20
Diyuu adi tolovinayao
Yeisu ina lovina sivaakakone tetelina
Yeisu ina lovina sivaakakone tetelina
(Madiu 21:23-33; Maki 11:27-33)
1 Tuta tayamo Vada Kimaasabaina ina kali goi boda sikaaiyaka Yeisu ivatuulukoidi be Vala Dedevina itaalavaite yaidi go, kidi Tonúwala Gagaidi be Yaubada ina Katukeda ana tovatulukwanayao be Diyuu idi tomoyamoya sima 2 Tauyana silumadade sidigo kadi,
‘Kulatuwokōima avatau ina lovina goi moe guinuwayadi kuguuinuwedi? Nakae avatau itaagonem kuguuinuwedi?’
3 E kina idigo kana,
‘Yau nakae lumadádana tayamo. Guna lumadadanayana ame nakae: Kolatuwokōigu 4 Iyoni ina sayóyova moe Yaubada ina lovina goi gea tomota idi lovina goi?’
5 E kidi aditava sibobóbwara sidigo kadi,
‘Bei manakaeda? Neta kada, “Yaubada goi”, e Tauyana bei kana,
“Moe moitamo! Tauna kaga unana geya konumiseyeta?”
6 Go neta kada, “Tomota goi”, e boda madabokidi bei gurewa goi sikaumateda. Boda sinumisa Iyoni Yaubada ina tokabivalavala tayamo.’
7 Tuwo Yeisu silatuwoko sidigo kadi,
‘Geya kayagoiyeta avatau ina lovina goi.’
8 Kina Yeisu idigo kana,
‘Yau nakae geya alatuwokoimita avatau ina lovina goi ame guinuwayadi aguuinuwedi.’
Livalakaibala toni tánuwo manuna:
Avatauwa neta Yaubada Natuna siikatae, bei liuna sibabane
Avatauwa neta Yaubada Natuna siikatae, bei liuna sibabane
(Madiu 21:33-46; Maki 12:1-12)
9 E Yeisu ivatowo livalakaibala ame tomota ivatulukoidi, idigo kana,
‘Tayamo koroto ina ina tánuwo goi oine kaka ibaguli.†Ais 5:1. Ibaguli ikavava, koroto maniyedi itagonedi tanuwoyana sikatoguye go, niga dibayoya ana tuta goi oine keuwoina maniyena bei toni tánuwo siemaisi. Tuwo kidi tokatoguyadi sikaaiyaka tánuwo sipaaisewa go, tauyana itaoya ina ituli ta dadava goi bei ikaaiyaka tuta maanawena.
10 Niga dibayoya ana tuta goi toni tanuwoyana ina pákwana tayamo ietune ina ina tánuwo ana tokatoguyao yaidi goi bego ina tánuwo ana takona oine maniyena ikabidi imedi. Ago imamaima, kidi tokatoguyadi siyoisi, siláui. Siláui ikavava, nima kaka sietunemnei ina toni tánuwo yaina goi. 11 Tuwo toni tanuwoyana ina pákwana aiyuwoina ietune ina tokatoguyao yaidi goi go, amo tauyana nakae siyoisi, siláui be nakae sigieomaemae. Ikavava, nima kaka sivalilive ikaluvilamna ina toni tánuwo yaina goi. 12 Tuwo toni tanuwoyana ina pákwana aitonina ietune ina go, ame tauyana nakae siyoisi siláui sibugoyai toina. Ikavava, sivatapiye isiya. 13 E tomoya, moe toni tanuwoyana, idigo kana,
“Manakaegu bei? Bokoyo natugu guna kakaya bei aetune ina. Nakona bei tauyana sigite odi imayamaya.”
14 E tuwo moitamo natunayana ietune ina go, kidi tokatoguyadi sikandobala tauyana sigite imamaima. Tuwo aditava sibobóbwara kadi,
“Amo toni tánuwo natuna imamaima. Tauyana tamana ana katumapu. Tuwo ima, tayōisi takaumāte bego tanuwoyana kita ida kaba lovina.”
