11
Yeisu ina vatulúkwana awanoi manuna
(Madiu 6:9-13, 7:7-11)
1 Yeisu asa tayamo goi ikaawanoi go, ina kawanoiyana mlina, ina tovatotówana tayamo idigo kana,
‘Tomoya, awanoi kuvatulukōima nakae Iyoni ina tovatotowanayao ivatuulukoidi.’
2 E kina Yeisu idigo kana,
‘Tutayana kokawanoi, kodīgo kami,
“Tamama, yoim kakimasabe.
Kūma kukalibubūma.
3 Ama máliya ame manuna neta kuvinīma.
4 Ima goyo neta kunuwotaōidi.
Kai nakae tomota idi goyo liliudi yaima goi kanuwootaoidi.
Neta taabu kutaagonēma bei vakakona goi kaakapusi.” ’
5-6 Yeisu tuwaina kana,
‘Neta komi kona siyami yaina bunatoina goi kodigo kami,
“Siyagu, guna ogaoga ima go, yau geya tayaamo kaga bego avini ikáika. Tauna beredi aito kuvinīgu ana avini.”
7 Manakae? Bei tauyana vada sinaena goi idigo kana,
“Taabu kuyoobosēgu. Totom bogina akatunibode. Yau ma natugowo ima kaba masisi goi bogina kaamasisi. Geya itoboineguta bei ataoya avinim”?
Moe nakae geya ae? 8 Ame alatuuwokoimi konōve: Nakona korotoyana geya itaoeta bego ivinimi siyami pasina go, omayamaya pasina bei itaoya, kaga nakae latuwomi bei ivinimi.
9 Ame yau alatuuwokoimi konōve: Kokawanōi Yaubada yaina, e bei ivinimi. Kaga kokiseeyeseye Yaubada yaina koolusāle, e bei kobabane. Kokaukeeyakēya, e Yaubada komi yaimi totom bei ikatupáeve. 10 Moitamo. Tokawanoi liliudi yaidi Yaubada ikaiguyau. Tolusala liliudi bei sibabane. Tokaukeyakeya liliudi yaidi, totom bei ikatupáeve.
11 E avatauwa komi yaimi goi ma natuumiyao go, neta íyana sikawanoiye, manakae? Bei moteta kovinidi? Geya ae?‡Buki Kimaasabaina ana kopi aibogoidi maniyedi ame nakae: E avatauwa komi yaimi goi ma natumiyao go, neta natumiyaoyadi awoinu sikawanoiye, manakae? Bei gurewa kovinidi? O neta íyana sikawanoiye, manakae? Iyanayana geya kovinidita, go sem moteta kovinidi? Geya ae? 12 Neta peleleotu sikawanoiye, manakae? Gániva bei kovinidi? Geya ae? 13 Tauna komi toogoyoimi go, koyagoi manakaemi yabobona dedevidi natumiyao kovinidi ae? Go Tamada guma yábana todedevina, tauna neta kokawanoi Tauyana yaina, Baloma Kimaasabaina moitamo bei ivinimi.’
Yeisu ina vatulúkwana
dimoni idi sinapu manudi
dimoni idi sinapu manudi
(Madiu 12:22-30; Maki 3:20-27)
14 Dimoni tayamo ikaaiyaka koroto tayamo yaina goi, tuwo korotoyana maena imou. Ago dimoniyana, kina Yeisu ivaatapiye isiya. E tutayana isowóduwo, korotoyana itoboine ibobwara dókana. Ago boda sigite, sikainaopa. 15 E kidi go boda maniyedi Yeisu ina guinuwa sigite sidigo kadi,
‘Ame Tauyana dimoni ivataapiyedi go, moe dimoni idi tolovina Beyelisebuli†aMad 10:25. ina togaga goi ivataapiyedi siisowóduwo.’†bMad 9:34.
16 E kidi go maniyedi latuwodi Yeisu sivakakone, tuwo sidigo kadi,
‘Aba kinana tayamo kuvatulukōima bei kayagoi kom moitamo Yaubada goi kuma.’†Mad 12:38, 16:1; Mak 8:11.
