12
Livalakaibala toni tánuwo manuna:
Avatauwa neta Yaubada Natuna siikatae bei liuna sibabane
Avatauwa neta Yaubada Natuna siikatae bei liuna sibabane
(Madiu 21:33-46; Luke 20:9-19)
1 E Yeisu ivatowo livalakaibala goi Diyuu idi tolovinayao ivatulukoidi idigo kana,
‘Koroto tayamo ina tánuwo goi oine kaka ibaguli. Ibaguli ikavava, gurewa ikabidi tanuwoyana ana kali ikaudakodako. Ikavava, oine ana kaba vavetaveta ogalaoina goi bobosiu ieli oine ana kaba saligógana manuna. Ikavava, tanuwoyana sinaena vada aba yáusa tayamo maanawena iyowo ituko ina. Iyowo ikavava, koroto maniyedi itagonedi tanuwoyana sikatoguye go, niga dibayoya ana tuta oine keuwoina maniyena bei toni tánuwo siemaisi. Tuwo tokatoguyadi sikaaiyaka tánuwo sipaaisewa go, kina toni tanuwoyana itáoya ina ituli ta dadava.†Ais 5:1-2. 2 Go ina pákwana tayamo dibayoya ana tuta goi ietune ina ina tánuwo ana tokatoguyao yaidi goi bego tánuwo ana takona oine maniyena ikabidi imedi. 3 Ago imamaima, kidi tokatoguyadi siyoisi, siláui. Siláui ikavava, nima kaka sietunemnei ina toni tánuwo yaina goi. 4 Tuwo toni tanuwoyana ina pákwana aiyuwoina ietune ina tokatoguyao yaidi goi go, siyoisi, dabana siláui be nakae sigieomaemae. 5 Tuwo ina pákwana aitonina ietune ina go, sikaumate. Tauna nakae iisowóduwo toni tánuwo ina pakonayao koroto badabadaidi yaidi; maniyedi silauidimo, maniyedi sikauumatedi. 6 Go tayamo toito nava ikaaiyaka, toni tánuwo natuna, ana kakaya. Inuwonúwana kana,
“Tuwo bokoyo natugu bei aetune ina. Nakona bei tauyana sigite odi imayamaya.”
Tuwo moitamo natunayana moe aba lukavava ietune ina. 7 E ina go, amo tokatoguyadi aditava sibóbwara kadi,
“Amo toni tánuwo natuna imamaima. Tauyana tamana ana katumapu. Tuwo ima, tayōisi takaumāte bei tanuwoyana kita ida kaba lovina.”
8 Tuwo moitamo tauyana ima kikidi, e siyoisi sikaumate. Ikavava, silave ina takiki goi.
9 Tauna tomoyayana, moe toni tánuwo, bei kaga iguinuwe tokatogu yaidi goi? Bei ina ikaumatedi go, ituli ta tokatogu dedevidi bei itagonedi tanuwoyana simatakavate. 10 Go manakae? Ame tomwanayana Gínina Kimaasabaina goi konuuwaisi gea geya? Tomwanayana Guyau manuna idigo kana,
“Gurewayana kidi toyówana siikatae
bogina imalalasáuna.†Gui 4:11; 1Pi 2:4,7.
11 Ame Yauwe ina guinuwa go,
guinuwayana moe aba kainaopa kita yaida.” ’
Same 118:22-23
12 Go kidi Tonúwala Gagaidi be Yaubada ina Katukeda ana tovatulukwanayao be Diyuu idi tomoyamoya enao siilusala bei Yeisu siyoisi go, boda simatoitedi. Moitamo. Tonuwalayadi, tovatulukwanayadi be tomoyamoyayadi bogina siiyagoi bego Yeisu ina livalakaibala goi iidigedi, e boda nakae bogina sinove, tauna nakona kaga bei sivekoidi. Go enao geya, tuwo Tauyana sikalave sina.
