Yeisu numisa ana Tokaimatana be
ana Tokimatuwo, yawoida goi tadumaakavāte
ana Tokimatuwo, yawoida goi tadumaakavāte
12
(Iberiu 12:1-29)
Mada mesayágana ida vavalákuna talokōina
1 Tauna kita nakae mada kaba gita amo tauyadi badabadaidi goi. Kidi moe numisa ana totalavaitayadi yábana goi sitaoyakobuda gaota nakae. Tauna goyo aba sanaboda nakae taabu taadanīda, e kwama nakae tavalilivīdi takalavēdi go, mada mesayágana vavalákuna matada goi taalokōine. 2 Ida lokoinayana ame nakae: Yeisu tadumaakavāte; Tauyana ida numisa ana Tokaimatana be ana Tokimatuwo. Tauyana matana goi aba uyáwana ikaaiyaka, tauna kerose ana gedageda goi itogaga go, keroseyana ana omayamaya itanisi. Ikavava, ituko ina yábana go, kébana esaesa wowooinina moe Yaubada kakataina goi itusobu. 3 Moitamo. Tauyana toogoyoidi idi vakaleya goi itogaga, e manuna konuwolelēu, govila bei sosomi itapiyapiya, e nukotomi itopa.
4 Toogoyoidi sivakaleyemi bogina kovadókana go, imi vadokanayana goi nava ikaikaimi geya idauta. 5 Nakona tonanamsa ina liwola madabokina bogina konuwoilave. Boi ina liwolayana goi kita natunao nakae ilatuwokoida idigo kana,
‘Natugu, Yauwe ina sápina taabu kuukatāe.
Aiyuwoina taabu nukotom itopatōpa
tutayana ikamamaetalim.
6 Avatauwa neta Yauwe imatakoiyedi, bei isapidi.
E ava natunava neta iuyaonedi, bei tamo tamo iliunedi.’
Nanamsa 3:11-12
7 Imi mou goi kotogāga; mouyadi Yaubada ina sápina nakae. Tutayana Tauyana isapimi, ivanaatunemi. Ame moitamo. Ava koroto natuna geya isapiyeta? Geya. 8 E kita Yaubada natunao liliuda ina sápina talotowo. Tauna avatauwa kita yaida neta geya isapideta, e ame tauyada geya Yaubada natunao toida geya. 9 Tuwaina, kita ma tamadao poyapoya ame goi. E tamadaoyadi boi sisapida go, tawowoinedi. Tauna itoboine toina balomaida Tamadi yaina goi tasakululu be yawoida tababane ae? 10 Tamadaoyadi kidi tuta kaakupina poyapoya ame goi sisapida nakae toinidi sinuwonúwana bei dedevina. E kina go Yaubada isapida kita ada dedevina manuna bei kita kimaasabaida Tauyana nakae. 11 E tutayana sápina liliudi tababanedi, geya tanuwonuwoneta bego moe aba uyáwana, go sem nuwomou talotowo. Ago avatauwa neta Yaubada ina sapinayana goi ikatubayasidi, e sapinayana keuwoina sisowóduwo yaidi goi, moe tuboina be kibóbwata Yaubada nuwona manuna.
12 Tauna komi maniyemi tovavalákuna neenetaidi nakae, e nimami taameyaidi be aemi taatavidi kokitogagēdi†Ais 35:3. 13 go, imi kenao kokitotomoiīdi bego kidi topem geya sikapusita, go sem bei sidedevina.†Abi 4:26.
Tuboina tayāle be nakae ma kimaasabaida
Yaubada umana taaketōiya
Yaubada umana taaketōiya
14 Kosokikīna bei tomota liliudi taiyao kotuboina be nakae ma kimaasabaimi kooketoiya Yaubada umana. Neta moe nakae geya koketoiyeta, geya itoboinemita ida Tomoya kogite. 15 Ami dodōkana, govila bei tayamo yaimi goi Yaubada ina kanuwóiya geya ibabaneyeta. Aiyuwoina ami dodōkana, govila bei maniyemi yaimi goi kubukasa lam nakae itabo, e ibíbina go, keuwoina tamatamaina isowóduwo, e bei semiyao badabadaidi ikaigoyaidi.†Atu 29:18. 16 Aitonina ami dodōkana, govila bei maniyemi yaimi goi Yaubada omi ikai‡Yaubada omi ikai: Da Giriki niyadi goi kadi, ‘Komasisi goyogoyo.’ Go ame nakona livalakaibala ana yagoina ame nakae: Yaubada ina bodao Isileli tubunao tupwana nakae Yaubada monena. Tauna neta ituli ta yaubada polapola yaidi goi sisakululu moe nakae siroerata o kada, ‘Yaubada odi ikai.’ o taviileimi Yaubada yaina Iso nakae. Amo tauyana botomoya mana lovina go, lovinayana ikawoilave áika tayamo manuna, e siyana ivini.†Abv 25:29-34. 17 Bogina tayagoi bego niga Isoyana latuwona tamana ina kaipaku go, tamanayana ikatae. Moe moitamo. Tauyana mana táiya isokikina makimaki bego tamana ikaipakuye go, geya itoboineyeta tamanayana nukotona ibugavile.‡Nukotona ibugavile: Da Giriki niyadi geya imavadeta ameko goi. Itoboineda takaigavile kada, ‘Iso geya itoboineyeta itugavila.’ Aiyuwoina itoboineda takaigavile kada, ‘Iso geya itoboineyeta ina guinuwa ikaigavile.’ Aitonina moe mae tomwana 17 goi.†Abv 27:30-40. 18 Moitamo itoboine kosokikina bei kotuboina be nakae kimaasabaimi Yaubada umana. Tutayana Yaubada konoko, komi geya Isileli tubunao nakae geya. Kidi boi neta kaga itoboinedi sibisikonedi, e bei sinokoidi. Sina yeu sabeninimina, kokonótuya, gaugau be nakae yágira lekoleko itowo sigitedi.†Tat 19:16-22, 20:18-21; Atu 4:11-12, 5:22-27. 19 Ago síula niyana be nakae níyana tayamo ana livala sinovedi go, tutayana sinovedi, simatoita. Tuwo sikawanoi makimaki Yaubada yaina bego livala tuwaina geya ivinidita. 20 Moitamo. Yaubada ina lovina ivinidi idigo kana,
‘Kaga neta koyayana ibisikone, nakona tomota o yoguyogu nakae, e giya gurewa goi kokaumate.’
