16
Parisi latuwodi aba kinana
go, Yeisu ina katumátala adi isti manuna
go, Yeisu ina katumátala adi isti manuna
(Madiu 12:38-41; Maki 8:11-21; Luke 12:54-56)
1 Yeisu kai taiyao kama kavaiu kasou go, kidi Parisi be Sadusi maniyedi sima Yeisu sivakakone sidigo kadi,
‘Aba kinana tayamo kuvatulukōima†Luk 11:16. bei kayagoi kom moitamo Yaubada goi kuma.’
2 E Yeisuyana idigo kana,
‘Lavilavi tutayana níyala isaliu neta yábana isabenínima, komi kami,
“Itomo bei kelavaboina.”
3 Go nobuyana neta gaota isabenínima, e bou itáoya, komi kami,
“Ame bei kelavagoyo.”
E yábana ana kaigigita itoboinemi kodovatusidi bei ana yagoina koyagoi go, kaga kaga sisowóduwo tuta ame goi Yaubada iguuinuwedi adi kaigigita geya itoboinemita kodovatusidi bei adi yagoina koyagoidi! 4 Tomota neta goyo sinadi be nakae Yaubada situgavile, e aba kinana siiyaledi. Ago Yaubada aba kinana tayamo toito bei ivinidi go, tuwaina geya. Aba kinanayana moe Iyona.’†Iyo 1:17; Luk 11:29.
Ibóbwara ikavava, itáoya ikalavedi.
5 Yeisu kai ina tovatotowanayao kasaidámana ituli ta dadava goi kavaiu. Kavaiu, kasou go, kagite beredi kanuwoilave bego kakabi.
6 E kina go Yeisuyana idigo kana,
‘Ami dodōkana kidi Parisi be Sadusi idi isti goi.’†Luk 12:1.
7 Go Yeisu ina livala katainasiye, e taumava kabobóbwara kama,
‘Nakona amo nakae ilatuwokoida unana kita beredi tanuwoilave.’
8 E kina Yeisuyana bogina iyagoi manakaema kanuwonúwana, tuwo idigo kana,
‘Komi to moitamo, geya konumisedokoiguta! Kaga pasina amitava kobobóbwara bego geya ami beredimo? 9 Nava geya koyagoiyeta ae? Manakae? Boi beredi ainima goi tomota 5,000 avakanidi, moe bogina konuwoilave ae? Nakae valala bayao goi kododoidi, bogina konuwoilave aivina sikesa ae?†Mad 14:17-21. 10 Aiyuwoina boi beredi ainima aiyuwo goi tomota 4,000 avakanidi, moe bogina konuwoilave ae? Nakae valala bayao gagaidi goi kododoidi, bogina konuwoilave aivina sikesa ae?†Mad 15:34-38. 11 Komi manakae geya koyagoiyeta bego beredi manuna geya abobwareta, go sem kagu, “Ami dodōkana Parisi be Sadusi idi isti goi.” ’
12 Amoko goi bogina kayagoi geya beredi toina manuna Yeisu idigodigo geya, go sem latuwona Parisi be Sadusi idi vatulúkwana kavakilisidi.
Pita ina kamoitamo Yeisu manuna
(Maki 8:27-38; Luke 9:18-27)
13 E Yeisu kai ina tovatotowanayao taiyao kana Sesariya Pilipai ana dadava. Amoko goi Yeisu ilumadadema idigo kana,
‘Tomota sibobóbwara koonovedi manakaedi sinuuwonúwana Tomalatomota manuna?’
14 ‘Tomota maniyedi sidigodigo bego Tauyana Iyoni tosayóyova. Go maniyedi sidigodigo bego Tauyana Eliyau. Go maniyedi sidigodigo bego Tauyana Yeremaya o Yaubada ina tokabivalavala tayamo’, kai kaema.†Mad 14:1-2; Mak 6:14-15; Luk 9:7-8.
15 Go Yeisu idigo kana,
‘Go komi manakaemi konuwonúwana yau manugu?’
16 E Saimoni Pita idigo kana,
‘Kom Guyau, Yaubada maa yawoina Natuna!’†Iyo 6:68-69.
17 E kina Yeisu idigo kana,
‘Saimoni, Iyona natuna, moe tomota geya sivatulukoimta, go sem Tamagu guma yábana ivatulukoim. Tauna am dedevina bogina kubabane. 18 E ame yau alatuuwokoim kunōve: Kom Pita‡Pita: Pita ana yagoina moe gurewa go, Pita be lasáuna da Giriki niyadi adi taiyakeka nakae. o kada, “Lasáuna.” Go moe lasaunayana yatana goi bei yau guna totugugunayao alamgogoidi ayatoidi nakae lasáuna neta yatana vada tayowo ikasa. Ago ámasa geya itoboineyeta guna totugugunayaoyadi itogagasavedi. 19 Ame tuta lovina avadamane kom goi bego Yaubada ina kalibúbuna goi kom mam lovina. Tauna kaga poyapoya goi kusaanabode Yaubada yábana goi nakae isanabode. Aiyuwoina kaga poyapoya goi kuutagone Yaubada yábana goi nakae itagone.’†Ais 22:22; Mad 18:18; Iyo 20:23.
