10
Yeisu ina tovatotowanayao 72
ietunedi sina sipaaisewa tetelina
ietunedi sina sipaaisewa tetelina
1 E moe guinuwayadi sikavava, Tomoya ina tovatotowanayao yaidi goi 72‡72: Buki ame ana kopi maniyedi kadi, ‘70. ikinavedi ina paisewa manuna. Adi taiyuwo adi taiyuwo ietunedi bei sivakumgo sina asa liliudi goi tomota sikatubayasidi Tauyana ina sowóduwo manuna. 2 E livalakaibala goi ilatuwokoidi idigo kana,
‘Tánuwo bogina iloboina go, todibayoya geya sibadebadeta. Tauna toni tánuwo yaina goi kokawanōi bego topaisewa ietunedi sima sidibayoya.†Mad 9:37-38. 3 Kōna go, ami dodōkana! Komi lami nakae aetunemi kona guna kaleyayao yaidi goi; tauyadi weiniya woliwoli sasasaidi nakae.†Mad 10:16. 4 Imi mani saisairina o imi wasare o imi sendoro aiyuwoina taabu kookabīdi.†Mad 10:9-10; Mak 6:8-9; Luk 9:3. Geya vatau tayaamo kootagōne enao iitukika.
5 E ava vada goi neta siuyaonemi, kosīu go, mainao kodīgo kami,
“Tuboina ikaaiyaka yaimi.”
6 Neta moeko goi toni vada totuboina, imi tuboinayana ikaiyaako vata tauyana yaina. Ago neta tauyana geya totuboina geya, e tuboinayana ikaluvilamna iwo yaimi.†Mad 10:12-13. 7 E vadayana goi siuyaaonemi kokaaiyāka go, ava kawoinu o ava bwae siivinimi, kokāika be konīm. Topaisewa itoboinedi bei adi maisa sibabane.†Mad 10:10; 1Ko 9:14; 1Ti 5:18. Go taabu kokanadamadāmana vada tayamo tayamo goi. 8 Ava kasa goi kosiu neta toni kasa siuyaonemi, e ava kawoinu siivinimi, moe kokāika. 9 Ago tokatówana asayana goi kokidedevinēdi namliyeta kolatuwokōidi kami,
“Yaubada ina kalibúbuna bogina imaiyaba yaimi bei itoboinemi kosiu.”†Mad 4:17; Mak 1:15; Luk 10:11.
10 E ava kasa goi kosiu neta toni kasa geya siuyaonemita, kōna asayana ana kenao goi go, toni kasayadi kolatuwokōidi kami,
11 “Bei kakalavemi go, imi kasa kaukauna aema goi nakae kasapinunui kakalave.†aMad 10:14; Mak 6:11; Luk 9:5; Gui 13:51. Moe imi katumátala bego Yaubada itavileiyemi. Ago ame konuuwāisi: Yaubada ina kalibúbuna bogina imaiyaba.”†bMad 4:17; Mak 1:15; Luk 10:9.
12 Go ame alatuuwokoimi konōve: Takínona ana tuta tomota amo asayana goi adi liuna bei gagaina namliyeta kidi da Sodoma.†Abv 19:24-28; Mad 10:15, 11:24.
13 Komi da Korasini be da Betesaida konovēgu! Da Taya†Ais 23:1-18; Isi 26:1—28:26; Iyl 3:4-8; Emo 1:9-10; Sak 9:2-4. be da Saidoni tomota goyogoyoidi. Go neta guna guinuwa toogagaidi boi komi bogina koogitedi kidi nakae sigitedi, boi nimatu e bogina situgavila go, idi tugavilayana ana kaba kinana siguinuwe moe kwama salisalina silosidi be selekau dabadi goi siyatoidi. Komi boi itoboinemi nakae kotugavila go, geya koguinuweyeta. O komi da Korasini be da Betesaida ami toovalugo! 14 Komi takínona ana tuta goi ami liuna bei gagaina toina namliyeta kidi da Taya be nakae da Saidoni.
15 Komi da Kapaneumi nakae. Manakae? Konuwonúwana Yaubada bei ikilagasimi yábana goi? Moe geya, go sem bei ilavemi kosou kona asagabugabu goi!†Ais 14:13-15; Mad 11:20-27.