Lumadádana Sisa ina takisi manuna
(Madiu 22:15-22; Luke 20:20-26)
13 E tuwo Diyuu adi tolovinao Parisi maniyedi be nakae Erodi ina bodao‡Erodi ina bodao: Ame tauyadi Diyuu go, latuwodi Erodi ilovina. Tauna Erodiyana sivaite bego lovinayana ikabi. sietunedi sima Yeisu bego ina livala goi sikatutao. 14 E sima Yeisu silatuwoko sidigo kadi,
‘Tovatulúkwana, bogina kayagoim bego kom moitamo be nakae kom tomota geya kutagonedita nuwom siikobale. Moitamo. Tomota kuwowooinedi geya adi kaigigita goi geya, tauna geya kunuwonuwoneta tomota manakaedi sinuwonúwana im vatulúkwana manuna geya, go sem Yaubada ina kenao kuvatulukwana dókana. Tauna manakae? Itoboine kita tatakisi Sisa yaina gea geya? Manakaem kunuwonúwana, takisi tavini gea tuwo?’
15 E idi pola bogina iiyagoi, tauna idigo kana,
‘Komi manakae bego kokatutaoigu! Mani tayamo kokābi kōme agite.’
16 E tayamo sikabi sime go, Yeisu idigo kana,
‘Mani ame goi avatau makayauna be nakae yoina?’
‘Sisa’, tauyadi kaedi.
17 E kina go Yeisuyana idigo kana,
‘Moe moitamo. Tauna kaga neta Sisa konana, e Sisayana tavīni go, kaga neta Yaubada konana, e Yaubadayana tavīni.’
Tauyadi sikainaopa ina katumapu pasina.
Yeisu ina vatulúkwana
tokámasa idi taoyamna manuna
tokámasa idi taoyamna manuna
(Madiu 22:23-33; Luke 20:27-40)
18 E Sadusi maniyedi sima Yeisu yaina. Tauyadi sidigodigo tokámasa geya sitaoyamneta.†Gui 4:2, 23:8. E sima bego Yeisu sikatutao sidigo kadi,
19 ‘Tovatulúkwana, boi nimatu ida lovina Mosese igini idigo kana,
“Koroto nainaina neta geya natunamo go, ikámasa, e aena vavilaina itoboine kobuina inai. Niga neta vavinayana ivenátuna, natunao moe tokámasa ana katumapu.”
Atukeda 25:5-6
20 Tayamo aba gita ame nakae:
Koroto adi badabada adi tainima adi taiyuwo sinadi tayamo sikaaiyaka. Botomoya igiminai go, geya natunamo ikámasa. 21 Tuwo aena vavilaina itáoya, tuwowona kobuina ikabi inai go, niga geya natunamo ikámasa. Niga amo tauyana aena vavilaina itáoya, tuwowona kobuina ikabi inai go, nakae geya natunamo ikámasa. 22 Tauna nakae korotoyadi adi tainima adi taiyuwo. Vavinayana sinai go, geya natudimo sikámasa. Korotoyadi liliudikova sikamasa kówasa, namliyeta baige vavinayana nakae ikámasa. 23 Tauna neta moitamo tomota ámasa goi sitaoyamna, e amo tutayana goi tauyadi nakae bei sitaoyamna go, korotoyadi yaidi ava koroto moe vavina monena mooitamoina? Bogina kuyagoi. Korotoyadi adi tainima adi taiyuwo boi mainao nava maa yawoidi go, vavinayana liliudi sinai.’
24 Go kina Yeisuyana idigo kana,
‘Ame pasina komi kobágala: Gínina Kimaasabaidi geya koyagoidita be nakae Yaubada ina togaga geya koyagoiyeta! 25 Tutayana tokámasa sitaoyamna, koroto be vevina nai geya, go sem idi kaiyaka anerose yábana goi nakae; tauyadi nai geya.
