4
Keni be Ebeli tetelidi
1 E kina go Adama monena Ivi taiyao simasisi, ikéuwama go, niga ivenátuna, natuna koroto. Tuwo idigo kana,
‘Yauwe ina vaita goi natugu bogina ababane.’
Tauna natunayana ivayou Keni.‡Keni: Ame youyana Isileli tubunao niyadi goi ana taiyakeka nakae madágina. 2 Niga aiyuwoina ivenátuna, natuna koroto moe Keni siyana yoina Ebeli.‡Ebeli: Ame youyana ana yagoina moe tupwana nakae nuwatue o yáwana. Sikaiyaka, gogómana sibíbina gagaidi. E kina go Ebeliyana yoguyogu sipi ana tomatakavata go, kina Keniyana tobágula.
3 E niga go dibayoya ana tuta goi Keni ina dibayoya keuwoina maniyedi ikabidi ina vininabeso go, imedi Yauwe yaina ikasaledi. 4 E kina go Ebeliyana nakae ina vininabeso moe sipi bonatudiyao botomoya be saabalidi, e ikaumatedi. Ikavava, imedi Yauwe yaina ikasaledi. Yauwe igitedi, e Ebeli be ina vininabesoyadi iuyaonedi 5 go, Keniyana be ina vininabesoyadi geya iuyaonedita. Tuwo Keni gamona igoyo toina, e kubuna ipulu.†Ibe 11:4. 6 E Yauwe idigo kana,
‘Keni, kaga unana gamom igoyo? Kaga unana kubum ipulu? 7 Neta im guinuwa dedevina, bei mam uyáwana ae? Go neta im guinuwa geya idedevineta, e bágala yoguyogu sasasaina nakae totom goi iyokabúbuna; latuwona kom ilovinaem go, ina togaga kulovināe.’
8 E tuta tayamo Keni siyana Ebeli ilatuwoko idigo kana,
‘Tāna yoyowo.’
Tuwo moitamo sina yoyowo goi go, tutayana amoko goi sikaaiyaka, e Keniyana itáoya, siyana Ebeli ikaumate.†Mad 23:35; Luk 11:51; 1Iy 3:12.
9 E Yauwe Keni ilatuwoko idigo kana,
‘Siyam Ebeli nako?’
‘Seki, geya ayagoiyeta. Manakae? Yau siyagu ana tomatakavata?’ Keniyana kaena.
10 Go kina Yauwe idigo kana,
‘Moe kaga kuguinuwe! Kunōve! Siyam ikaikaina tomota nakae poyapoya goi itaiyaduduwo Yau yaigu. Latuwona im kaumata pasina Yau akatumapum.†Ibe 12:24. 11 E tauna ame tuta im guinuwa pasina akatubolatem. Poyapoya goi avalilivem, tauna geya tuwaina bei itoboinem poyapoya goi kubágula. Ame poyapoyayana siyam ikaikaina inim tutayana kwaumate. 12 Bego poyapoyayana goi kubágula go, kom manum poyapoya ilogoyo. Tauna poyapoya ame goi kom bei kuketoiya beso; geya im kasamo.’
13 Go kina Keniyana idigo kana,
‘Iyaa! Guna liuna moumou ivakaigaga yaigu! Geya itoboineguta atogaga. 14 Kunōve! Ame bei poyapoya ame goi kuvatapiyegu, tauna matam goi geya itoboineguta akaaiyaka. Tuwo bei poyapoya ame goi avabebeo beso unana geya guna kasamo. Tauna avatau neta ibabanegu, bei ikaumategu.’
15 Tuwo kina Yauwe idigo kana,
‘Moe nakae geya. Ame nakae bei aguinuwe: Avatau neta ikaumatem, tauyana ana katumapu moe aliune gagaina toina.’‡Aliune gagaina toina: Isileli tubunao niyadi goi ame geya imavadeta. Enao aiyuwo sikaiyaka. Tayamo mae nakae go, tayamo itoboineda kada, ‘Avatau neta ikaumatem, am katumapu tomota ana badabada adi tainima adi taiyuwo bei sikámasa.’
E tuwo tayamo aba kinana Keni goi iyato, govila bei avatauwa neta tauyana sibabane sikaumate. 16 E Keni itáoya Yauwe matana goi isowóduwo ina asa yoina Nodi;‡Nodi: Ame youyana ana yagoina moe vabebeo beso. moe Ideni bomatu dadavina.