16 Avatauwa neta komi imi livala siinovedi, moe nakae yau guna livala siinovedi.†Mad 10:40; Mak 9:37; Luk 9:48; Iyo 13:20. Avatauwa neta komi sikaataemi, moe nakae yau sikaataegu. E avatauwa neta yau sikaataegu, moe nakae guna toetuna siikatae.’
Ibóbwara ikavava, adi taiyuwo adi taiyuwo ietunedi sina.
17 E niga ina tovatotowanayaoyadi 72 madi uyáwana sikaluvilamna sima sidigo kadi,
‘Tomoya, dimoni nakae, neta yoim kavatoi, sopama sikabikaone.’
18 E Yeisu idigo kana,
‘Tutayana dimoniyadi sikabikaonemi ida Kaleya agitegite ana kaigigita matabuwona ávila nakae yábana goi isousou. 19 Konovēgu. Togaga bogina avinimi be itoboinemi moteta be gániva kovakavatedi nakae ida Kaleya ina togaga madabokina kokinenete go, geya tayaamo kaga itoboine iyogedegedemi.†Sam 91:13. 20 Ego kouyāwana gagaina bego yoimi yábana goi Yaubada bogina iginidi namliyeta kouyāwana bego dimoni sopami sikabikaonedi.’
21 Amo tutayana goi Baloma Kimaasabaina pasina Yeisu iuyáwana idigo kana,
‘Tamagu, kom yábana be poyapoya idi Tomoya. Guna guinuwayadi adi yagoina bogina kuvamoudi kidi madi nanamsa be madi yagoina yaidi goi go, kidi gogómana nakae yaidi goi guna guinuwa adi yagoina bogina kukaiwoduwedi. Tauna ayapaliyem. Moitamo Tamagu, moe im guinuwayana im nuwonúwana goi ivauyaonem.’
22 Ikawanoi ikavava, tauyadi 72 ilatuwokoidi idigo kana,
‘Kaga liliuna Tamagu nimagu goi bogina iyatoidi.†aIyo 3:35. Tamaguyana anetava yau Natuna iyagoidokoigu. Yau agutava Tamagu ayagoidoko go, avatauwa neta akinavedi bei Tamagu avatulukoidi, e bei siyagoidoko.’†bIyo 10:15.
23 Yeisu itugavila ina tovatotowanayao aditava ilatuwokoidi kana,
‘Avatauwa sigite kaga komi matami goi bogina koogitedi, e adi dedevina bogina sibabane. 24 Moitamo. Ame alatuuwokoimi konōve: Boi nimatu Yaubada ina tokabivalavala badabadaidi be nakae tolovina badabadaidi latuwodi bego sigite kaga koogitegu aguuinuwe go, geya sigitedita. Latuwodi bego sinove kaga kaga koonovedi avatulúkwana go, geya sinovedita.’†Mad 13:16-17.
Livalakaibala guma Samériya
ina guinuwa dedevina manuna
ina guinuwa dedevina manuna
25 Yaubada ina Katukeda ana tolumavívita tayamo itaoya; latuwona Yeisu ina vatulúkwana ivakakone. Tuwo idigo kana,
‘Tovatulúkwana, kaga aguuinuwe bei yawoigu vata ababane?’
26 ‘Yaubada ina Katukeda buki goi Mosese manakaena yawoida vata manuna igini? Manakaem kulumavivisi?’ Yeisu kaena.
27 E tonanamsayana kana,
‘Mosese ilatuwokoida kana,
“Yauwe ida Yaubada komataakoīye atemi madabokinakova goi be yawoimi madabokinakova goi be imi togaga madabokinakova goi be nuwomi madabokinakova goi.”†aMad 22:37; Mak 12:30.
Atukeda 6:5
Aiyuwoina kana,
“Siyami komataakoīye nakae toinimi komatakooiyemi.” ’†bMad 5:43, 19:19, 22:39; Mak 12:31,33; Rom 13:9; Gal 5:14; Ibe 13:1; Yem 2:8.
Vininabeso 19:18
28 E Yeisu idigo kana,
‘Bogina kudigoyabe. Moe nakae kuuguinūwe, bei yawoim vata kubabane.’
29 E Yaubada ina Katukeda ana tolumavivitayana ivakibala; latuwona bego ana kaigigita tauyana tokibóbwata, tuwo Yeisu ilatuwoko idigo kana,
‘Go siyagu avatau bego itoboinegu amatakoiye?’