17 E kina go Yeisu idi nuwonúwana bogina iyagoidi, tuwo idigo kana,
‘Aba lovina liliudi neta sinaedi tomota siilivisi, aba lovinayadi bei sisou. Bodayauwo nakae. Neta sinaena tomota siilivisi, tomotayadi bei sisapa. 18 E ida Kaleya nakae. Komi kodigodigo bego Beyelisebuli ina togaga goi dimoni avataapiyedi. Neta moe moitamo, moe nakae toinina ina bodao iliivisidi. Go moe kaga ana dedevina? Ina lovinayana manakaena bei itogaga? Geya! Neta toinina ina bodao iliivisidi, ina lovinayana bei ikavava!
19 Yau nakae. Neta yau Beyelisebuli ina togaga goi dimoni avataapiyedi, e komi toinimi imi bodao nakae; tauyana ina togaga goi dimoni sivataapiyedi. Go moe nakae geya ae? Moe pasina nava bei toinimi imi bodao sitakinoimi komi tobágala. 20 E Yau Yaubada ina togaga‡Yaubada ina togaga: Da Giriki niyadi kadi, ‘Yaubada nimadidina.’ Go moe nakae livalakaibala Yaubada ina togaga manuna. goi dimoni avataapiyedi, tauna ina kalibúbuna bogina imaiyaba yaimi.
21 Yau dimoni avataapiyedi go, geya kada tauyana ina togaga goi avataapiyedi. Aba gita tayamo aguinuwe bei koyagoi Yaubada Balomaina goi dimoni avataapiyedi. Ida Kaleya koroto toogilúluna nakae. Mana kaipíyama liliudi, itoboine ina vada gagaina imatakavate go, geya vatau tayaamo itoboine konana ivainaoidi. 22 Go tutayana tokalika isowóduwo, e togilulunayana iláui be itogoisave go, ina kaipiyamayadi boi inuumisedi tokalikayana ikabidi inavedi. Ikavava, konanayadi ikaiguyauyedi.
23 Avatau neta yau taiyao geya kaspwagogoneta,†Mak 9:40; Luk 9:50. tauyana guna kaleya. Avatau neta tomota geya italigogoidita yau taiyao, e tomotayadi ikausapesapedi.
24 Nakona dimoni tomota tayamo ikinagove go, tutayana dimoniyana sivatapiye bogina isowóduwo, e ina asa yoyowo goi aba waiwasi iilusala. Iilusala go, geya tayaamo ibabane. Tuwo idigo kana,
“Bei akaluvilamna ana vadayana boi aakalave goi.”
25 Ago ima, tomotayana ibabane vada nakae bogina kaidiiyoyaina be katubaayasina go, daakakaina. 26 E tuwo dimoniyana ina ituli ta dimoni adi badabada ainima aiyuwo ikabidi imedi. Tauyadi goyogoyoidi toina, nakae dimoniyana ina goyo sikalisave. Ikabidi, imedi vadayana sisiu sikaaiyaka. Amo korotoyana ina kaiyaka boi tupwana igoyo go, ame igoyo toina.’
27 E tuwo nava ibobóbwara go, vavina boda yaidi goi ikaaiyaka niyana gagaina goi iduduwo idigo kana,
‘Tomoya, ava vavina neta gamona goi kubíbina be nununa goi kom kununu, ana dedevina bogina ibabane!’
28 E kina go Yeisu idigo kana,
‘Moe geya, go sem avatau neta Yaubada ina livala inove be ikabikaone, tauyana ana dedevina bogina ibabane.’
Iyona aba kinana Yeisu manuna
(Madiu 12:38-42)
29 Boda gagaina toina tuwaina sitaligógana Yeisu yaina goi, e ibibilágata idigo kana,
‘Tomota ame tauyadi nakae goyo sinadi; tauyadi aba kinana siiyaledi. Ago Yaubada aba kinana tayamo toito bei ivinidi go, tuwaina geya. Aba kinanayana moe Iyona.†Mad 16:4; Mak 8:12. 30 Moitamo. Iyonayana aba kinana tayamo boi da Ninivei yaidi goi bego Yaubada goi ima,†Iyn 3:4. e nakae Tomalatomota aba kinana amo tomota nakae yaidi bego Tauyana Yaubada goi ima. 31 Giyovila tayamo Totuyoyowo‡Giyovila tayamo Totuyoyowo: Ame Giyovilayana nakona da Siba adi tolovina.†1To 10:1-10; 2Te 9:1-12. go, ina kaba lovina moe Siba youya dadavina goi. Tauyana boi aduwanau goi ima Solomoni ina nanamsa inove. Go konōve. Tomota tayamo toolagaina ameni namliyeta baige Solomoni. Go ame togoyoidiyadi nanamsa gagaina bogina sinove go, nava geya situgavileta. Tauna takínona ana tuta goi giyovilayana bei itaoya kidi taiyao go, idi goyo bei italaledi. 32 Boi Iyonayana ina talavaita da Ninivei sinove, e situgavila.†Iyn 3:5. Go konōve. Tomota tayamo toolagaina ameni namliyeta Iyona go, ame togoyoidiyadi nava geya situgavileta. Tauna takínona ana tuta goi da Ninivei bei sitaoya, ame togoyoidiyadi idi goyo bei sitalaledi.’
