaoga. 5 Yau bogina Isileli tubunao idi kalayawoi anove. Idi kalayawoiyana unana da Itipita sipakoidi, tauna kidi da Itipita idi pakonayao. Idi lida anove, e guna kanasíuna yaidi goi anuwokavate. 6 Tauna semowo Isileli tubunao kulatuwokōidi kam,
“Yau Yauwe. Da Itipita idi kogúyala moumouna goi bei ayavemi. Ami pákwana goi bei ataligeimi be nakae nimagu toogagaina bei ayosale bei guna liuna gagaidi avinidi go, komi bei atatetemi. 7 Bei akinavemi komi guna bodao go, Yau imi Yaubada. Bei koyagoigu Yau Yauwe imi Yaubada, da Itipita idi kogúyala moumoudi goi bei ayavemi 8 go, avakedemi koma poyapoyayana goi boi nimagu akatuulagasi akatótula bego Eberamo, Aisake be Yakobo avinidi. Ame poyapoyayana bei komi imi poyapoya. Yau Yauwe.” ’
9 E tuwo ataoya, ana Isileli tubunao nakae alatuwokoidi go, wowodi sikaliwoya be adi kogúyala ivakaigaga, tauna sopagu geya sikabikaoneyeta.
10 E Yauwe ilatuwokoigu idigo kana,
11 ‘Kutāoya kūna Pero da Itipita adi tolovina kulatuwōko Isileli tubunao ina kaba lovina goi italigeimi.’
12 Go yau adigo kagu,
‘Kunōve! Segowo Isileli tubunao sopagu geya sikabikaoneyeta go, Pero masa bei sopagu ikabikaone. Yau maegu imoumou!’
13 E Yauwe ibóbwara Eroni be yau yaima, e ima lovina semao Isileli tubunao manudi be nakae Pero da Itipita adi tolovina manuna ivinima, idigo kana,
‘Isileli tubunao Itipita goi kokabīdi konavēdi.’
Mosese ana liliu
14 Ame Isileli tubunao adi dala yawou aiyuwo adi nunu adi tovakumgoyao:
Isileli ina botomoya Rubeni natunao koroto ame nakae: Enoki be Palu, Esironi be Karami.†Abv 46:9. Ame tauna dala yoina Rubeni ana nunu adi tovakumgoyao.
15 Ame Simion natunao koroto: Yamweli,‡aYamweli: Ame youyana Yoy 26:12 goi moe Namweli. Yamini, Owadi, Yakini, Sokara‡bSokara: Ame youyana Yoy 26:12 goi moe Seraki. be Saulo. Sauloyana sinana guma Kenani.†Abv 46:10; Yoy 26:12. Ame tauna dala yoina Simion ana nunu adi tovakumgoyao.
16 Ame Livai natunao koroto adi bíbina goi: Gerasoni, Kowate be Merari.†Abv 46:11; Yoy 3:17-20, 26:57-58; 1Te 6:16-19. Kina Livai ana tala ana badabada 137 tutayana ikámasa.
17 Gerasoni natunao koroto adi bíbina goi ame nakae: Livani be Simei go, niga moe tubudiyao adi nunu yoidi nakae.
18 Kowate natunao koroto ame nakae: Amram, Isari, Ebironi be Useyeli. Kowate ana tala ana badabada 133 tutayana ikámasa.
19 Merari natunao koroto ame nakae: Makili be Mse. Ame tauna dala yoina Livai ana nunu adi tovakumgoyao adi bíbina goi.
20 E Amram inai tamana niuna yoina Yokebedi. Niga go Yokebediyana natunao koroto Eroni be yau ivenatunima. Amramyana ana tala ana badabada 137 tutayana ikámasa.
21 Isari natunao koroto ame nakae: Kora, Nepegi be Sikiri.
22 Useyeli natunao koroto ame nakae: Misaeli, Elisapani, Siteli.
23 E Eroni inai Aminadabi natuna yoina Eliseba go, Eliseba siyana yoina Nakasoni. Elisebayana ivenátuna, natunao koroto ame nakae: Nadavi be Abaiu, Eliyasa be Itamari.
24 E Kora natunao koroto ame nakae: Asira, Elikana be Aviyasapi. Ame nunu tamo tamo Kora ina bodao goi.
25 E kina go Eroniyana natuna Eliyasa inai Putiyeli natuna go, ivenátuna, natuna koroto yoina Pinikasi.
Ame tauna dala yoina Livai ana nunu adi tovakumgoyao.
26 E ame Eroniyana be yau Mosese boi Yauwe ilatuwokoima kana,
‘Kōna semiyao Isileli tubunao Itipita goi kokabīdi konavēdi go, kidi badabadaaidi dala dala nakae goi sisowóduwo.’
27 Moe kai ama taiyuwo, e kana Pero da Itipita adi tolovina kalatuwoko kai Isileli tubunao itagonema Itipita goi kasowóduwo. Ame Eroniyana be yau Mosese.
Yauwe aiyuwoina Mosese be Eroni
ietunedi sina Pero goi tetelina
ietunedi sina Pero goi tetelina
28 E tutayana Itipita goi Yauwe ilatuwokoigu, 29 idigo kana,
‘Yau Yauwe. Kūna Pero da Itipita adi tolovina kulatuwōko kaga liliuna bogina alatuwokoim.’
30 Go yau adigo kagu,
‘Kunōve. Yau maegu imoumou. Masa bei Pero sopagu ikabikaone.’