8
Liuna aiyuwoina:
Kwekwe Nairi goi sisinalaga
Kwekwe Nairi goi sisinalaga
1 E Yauwe ilatuwokoigu idigo kana,
‘Kūna Pero kulatuwōko kudīgo kam,
“Yauwe ibóbwara ame nakae, idigo kana, ‘Guna bodao kutaligēidi bei sima sisakululu yaigu. 2 Go neta kuvagagaledi, e am dodōkana. Bei kwekwe aetunedi siwo im kasa madabokina goi bei aliunemi. 3 Nakae kwekwe Nairi goi bei sibadabada, e bei sisinalaga sima im vada goi sisiu, im kaba masisi vabodaupaina goi be nakae kebam goi. Aiyuwoina bei im pakonayao be nakae da Itipita idi vada goi sisiu. Nakae imi kaba vaipolu goi sisiu be imi noko goi sisowoya. 4 Kwekweyadi bei sipela kom, im tomota be nakae im pakonayao yatami goi sitowo!” ’
5 E tuwo Eroni be yau kana Peroyana kalatuwoko. Ikavava, e Yauwe ilatuwokoigu idigo kana,
‘Eroni kulatuwōko aitukoyana iyosale sákala be oveya be nakae otoku yatanaidi goi, e bei kwekwe sisinalaga Itipita goi.’
6 Tuwo moitamo Eroni alituwoko ikavava, nimana ikatulagasi Itipita bwaedi ivasakikinakoidi, e kwekwe sisinalaga Itipita sivatum. 7 E kidi tomeméyava idi méyava goi nakae siguinuwe, e kwekwe sivaituwedi da Itipita idi kasa goi sisinalaga. 8 Tuwo Pero inuwonúwana, geya, Eroni be yau iduduwema kana ilatuwokoima idigo kana,
‘Yauwe yaina kokawanōi bei kwekwe ikabidi da Itipita be nakae yau yaima goi go, tomotayadi bei ataligeidi sina idi yoguyoguyao sigabudi sikasaledi Yauwe yaina.’
9 E adigo kagu,
‘Dedevina. Kom toinim kulovina ava tuta latuwom akawanoi kom be im pakonayao be da Itipita liliudi manumi bei kwekwe sikavava komi be nakae imi vada goi go, Nairi kaka goi bei sikaiyaka.’
10 ‘Itomo’, Peroyana kaena.
Tuwo adigo kagu,
‘Nakae kudige bei isowóduwo, e bei kuyagoidoko bego geya vatau tayaamo ikaaiyaka nakae Yauwe ima Yaubada. 11 Kwekweyadi bei sikalavemi kom be im vada be im pakonayao be nakae da Itipita. Nairi kaka goi bei sikaaiyaka.’
12 E Eroni be yau katáoya Pero kakalave go, kasowóduwo. Kasowóduwo, aduduwo Yauwe yaina kwekwe boi iiyatoidi Pero yaina manudi. 13 E moitamo Yauwe iguinuwe nakae guna livala. Tuwo kwekweyadi da Itipita idi vada, idi kasa be nakae idi tánuwo goi sikamasa kówasa. 14 Ikavava, sakavaidi sivagugunidi gúguna badabadaaidi goi, tuwo asa ibówana. 15 E tutayana Pero igite kwekwe bogina sikavava, mainao aiyuwoina idabakasamna, tuwo Eroni be yau geya inovemeta nakae Yauwe boi bogina idige.
Liuna aitonina:
Kaukau imaladimokíkila
Kaukau imaladimokíkila
16 E Yauwe ilatuwokoigu idigo kana,
‘Eroni kulatuwōko kudīgo kam,
“Im kaituko kuyosāle, poyapoya kaukauna kusāpi bei kaukauyana Itipita ana madabokina goi imaladimokíkila.” ’
17 E tuwo moitamo nakae kaguinuwe. Aitukoyana Eroni iyosale, poyapoya kaukauna isapi. Ikavava, dimokíkila badabadaaidi sisowóduwo tomota be nakae yoguyogu goi. Poyapoya kaukauna madabokina Itipita ana madabokina goi imaladimokíkila. 18 E tomemeyavayadi madi méyava sipoikíkina poyapoya kaukauna goi dimokíkila sikaiwoduwedi go, geya itoboinedita. Tuwo dimokikilayadi tomota be yoguyogu yaidi goi sikaaiyaka.