Rampa ana livalakaibala
33 Tuwaina Yeisu kana,
‘Geya vatau tayaamo ina rampa igabu go, aba vamóuna goi iyato o bayao goi ivatum geya, go sem ikabi rampa ana kaba yata yatana goi iyato bego tomota vada goi sisiusiu bei rampayana ina mavada sigite.†Mad 5:15; Mak 4:21; Luk 8:16.
34 Matami moe wowomi ana rampa nakae. Neta matami sidedevina moe nakae komi tokaiguyau, e itoboinemi tomota idi mou kogitedokoidi bego kovaitedi. Neta nakae, e wowomiyadi madabokina mavada bei ivakayaodeidi. Go neta matami sigoyo, moe nakae komi tomatakónana, e geya itoboinemita kogita dókana. Neta nakae, e wowomi madabokina kokonótuya ivakayaodei. 35 Tauna korugwausīmi, govila bei guinuwa mamaníwana sinaemi kogite moe konuwonúwana bego mavada. 36 Tauna neta wowomi madabokina maavadaina, nakae geya tayaamo dadavina imamaníwana, e wowomiyadi maavadaina toina nakae rampa itapaasigimi.’
Yeisu Parisi iibowoidi tetelina
(Madiu 23:1-36; Maki 12:38-40)
37 E tutayana Yeisu ina bóbwara ilukavave, Parisi tayamo ima Yeisu iduduwe ima bei taiyao sikáika. E tuwo Yeisu ina Parisiyana ina vada goi isiu taiyao sikáika. 38 E kina go Parisiyana idobala Yeisu igite bego nimana geya inikidita, tauna ikainaopa. 39 E Tomoyayana idigo kana,
‘Komi Parisi moitamo! Komi keiga be noko nakae. Toluyedi koonikidi go, sinaedi báila ivakayaodeidi, bailayana moe matakónana be guinuwa goyogoyoidi. 40 Komi tamogemogemi! Manakae? Geya koyagoiyeta toluyemi ana tomadágina moe sinaemi nakae imadagi? Tauyana latuwona sinaemi nakae toluyemi simavada. 41 Taabu konuuwonūwana toluyemi manudi, go sem atemi goi kokaiguyau bēso tokai yaidi, e bei atemi madabokina maavadaina. 42 Go komi moe nakae geya, go sem komi imi yawóuna†Vin 27:30. minta be rue‡Minta be Rue: Ame pai yoidi. be pai liliudi Yaubada kovinibeso go, moe guinuwa giyaiina. Ago guinuwa gagaidi kokalavedi. Guinuwa gagaidiyadi moe takinona vavasa be Yaubada ana matakoi. Itoboine guinuwayadi gagaidi be nakae giyaidi madabokidi koguuinuwedi. Oo komi Parisi ami toovalugo ae?
43 Komi Parisi, sinapu ame nakae latuwomi: Tapwaroro ana kaba tugúguna sinaena wowoina basekoina goi kootusobu bei tomota siyapaaliyemi. Aba maketi goi tomota sima sikatoomoyaemi. Ame guinuwayadi komi nuwomi sikabi. Tauna komi ami toovalugo ae? 44 Komi valiwoga geya ana kaba kinanamo nakae. Yatadi goi tomota siiketoiya go, geya siyagoiyeta tokámasa sobuyekoidi sikaaiyaka be sikibaibailidi. Oo komi Parisi ami toovalugo ae?’
