3
Adama be Ivi idi kapipilova be adi liuna tetelidi
1 E moteta tonuwosinapu gagaina. Nakae woiwoi madabokidi Yauwe Yaubada iwoodugudi ikalisavedi. Tauyana ima vavina ilatuwoko idigo kana,
‘Iyaa! Moitamo Yaubada idigodigo bego alova keuwoidi madabokiidi tánuwo sinaena taabu kookanīdi, ae?’†Nuw 12:9, 20:2.
2 Go kina vavinayana idigo kana,
‘Geya! Tánuwo alovaidi keuwoidi mama tagona kakanidi 3 go, Yaubada alova tayamo isanabode idigo kana,
“Alova tánuwo nauyayanaina, e keuwoina taabu kokanikāni be nakae taabu kobiisikōne, govila bei kokámasa.” ’
4 Go kina motetayana idigo kana,
‘Geya kokamaseta. Geya toina! 5 Moitamo. Yaubada iyagoi neta keuwoinayana kokani, nukotomi ikipolaledi, e komi Tauyana nakae, dedevina be goyo koyagoidi.’
6 Tuwo vavinayana ikandolaga alova keuwoina igite bego ana kaigigita dedevina. Aiyuwoina nakona ana káika dedevina be ana kaikayana goi itoboine nanamsa ibabane, tauna iyale. Tuwo moitamo keuwoina tayamo iguwe, e ikani. Ikavava, monena nakae tayamo ivini‡Monena nakae tayamo ivini: Isileli tubunao niyadi goi ame geya imavadeta. Kidi kadi, ‘Vavina taiyao.’ Nakona ame Adama ikaaiyaka tutayana moteta ina vavina ikatubau. Go aiyuwoina nakona Adama geya ikaiyaketa. ikani. 7 Sikani ikavava, mainao adi taiyuwokova nukotodi ikipolaledi,†Luk 24:31. tauna siyagoi sipawaku. Tuwo lao vagana siguledi, sigilumidi adi tabodaboda. 8 Sigíluma ikavava, lavilavi Yauwe Yaubada aena butukáona sinove tánuwo goi ivaabebeo. Tuwo kidi alova nauyayanaidi goi sivatamtamumuye. 9 Ago Yauwe Yaubada korotoyana itumadade idigo kana,
‘Kom nakoim?’
10 ‘Tánuwo goi aem butukáona anove go, apawaku, tauna amatoita, tuwo avatamtamumuyem’, korotoyana kaena.
11 Go Yaubada idigo kana,
‘Avatau ilatuwokoim bego kom kupawaku? Manakae? Alovayana keuwoina asanaabodem bogina kukani?’
12 ‘Vavinayana boi kuuvinigu, alova keuwoina ivinigu akani’, korotoyana kaena.
13 Tuwo Yauwe Yaubada vavinayana ilatuwoko idigo kana,
‘Iyaa! Kaga unana moe nakae kuguinuwe?’
‘Moteta ikatubaugu, akani’, vavinayana kaena.†2Ko 11:3; 1Ti 2:14.
14 Tuwo Yauwe Yaubada itáoya, motetayana ilatuwoko idigo kana,
‘Moe im guinuwa pasina akatubolatem.
Yoguyogu madabokiidi yaidi goi kom amta sikasilaliyem.
Yawoim madabokina gamom goi bei kudaladala,
e poyapoya tobum goi bei ikaaiyaka.
15 Go vakaleya kom be vavinayana nauyayanaimi goi bei ayato.
Kom im boda†aAbv 22:17-18. be tauyana ina boda‡Im boda be tauyana ina boda: Isileli tubunao niyadi goi kadi, ‘Peleleotum be tauyana peleleotuna’ go, moe tomota idigedige. Livala peleleotu nakona tomota tayamo idigedige o badabadaidi iidigedi go, geya imavadeta. Tauna ana yagoina aiyuwo. Ana yagoina tayamo moe im boda tayamo o tadigo kada, ‘Tubum tayamo.’ Go ana yagoina aiyuwoina moe im bodao o tadigo kada, ‘Tubumowo badabadaidi.’ Neta ana yagoina moe im boda, ame nakona Guyau Yeisu idigedige. Neta ana yagoina im bodao, moe Eberamo tubunao iidigedi. Nakona ana yagoina aiyuwo sikaaiyaka livalayana goi. nakae bei sivaakaleya.