20 E tuwo kai tovatotowanayama ikatumatalima idigo kana,
‘Geya vatau tayaamo kolaatuwōko bego yau Guyau.’
Yeisu ina tovatotowanayao
ikatubaayasidi ina kámasa manuna tetelina
ikatubaayasidi ina kámasa manuna tetelina
(Madiu 16:21—18:35)
Yeisu ana sabokuli manuna
(Maki 8:31—9:1; Luke 9:22-27)
21 Tuta amo goi Yeisu ivatowo kai ina tovatotowanayao ivatulukoima ina kámasa manuna, idigo kana,
‘Itoboine ana Yerusalema goi tomoyamoya be Tonúwala Gagaidi be nakae Yaubada ina Katukeda ana tovatulukwanayao bei siyogedegedegu gagaina be nakae sikaumategu go, maliyalina aitonina goi Yaubada bei ikaitaoegu.’
22 Ago Pita itáoya Yeisu ikabi, adi taiyuwo sibala sina masigava goi, e Pita ivatowo Yeisu ibove idigo kana,
‘Iyaa! Guna Tomoya, moe kwalāve! Moe nakae geya iisowóduwo yaim!’
23 Go Yeisu itugavila, Pita matana goi idigo kana,
‘Kom im guinuwa Kaleya nakae! Kūna mligu goi kusabokuliyēgu!‡Kūna mligu goi kusabokuliyēgu: Da Giriki niyadi goi ame ana yagoina aiyuwo itoboine. Tayamo mae nakae. Aiyuwoina itoboineda takaigavile kada, ‘Kwalavēgu!’ Kom geya kunuwonuwoneta Yaubada ina nuwonúwana manuna, go sem tomota idi nuwonúwana manuna kunuwonúwana. Tauna kom im nuwonúwana goi kupooikíkina kumatabodeebodegu!’
24 Tuwo kai Yeisu ina tovatotowanayao yaima goi idigo kana,
‘Avatauwa komi neta latuwomi bego kosabokuuliyegu, toinimi yawoimi kokaasalēdi be nakae toinimi imi kerose kokaavalēdi‡Imi kerose kokaavalēdi: Ame ana yagoina tomota itagona ikámasa Yeisu pasina. namliyeta baige kōma kosabokuliyēgu.†Mad 10:38; Luk 14:27. 25 Moitamo. Avatauwa bego yawoidi sivagagaledi, e nava yawoidi vau bei sitagau. Go avatauwa neta yau pasigu yawoidi sitagau, e nava yawoidi vata bei sibabane.†Mad 10:39; Luk 17:33; Iyo 12:25. 26 Guna nuwonúwana ataligei. Yawoimi moe dogoi gagaina. Nakae neta poyapoya esaesaina gagaina madabokina kokabi go, yawoimi sitagau vata, e bei kaga ana dedevina? Geya. Neta yawoimi sitagau vata, geya tayaamo kaga ikaaiyaka itoboine bei yawoimiyadi kotalamapuyedi. 27 Moitamo. Tomalatomota Tamana ana káeyana tomoeeyalina goi bei ima ina aneroseyao taiyao,†aMad 25:31. e bei tomota tamo tamo idi guinuwa goi ikatumapudi.†bSam 62:12; Rom 2:6.
28 U, moe nakae bei isowóduwo go, ame alatuuwokoimi konōve: Tutayana Tomalatomota ima, bei ina bodao ikaliibubudi, e komi maniyemi ameko kootáoya nava bei maa yawoimi kogite.’
†16:14 Mad 14:1-2; Mak 6:14-15; Luk 9:7-8.
‡16:18 Pita: Pita ana yagoina moe gurewa go, Pita be lasáuna da Giriki niyadi adi taiyakeka nakae.
†16:19 Ais 22:22; Mad 18:18; Iyo 20:23.
‡16:23 Kūna mligu goi kusabokuliyēgu: Da Giriki niyadi goi ame ana yagoina aiyuwo itoboine. Tayamo mae nakae. Aiyuwoina itoboineda takaigavile kada, ‘Kwalavēgu!’
‡16:24 Imi kerose kokaavalēdi: Ame ana yagoina tomota itagona ikámasa Yeisu pasina.
†16:25 Mad 10:39; Luk 17:33; Iyo 12:25.