26 Ego tokámasa adi kaitáoya manuna, Mosese ina buki goi tauyana tetelina ikaaiyaka go, manakae? Geya kokatuyaiviyeta ae? Boi ikaaiyaka go, yeu taliboibo sinaena Yaubada isowóduwo Mosese ilatuwoko idigo kana,
“Yau tubumowo Eberamo, Aisake be Yakobo idi Yaubada.”†Gui 3:13, 7:32.
Tateta 3:6
27 Moeko goi taayagoi tauyadi maa yawoidi yábana goi Yaubada yaina sikaaiyaka. Tauna Yaubada kina geya kada tokámasa idi Yaubada geya, go sem tauyadi maa yawoidi idi Yaubada. Moitamo. Komi kobágala gagaina. Tokámasa moitamo bei sitaoyamna.’
Lovina gagaina Yaubada ina Katukeda goi
(Madiu 22:34-40; Luke 10:25-28)
28 Niga Yaubada ina Katukeda ana tovatulúkwana tayamo ima Yeisu be Sadusi idi kaumakimaki inove go, bogina igite Yeisu ina katumapu yaidi goi dedevina. Tuwo ilumadade idigo kana,
‘Lovina liliudi Yaubada ina Katukeda yaidi goi, ava lovina gagaina?’
29 Go kina Yeisu idigo kana,
‘Lovina ame, lovina gagaina kana,
“Isileli tubunao konōve. Ida Yaubada moe Yauwe; Yauweyana anetava.‡Anetava: Diyuu niyadi goi ame livalayana itoboineda takaigavile kada, ‘Tayamo.’ Go aiyuwoina nakona ana yagoina moe anetava. 30 Tauna Yauwe imi Yaubada komataakoīye atemi madabokinakova goi be yawoimi madabokinakova goi be nuwomi madabokinakova goi be imi togaga madabokinakova goi.”
Atukeda 6:4-5
31 Lovina aiyuwoina ame nakae kana,
“Siyami komataakoīye nakae toinimi komatakooiyemi.”†Mad 5:43, 19:19; Mak 12:33; Rom 13:9; Gal 5:14; Ibe 13:1; Yem 2:8.
Vininabeso 19:18
Geya tayaamo lovina ikaaiyaka ame lovinayadi aiyuwo ikalisavedi.’
32 Yaubada ina Katukeda ana tovatulukwanayana idigo kana,
‘Moitamo, tovatulúkwana! Kom kubóbwara moitamo. Mosese igini kana,
“Yauwe anetava Yaubada. Geya tayaamo yaubada tuwaina ikaaiyaka geya.”
Atukeda 4:35
33 Aiyuwoina tauyana kana,
“Tauyana komataakoīye atemi madabokinakova goi be imi nuwonúwana madabokinakova goi be imi togaga madabokinakova goi.”
Atukeda 6:5
Nakae kana,
“Siyami komataakoīye nakae toinimi komatakooiyemi.”†aMad 5:43, 19:19; Mak 12:31; Rom 13:9; Gal 5:14; Ibe 13:1; Yem 2:8.
Vininabeso 19:18
Vininabeso yoguyogu sivakaasavedi adi kasala be nakae yoguyogu sikauumatedi adi kasala liliudi Yaubada yaina dedevidi go, ame lovinayadi aiyuwo sikalisavedi.’†b1Sa 15:22; Sam 40:6; Ose 6:6; Mik 6:6-8; Mad 9:13, 12:7; Ibe 10:6,8.
34 Yeisu igite korotoyana mana nanamsa ikatumapu, tuwo idigo kana,
‘Giyakainava bei Yaubada ina kalibúbuna goi kusiu.’
Moeko goi geya vatau tayaamo tuwaina mana katepatu bego Yeisu ilumadade.
