Yeisu ina guinuwa Yerusalema goi
11
(Maki 11:1—13:37)
Yeisu tokalibúbuna nakae
Yerusalema goi isiusiu tetelina
Yerusalema goi isiusiu tetelina
(Madiu 21:1-11; Luke 19:28-40; Iyoni 12:12-19)
1 E tutayana bogina Yerusalema goi sivakakana, e sina asa Betapegi be Betani Oribe Koyaina papanaina goi. Go Yeisu ina tovatotowanayao adi taiyuwo ivamoleyedi sina asa goi. 2 Go mainao ilatuwokoidi idigo kana,
‘Kōna asa amo matada goi go, tutayana kosiu, ase bonatuna siikonina bei kobabane. Bonatunayana goi geya vatau tayaamo itulagakone. E kobabane, kotaligēi kōme yau yaigu. 3 Go avatau neta ilatuwokoimi idigo kana,
“Kaga unana moe koguuinuwe?”
Komi kodīgo kami,
“Tomoya latuwona iepaisewe, e mainao bei ietunemnei ima.” ’
4 Tuwo adi taiyuwokova sina asayana goi sisiu, ase bonatuna tayamo sibabane enao goi iitaoya, siikonina vada ana kali ana kaba siu goi. 5 Sitaaligei go, tomota maniyedi amoko goi sikaaiyaka sidobala ina tovatotowanayaoyadi sigitedi, tuwo sidigo kadi,
‘Kaga unana ase bonatuna kotaaligei?’
6 Adi taiyuwokova silatuwokoidi nakae Yeisu idige. Tuwo tokaiyako sitagona aseyana sikabi. 7 Sikabi, sime Yeisu yaina goi go, adi tanigo sivalilividi aseyana toluna goi sisekulidi. Ikavava, Yeisu itulaga. 8 Boda maniyedi sima adi tanigo sivalilividi enao goi sieveidi. Go maniyedi magimagi gigidi bogina siiutudi simedi, e enao goi sieveidi. 9 Go boda Yeisu sivaakitau, maniyedi matana goi, maniyedi mlina goi. Sivaakitau go, siiduduwo kadi,
‘Tauyana takilagāsi!
Tauyana Yauwe yoina goi imamaima kaaipakuna!† Mad 23:3; Luk 13:35.
Same 118:25-26
10 Tauyana ina kalibúbuna tubuda Devida nakae
imamaima kaaipakuna.
Tauyana takilagāsi ituko toina!’
11 Yeisu boda taiyao siketoiya sina Yerusalema goi sisiu. Sisiu, Yeisu ina Vada Kimaasabaina ana kali sinaena goi isiu, imatavilavila. Ikavava, isowóduwo go, asa bogina lavilavi, tauna mana tovatotowanayao yawou aiyuwo asayana goi sisowóduwo sikaluvila sina Betani.
Yeisu keukeu ikatuubolate tetelina
(Madiu 21:18-19)
12 Niga vanuwo itomo, sitaoya Betani sikalave siiketoiya go, Yeisu loga ikámasa. 13 Ikandobala tupwana aduwanau goi keukeu tayamo igite bogina idugo. Tuwo ibala ina igite nakona ikéuwo gea geya. Go ima, ikandolaga igite geya keuwoinamo, go sem vaga kaka. Bogina kuyagoi. Amo tutayana moe geya keukeu ana tuta geya. 14 Tuwo ikatubolate idigo kana,
‘Kom bei geya kuukēuwo!’
Go ina livalayana kidi ina tovatotowanayao bogina sinove.
Yeisu tokaigimona Vada Kimaasabaina goi
ivataapiyedi tetelina
ivataapiyedi tetelina
(Madiu 21:12-13; Luke 19:45-48; Iyoni 2:12-17)
15 Kidi Yeisu sima Yerusalema goi sisiu. Sisiu sina Vada Kimaasabaina ina kali goi sisiu go, Yeisuyana ivatowo tokaigimona be togimona ivatapiyedi sisiya. Ago mani ana totalamapuyao idi teboro be bunabuna adi tokaigimonayao idi kaba tusobu nakae ikausepaledi. 16 Geya tayaamo tomota itagone bego konana tayamo iikavale Vada ana kaliyana goi iivaupa. 17 E ikausepaledi ikavava, ivatowo ivatulukoidi idigo kana,
‘Komi bogina koyagoi Gínina Kimaasabaina Yaubada manuna italavaita idigo kana,
“Guna vada moe boda liliudi adi kaba kawanoi.”