15 Tuwo moitamo tauyana ima kikidi, e siyoisi silave ina takiki goi sikaumate.
Tauna tomoyayana, moe toni tánuwo, bei kaga iguinuwe tokatogu yaidi goi? 16 Bei ina ikaumatedi go, ituli ta tokatogu dedevidi bei itagonedi tanuwoyana simatakavate.’
E totaiyakekayadi Yeisu ina livalakaibala sinove, sidigo kadi,
‘Iyaa! Moe nakae bei geya, geya toina!’
17 E Yeisu ipotekaavatedi go, idigo kana,
‘Go moe Gínina Kimaasabaina ina talavaita ame ana yagoina! Talavaitayana kana,
“Gurewayana kidi toyówana siikatae
bogina imalalasáuna.”†Gui 4:11; 1Pi 2:4,7.
Same 118:22
18 Gurewayana moe yau. Tuwo avatauwa neta sikataegu moe nakae tomota neta sikapusi sisou gurewayana goi, e tauyadi bei ivatuguguyalidi. Nakae avatauwa neta yatadi goi gurewayana isou, bei ikauvetevetedi.’
Lumadádana Sisa ina takisi manuna
(Madiu 22:15-22; Maki 12:13-17)
19 Tuwo Yaubada ina Katukeda ana tovatulukwanayao be Tonúwala Gagaidi enao siilusala bei Yeisu siyoisi tuta amo goi go, boda simatooitedi. Moe moitamo. Tovatulukwanayadi be tonuwalayadi bogina siiyagoi Yeisu ina livalakaibala goi iidigedi, e boda nakae bogina sinove, tauna nakona kaga bei sivekoidi. 20 Tuwo Tauyana siiyamwasi tuta dedevina goi bei siyoisi. Toyáusa maniyedi sietunedi sima Tauyana yaina. Go tauyadi tokibóbwata polapola, e sima bego Yeisu ina livala goi sikatutao bei itoboinedi siyoisi gávana nimana goi siyato kotu manuna. 21 E sima madi katunuwanuwa Yeisu silumadade, sidigo kadi,
‘Tovatulúkwana, bogina kayagoim bego kaga kom kubobobore be kuvaatulúkwana moe moitamo. Tomota kuwowooinedi geya adi kaigigita goi geya, go sem livala moitamo goi Yaubada ina kenao kuvatulukwana dókana. 22 Tauna manakae? Itoboine kita tatakisi Sisa yaina gea geya?’
23 E idi katutáwana bogina iiyagoi, tauna idigo kana,
24 ‘Mani tayamo kovatulukōigu.’
Tayamo sime sivatuluko, Tauyana idigo kana,
‘Mani ame goi avatau makayauna be nakae yoina?’
‘Sisa’, tauyadi kaedi.
25 ‘Moe moitamo. Tauna kaga neta Sisa konana, e Sisayana tavīni go, kaga neta Yaubada konana, e Yaubadayana tavīni’, Tauyana kaena.
26 Tuwo toyausayadi tomota matadi goi geya itoboinedita bei ina livala goi sikatutao. Ago sikainaopa ina katumapu pasina, tuwo situgaumo.
Tokámasa idi taoyamna manuna
(Madiu 22:23-33; Maki 12:18-27)
27 E Sadusi maniyedi sima Yeisu yaina. Tauyadi sidigodigo tokámasa geya sitaoyamneta.†Gui 23:8. Tuwo sima bego Yeisu sikatutao sidigo kadi,
28 ‘Tovatulúkwana, boi nimatu ida lovina Mosese igini idigo kana,
“Koroto nainaina neta geya natunamo go, ikámasa, e aena vavilaina itoboine kobuina inai. Niga neta vavinayana ivenátuna, natunao moe tokámasa ana katumapu.”
Atukeda 25:5-6
29 E tayamo aba kinana ame nakae: Koroto adi badabada adi tainima adi taiyuwo sinadi tayamo sikaaiyaka. Kina botomoya igiminai go, geya natunamo ikámasa. 30 Tuwo aena vavilaina itaoya tuwowona kobuina ikabi inai go, niga geya natunamo ikámasa. 31 Niga amo tauyana aena vavilaina itaoya, tuwowona kobuina inai go, nakae geya natunamo ikámasa. E korotoyadi adi tainima adi taiyuwo liliudikova nakae. Vavinayana sinai go, geya natudimo sikámasa. 32 Sikamasa kówasa namliyeta vavinayana nakae ikámasa. 33 Tauna neta moitamo tomota ámasa goi sitaoyamna, e amo tutayana goi korotoyadi yaidi ava koroto moe vavina monena mooitamoina? Korotoyadi adi tainima adi taiyuwo boi mainao nava maa yawoidi go, vavinayana liliudi sinai.’
