6
Yeisu ina kaba kinana aivasina:
Boda ainima tausani (5,000) ivaakanidi tetelina
(Madiu 14:13-21; Maki 6:30-44; Luke 9:10-17)
1 Moe dogoiyadi sikavava, Yeisu kai ina tovatotowanayao taiyao kakaluvilamna kana Galili dadavina. Niga oga kasowoya kakailova kasaidámana kana Galili Bwaena ituli ta dadava. Bwaeyana youyuwoina moe Tiberiyasi. 2 E kana go, boda gagaina bogina sigite aba kinanayadi Yeisu iguuinuwedi tokatówana yaidi goi, tauna aedi goi Bwaeyana sivanibisi sina Tauyana sisabookuliye. 3 E kama ituli ta dadava goi, Yeisu kai ina tovatotowanayao taiyao kasou, kana koya goi katuko. Maeko goi katusobu kakaaiyaka. 4 Ego kai Diyuu ima Basitáwana Aikanina bogina ana kebukebu. 5 E Yeisu iitusobu go, matana idobala boda gagaina igitedi simamaima Tauyana yaina. Tuwo Pilipo ilatuwoko kana,
‘Pilipo, amo tauyadi avadi nako bei tagimone bego sikáika?’
6 Ego moe idigedige bego Pilipoyana ina numisa ivakakone. Iya go Yeisu bogina iyagoi kaga giyakainava bei toinina iguinuwe. 7 Go iya Pilipoyana idigo kana,
‘Manakaema? Boda giyaina kaeda! Neta kita tukówana ainima aito adi paisewa ana maisa takabi, avadi tagimonedi, e nakona giyaina giyaina tomota tamo tamo tavinidi go, geya itoboinedeta amo bodayadi liliudikova tavakanidi.’
8 Yeisu ina tovatotówana tayamo, moe Saimoni Pita siyana Anduru, kana,
9 ‘Gómana tayamo ameni. Tauyana mana bali beredi ainima be mana íyana kaaivayaidi aiyuwo go, moe kaga? Amo boda gagaina go!’†2To 4:42-44.
10 Yeisu ilatuwokoima idigo kana,
‘Tomota kolatuwokōidi situsobu.’
Ego amo dadavayana goi náuna gagaina ikaaiyaka, tauna kalatuwokoidi situsobu. Bodayadi yaidi goi koroto kaka adi badabada moe 5,000. 11 E berediyadi be iyanayadi Yeisu kavini ikabidi manudi ikauyagu Yaubada yaina. Ikavava, berediyadi ikivisidi, ivinima go, kai kakabidi kana kakaiguyauyedi tomotayadi siitusobu yaidi. Ikavava, íyana nakae iguinuwe. Ago tomotayadi sikáika nakonakae latuwodi.
12 E tutayana tomota bogina gamodi, Yeisu kai ina tovatotowanayaoyama ilatuwokoima kana,
‘Kōna valala kokatunokunokūdi, govila bei takavavaluge.’
13 E tauna kana bali berediyadi ainima tomota bogina sikáika gamodi go, valalaidi kakatunokunokudi, e bayao yawou aiyuwo kavakayaodeidi. 14 E kidi go tomotayadi sigite Yeisu aba kinana iguuinuwe, tuwo sidigo kadi,
‘Amo Tauyana moitamo Yaubada ina tokabivalavalayana tatuuyaosi bego ima poyapoya ame goi.’†Atu 18:15-19.
15 E iya go Yeisuyana iyagoi bego tomota giyakainava bei sima siyoisi be sivayoko Tauyana adi tokalibúbuna, tuwo ikalavedi go, anetava aiyuwoina koyayana goi itukomna.