Aiseya 56:7
Go komi koyatako tovaináwana idi kaba tamumu.’† Yer 7:11.
18 Ago kidi Tonúwala Gagaidi be Yaubada ina Katukeda ana tovatulukwanayao sinove Yeisu manakaena ibóbwara, tuwo enao siilusala bei manakaedi Tauyana sikaumate. Bogina kuyagoi. Tauyana simaatoite unana boda gagaina nukotodi sikabi. Moitamo. Ina vatulukwanayana pasina kidi boda madabokidi nukotodi siwowówana gagaina. 19 Go maliyalina tamo tamo goi neta bogina lavilavi toina, e Yeisu mana tovatotowanayao asa Yerusalema siikalave.
Keukeu katuboolataina Yeisu ina livala pasina ivaadiwówana tetelina
(Madiu 21:20-22)
20 Itomo nobuyana nava matagougouna tauyadi sitaoya, siketoiya sinonoina bego Yerusalema go, keukeuyana sigite lamna goi ituko ina sipona goi bogina ivadiwówana. 21 Tuwo kina Pita Yeisu ina katubolatayana inuwopeye, tauna Yeisu ilatuwoko idigo kana,
‘Tovatulúkwana Toolagaim, keukeuyana boile kukatuubolate kugīte, bogina ivadiwówana.’
22 Go kina Yeisu idigo kana,
‘Yaubada koonumīse. 23 Moitamo toina! Ame alatuuwokoimi konōve: Avatau neta koya ame ilatuwoko kana, “Yaubada ikabim ilavem kusōu négwasa goi” go, nuwona goi geya inanayuwoita, go sem iinumisa bego kaga iivatoi moitamo bei isowóduwo, e nakae bei isowóduwo tauyana manuna.† Mad 17:20; Luk 17:6; 1Ko 13:2. 24 Moe pasina tauna ame alatuuwokoimi konōve: Kaga liliuna kokawaanoiye Yaubada yaina, konumīsa bego dogoiyana bei kobabane, e moitamo bei kobabane. 25-26 Ago tutayana kotaoya bei kokawanoi, neta tomota idi bágala yaimi goi sikaaiyaka, e bagalayadi konuwotaōidi bego Tamada guma yábana nakae bei imi bágala inuwotaoidi.’‡ Nakona tomwana 26 Maki geya iginiyeta, go sem, tokaidámana toinina ina nuwonúwana igini. Tomwana 26 ame nakae: Ego neta geya konuwotaoidita, e Tamada nakae komi imi goyo geya inuwotaoidita.† Mad 6:14-15.
Diyuu adi tolovinayao
Yeisu ina lovina sivaakakone tetelina
Yeisu ina lovina sivaakakone tetelina
(Madiu 21:23-27; Luke 20:1-8)
27 Aiyuwoina sima Yerusalema goi sisiumna go, sina Vada Kimaasabaina ana kali goi sisiu. Sisiu, sinaena Tauyana ivaabebeo go, kidi Tonúwala Gagaidi be Yaubada ina Katukeda ana tovatulukwanayao be Diyuu idi tomoyamoyayao sima 28 Tauyana silumadade sidigo kadi,
‘Avatau ina lovina goi moe guinuwayadi kuguuinuwedi? Nakae avatau itaagonem kuguuinuwedi?’
29 E kina go Yeisuyana idigo kana,
‘Yau nakae lumadádana tayamo alumadademi. Kokatumāpu, bei alatuwokoimi avatau ina lovina goi ame guinuwayadi aguuinuwedi. 30 Guna lumadadanayana ame nakae: Iyoni ina sayóyova moe Yaubada ina lovina goi gea tomota idi lovina goi? Kokatumāpu.’
31 Tuwo kidi aditava sibobóbwara kadi,
‘Bei manakaeda? Neta kada, “Yaubada goi”, e Tauyana bei kana,
“Moe moitamo! Tauna kaga unana geya konumiseyeta?”
32 Go sem neta kada, “Tomota goi”, e boda bei manakaedi?’
Ame tauyadi boda simatooitedi seki kaga bei sivekoidi. Bogina kuyagoi. Boda liliudi sinuwonúwana Iyoni moitamo toina tokabivalavala tayamo. 33 Tuwo Yeisu silatuwoko sidigo kadi,
‘Geya kayagoiyeta avatau ina lovina goi.’
Go kina Yeisu idigo kana,
‘Yau nakae, geya alatuwokoimita avatau ina lovina goi ame guinuwayadi aguuinuwedi.’