Mosese ina kawoi be ina kabikáwana tetelina
3
(Tateta 3:1—7:7)
Yauwe ina sowóduwo Mosese yaina tetelina
1 E yau go yaogu da Midiyani adi Tonúwala Iyetoro‡Iyetoro: Ame tauyana youyuwoina moe Reuweli (Tat 2:16). ina yoguyoguyao amatakaavatedi. Amatakaavatedi go, akabidi, yoyowo goi avadamanedi, anavedi koiboga dadavina koya yoina Korevi goi. Koyayana moe Yaubada ina koya. 2 E amoko goi Yauwe ina anerose yeu sabeninimina nakae isowóduwo yaigu.†Gui 7:30-34. Yeuyana taliboibo sinaena ininínima. Go taliboiboyana agite, akaliwoisa unana geya igabuyeta geya. 3 Tuwo anuwonúwana kagu,
‘Iyaa! Kaga unana taliboibo geya igabuyeta? Amo nakona aba kainaopa tayamo gagaina. Tuwo abala ana agitedoko.’
4 E Yauwe igitegu bego abala ana taliboibo agite, tuwo taliboiboyana sinaena goi iduduwegu idigo kana,
‘Mosese, Mosese!’
‘U. Amegu’, kaegu.
5 Tauyana idigo kana,
‘Taabu kumamāima kikigu! Im sendoro kukitakīdi,‡Im sendoro kukitakīdi: Tutayana Mosese ina sendoro ikitakidi moe nakae ikamoitamo bego poyapoyayana Yaubada ina poyapoya, ina kaba lovina. kuyatōidi. Moe poyapoyayana goi kuutaoya poyapoya kimaasabaina yau umagu.’†Gui 7:33.
6 Kana,
‘Yau tamam ina Yaubada be nakae tubumowo Eberamo, Aisake be Yakobo idi Yaubada†Tat 3:15; Mad 22:32; Mak 12:26; Luk 20:37; Gui 3:13, 7:32. boi yaigu sisaakululu.’
E tuwo magu matoita maisigu avamou, govila bei Yaubada agite, akámasa. 7 E Yauwe idigo kana,
‘Guna bodao Itipita goi idi kaiyakomou moitamo bogina agitedoko be idi taiyaduduwo adi tolovinayao pasidi bogina anovedoko. Adi gedageda bogina alotowo. 8 Tauna asou ama bei da Itipita nimadi goi ayavedi. Itipita goi bei akabidi atukoedi anavedi poyapoya tayamo goi silokasa. Amo poyapoyayana dedevina be buutumina gagaina, maaliina be lobooinina. Poyapoyayana moe Kenani tubunao, Eta tubunao, Emori tubunao, Perisi tubunao, Ivai tubunao be Iyebusi tubunao idi kasa. 9 Gwa! Kunovēgu. Semowo Isileli tubunao idi taiyaduduwo bogina ima yaigu, e bogina anove be nakae bogina agite da Itipita manakaedi siyogedegededi gagaina. 10 Tauna tuta ame goi aetunem kuna Pero yaina kukawanoi guna bodao Isileli tubunao italigeidi bei Itipita goi kukabidi kumedi.’
11 Go yau adigo kagu,
‘Go yau avatau bego ana Pero matana goi akawanoi? O yau avatau bego sopagu ikabikaone go, Isileli tubunao italigeidi, e Itipita goi akabidi amedi? Geya!’
12 Go kina Yaubada idigo kana,
‘Yau Tauyagu bei avakitaum go! Aba kinana avinim bei kuyagoi bego moitamo Yau aetunem. Aba kinanayana ame nakae: Tutayana semowo Isileli tubunao Itipita goi kumedi, e ame koyayana goi bei kosakululu Yau imi Yaubada yaigu.’
13 Go yau adigo kagu,
‘Go neta ana osegowo alatuwokoidi kagu, “Tubudao idi Yaubada ietunegu ama yaimi” go, neta kidi kadi, “Go Tauyana yoina manakoyoina?” e yau bei manakaegu akatumapu?’†Tat 6:2-3.
