9
1 Tuwaina Yeisu idigo kana,
‘U, moe nakae bei isowóduwo go, ame alatuuwokoimi konōve: Tutayana Yaubada ina kalibúbuna mana togaga ima ina bodao ikaliibubudi, e komi maniyemi ameko kootáoya, nava bei maa yawoimi kogite.’
Yeisu ana sabokuli nakonakae
(Maki 9:2—10:52)
Yeisu ana kaigigita ikaanagavila tetelina
(Madiu 17:1-13; Luke 9:28-36)
2 Maliyalina ainima tayamo mlidi Yeisu itáoya, Pita, Yemesa be Iyoni ikabidi, aditava sina koya maanawena goi situko.†Tat 24:15-18. Maeko goi sigite Tauyana ana kaigigita ikanagavila, 3 nakae ana kwama sitomoéyala nakae sivapopowou toina go, ana kaigigita geya vatau tayaamo poyapoya goi itoboine bei kwama ikimavade ana popowou nakae. 4 Ago Eliyau be Mosese sisowóduwo tauyadi yaidi goi go, Yeisu taiyao sibobóbwara. 5 Go Pita iigitedi, tuwo ikaubesobeso idigo kana,
‘Tovatulúkwana Toolagaim, ame dedevina kita ameko takaaiyaka. Manakae? Yoyou aito kayowóidi? Tayamo kom im yoyou, tayamo Mosese ina yoyou, tayamo Eliyau ina yoyou.’
6 Pitayana geya iyagoiyeta manakaena ibobóbwara. Bogina kuyagoi. Adi taito atedi iyova gagaina.
7 Niga gaota isowóduwo iumaidi†aTat 40:35. go, gaotayana goi níyana tayamo sinove, idigo kana,
‘Ame Natugu, guna kakaya. Tauyana konōve!’†bMad 3:17; Mak 1:11; Luk 3:22; 2Pi 1:17-18.
8 Livalayana sinove go, matabuwodi simatavilavila, tauyadi geya sigitedita, go sem Yeisu anetava sigite ikaaiyaka kidi taiyao. 9 Ikavava, koya goi sisousou go, Yeisu ilovinaedi idigo kana,
‘Kaga koogitedi taabu kotalaavaitēdi ana kadókana Tomalatomota tokámasa yaidi goi itaoyamna.’
10 Tuwo ina livala sikabikaone go, taudiva sibobóbwara kadi,
‘Ina taoyamna tokámasa yaidi goi kaga ana yagoina?’
11 Go Eliyau ina sowóduwo pasina tauyadi silumadade sidigo kadi,
‘Kaga unana Yaubada ina Katukeda ana tovatulukwanayao sidigodigo bego Eliyau igimiima namliyeta Guyau bei ima?’†Mal 4:5; Mad 11:14.
12 Yeisu kana,
‘Moe moitamo. Eliyau igimiima bei kaga liliuna iyolimedi Guyau ina sowóduwo manuna. Go Guyauyana manuna manakae Gínina Kimaasabaidi sitalavaita bego Tomalatomota geda badabadaidi bei ibabanedi be nakae tomota bei sikaolilive? 13 Moitamo Eliyauyana igimiima go, ame alatuuwokoimi konōve: Bogina ima go, kaga nakae latuwodi siguinuwe tauyana yaina, e nakae siguinuwe. Moe nakae Gínina Kimaasabaidi sitalavaita tauyana manuna.’
Yeisu gómana naagovaina
ikideedevine tetelina
ikideedevine tetelina
(Madiu 17:14-21; Luke 9:37-43a)
14 Pita, Yemesa be Iyoni Yeisu taiyao sisou sina sediyao tovatotówana yaidi go, sikandobala boda gagaina sigitedi ina tovatotowanayaoyadi sitaoyakobudi go, Yaubada ina Katukeda ana tovatulukwanayao tovatotówana taiyao sikaumaakimaki. 15 E sisowóduwo, boda madabokina sikandobala Yeisu sigite, sikainaopa gagaina, tuwo silokoina sima siuyaone. 16 Ago ilumadadedi idigo kana,
‘Kaga kokaumakiimakiye ame tauyadi taiyao?’
17-18 Ago koroto tayamo bodayadi sinaedi goi idigo kana,
‘Tovatulúkwana, idi kaumakimaki unana ame: Dimoni boi isiu ikaaiyaka natugu sinaena, tauna maena imoumou. Neta dimoniyana ikiinagove, e ilave isou poyapoya goi be nakae tobuna goi polu iisowóduwo. Aiyuwoina iikagúguta be nakae wowona ikaalitola. Tauna maine tauyana ame bego kuvaite. Go ama, kom geya, tuwo im tovatotowanayao akawanoiyedi bego dimoniyana sivatapiye go, geya itoboinedita.’
19 Go Yeisu idigo kana,
‘Komi tomota manakae? Moitamo numisa geya ae? Tuta maanawena taiyao bogina takaaiyaka go, ava tuta bei konumisedokoigu? Tuta maanawena imi dabakasa aatogage, tauna ava tuta bei konovegu? Tuwo gomanayana kōme!’