Guyau moe Devida tubuna be nakae ina Tomoya
(Madiu 22:41-46; Luke 20:41-44)
35 Niga Yeisu Vada Kimaasabaina goi ivaatulúkwana go, tomota ilatuwokoidi idigo kana,
‘Atukeda ana tovatulukwanayao manakae sidigodigo bego Guyau moe Devida tubuna ame tauna? 36 Go boi nimatu Baloma Kimaasabaina Devida nukotona isanayato, tuwo idigo kana,
“Yauwe ibóbwara guna Tomoya ilatuwoko kana,
‘Kūma wowoina basekoina kakataigu goi kutusōbu
ana kadókana im kaleyayao avasobusoobuyedi kulovinaedi.’ ”†Gui 2:34-35; Ibe 1:13.
Same 110:1
37 Tauna Devida igimibíbina namliyeta Guyau go, Devidayana Guyau ikatoomoyae, ae? Tauna tayagoi Guyauyana moe Devida tubuna go, tuwaina, Tauyana Tomoya, e Devida itobusave!’
E kidi boda gagaina madi uyáwana Yeisu sitaiyakeke.
Atukeda ana tovatulukwanayao
idi sinapu be kóbuya idi sinapu
idi sinapu be kóbuya idi sinapu
(Madiu 23:1-36; Luke 20:45—21:4)
38 Yeisu ina vatulúkwana goi idigo kana,
‘Ami dodōkana kidi Yaubada ina Katukeda ana tovatulukwanayao. Kidi sinapu ame latuwodi: Madi kwama maanawedi be nakae kaausaraidi sivaabebeo. Aba maketi goi tomota sima sikatoomoyaedi. 39 Tapwaroro ana kaba tugúguna sinaena wowoina basekoina goi siitusobu. Áika gagaidi goi sisiu wowoina basekoina goi siitusobu. Ame guinuwayadi kidi nuwodi sikabi. 40 Tauyadi kóbuya idi vada be konadi sivaaobudi be nakae idi kawanoi polapola Yaubada yaina simamanao bego tomota sigitedi. Ame tauyadi adi liuna gagaina bei sibabane.’
41 Ibóbwara ikavava, itusobu, vininabeso ana kaba yata ikaonako go, tomota badabadaidi idi mani siyatayata idumakaavatedi. Idumakaavatedi, toesaesa idi mani gagaidi siyatayata 42 go, tayamo kóbuya ima ina vininabeso mani aiyuwo iyatoidi, moe ana lamgógana mani giyaina toina. 43 Tuwo Yeisu ina tovatotowanayao iduduwedi sima, ilatuwokoidi idigo kana,
‘Iyaa! Kóbuya amo ina vininabeso aba kainaopa! Ame alatuuwokoimi konōve: Amo kobuyayana tookaina ina vininabeso iyato moe gagaina namliyeta tomota liliudi idi vininabeso aba yata goi siyatayata. 44 Ame moitamo. Kidi go tomotayadi liliudi sima idi mani gagaina vininabeso ana kaba yata goi siiyatoidi go, idi kesa gagaina ikaaiyaka. E kina go kobuyayana ina mani madabokiina iyato. Geya kada tayaamo ina kesa ikaaiyaka bei avana igimona.’
†12:1 Ais 5:1-2.
‡12:13 Erodi ina bodao: Ame tauyadi Diyuu go, latuwodi Erodi ilovina. Tauna Erodiyana sivaite bego lovinayana ikabi.
‡12:29 Anetava: Diyuu niyadi goi ame livalayana itoboineda takaigavile kada, ‘Tayamo.’ Go aiyuwoina nakona ana yagoina moe anetava.
†12:31 Mad 5:43, 19:19; Mak 12:33; Rom 13:9; Gal 5:14; Ibe 13:1; Yem 2:8.
†a12:33 Mad 5:43, 19:19; Mak 12:31; Rom 13:9; Gal 5:14; Ibe 13:1; Yem 2:8.
†b12:33 1Sa 15:22; Sam 40:6; Ose 6:6; Mik 6:6-8; Mad 9:13, 12:7; Ibe 10:6,8.