Yeisu ina kaba kinana ainimaina:
Galili Bwaena yatana goi iiketoiya tetelina
(Madiu 14:22-27; Maki 6:45-52)
16 E tutayana lavilavi bogina, kai ina tovatotowanayao kasou kaiwo kana Galili Bwaena labutabutaina goi. 17 Vanuwo bogina ikamamaníwana go, Yeisu nava geya imaita. Tuwo kai ima oga goi kasowoya, katavila kana Kapaneumi. 18 Kanonoina go, bwaeyana goi yágira gagaina itowo, e aivaya gagaidi. 19 E tauna kai kabeubéuta kanonoina go, bogina kana kilomita ainima nakae. Kanonoina go, Yeisu kagite bwae yatana goi iketoiya imamaima, e ima oga bogina ivakakana. Tuwo kai kamatoita.
20 ‘Yau Tauyagu! Taabu koomatōita!’ Yeisu kaena.
21 E tauna mama uyáwana oga goi bego isowoya go, mainao bogina kavaiu asayana latuwoma goi!
Yeisu ina vatulúkwana
yawana vata awoinuna manuna
22 Vanuwo itomo, bodayadi Galili Bwaena labutabutaina dadavayana goi nava sikaaiyaka Yeisu siilusale go, geya siyagoiyeta nako ina. Siyagoi boile mamaya goi kai ima oga tayamo toito ikaaiyaka go, ame geya. Aiyuwoina boile Yeisu sigite geya isowoeta, go sem kai ina tovatotowanayao ametava kasowoya kana. 23 Ego oga giyaidi maniyedi Tiberiyasi goi sima yoyowo tayamo goi sivaiu. Yoyowoyana moe boile Tomoya beredi manuna ikauyagu namliyeta bodayadi sikáika go, kikina.
24 E tutayana bodayadi sigite bego Yeisu nakae kai ina tovatotowanayao amoko goi geya, e ogayadi sisowoya sina Kapaneumi goi Yeisu silusale. 25 Sima Galili Bwaena ituli ta dadava goi silusale. Siilusale, amoko goi sibabane, tuwo sidigo kadi,
‘Tovatulúkwana Toolagaim, kom ava tuta kuma?’
26 Yeisuyana idigo kana,
‘Komi kolusalegu moe moitamo go, ame alatuuwokoimi konōve: Komi koluusalegu geya kada aba kinana boi koogitedi pasidi geya, go sem boi beredi kokáika bogina gamomi pasina moe kolusalegu. 27 Taabu kopooisōgana awoinu kaavavaina manuna, go sem yawana vata awoinuna manuna kopooisōgana! Moe awoinuyana Tomalatomota bei ivinimi. Bogina koyagoi. Tamada Yaubada bogina ivayoko iya ana katumapu, tauna itoboine nakae iguuinuwe.’
28 E bodayadi sidigo kadi,
‘Ava guinuwa itoboine kaguinuwe bego Yaubada ina nuwonúwana kaguuinuwe?’
29 Iya Yeisuyana idigo kana,
‘Yaubada ina nuwonúwana ame nakae koguinuwe: Bego Tauyana Yaubada bogina ietune ima konumise.’
30 E bodayadi sidigo kadi,
‘Tauna kom ava kaba kinana bei kuguinuwe bego kagite be kanumisem? Kaga bei kuguinuwe? 31 Nakae aba kinana tayamo boi nimatu Mosese iguinuwe ame nakae: Tubudao boi nimatu yoyowo goi mana†aTat 16:14-16,31. sikakáika nakae boi Gínina Kimaasabaina kana,
 