Keni ana liliu
17 E Keni monena taiyao simasisi, e ikéuwama. Niga ivenátuna, natuna Enoki.‡Enoki: Koroto adi taivasi Buki Kimaasabaina goi yoidi Enoki. (1) Keni natuna. (2) Yeredi natuna (Abv 5:18-24). (3) Midiyani natuna (Abv 25:4). (4) Rubeni natuna (Abv 46:9). Ego amo tutayana Keni ilokasa, tauna asayana ivayou Enoki, nakae natuna yoina.
18 Ago Enokiyana natuna koroto Iradi. Iradi natuna koroto Mekuyaeli. Mekuyaeli natuna Metusaeli go, Metusaeli natuna Lemeki.
19 Kina Lemekiyana vevina adi taiyuwo inaidi, tayamo yoina Eda, tayamo yoina Sila. 20 Edayana ivenátuna, natuna koroto yoina Yabali. Tauyana yoyou parai goi igimimasisi go, yoguyogu sipi be bulumakau imatakaavatedi. Ago tubunao giyaidi nakae siguinuwe, situliya asa tamo tamo. 21 Yabaliyana siyana yoina Yubali. Tauyana api ana láuwo be kokopi ana uwa unadi. 22 E kina Silayana nakae ivenátuna, natuna koroto yoina Tubali Keni, tauyana kainum be kopwa goi turu iwodúguna. Tauyana niuna yoina Nama.
Lemeki ina gágasa tetelina
23 E tuta tayamo Lemeki mana gágasa monenao adi taiyuwo ilatuwokoidi idigo kana,
‘Eda be Sila, guna livala konovedokōidi.
Tubuwau ilauigu nakae ipwaikigu go,
tauyana akaumate.
24 Neta Keni ana kámasa ana katumapu
moe Yaubada bei tokaumata iliune gagaina toina,‡aIliune gagaina toina: Aba Vatowo 4:15 ana talígava kugīte. Ameko enao aiyuwoina moe kada, ‘Yaubada bei tomota ana badabada ainima aiyuwo ikaumatedi.’
e neta yau silaiguú,
guna láuwo ana katumapu moe bei gagaina toina
namliyeta Keni ina kámasa ana katumapu.’‡bIsileli tubunao niyadi goi ame tomwanayana geya imavadeta. Enao tayamo moe mae nakae. Go enao aiyuwoina itoboineda kada, ‘Guna láuwo ana katumapu moe tomota ana badabada 77 bei sikámasa.’
Seti ina bíbina tetelina
25 E Adama monena taiyao aiyuwoina simasisimna, e ikéuwama, ivenátuna natuna koroto. Monenayana idigo kana,
‘Yaubada natugu ivinigu Ebeli ana katumapu unana Keni ikaumate.’
Tauna natuna ivayou Seti.‡Seti: Ame youyana ana yagoina moe ivinigu o atumapu. 26 Niga Seti ibíbina gagaina ivenátuna, natuna koroto yoina Enosi. E amo tutayana goi tomota sivatowo Yauwe yaina sisakululu.
‡4:1 Keni: Ame youyana Isileli tubunao niyadi goi ana taiyakeka nakae madágina.
‡4:2 Ebeli: Ame youyana ana yagoina moe tupwana nakae nuwatue o yáwana.
†4:8 Mad 23:35; Luk 11:51; 1Iy 3:12.
‡4:15 Aliune gagaina toina: Isileli tubunao niyadi goi ame geya imavadeta. Enao aiyuwo sikaiyaka. Tayamo mae nakae go, tayamo itoboineda kada, ‘Avatau neta ikaumatem, am katumapu tomota ana badabada adi tainima adi taiyuwo bei sikámasa.’
‡4:16 Nodi: Ame youyana ana yagoina moe vabebeo beso.
‡4:17 Enoki: Koroto adi taivasi Buki Kimaasabaina goi yoidi Enoki. (1) Keni natuna. (2) Yeredi natuna (Abv 5:18-24). (3) Midiyani natuna (Abv 25:4). (4) Rubeni natuna (Abv 46:9).
‡a4:24 Iliune gagaina toina: Aba Vatowo 4:15 ana talígava kugīte. Ameko enao aiyuwoina moe kada, ‘Yaubada bei tomota ana badabada ainima aiyuwo ikaumatedi.’
‡b4:24 Isileli tubunao niyadi goi ame tomwanayana geya imavadeta. Enao tayamo moe mae nakae. Go enao aiyuwoina itoboineda kada, ‘Guna láuwo ana katumapu moe tomota ana badabada 77 bei sikámasa.’
‡4:25 Seti: Ame youyana ana yagoina moe ivinigu o atumapu.