Tateta 19:12-13
Go kidi idi nuwonúwana Yaubada ina lovinayana geya itoboinedita sikabikaone, tauna simatoita gagaina. 21 Dogoiyana koya goi isowóduwo moe aba matoita gagaina toina, tuwo Mosese nakae idigo kana,
‘Yau matoita ivakayaodeigu; bogina amalitatátava.’†Atu 9:19.
22 E moe geya komi nakae geya, go sem komi bogina koma Saiyoni Koyaina goi. Moe Yaubada maa yawoina ina kasa o tadigo kada, ‘Yerusalema yabanina.’ Aiyuwoina bogina koma anerose badabadaaidi guugunidi madi uyáwana yaidi goi. 23 Aitonina bogina koma Yaubada ina tomotayao, moe ina botomoyayao, e idi tugúguna kosiukoidi. Tauyadi yoidi yábana goi bogina iginidi. Aivasina bogina koma ada Totakínona, moe kita madabokida ida Yaubada, yaina goi be nakae tokibóbwata balomaidi Yaubada ikimatuwedi yaidi goi. 24 Ainimaina bogina koma Yeisu yaina goi, Tauyana Yaubada ina kanasiuna vau ana togúdala be nakae ikaikaina seeulina yaina goi.†aIbe 9:19, 10:22; 1Pi 1:2. Ikaikayana valena Ebeli ikaikaina valena ikalisave.†bAbv 4:10; Ibe 11:4.
Taabu Yaubada niyana takapiipilāve,
go sem takauyāgu Tauyana yaina
go sem takauyāgu Tauyana yaina
25 Ami dodōkana Tauyana ame tuta ivaadigoida niyana taabu kokapiipilāve. Neta poyapoya goi boi Isileli tubunao Yaubada ina livala sikatae go, geya itoboinedita adi liuna goi sisiya, e kita manakaeda neta Yaubada yábana goi ina livala ikaiwoduwe yaida go, Tauyana tatugavile? Bei ina liuna goi tasiya gea geya? Geya ae?†Tat 20:22. 26 Tauyana niyana amo tutayana poyapoya Saiyoni goi ikiikuiku go, ame tuta bogina ikatótula idigo kana,
‘Sivatayamo tuwaina poyapoya bei aege go,
geya poyapoya kaka geya,
go sem yábana taiyao aegedi.’
Kagai 2:6
27 E ina livalayana kana, ‘Sivatayamo tuwaina.’ Moe ivatulukoida kaga liliuna boi imadagidi bei iegedi ikabidi ikalavedi. Moe nakae iguinuwe bego dogoiyadi geya iegedita bei sikaiyako vata.
28 E tauna Yaubada ina kalibúbuna goi tasiusiu geya iikuneta, go sem ikaiyako vata. Tauna takauyāgu Yaubada yaina go, ida kauyaguyana goi mada wowoina be mada matoita tataimámina Yaubada yaina nakae bei iuyaone. 29 Moe itoboine unana ida Yaubada yeu sabeninimina nakae, e itoboine kaga liliuna ivakasavedi. Tauna tataimámina Yaubada yaina.†Tat 24:17; Atu 4:24, 9:3; Sam 97:3; Ais 33:14; 2Tk 1:7.
†12:12 Ais 35:3.
†12:13 Abi 4:26.
†12:15 Atu 29:18.
‡12:16 Yaubada omi ikai: Da Giriki niyadi goi kadi, ‘Komasisi goyogoyo.’ Go ame nakona livalakaibala ana yagoina ame nakae: Yaubada ina bodao Isileli tubunao tupwana nakae Yaubada monena. Tauna neta ituli ta yaubada polapola yaidi goi sisakululu moe nakae siroerata o kada, ‘Yaubada odi ikai.’
‡12:17 Nukotona ibugavile: Da Giriki niyadi geya imavadeta ameko goi. Itoboineda takaigavile kada, ‘Iso geya itoboineyeta itugavila.’ Aiyuwoina itoboineda takaigavile kada, ‘Iso geya itoboineyeta ina guinuwa ikaigavile.’ Aitonina moe mae tomwana 17 goi.
†12:18 Tat 19:16-22, 20:18-21; Atu 4:11-12, 5:22-27.
†12:21 Atu 9:19.
†a12:24 Ibe 9:19, 10:22; 1Pi 1:2.
†12:29 Tat 24:17; Atu 4:24, 9:3; Sam 97:3; Ais 33:14; 2Tk 1:7.