“Awoinu yábana goi ivinidi sikáika.” ’†bTat 16:4; Nie 9:15.
Same 78:24
 
32 Go iya Yeisuyana idigo kana,
‘Moitamo awoinu yábana goi imamaima sikakáika go, ame alatuuwokoimi konōve: Iya Mosese awoinu yábana goi geya ivinidita, go sem yau Tamagu ivinidi go, awoinu mooitamoina yábana goi nakae bei ivinimi. 33 Ame moitamo. Awoinuyana Yaubada iivinimi moe Tauyana yábana goi isou ima da poyapoya yawana vau ivinimi.’
34 E bodayadi sidigo kadi,
‘Tomoya, tuta liliuna moe awoinuyana neta kuuvinīma.’
35 Iya Yeisuyana idigo kana,
‘Yau Tauyagu yawana vau awoinuna. Avatau neta iimekoigu, e loga geya ikamakámasa. Nakae neta inuumisegu, e maena geya iyapayápasa. 36 Latuwogu komekoigu go, geya. Go sem nakae bogina alatuwokoimi kagu,
“Bogina koogitegu aba kinana aguuinuwedi go, nava geya konumiseguta.”
37 Tomota liliudi Tamagu iivinigu bei simekoigu. Go liliudikova siimekoigu, yaidi goi geya tayaamo bei avatapiye. 38 Unana yábana goi asou ama geya kada guna nuwonúwana bego aguinuwe geya, go sem bego guna Toetuna ina nuwonúwana aguinuwe. Tauna tomotayadi sima yaigu geya avatapiyedita. 39 E ame guna Toetunayana ina nuwonúwana: Bego tomota liliudi bogina iivinigu goi geya tayaamo vatau bei avaasulaigi, go sem tuta ana kaba lukavava ámasa goi bei akaitaoedi. 40 Ame moitamo. Yau Tamagu ina nuwonúwana ame nakae: Bego avatauwa neta Natuna sigite be sinumise, e yawoidi vata bei sibabane, nakae tuta ana kaba lukavava ámasa goi bei akaitaoedi.’
41 E tauna Yeisu ina livalayadi pasidi kidi Diyuu adi tolovinayao sikaukulukúluwo unana Tauyana idigo kana,
‘Yau Tauyagu awoinu yábana goi asou ama.’
Tauna sikaukulukúluwo 42 taudiva sidigo kadi,
‘Amo Iyosepa natuna, Tauyana Yeisu ae? Tamana be sinana tayaagoidi go, ame manakae tauna kana,
“Yábana goi asou ama”?’
43 Go iya Yeisuyana idigo kana,
‘Taabu taumiva kokaukuulukūluwo! 44 Geya vatau tayaamo itoboine toinina imekoigu go, avatauwa neta Tamagu, guna Toetuna, ibiudi, bei simekoigu. Ago tuta ana kaba lukavava tauyadi ámasa goi bei akaitaoedi. 45 Moe nakae tonumisa liliudi manudi boi Yaubada ina tokabivalavalayao sigini kadi,
 