14 Yaubada idigo kana,
‘Yau Tauyagu Aiiyakoigu.†Tat 6:3; Iyo 8:58, 13:19; Ibe 13:8; Nuw 1:4,8, 4:8, 11:17, 16:5. E tomotayadi ame nakae kulatuwokōidi kam,
“Tauyana toinina ivayou kana, ‘Yau Tauyagu’, e amo Tauyana ietunegu ama yaimi.” ’
15 Tuwaina Yaubada idigo kana,
‘Isileli tubunao kulatuwokōidi ame nakae: Kam,
“Yauwe, Tauyana tubudao Eberamo, Aisake be Yakobo idi Yaubada,†Tat 3:6; Mad 22:32; Mak 12:26; Luk 20:37; Gui 3:13, 7:32. ietunegu ama yaimi.”
E ame yoiguyana ikaiyako vata. Nakae ame youyana goi malamalágata tamo tamo bei sinuwokavategu.
16 Tauna kūna Itipita goi go, Isileli tubunao idi tomoyamoya kududuwēdi sima kulatuwokōidi kam,
“Kina Yauwe tubudao idi Yaubada, moe Eberamo, Aisake be Yakobo idi Yaubada isowóduwo yaigu idigo kana, ‘Bogina avadademi, tuwo bogina ayagoi kaga isowóduwo yaimi Itipita goi, tauna bei aguinuwa. 17 Tauna akatótula bei da Itipita idi yogedageda goi akabimi go, anavemi poyapoya maaliina be lobooinina goi. Poyapoyayana moe kidi Kenani tubunao, Eta tubunao, Emori tubunao, Perisi tubunao, Ivai tubunao be Iyebusi tubunao idi kasa.’ ”
18 Isileli tubunao sopam bei sikabikaone. E tuwo idi tomoyamoya taiyao kōna da Itipita adi tolovina kolatuwōko kami,
“Yauwe, kai Iberiu ima Yaubada bogina ivalobodema. Tauna ame kama kakawanoi yaim bego kutagonema kana yoyowo goi maliyalina aito kaketoiya bei amoko goi ima yoguyoguyao kagabudi kakasaledi Yauwe ima Yaubada yaina.”
19 Go Yau bogina ayagoi bego da Itipita adi tolovina bei itagonemi kosowóduwo neta guna togaga goi to abuneneteyamo. 20 Tuwo Yau nimagu bei abisisobu, guna guinuwa aba kainaopa liliudi aguuinuwedi da Itipita toinidi idi kasa goi go, aba kainaopayadi goi bei asapidi. Asapidi ikavava, tauyana bei italigeimi kosowóduwo. 21 Anuwóiya goi da Itipita nukotodi bei asanayatoidi. Moeko goi idi kanuwóiya bei kobabane. E tutayana bego kosowóduwo kona, geya kada nima kaka geya,†Tat 12:35-36. 22 go sem imi vevina tamo tamo bei sina da Itipita idi vada goi vevina liliudi yaidi sikawanoi siriba be goura be nakae kwama dedevidi manudi. Sivinimi ikavava, kokabīdi natumiyao kovalosīdi. Tauna da Itipita konadi liliudi bei kotalagogodedi.’
‡3:1 Iyetoro: Ame tauyana youyuwoina moe Reuweli (Tat 2:16).
‡3:5 Im sendoro kukitakīdi: Tutayana Mosese ina sendoro ikitakidi moe nakae ikamoitamo bego poyapoyayana Yaubada ina poyapoya, ina kaba lovina.
†3:6 Tat 3:15; Mad 22:32; Mak 12:26; Luk 20:37; Gui 3:13, 7:32.
†3:14 Tat 6:3; Iyo 8:58, 13:19; Ibe 13:8; Nuw 1:4,8, 4:8, 11:17, 16:5.
†3:15 Tat 3:6; Mad 22:32; Mak 12:26; Luk 20:37; Gui 3:13, 7:32.