Ago kina ina bodayana bei dabam ikaumotui go,
tauyana aegedugeduna kom bei kukalimotui.’†bNuw 12:17.
16 E vavinayana ilatuwoko idigo kana,
‘Im venátuna ana gedageda bei avaituwe gagaina,
tauna mam gedageda natumowo kuvenatunidi.
Im yala bego monem kulovinae go,
tauyana bei ilovinaem.’
17 E Adama‡Adama: Ame youyana ana yagoina moe koroto o tomota. ilatuwoko idigo kana,
‘Kom pasim poyapoya akatubolate
unana monem sopana kukabikaone,
e keuwoinayana boi asanaabodem taabu kukanikāni go,
tuwo kukani.†Ibe 6:8.
Yawoim ana madabokina goi bei mam gedageda
kukokōila gagaina bego avam kubabane.
18 Go náuna nakae taliboibo poyapoyayana goi
bei sitabo manum.
Ago pai be awoinu bei kukakáika.
19 Mam mosali bei kupaaisewa gagaina
bego avam kubabane ana kadókana kukámasa,
e kwaluvila kuna poyapoya goi.
Bogina kuyagoi. Poyapoya goi aodugum.
Moitamo. Kom taum poyapoyayana ana vaituwo,
tauna bei kwaluvila kuna poyapoyayana goi.
Tutayana kukámasa,
bei kumalapoyapoyamna.’
20 E korotoyana monena tomota liliudi unadi, tauna ivayou Ivi.‡Ivi: Ame youyana Isileli tubunao niyadi go, ana yagoina moe yáwana o aiyaka. 21 E Yauwe Yaubada yoguyogu sakavaidi ikabidi, Adama ma monena adi kwama imadagidi, ivalosidi.
22 E Yauwe Yaubada idigo kana,
‘Iyaa! Tomotayadi bego kita nakae, dedevina be goyo siyagoidi! Tuwo tasanabodēdi bei geya itoboinedita yawana vata alovaina keuwoina sikabi, govila bei sikani sikaiyako vata!’†Nuw 22:14.
23 E tuwo moitamo tánuwo Ideni goi ivalilivedi sina go, Adama poyapoya goi bei ibágula. Ego amo poyapoyayana goi boi Yauwe koroto iwodugu! 24 Tuwo ivatapiyedi ikavava, e tanuwoyana Ideni ana kaba siu goi moe bomatu dadavina yábana ana tomatakavatayao†Tat 25:18; Ibe 9:5. iyatoidi. Tayamo sisi yeu sabeninimina iyato go, sisiyana ikaivivilo bego aba siu itubode. Moe dogoiyadi iyatoidi bego geya vatau tayaamo bei tanuwoyana goi isiu ina yawana vata alovaina keuwoina ikabi, ikani.
‡3:6 Monena nakae tayamo ivini: Isileli tubunao niyadi goi ame geya imavadeta. Kidi kadi, ‘Vavina taiyao.’ Nakona ame Adama ikaaiyaka tutayana moteta ina vavina ikatubau. Go aiyuwoina nakona Adama geya ikaiyaketa.
†a3:15 Abv 22:17-18.
‡3:15 Im boda be tauyana ina boda: Isileli tubunao niyadi goi kadi, ‘Peleleotum be tauyana peleleotuna’ go, moe tomota idigedige. Livala peleleotu nakona tomota tayamo idigedige o badabadaidi iidigedi go, geya imavadeta. Tauna ana yagoina aiyuwo. Ana yagoina tayamo moe im boda tayamo o tadigo kada, ‘Tubum tayamo.’ Go ana yagoina aiyuwoina moe im bodao o tadigo kada, ‘Tubumowo badabadaidi.’ Neta ana yagoina moe im boda, ame nakona Guyau Yeisu idigedige. Neta ana yagoina im bodao, moe Eberamo tubunao iidigedi. Nakona ana yagoina aiyuwo sikaaiyaka livalayana goi.
‡3:17 Adama: Ame youyana ana yagoina moe koroto o tomota.
‡3:20 Ivi: Ame youyana Isileli tubunao niyadi go, ana yagoina moe yáwana o aiyaka.