20 E tuwo gomanayana sime go, dimoniyana ikandobala Yeisu igite, e mainao gomanayana ikinagove. Tuwo gomanayana ikapusi isou poyapoya goi ikanasipusípula be nakae tobuna goi polu iisowóduwo. 21 Go kina Yeisu ilumadádana gomanayana tamana yaina idigo kana,
‘Aivina tala natum ina sinapu moe nakae?’
‘Ina tuta gómana goi go, ima ame tuta. 22 Tuta liliuna kina dimoniyana natugu ilave isou yeu goi o bwae goi bego ikaumate. Tauna, neta ikakapu yaim, e mam nuwokapisi kuvaitema’, tamanayana kaena.
23 E kina go Yeisu kana,
‘Im nanayuwo goi kom kam,
“Neta ikakapu yaim.”
Iyaa! Kaga liliuna ikakapu tonumisa yaina.’
24 Tuwo mainao korotoyana iduduwo kana,
‘Moitamo anumisa go, geya anumisadokoneta. Go neta guna numisa kuvāite!’
25 E Yeisu boda igitedi silokoina simamaima, tauna dimoniyana ilovinae idigo kana,
‘Kom pasim gómana maena imoumou nakae taiyana patupatuna, tauna alovinaem kukalavevatāe, e geya tuwaina kusiusīu!’
26 Tuwo moitamo dimoniyana mana podeda gómana ikinagove, tauna itatátava gagaina go, gomanayana yaina goi isowóduwo ina. Ago gomanayana ana kaigigita tokámasa nakae, tauna boda sigite, sitainasi kadi,
‘Gomanayana bogina ikámasa.’
27 E kina go Yeisu gomanayana nimana iyoisi, ikaitáoe. E gómana itáoya, bogina idedevina. 28 Yeisu mana tovatotowanayao sina vada tayamo goi sisiu go, ina tovatotowanayaoyadi taudiva Yeisu silumadade sidigo kadi,
‘Kaga unana geya itoboinemeta amo dimoniyana kavatapiye isiya?’
29 Tauyana idigo kana,
‘Geya tayaamo kaga goi itoboineda dimoni moe nakae tavatapiye go, enao tayamo toito tauna, moe awanoi Yaubada yaina.’
Yeisu ina kámasa aiyuwoina italavaitemnei
(Madiu 17:22-23, 18:1-9; Luke 9:43b-45)
30 Amoko goi Yeisu mana tovatotowanayao sitáoya amo asayana sikalave go, sina Galili parovinsi goi sisiu siketoiya sinonoina Kapaneumi manuna. Go geya latuwona toni kasa siyagoi ikaaiyaka ina vatulúkwana pasina. 31 Moitamo. Sinonoina enao goi ina tovatotowanayao ivatuulukoidi kana,
‘Nava bei tomota tayamo itáoya, Tomalatomota inuwotuluye tomota nimadi goi. Ikavava, bei sikabi sikaumate go, ina kaumatayana mlina maliyalina aitonina goi bei itaoyamna.’
Nakae ivatuulukoidi go, boda liliudi nakona bei sitainasi, tauna geya latuwona siyagoi ikaaiyaka. 32 Go ina livalayana ina tovatotowanayao geya siyagoiyeta. Ago simatoita bego ina livalayadi manudi silumadade.
Avatau toolagaina
Yaubada ina kalibúbuna goi tetelina
Yaubada ina kalibúbuna goi tetelina
(Madiu 18:1-9; Luke 9:46-48)
33 Niga bogina sina Kapaneumi goi go, vada goi sikaaiyaka, Yeisu ina tovatotowanayaoyadi ilumadadedi idigo kana,
‘Kenao goi kaga kokaumakimakiye?’
34 Go tauyadi madi omayamaya situgau. Bogina kuyagoi. Enao goi sikaumakimaki bego avatau yaidi goi toolagaina.†Luk 22:24. 35 Tuwo Yeisu itusobu, ina tovatotowanayao yawou aiyuwo iduduwedi sima ilatuwokoidi idigo kana,
‘Avatauwa yaimi goi bego toosakidi, tauyadi itoboinedi bei toosobudi tomota liliudi yaidi goi be nakae tomota liliudi adi tovaita.’†Mad 20:26-27, 23:11; Mak 10:43-44; Luk 22:26.
36 Gómana tayamo ikabi, matadi goi ivatáoe. Ikavava, ivaayavau go, ina tovatotowanayaoyadi ilatuwokoidi idigo kana,
37 ‘Avatauwa neta toosobudi gómana ame nakae yau yoigu goi siiuyaone, e yau nakae siuyaaonegu. Go avatauwa neta siuyaaonegu, agu toetuna nakae siiuyaone.’†Mad 10:40; Luk 10:16; Iyo 13:20.
38 Go Iyoni idigo kana,
‘Tovatulúkwana, koroto tayamo kagite kom yoim goi dimoni ivataapiyedi go, tauyana kita taiyao geya, tauna kapoikiki bego kasanabode.’