“Tomota liliudi Yaubada bei ivatulukoidi.”
Aiseya 54:13
 
Avatauwa neta Tamagu sinove be nakae sikabiikaone, bei simekoigu. 46 Go geya kada tayaamo tomota Tamagu bogina igite geya. Tauyana Yaubada goi ima, e ame Tauyana anetava Tamagu bogina igite. 47 Guna bóbwara moitamo go, ame alatuuwokoimi konōve: Avatauwa neta sinuumisegu, bogina maa yawoidi vata.†Iyo 3:15-16, 20:31; 1Iy 5:13. 48 Yau Tauyagu moe yawana vau awoinuna. 49 Tubumiyao boi nimatu yoyowo goi mana sikakáika go, tuwo niga sikamasa kówasa. 50 Awoinu ame adigedige moe yábana goi isou ima bego avatauwa neta sikáika, e geya sikamaseta. 51 Yau Tauyagu awoinu maa yawoina, yábana goi asou ama. Avatauwa neta ame awoinuyana sikani, yawoidi vata bei sibabane. Aiyuwoina ame awoinuyana yau aakasale moe iwoigu komi da poyapoya yawoimi vata manuna.’
52 E tauna kidi Diyuu adi tolovinayao taudiva sikaumakimaki kadi,
‘Amo korotoyana manakaena iwoina ikasale bego takani?’
53 Tauna iya Yeisuyana idigo kana,
‘Guna bóbwara geya konumiseyeta go, ame alatuuwokoimi konōve: Neta Tomalatomota iwoina geya kokaniyeta be nakae ikaikaina geya konimyeta, yawana vau yaimi goi geya. 54 Avatauwa neta iwoigu sikani be ikaikaigu sinim, yawoidi vata sibabane, e tuta ana kaba lukavava ámasa goi bei akaitaoemneidi. 55 Ame moitamo. Yau iwoigu awoinu mooitamoina. Yau ikaikaigu aba nim mooitamoina. 56 Avatauwa neta iwoigu goi sikakáika be ikaikaigu goi sinimnim, bogina sikaaiyaka yau yaigu nakae yau akaaiyaka kidi yaidi. 57 Yau maa yawoigu Tamagu pasina unana Tauyana toni yáwana ietunegu ama. Avatauwa neta iwoigu sikani nakae; kidi maa yawoidi yau pasigu. 58 Awoinu ame yábana goi isou ima go, geya kada komi tubumiyao avadi nakae geya. Amo sikáika go, tuwo niga sikámasa. Go avatauwa neta ame awoinuyana sikáika, bei sikaiyako vata.’
59 Ame livalayadi kai Diyuu ima kaba tugúguna goi iidigedi tutayana Kapaneumi goi ivaatulúkwana.
Tomota maniyedi Yeisu sikalave go,
iya Pita nava isabookuliye tetelina
60 E Yeisu ina tovatotowanayao badabadaidi ina livala sinove, taudiva sidigo kadi,
‘Iyaa! Amo livalayadi simoumou. Avatau itoboine iuyaonedi? Geya!’
61 E Yeisu nukotona goi bogina iyagoi bego ina tovatotowanayaoyadi ina livala manuna sikulukúluwo. Tuwo ilatuwokoidi idigo kana,
‘Manakae? Guna livala pasidi imi numisa goi kokapusi? 62 E tauna neta Tomalatomota kogite ituko ina boi isou imamaima asayana goi, manakae? Bei kokapusi gea konumise? 63 Baloma Kimaasabaina moe yawana vau ana tokaiguyau go, tomota toinidi idi togaga geya ivaitedita yawana vau manuna. Yau guna livala bogina alatuwokoimi Baloma Kimaasabaina goi sima nakae livalayadi yawana vau unana. 64 Numisa goi itoboinemi yawanayana kobabane go, maniyemi yaimi goi geya konumiseta.’
Ame moitamo. Yeisu boi ina paisewa ana kaba vatowo goi igimiyagoi avatauwa bei geya sinumiseta be nakae avatau ina tonuwotulu. 65 Tuwaina idigo kana,
‘Moe pasina bogina alatuwokoimi kagu,
“Geya vatau tayaamo itoboine toinina imekoigu neta Tamagu geya itagoneyeta.” ’
66 Ame pasina tuta amo goi Yeisu ina tovatotowanayao badabadaidi sitaoya Tauyana sikalave, e geya tuwaina sisabookuliye. 67 E tauna kai ina tovatotowanayao yawou aiyuwo nava kakaaiyaka Yeisu ilatuwokoima idigo kana,
‘Manakae? Komi nakae latuwomi kokalavegu?’
68 Go iya Saimoni Pita kana,
‘Tomoya, neta kakalavem, bei nako kana? Kom amta im livala goi yawana vata kababane. 69 Kai bogina kanuumisem nakae kayaagoim bego kom Totumasaba, Yaubada goi kuma.’†Mad 16:16; Mak 8:29; Luk 9:20.
70 Yeisu idigo kana,
‘Komi yawou aiyuwoyami, yau akinavemi go, tuwo tayamo yaimi goi moe Totagiwayayana.’
71 Ego moe Saimoni guma Keriota natuna Yudasa idigedige. Tauyana tayamo yawou aiyuwo yaima goi go, giyakainava bei Yeisu inuwotuluye.

†6:9 2To 4:42-44.

†6:14 Atu 18:15-19.

†a6:31 Tat 16:14-16,31.

†b6:31 Tat 16:4; Nie 9:15.

†6:47 Iyo 3:15-16, 20:31; 1Iy 5:13.

†6:69 Mad 16:16; Mak 8:29; Luk 9:20.

© 2019 Wycliffe Bible Translators, Inc.