5
Yeisu ina kaba kinana aitonina:
Koroto topem Sabati goi ikideedevine tetelina
Koroto topem Sabati goi ikideedevine tetelina
1 Moe dogoiyadi sikavava, kai Diyuu ima káika tayamo bogina ana kebukebu, e Yeisu kai ina tovatotowanayao taiyao katuko kana Yerusalema goi. 2 Bwae nikuunikuna tayamo Yerusalema goi ikaaiyaka. Moe tayamo aba siu yoina Sipi Idi Kaba Siu kikina. Bwaeyana Diyuu niyadi goi siduduwe Betesata. Kikina goi vada geya adi vabodamo ainima sitaoyakobu. 3-4 Vadayadi goi togoyogoyo badabadaidi, nakae tokebo, topego be topem, sikaaiyaka.‡Buki Kimaasabaina bogo kopi maniyedi goi tomwana 3 ana kaba lukavava be tomwana 4 geya sikaiyaketa. Nakona ame tomwanayadi Iyoni geya iginidita, go sem tokaidámana toinina ina nuwonúwana igini. Tomwanayadi ame nakae: (3b) Siituyáwata bego bwaeyana ikaubobóbwala. (4) Moitamo. Yauwe ina anerose tuta tuta isou ima bwaeyana ikimoemoe. E ikimoemoe ikavava, avatau neta igimisou bwaeyana goi, neta ava katówana, e tauyana bei iboboina. 5 E tayamo koroto amoko goi ikaaiyaka, bogina tala 38 goi mana vísiya ikaaiyaka.
6 Yeisu ima korotoyana igite iitusobu, iyagoi bego tuta maanawena mana vísiya. Tuwo korotoyana ilatuwoko kana,
‘Manakae? Latuwom kudedevina?’
7 ‘U, Tomoya, latuwogu go, tutayana bwae ikaubobóbwala, geya tayaamo guna tovaita ikaaiyaka itoboine ikavalegu bwaeyana goi ikaisobuyegu. Tuwo toinigu apoikiki ama go, tuta tuta tomota tayamo ivakumgo isou bwaeyana goi, e yau geya’, tokatowanayana kaena.
8 Yeisu kana,
‘Kutāoya, im baseko kwābi go, kuketōiya!’
9 Tuwo moitamo mainao idedevina, e ina basekoyana ikabi iketoiya. Ego ame maliyalinayana moe Sabati. 10 E kidi Diyuu adi tovakumgoyao sigite korotoyana idedevina ina baseko iikavale, tuwo silatuwoko kadi,
‘Iyaa! Kita geya ada tagonamo bei Sabati goi tapaaisewa, tauna kom geya am tagonamo im baseko kuukavale.’†Nie 13:19; Yer 17:21.
11 ‘Tauyana guna tokidedevina ilatuwokoigu kana,
“Im baseko kwābi kuketōiya” ’, korotoyana kaena.
12 Tovakumgoyadi silumadade sidigo kadi,
‘Ava koroto ilatuwokoim im baseko kwabi kuketoiya?’
13 E kina go korotoyana bogina idedevina geya iyagoiyeta ana tokidedevina yoina manakoyoina. Boda gagaina sikaaiyaka, e bodayadi sinaedi goi Yeisu bogina ivasulaigi.
Yeisu ina katumapu Diyuu idi vakaleya yaina
14 Moe dogoiyadi sikavava, Yeisu Vada Kimaasabaina goi isiu korotoyana ibabane, tuwo idigo kana,
‘Kunovēgu! Kom bogina kudedevina. Ago taabu goyo tuwaina kuguuinūwe, govila bei dogoi goyogoyoina toina isowóduwo yaim.’
15 Tuwo korotoyana ina Diyuu adi tovakumgoyao yaidi italavaita idigo kana,
‘Guna tokidedevina yoina Yeisu.’
16 Kidi Diyuu adi tovakumgoyao sivatowo Yeisu sivakaleye ame pasina: Ina guinuwa Sabati goi iguuinuwedi. 17 E iya go Yeisu ilatuwokoidi idigo kana,
‘Yau Tamagu boi nimatu go, ima ame tuta nava ipaaisewa, tauna yau nakae apaaisewa.’