39 E kina go Yeisuyana idigo kana,
‘Taabu kosaanabōde. Geya vatau tayaamo mainao yoigu goi guinuwa toogagaidi iguinuwedi go, namliyeta itagiwoigu. 40 Moe moitamo. Avatau neta geya ivakaleyedeta, e tauyana ivaiteda.†Mad 12:30; Luk 9:50, 11:23. 41 Kogita. Avatauwa neta bwae sivanimmi unana komi yoimi Guyau ina bodao go, neta ame tauna siguinuwe, e ame alatuuwokoimi konōve: Adi vaiwówana nava bei sibabane.†Mad 10:42.
42 Avatauwa neta tayamo toosobuna guna tonumisayao yaidi goi sivakapusiye, e liuna gagaina toina bei sibabane. Neta gurewa gagaidi sikabidi, nukotodi goi sisikoidi go, tauyadi silavedi sisou sina négwasa goi sisalili, moe liuna giiyaina, go sem Yaubada ina liuna bei gagaina.†Luk 17:1-2. 43 Go ava nímana ami píkwana ana toyomátula, e kokūpo kokalāve. Neta ma nimakuuponimi go, yawoimi vata kobabane, e moe dedevina, go sem neta ma nimayuwoyuwoimi silavemi kosou asagabugabu ana yeu sabenínima vaatayaina goi, e moe igoyo toina.†Mad 5:30. 44-45 Ava káena ami píkwana ana toyomátula, e kokūpo kokalāve. Neta ma kaekuuponimi go, yawoimi vata kobabane, e moe dedevina, go sem neta ma kaeyuwoyuwoimi silavemi kosou asagabugabu goi, e moe igoyo toina.‡Nakona tomwana 44 Maki geya iginiyeta, go sem tokaidámana tayamo toinina ina nuwonúwana igini. Tomwana 44 ame nakae: Amoko goi Yaubada ina liuna ikaiyako vata. Nakae motemoteta tomata yaidi goi geya sikamaseta, yeu nakae geya ikamaseta. 46-47 Matami nakae. Ava mátana ami píkwana ana toyomátula, e kokipōsi kokalāve. Neta mata tayataya go, Yaubada ina kalibúbuna kosiu, e moe dedevina, go sem neta mata yuwoyuwo sikabimi silavemi kosou asagabugabu goi, moe igoyo toina.‡Nakona tomwana 46 Maki geya iginiyeta, go sem tokaidámana tayamo toinina ina nuwonúwana igini. Tomwana 46 ame nakae: Amoko goi Yaubada ina liuna ikaiyako vata. Nakae motemoteta tomata yaidi goi geya sikamaseta, yeu nakae geya ikamaseta.†Mad 5:29. 48 Amoko goi Yaubada ina liuna ikaiyako vata. Nakae motemoteta tomata yaidi goi geya sikamaseta be nakae yeu geya ikamaseta.†Ais 66:24. 49 Yaubada yeu bei isiwoi soroti nakae tomota liliudi yaidi goi, adi kimavada manuna o adi vailai manuna.
50 Soroti‡Soroti: Kidi Diyuu idi sinapu boi nimatu soroti sikabi, sikanasíuna go, sorotiyana ana yagoina moe anasiunayana ikasa. Nakae geya itoboinedita anasiunayana sikupo o sikalave. Tauna soroti be anasíuna moe nakae itoboinedi sikabivekoveko vata. dedevina go, neta ina togaga ikavava, manakaemi koguinuwe bei idedevinamna? Geya ae?†Mad 5:13; Luk 14:34-35. Komi nakae. Kotagōna soroti ikaiyako vata yaimi, o tadigo kada, “Bei taiyao kotuboina.” ’
†b9:7 Mad 3:17; Mak 1:11; Luk 3:22; 2Pi 1:17-18.
†9:35 Mad 20:26-27, 23:11; Mak 10:43-44; Luk 22:26.
†9:37 Mad 10:40; Luk 10:16; Iyo 13:20.
†9:40 Mad 12:30; Luk 9:50, 11:23.
‡9:44-45 Nakona tomwana 44 Maki geya iginiyeta, go sem tokaidámana tayamo toinina ina nuwonúwana igini. Tomwana 44 ame nakae: Amoko goi Yaubada ina liuna ikaiyako vata. Nakae motemoteta tomata yaidi goi geya sikamaseta, yeu nakae geya ikamaseta.
‡9:46-47 Nakona tomwana 46 Maki geya iginiyeta, go sem tokaidámana tayamo toinina ina nuwonúwana igini. Tomwana 46 ame nakae: Amoko goi Yaubada ina liuna ikaiyako vata. Nakae motemoteta tomata yaidi goi geya sikamaseta, yeu nakae geya ikamaseta.
†9:48 Ais 66:24.
‡9:50 Soroti: Kidi Diyuu idi sinapu boi nimatu soroti sikabi, sikanasíuna go, sorotiyana ana yagoina moe anasiunayana ikasa. Nakae geya itoboinedita anasiunayana sikupo o sikalave. Tauna soroti be anasíuna moe nakae itoboinedi sikabivekoveko vata.