45 E Yeisu ina livalayana Yaubada ina Katukeda ana tolumavívita tayamo inove idigo kana,
‘Tovatulúkwana, moe im livalayadi goi kai nakae kutagiwoima.’
46 E Yeisu kana,
‘Komi Yaubada ina Katukeda ana tolumavivitayao nakae. Lovina badabadaidi tomota koovinidi go, lovinayadi moe kónana moumoudi nakae itoomatedi go, geya kada tayaamo vaita kovinidi geya. Oo komi nakae ami toovalugo ae? 47 E komi latuwomi tomota siyapaliyemi bego komi todedevimi, tauna mami uyáwana Yaubada ina tokabivalavala adi valiwoga adi kaba kinana polapola kowoodugudi go, tokabivalavalayadi komi tubumiyao geya sikabikaonedita, go sem sikaumatedi! E komi nakae geya kokabikaonedita! Oo komi ami toovalugo ae? 48 Tauna tubumiyao idi guinuwa goyogoyoidi bogina koyagoidi be kokamoitamoedi. Tokabivalavalayadi kidi tubumiyao sikaumatedi go, komi bego adi valiwoga adi kaba kinana polapola kowoodugudi. 49 Ame pasina tauna boi nimatu Yaubada mana nanamsa gagaina komi manumi idigo kana,
“Guna tokabivalavala be guna vamoleyanayao aetunedi siwo yaimi. Maniyedi bei kokaumatedi go, maniyedi bei koyogedegededi.”
50 Moe bego tokabivalavala liliudi ikaikaidi adi dau boi nimatu poyapoya ana kaba vatowo goi go, ima ame tuta moe komi be nakae tomota komi nakae imi puwoya. 51 Nakae Ebeli†aAbv 4:8. ina kámasa ima Sakarayau‡Sakarayau: Ame Sakarayauyana moe Yaubada ina tokabivalavala. Ame geya Iyoni tamana geya.†bSak 1:1; 2Te 24:21. ina kámasa, Sakarayauyana boi nimatu aba kasala be Vada Kimaasabaina go, nauyayanaidi goi tubumiyao sikaumate. Ame alatuuwokoimi moitamo konōve: Tomota komi be nakae toogoyoidi komi nakae tokabivalavalayadi idi kámasa moe imi puwoya!
52 Komi Yaubada ina Katukeda ana tolumavivitayao, nanamsa Yaubada manuna moe vada nakae go, ana ki bogina kokabi. Komi itoboinemi vadayana kokatupáeve, e tomota kovatulukoidi. Ago komi geya latuwomi kosiu go, avatauwa neta latuwodi sisiu nanamsayana siyagoi, komi kosanabodedi. Oo ami toovalugo ae?’
53 Yeisu ina bóbwara ilukavave, itaoya vadayana goi isowóduwo amo dadavayana ikalave go, kidi Yaubada ina Katukeda ana tovatulukwanayao be Parisi sivatowo Yeisu sivakaleye makimaki be lumadádana goi dogoi badabadaidi manudi sivakakone. 54 Tauyadi sipoikíkina bego Yeisu sikatutao bei toinina ina bóbwara goi itoboinedi siwowoko.
‡11:11 Buki Kimaasabaina ana kopi aibogoidi maniyedi ame nakae: E avatauwa komi yaimi goi ma natumiyao go, neta natumiyaoyadi awoinu sikawanoiye, manakae? Bei gurewa kovinidi? O neta íyana sikawanoiye, manakae? Iyanayana geya kovinidita, go sem moteta kovinidi? Geya ae?
†11:16 Mad 12:38, 16:1; Mak 8:11.
‡11:20 Yaubada ina togaga: Da Giriki niyadi kadi, ‘Yaubada nimadidina.’ Go moe nakae livalakaibala Yaubada ina togaga manuna.
‡11:31 Giyovila tayamo Totuyoyowo: Ame Giyovilayana nakona da Siba adi tolovina.
†11:31 1To 10:1-10; 2Te 9:1-12.
†11:33 Mad 5:15; Mak 4:21; Luk 8:16.
†11:42 Vin 27:30.
‡11:42 Minta be Rue: Ame pai yoidi.
‡11:51 Sakarayau: Ame Sakarayauyana moe Yaubada ina tokabivalavala. Ame geya Iyoni tamana geya.
†b11:51 Sak 1:1; 2Te 24:21.