18 E tauna kidi Diyuu adi tovakumgoyao sipoikiki makimaki bego Yeisu sikaumate ame pasina: Yeisu Sabati ana lovina ikapipilave. Go apipilova kaka geya, go sem idigodigo bego Yaubada moe toinina Tamana. Moe nakae Yaubada taiyao sivavasa. 19 E iya Yeisu ilatuwokoidi idigo kana,
‘Moitamo apaaisewa go, ame alatuuwokoimi konōve: Geya tayaamo kaga Yaubada Natuna itoboine toinina ina lovina goi iguinuwe, go sem kaga neta igite Tamana iguuinuwe Natunayana nakae iguuinuwe. Ame moitamo. Kaga neta Tamanayana iguuinuwedi, guinuwayadi Natuna nakae iguuinuwedi. 20 Guna nuwonúwana ataligei. Iya go Tamanayana ina guinuwa liliudi Natuna bogina ivatuluko unana imatakoiye. Ago amo guinuwayadi giyaidi. Go nava bei guinuwa gagaidi Natuna ivatuluko iguinuwedi bego komi kogitedi kokainaopa. 21 Kogita. Nakonakae Tamana tokámasa ikaitaoedi o tadigo kada, “Yawoidi ivinidi”, e Natuna nakae iguinuwe. Avatauwa neta Natuna ikinavedi, e yawoidi vau ivinidi. 22 Ame moitamo. Tamana geya vatau tayaamo itakino, go sem takínona ana paisewa madabokina bogina Natuna nimana goi iyato 23 bego tomota liliudi siwowoine nakae Tamana bogina siwowoine. Avatauwa neta Natuna geya siwowoineyeta, e nakae ina Toetuna, moe Tamana, geya siwowoineyeta. 24 Takínona ana paisewa ivini go, ame alatuuwokoimi konōve: Avatauwa neta guna livala sinovedi be guna Toetuna sinumise, e yawoidi vata sibabane. Tuwo takínona goi geya sisiuta, go sem ámasa bogina sikalave go, sisaidámana yawana vata goi. 25 Guna bóbwara moitamo, tauna ame alatuuwokoimi konōve: Tuta tayamo imamaima o tadigo kada, “Bogina ima” bei tomota neta balomaidi kaamasidi, e Yaubada Natuna niyana bei sinove go, neta sikabikaone, yawoidi vau bei sibabane. 26 Ame nakae: Tamana moe yawana vau ana tokaiguyau go, Natuna nakae bogina ivayoko bego Tauyana yawana vau ana tokaiguyau. 27 Natunayana moe Tomalatomota, tauna Tamana lovina ivini bei tomota itakinoidi. 28 Ame manuna taabu kokaaināopa unana tuta tayamo imamaima goi tokámasa liliudi bei Tauyana niyana sinove, 29 adi valiwoga tukubu goi bei sisowóduwo. Tauyadi guinuwa dedevina ana toguinuwa sitaoyamna bei yawoidi vata sibabane go, goyo adi toguinuwayao sitaoyamna bei adi takínona sibabane. Tauna taabu kokaaināopa.†Dan 12:2.
30 Yau geya tayaamo kaga toinigu guna nuwonúwana goi itoboinegu aguinuwe. Takinona nakae. Nakonakae Yaubada ilatuwokoigu, nakae atakínona. Geya latuwogu toinigu guna nuwonúwana aguinuwe, go sem latuwogu guna Toetuna ina nuwonúwana aguuinuwe. Tauna yau guna takinonayana moe kivaavasaina.