34 Go kina Yeisuyana idigo kana,
‘Tuta ame goi da poyapoya, koroto nakae vevina, nai geya. 35 E kidi go da poyapoyayadi yaidi goi avatauwa neta Yaubada itakinoidi bego itoboinedi bei tokámasa yaidi sitaoyamna, amo tutayana tauyadi nai geya. 36 Ame moitamo. Geya itoboinedita sikamasamna. Kidi anerose nakae be nakae kidi Yaubada natunao unana bogina ámasa goi sitaoyamna.
37 Go tokámasa adi kaitaoya manuna, moe Mosese bogina ikaiwoduwe yaimi taliboibo igabugabu tetelina goi. Tutayana taliboiboyana kikina ikaaiyaka, kidi Eberamo, Aisake be Yakobo bogina sikámasa go, tuwo nava Moseseyana Yauwe ivayoko kidi idi Yaubada kana,
“Eberamo, Aisake be Yakobo idi Yaubada.”†Gui 3:13, 7:32.
Tateta 3:6,15
38 E Yaubada kina geya kada tokámasa idi Yaubada geya, go sem tauyadi maa yawoidi idi Yaubada. Ame moitamo. Tokámasa madabokidi maa yawoidi Yaubada yaina.’
39 Go kidi Yaubada ina Katukeda ana tovatulukwanayaoyadi maniyedi sidigo kadi,
‘Tovatulúkwana, kom kubobwara dókana!’
40 Tauyadi nakae sibóbwara unana geya idi katepatumo bego tuwaina Yeisu silumadade. Moe pasina nakae sibóbwara.
Guyau moe Devida tubuna be nakae ina Tomoya
(Madiu 22:41-46; Maki 12:35-37)
41 E Yeisu ilatuwokoidi idigo kana,
‘Tomota maniyedi manakae sidigodigo bego Guyau moe Devida tubuna ame tauna? 42 Gwa! Guyau moitamo Devida tubuna go, aiyuwoina Guyauyana moe Tomoya. Moe nakae boi Devida buki Same goi Guyauyana manuna igini kana,
“Yauwe ibóbwara guna tomoya ilatuwoko kana,
‘Kūma wowoina basekoina kakataigu goi kutusōbu
43 ana kadókana im kaleyayao
avasobusoobuyedi kulovinaedi.’ ”†Mad 22:44; Mak 12:36; Gui 2:34-35; Ibe 1:13.
Same 110:1
44 Tauna Devida igimibíbina namliyeta Guyau go, Devidayana Guyau ikatoomoyae ae? Tauna tayagoi Guyauyana moe Devida tubuna go, tuwaina, Tauyana Tomoya, e Devida itobusave!’
Yeisu Yaubada ina Katukeda
ana tovatulukwanayao be Parisi ibowoidi tetelina
ana tovatulukwanayao be Parisi ibowoidi tetelina
(Madiu 23:1-36; Maki 12:38-40)
45 E boda liliudi Yeisu sitaaiyakeke go, ina tovatotowanayao ilatuwokoidi idigo kana,
46 ‘Ami dodōkana kidi Yaubada ina Katukeda ana tovatulukwanayao. Kidi sinapu ame latuwodi: Madi kwama maanawedi be nakae kaausaraidi sivaabebeo. Aba maketi goi tomota sima sikatoomoyaedi. Tapwaroro ana kaba tugúguna sinaena wowoina basekoina goi siitusobu. Áika gagaidi goi sisiu wowoina basekoina goi siitusobu. Ame guinuwayadi kidi nuwodi sikabi. 47 Tauyadi kóbuya idi vada be konadi sivaaobudi be nakae idi kawanoi polapola Yaubada yaina simamanao bego tomota sigitedi. Ame tauyadi adi liuna gagaina bei sibabane.’