2
1 Moeko goi yábana be poyapoya be nakae kaga liliuna adi madágina bogina ikavava. 2 Tuwo maliyalina ainima tayamoina goi Yaubada ina paisewa ilukavavedi go, maliyalina ainima aiyuwoina ina paisewa madabokina goi iwaiwasi.†Tat 20:11; Ibe 4:4,10. 3 Ago maliyalinayana ikaipakuye sowona be nakae ikimasabe toinina umana unana ina paisewa madabokina bogina ikavava, e maliyalinayana goi iwaiwasi. Tauna ikaipakuye be ikimasabe.
Goyo ina sowóduwo
Yaubada ina madágina goi tetelina
Yaubada ina madágina goi tetelina
(Aba Vatowo 2:4—4:26)
Koroto be vavina adi madágina
be nakae adi lovina tetelidi
be nakae adi lovina tetelidi
4 Ame kaga liliuna sisowóduwo yábana be poyapoya goi tetelidi boi tutayana Yauwe Yaubada iwodugudi.
5 E Yauwe Yaubada kúwana nava geya ietuneyeta poyapoya goi be nakae geya tayaamo avatau ikaaiyaka bei ibágula, tauna náuna poyapoyayana goi nava geya sisowoduwoita nakae geya kada tayaamo kutukutu itabo geya. 6 Kúwana geya go, bwae doelu‡Bwae doelu: Ame livalayana Isileli tubunao niyadi goi geya imavadeta. Nakona ame bwae doelu goi isowóduwo. Go aiyuwoina nakona ame númla sigugumina. goi ituko imamaima bei poyapoya ana madabokina ivakaanapoive. 7 E amo tutayana Yauwe Yaubada poyapoya kaukauna ikabi, koroto imolului. Imolului ikavava, kubuna goi yawoina isalauwe, e korotoyana maa yawoina.†1Ko 15:45. 8 E Yauwe Yaubada alova tanuina tayamo Ideni‡Ideni: Ame youyana ana yagoina moe uyáwana. goi ikatubayasi, moe bomatu dadavina. Amoko goi korotoyana bogina iiwodugu iyato. 9 Iyato go, alova liliudi neta adi kaigigita dedevidi be nakae keuwoidi adi káika dedevidi ilovinaedi poyapoya goi sitabo. Ego tanuwoyana nauyayanaina goi alova aiyuwo sikaaiyaka, tayamo neta tomota sikani, e yawoidi vata sibabane. Ago tayamo neta tomota sikani, e dedevina be goyo adi nanamsa siyagoidi.†Nuw 2:7, 22:2,14.
10 E sákala tayamo Ideni goi idaudau tanuwoyana ivakaanapoive. Sakalayana Ideni goi isowóduwo iwotai, e sákala aivasi sidau. 11 Sákala tayamo yoina Paisoni idau ina asa Kevila idaunibisi go, amoko goi goura ikaaiyaka. 12 Amo asayana ana goura moe dedevina toina. Pútuma dedevina toina yoina bidelium be nakae gurewa maisana gagaina yoina anikisi nakae sikaaiyaka. 13 Sákala aiyuwoina yoina Gikoni. Ame sakalayana asa Kosa idaunibisi. 14 Sákala aitonina yoina Tigirisi. Ame sakalayana asa Asiriya bomatu dadavina goi idau. Sákala aivasina yoina Yuparetisi.
15 E korotoyana kina Yauwe Yaubada ikabi, tánuwo Ideni goi iyato bei ipaaisewa Yaubada umana be nakae tanuwoyana imataakavate.†Yoy 3:7-8, 8:26, 18:15-16. 16 Iyato ikavava, ina lovina ivini idigo kana,
‘Alova keuwoidi madabokidi tánuwo goi atagonem kukanidi 17 go, dedevina be goyo adi nanamsa alovaina taabu kukanikāni. Neta kukani, e moitamo toina bei kukámasa. Tauna taabu kukanikāni.’
18 E Yauwe Yaubada idigo kana,
‘Geya idedevineta neta korotoyana anetava ikaaiyaka. Tuwo tayamo tovaita aodugu bei koroto sowona.’
19 E tuwo poyapoya ikabi, yoguyogu be mánuwo liliudi iwodugudi. Iwodugudi ikavava, imedi korotoyana yaina. Latuwona iyagoi korotoyana manakaena bei tamo tamo ivayoudi. Neta ava you iivinidi, e moe yoidi. 20 Tuwo moitamo korotoyana yoguyogu be mánuwo be woiwoi liliudi ivayoudi go, geya kada tayaamo yoguyogu itoboine bei tauyana ina tovaita geya. 21 Tauna korotoyana matamasimasisi gagaina kina Yauwe Yaubada ivini ikanamatáiya. Ikanaamatáiya go, korotoyana silalumina tayamo‡Silalumina tayamo: Ame livalayana Isileli tubunao niyadi goi geya imavadeta. Nakona ame korotoyana kivilina Yaubada ikabi go, aiyuwoina nakona ame koroto silalumina. ikabi, íwaya iyato, silaluminayana kiyauna ivasumapu. 22 Ivasumapu ikavava, silaluminayana ikabi, vavina iwodugu. Iwodugu ikavava, ikabi ime korotoyana yaina. 23 Tuwo korotoyana idigo kana,
‘E ame moitamo!
Ame tauyana luluna, yau lulugu maisiyana.
Nakae sakavaina, yau sakavaigu maisiyana.
Yau silalumigu goi isowóduwo, e maisiyagu.
Tauna tauyana yoina moe vavina.’‡Vavina: Isileli tubunao niyadi goi vavina moe isa go, koroto moe is, tauna adi taiyakeka tupwana nakae.
24 E tauna moe pasina koroto tamana be sinana yaidi itumasaba go, monena taiyao situyuwo, tauna adi taiyuwokova wowodi tayamo.†Mad 19:5; Mak 10:7-8; 1Ko 6:16; Epe 5:31. 25 Korotoyana ma monena adi taiyuwo sipawaku go, geya siomaemaeta.
‡2:6 Bwae doelu: Ame livalayana Isileli tubunao niyadi goi geya imavadeta. Nakona ame bwae doelu goi isowóduwo. Go aiyuwoina nakona ame númla sigugumina.
‡2:8 Ideni: Ame youyana ana yagoina moe uyáwana.
†2:15 Yoy 3:7-8, 8:26, 18:15-16.
‡2:21 Silalumina tayamo: Ame livalayana Isileli tubunao niyadi goi geya imavadeta. Nakona ame korotoyana kivilina Yaubada ikabi go, aiyuwoina nakona ame koroto silalumina.
‡2:23 Vavina: Isileli tubunao niyadi goi vavina moe isa go, koroto moe is, tauna adi taiyakeka tupwana nakae.
†2:24 Mad 19:5; Mak 10:7-8; 1Ko 6:16; Epe 5:31.