31 Neta yau toinigu atalavaitegu, guna talavaitayana moe geya moitamo geya. 32 Ituli ta totalavaita ikaaiyaka italavaitegu. Ayagoi bego Tauyana ina talavaitayana yau manugu, moe mooitamoina. 33 Komi boi imi tomota koetunedi sina Iyoni yaina goi; latuwomi ina talavaita yau manugu konove, e Yaubada ana Nanamsa Mooitamoina moe yau italavaaitegu.†Iyo 1:19-27, 3:27-30. 34 E tomota idi talavaita geya auyaonedita, go sem komi kouyaonedi, tauna Iyoni ina livala manugu alatuuwokoimi bego komi konumise bei ami yava kobabane. 35 Amo tauyana rampa nakae ininínima. E komi go ina mavadayana goi latuwomi tuta kaakupina koouyáwana. 36 Go yau manugu tayamo talavaita ikaaiyaka; talavaitayana itogaga namliyeta Iyoni ina talavaita. Moitamo. Talavaitayana moe guinuwa Tamagu iivinigu aguinuwedi, e guinuwayadi moitamo aguuinuwedi. Ame guinuwayadi sitalavaitegu bego Tamada ietunegu ama.
37 Ago Tamagu guna Toetuna, Tauyana toinina bogina italavaitegu go, niyana geya konovenove nakae maisina geya kogitegite.†Mad 3:17; Mak 1:11; Luk 3:22. 38 Tauyana ietunegu go, komi geya konumiseguta, tauna ina livala yaimi goi geya ikaiyaketa geya. 39 Komi Gínina Kimaasabaina kokatuyaividokoidi‡Kokatuyaividokoidi: Da Giriki niyadi goi livala ame geya imavadeta. Itoboineda takaigavile kada, ‘Kokatuyaividokōidi.’ Moe lovina ivinidi. Aiyuwoina itoboineda kada, ‘Kokatuyaividokoidi.’ Ame ilatuwokoidi idi sinapu bogina siguinuwe manuna. unana konuwonúwana Gininayadi goi bei koyagoi manakaemi yawoimi vata kobabane. Go amo Gininayadi sitalavaaitegu! 40 Go kokatae koma yaigu bego yawoimi vata kobabane.’
41 Tuwaina kana,
‘Yau Yaubada amataakoiye, tauna tomota idi taimámina moe geya auyaonedita, 42 go sem bogina ayagoimi bego latuwomi tomota idi taimámina unana Yaubada ana matakoi yaimi goi geya ikaiyaketa. 43 Yau Tamagu yoina goi ama go, geya kouyaoneguta. Neta tomota tayamo toinina yoina goi ima, tauyana kouyaone! 44 Neta toinimi ami taimámina koyale go, Yaubada kaakesaina ina taimámina geya kotokumeyeta, e bei manakaemi itoboinemi konumisegu? Geya! 45 Taabu konuuwonūwana bego Tamagu yaina goi yau bei awowokoimi. Komi ami towowókana tayamo ikaaiyaka. Towowokanayana moe Mosese go, komi kolootutae bego ivaitemi. 46 Moitamo. Neta Mosese konumise, bei konumisegu. Bogina koyagoi. Moe yau manugu ina bukiyadi goi iginidi! 47 E neta Mosese ina livalayadi geya konumisedita, manakaemi bei guna livala konumisedi?’
‡5:3-4 Buki Kimaasabaina bogo kopi maniyedi goi tomwana 3 ana kaba lukavava be tomwana 4 geya sikaiyaketa. Nakona ame tomwanayadi Iyoni geya iginidita, go sem tokaidámana toinina ina nuwonúwana igini. Tomwanayadi ame nakae: (3b) Siituyáwata bego bwaeyana ikaubobóbwala. (4) Moitamo. Yauwe ina anerose tuta tuta isou ima bwaeyana ikimoemoe. E ikimoemoe ikavava, avatau neta igimisou bwaeyana goi, neta ava katówana, e tauyana bei iboboina.
†5:10 Nie 13:19; Yer 17:21.
†5:29 Dan 12:2.
†5:37 Mad 3:17; Mak 1:11; Luk 3:22.
‡5:39 Kokatuyaividokoidi: Da Giriki niyadi goi livala ame geya imavadeta. Itoboineda takaigavile kada, ‘Kokatuyaividokōidi.’ Moe lovina ivinidi. Aiyuwoina itoboineda kada, ‘Kokatuyaividokoidi.’ Ame ilatuwokoidi idi sinapu bogina siguinuwe manuna.