15
Mosese ina bodao taiyao idi vesi yapali
1 E ame tutayana yau Isileli tubunao taiyao vesi ame kavesiye Yauwe yaina kama,†Nuw 15:3.
‘Bei avesi Yauwe yaina;
Tauyana ana yapali ituko toina.
Osi madi totulagayao ikalisobuyedi
sisou négwasa goi!
2 Yauwe kina guna Tokitogaga;
moe Tauyana aavesiye.
Tauyana imalatoyava yaigu.†Sam 18:2; Ais 12:2.
Ame Tauyana guna Yaubada,
bei ayapaliye.
Tauyana tamagu ina Yaubada,
bei yoina akilagasi.
3 Yauwe kina tovayaviya tayamo.
Tauyana yoina Yauwe.
4 Pero ina sariyota be nakae ina tovayaviyayao liliudi,
e ikalisobuyedi Négwasa Kayakayaina goi.
Ina tovakumgoyao dedevidi toidi
kina Yauwe Négwasa Kayakayainayana goi ikausalilidi.
5 Négwasa dimowonina ilataoidi.
Gurewa nakae sisalilibóbwata
sisou sina dimówana tututu goi.
6 Yauwe,
Nimakakataim toogagaina toina.
Nimakakataimyana goi im kaleyayao kukauvisivisidi.
7 Im togaga ana kakainaki goi im kaleyayao kutogooisavedi.
Im egamogamogu yeu sabeninimina nakae kuetune ina
tauyadi limou nakae ivakasavedi.
8 Kubum ipulu yawoim kusalauwe,
e négwasa iwotai,
dadavina e dadavina ilatokotoko ituko ina.
E elu isayata ona inuwa;
négwasa vaboda nakae itaoya.
E negwasayana dimówana goi ikule ikasa.
9 Ida kaleyayao sigagágasa kadi,
“E tavatapiyēdi tasakavatēdi tayoisīdi.
Idi esaesa tanebōidi takaiguyauyēdi
bei giya sisi goi takaumatedi.
Ida togaga goi tamtulīdi,
e baige gamoda inuwa.”
10 Go Yauwe,
Yawoim goi négwasa kusalauwe,
e da Itipita ilataoidi.
Tauna kainum nakae sisalilibóbwata
négwasa toogagaidi goi.
11 Yauwe,
Ava yaubada idi yaubadayao yaidi goi
kom nakae? Geya ae?
Avatau kom nakae?
Kom Totumasaba kaausaraina.
Kom aba matoita be aba yapali.
Kom aba kainaopa ana toguinuwa.
Geya tayaamo yaubada kom nakae!
12 Tutayana nimakakataim kuyosale,
e poyapoya ima kaleyayao itonoidi.
13 Im lokata goi
kai im bodao boi kutaatetema kuvakedema.
Im togaga goi kuvakumgoiyema
kama im kaba kaiyaka kimaasabaina goi.
14 Ituli ta boda valem sinove,
bei sitatátava.
Nakae kidi da Palisiti ateyova gagaina bei iyoisidi.
15 Amo tutayana da Idom adi tolovinao
bei simatoita gagaina.
Da Moabe nakae adi tolovinao
matoita goi sitatátava.
Kidi Kenani goi sikaaiyaka
luludi bei sitameya.
16 Ame tauyadi matoita gagaina toina bei iyoisidi.
Yauwe,
Nimam toogagaina ana guinuwa pasina
odi ikámasa gurewa nakae
ana kadókana kai im bodao,
tauyama bogina kuvanatunema,‡Kuvanatunema: Livala ame Isileli tubunao niyadi goi geya imavadeta. Nakona ana yagoina moe kuvanatunema go, aiyuwoina nakona ana yagoina moe kugimonema. kavadámana.
17 Nava kai im bodao bei kumema kama
toinim im koya goi kuyatoima kalokasa.
Yauwe,
Ame koyayana kukinave im kaba kaiyaka manuna.
Tomoya,
Im kaba kimasaba nimam goi
toinim kumadagi.
18 Yauwe bei ikalibubuna vata!’
19 Ame vesiyana unana Pero ina osiyao nakae ina sariyota madi tokabikunuwoyao be ina tovayaviyayao sipoikíkina bego négwasa nauyayanaina goi sivadámana, e negwasayana Yauwe ikaluvilemnei da Itipita ikautumdi. E kai go Isileli tubunao kaketoiya poyapoya sayasayaina négwasa nauyayanaina goi. 20 E Eroni be yau niuma Miriyam, tauyana Yaubada ina tokabivalavala tayamo, girada ikabi ilauláuwo go, vevina liliudi mlina goi madi girada silauláusa. 21 E Miriyamyana vesi ame ivesiye yaidi idigo kana,
‘Tavēsi Yauwe yaina!
Tauyana ana yapali ituko toina!
Osi madi totulagayao ikalisobuyedi
sisou négwasa goi.’
Mosese ina bodao taiyao sinonoina
yoyowo goi tetelina
yoyowo goi tetelina
(Tateta 15:22—18:27)
Isileli tubunao sikaukuulukúluwo bwae pasina tetelina
22 E Isileli tubunao alatuwokoidi kataoya Négwasa Kayakayaina kakalave kana Sura yoyowoina goi. Amoko goi kaaketoiya nakae maliyalina aito go, geya tayaamo bwae kababane. 23 Tuwo kaketoiya kama asa Mara goi bwae kababane go, geya itoboinemeta kanim. Bwaeyana itamatama. Moe pasina asayana kaduduwe Mara.‡Mara: Ame youyana ana yagoina moe nuwomou be tamatama (Rut 1:20). 24 Tuwo tomota liliudi sikaukulukúluwo yau yaigu sidigo kadi,
‘Bei kaga kanim?’
25 Sikaukulukúluwo go, atumadádana Yauwe yaina vaita manuna. Tuwo alova tayamo ivatulukoigu kana,
‘Alova gomoe kwalisobūye bwaeyana goi.’
Tuwo alovayana akabi, alave bwae goi, e bwaeyana isadibidibi. E tuwo ameko goi Yauwe vatulúkwana be lovina ivinima yawoima manuna go, ivakakonema, 26 idigo kana,
‘Yau Yauwe imi Yaubada, ami tokidedevina. Tauna neta konovedokoigu go, kaga dedevina matagu goi koguinuwe be nakae guna lovina konovedi be guna katukeda liliudi kokabikaonedi, e vísiya liliudi boi da Itipita aavinidi geya avinimita.’
27 Ibóbwara ikavava, kataoya, Mara kakalave kana asa Elim goi. Amoko goi doelu ana badabada yawou aiyuwo be nakae deiti‡Deiti: Ame niu maisiyana go, keuwoina ana káika ituli. Keuwoina magi nakiyana go, kaalalaina. alovaidi 70 sikaaiyaka. Tuwo amoko bwae kikina goi katunagu.†Yoy 33:9.
†15:2 Sam 18:2; Ais 12:2.
‡15:16 Kuvanatunema: Livala ame Isileli tubunao niyadi goi geya imavadeta. Nakona ana yagoina moe kuvanatunema go, aiyuwoina nakona ana yagoina moe kugimonema.
‡15:23 Mara: Ame youyana ana yagoina moe nuwomou be tamatama (Rut 1:20).
‡15:27 Deiti: Ame niu maisiyana go, keuwoina ana káika ituli. Keuwoina magi nakiyana go, kaalalaina.
†15:27 Yoy 33:9.