19 E tomemeyavayadi Pero silatuwoko sidigo kadi,
‘Ame Yaubada ina togaga.’†Luk 11:20.
Go kina Peroyana nava idaabakasa, tuwo geya inovemeta nakae Yauwe boi bogina idige.
Liuna aivasina:
Nenéola asa Itipita sivakayaodei
Nenéola asa Itipita sivakayaodei
20 E Yauwe ilatuwokoigu idigo kana,
‘Itomo nobuyana giyaina kutāoya, kusōu kuīwo sákala Nairi goi Pero kutuuyaōsi. Kunōve. Tauyana itomo nobuyana bei isou iiwo ina Nairi goi. Tutayana iwowoiwo bwae manuna kūna kulatuwōko kudīgo kam,
“Yauwe ibóbwara ame nakae, idigo kana, ‘Guna bodao kutaligēidi bei sima sisakululu yaigu. 21 Go nakae bogina adige, neta guna bodao geya kutaligeidita, e am dodōkana. Nenéola badabadaidi bei aetunedi siwo kom, im pakonayao be da Itipita yaimi goi be nakae imi vada goi. Tuwo komi da Itipita imi vada be nakae poyapoya goi kootáoya nenéola bei sivatum. 22 Ago amo maliyalinayana goi guna bodao idi kasa Goseni bei atavileiyedi, e amoko goi nenéola geya sikaiyaketa. Moeko goi bei kuyagoidokoigu bego Yau Yauwe im kasa Itipita goi akaaiyaka. 23 Yau guna bodao be kom im bodao go, nauyayanaidi goi túwana bei ayato. Itomo ame aba kinanayana bei isowóduwo.’ ” ’
24 E tuwo Yauwe iguinuwe nakae ilatuwokoigu go, Pero geya inoveguta. Tuwo nenéola badabadaidi sina Pero be nakae ina pakonayao idi vada goi sisiu. Neneolayadi da Itipita idi kasa madabokina sikaaigoyai. 25 E tuwo Pero inuwonúwana geya, Eroni be yau iduduwema kama ilatuwokoima idigo kana,
‘Kōna imi yoguyoguyao kogabūdi kokasalēdi imi Yaubada yaina go, ameko Itipita sinaena goi nakae koguinūwe.’
26 Go yau adigo kagu,
‘Moe geya itoboinemeta ameko Itipita sinaena goi nakae kaguinuwe. Kai bei yoguyogu kagabudi kakasaledi Yauwe ima Yaubada yaina go, kaga kagabugabu moe aba kalagíwala komi da Itipita matami goi. Nakona nakae kakasaledi go, kogitema, e giya gurewa goi bei kokaumatema. 27 Itoboine maliyalina aito goi kaketoiya kana yoyowo goi ima yoguyoguyao kagabudi kakasaledi Yauwe ima Yaubada yaina nakae boi bogina ilatuwokoima.’
28 Tuwo Pero idigo kana,
‘Bei ataligeimi kona yoyowo goi imi yoguyoguyao kogabudi kokasaledi Yauwe imi Yaubada yaina go, taabu kononōina aduwanau, go sem tupwana yomana goi. Go kokawanōi manugu.’
29 E adigo kagu,
‘Gwa! Ame bei akalavem go, ana akawanoi Yauwe yaina gobe itomo, nenéola sivagisiyasiya kom, im pakonayao be nakae da Itipita yaimi. Go kom sem, taabu aiyuwoina kupolapōla boi nakae im pola, e geya kutaligeimeta bego kana ima yoguyoguyao kagabudi kakasaledi Yauwe yaina.’
30 E tuwo atáoya Pero akalave go, asowóduwo ana akawanoi Yauwe yaina. 31 E Yauwe iguinuwe nakae akawanoi. Nenéola Pero, ina pakonayao be da Itipita liliudi yaidi goi ikabidi ikalavedi. Ikavava, geya kada tayaamo nenéola ikaaiyaka geya. 32 Go kina Peroyana nava idaabakasa boi nakae, tuwo tomotayadi geya italigeidita.