30 Yeisu livalakaibala goi ikatumapu idigo kana,
‘Tayamo koroto Yerusalema goi isou inonoina Yeriko manuna. Inonoina go, tovaináwana maniyedi enao goi ivalobodedi. Ivalobodedi, to korotoyana siyoisi, ana kwama, konana nakae liliudi sikabidi go, tauyana siláui. Ikavava, nakae kaamasina enao goi sikalave go, sina.
31 E amo tutayana Tonúwala tayamo isousou amo enaoyana goi imamaima, korotoyana igite go, ivasigege enao ta dadava goi ivatabale ina. 32 E Livai tubuna tayamo nakae isou ima amoko goi tovailaiyana igite, tuwo ivalabelabena igitedoko. Igite go, ivasigege enao ta dadava goi ivatabale ina.
33 E tayamo Samériya korotoina mana ase imamaima go, ikandobala korotoyana igite, tuwo ivalabelabena korotoyana igitedoko. Igite, inuwokapisiye. 34 Tuwo oribe putumina be oine ikabidi, ibala ima tovailaiyana ina kaipíyama kiyaudi goi isiwoidi go, ipaimidi. E ipaimidi ikavava, toinina ina ase yatana goi tovailaiyana ikailagasi. Ikavava, inave vada ogaoga goi imatakavate.
35 Vanuwo itomo, mani aiyuwo ikabidi, vadayana ana torugwáuta ivini idigo kana,
“Tovailai kumatakavāte. Neta kaga tuwaina kuemaisi tauyana ina matakavata manuna, gobe niga guna kaluvila goi yau bei amapu.” ’
36 Yeisu kana,
‘Kom manakaem kunuwonúwana? Korotoyadi adi taito yaidi goi ava koroto tovailai ivasiyanedoko?’
37 ‘Tauyana inuwookapisi’, tolumavivitayana kaena.
E Yeisu idigo kana,
‘Kūna go, nakae kuguinūwe.’
Marita be Meri tetelidi
38 E Yeisu mana tovatotowanayao taiyao sinonoina go, asa tayamo goi sisiu. E vavina tayamo yoina Marita amo asayana goi ikaaiyaka, ina vada goi Yeisu iuyaone.†Iyo 11:1. 39 Ago Maritayana ana gómana yoina Meri. Meriyana Tomoya aena goi iitusobu, ina vatulúkwana itaaiyakeke. 40 E kina go Maritayana vaipolu ana katubayasi badabadaidi manudi inuuwotúkala. E tuwo ibala ima Yeisu kikina itaoya idigo kana,
‘Tomoya, guna gómana kugite? Geya dedevina ikaiyako beso go, yau aguta apaaisewa ae? Tauna kulatuwōko bego ima ivaitegu.’
41 Go kina Tomoyayana idigo kana,
‘Marita, Marita, dogoi badabadaidi manudi kunuuwotúkala, nakae nukotom taitáiya iuyoi. 42 Go tayamo dogoi itoboine kuguinuwe, moe guna vatulúkwana kutaiyakeke. Ame moitamo. Meri kugite? Tauyana dogoi dedevina bogina ikinave iguuinuwe go, geya vatau tayaamo bei isanabode.’
‡10:1 72: Buki ame ana kopi maniyedi kadi, ‘70.
†10:4 Mad 10:9-10; Mak 6:8-9; Luk 9:3.
†10:7 Mad 10:10; 1Ko 9:14; 1Ti 5:18.
†10:9 Mad 4:17; Mak 1:15; Luk 10:11.
†a10:11 Mad 10:14; Mak 6:11; Luk 9:5; Gui 13:51.
†b10:11 Mad 4:17; Mak 1:15; Luk 10:9.
†10:12 Abv 19:24-28; Mad 10:15, 11:24.
†10:13 Ais 23:1-18; Isi 26:1—28:26; Iyl 3:4-8; Emo 1:9-10; Sak 9:2-4.
†10:15 Ais 14:13-15; Mad 11:20-27.
†10:16 Mad 10:40; Mak 9:37; Luk 9:48; Iyo 13:20.
†10:19 Sam 91:13.
†b10:27 Mad 5:43, 19:19, 22:39; Mak 12:31,33; Rom 13:9; Gal 5:14; Ibe 13:1; Yem 2:8.