Ruti
Ruti tetelina
Livala Aba Vaita
Buki ame ana togínina geya tayagoiyeta. E nakae geya tayagoiyeta kaga unana igini. Ame tetalayana isowóduwo tutayana Isileli goi geya tayaamo tolovina ikaaiyaka.
Buki ame gagaina unana Ruti guma Moabe Totuyoyowo go, Isileli tubuna tayamo yoina Boasa taiyao sinai. Sinai go, niga kidi tubudi Devida isowóduwo. Devidayana moe Yeisu tubuna.
Ame bukiyana ivatulukoida bego Yaubada imatakaavateda. Nakona mou tababanedi go, mouyadi goi ada dedevina bei tababane unana ida Yaubada imatakaavateda. Aiyuwoina ivatulukoida lokata manuna. Ruti lokata ana kaba gita. Mainao tauyana yaona Naomi ilokate, e niga Boasa nakae ilokate.
Tétala Luluna
1. Naomi ina kaiyakomou tetelina 1:1-22
2. Ruti inonoina Boasa ina tánuwo goi tetelina 2:1-23
3. Ruti ikaawanoi vaita manuna tetelina 3:1-18
4. Naomi ana dedevina iibabane tetelina 4:1-22
Naomi ina kaiyakomou tetelina
1
(Ruti 1:1-22)
Naomi monena be natunao Moabe goi sikámasa tetelina
1-2 E koroto tayamo yoina Elimaleka go, monena Naomi taiyao Bedeliyema goi sikaaiyaka. Bedeliyemayana moe Yuda dadavina sinaena. Ma natuudiyao koroto adi taiyuwo; tayamo yoina Maloni, tayamo yoina Kiliyoni go, adi nunu yoina Eparati.
E tutayana Isileli idi totaligavayao siilovina, Isileli sinaena loga gagaina isowóduwo losiye pasina. Tuwo Elimaleka monena natunao adi taiyuwo taiyao sitáoya, sina asa Moabe‡Moabe: Ame asa yoina. Boi nimatu Loti natuna vavina taiyao simasisi, ikéuwama. Ikéuwama niga ivenátuna, natuna koroto yoina Moabe. Niga Moabeyana tubunao yoidi Moabe moe nakae adi dala yoina. Aiyuwoina idi kasa sivayou Moabe (Abv 19:30-38). goi sikaaiyaka. 3 Sikaaiyaka aaa, Naomi monena Elimalekayana ikámasa. Tuwo Naomi natunao adi taiyuwo taiyao aditava sikaaiyaka. 4 Sikaaiyaka, natunaoyadi Moabe vevinaidi sinaidi, tayamo yoina Opa,‡Opa: Isileli tubunao niyadi goi ame youyana ana yagoina moe tugavila. tayamo yoina Ruti. Amoko goi sikaaiyaka tala ana badabada yawou 5 go, Maloni be Kiliyoni adi taiyuwokova nakae sikámasa. Tuwo Naomi monena be natunao bogina sikámasa, tauna anetava ikaaiyaka.
Ruti ina kasala ivagiitakoe Naomi yaina tetelina
6 E Naomi livala tayamo inove bego Yauwe ina bodao Yuda goi ivaaitedi; adi máliya bogina ivinidi. Tauna yaonao adi taiyuwo taiyao sitáoya, sikatubayasi bego Moabe sikalave go, sikaluvila sina Yuda. 7 Sikatubayasi ikavava, asayana goi sikaaiyaka sikalave go, siketoiya bego sina Yuda. 8 Sinonoina go, Naomi idigo kana,
‘Yaogowo, kokaluvilāmna kōna sinamiyao taiyao kokaaiyāka. Guna kawanoi bego Yauwe ilokatemi nakae komi bogina kolokategu be nakae boi natugowo kolokatedi. 9 Aiyuwoina, guna kawanoi bego Yauwe itagona konaimna bei monemiyao taiyao kokaaiyaka imi vada.’
Tuwo, tauyana iyowoiidi go, kidi sitáiya. 10 Sitáiya, sidigo kadi,
‘Yaoma, geya latuwoma kakalavem. Latuwoma bego kakitaum bei taiyao tana im bodayao yaidi.’
11 E kina go Naomiyana idigo kana,
‘Yaogowo, kokaluvilāmna kōna imi kasa. ¿Kaga pasina latuwomi kokitaugu? Yau geya itoboineguta bei avaitemi. Nakae geya itoboineguta bei natugowo koroto avenatunidi bei monemiyao. 12 Tuwo, kokaluvīla kōna imi kasa. Yau bogina akainamoya, tauna geya itoboineguta anaimna. ¿Go neta sabamgo ame yau koroto tayamo bei anai, taiyao kamasisi akéuwama be natugowo koroto avenatunidi, 13 manakae? ¿Bei kotuyaosidi, e sibíbina gagaidi baige konaidi? ¿Bei nai kototo? Geya, yaogowo, geya itoboinemita. Yaubada bogina itugavilegu, tauna moumou ivakaigaga yaigu namliyeta komi. Bogina koyagoi. Komi itoboinemi konaimna go, yau geya.’
14 E tuwo ina livala sinove, sitaiyamna. E Opa yaona iyowoi ikavava, ikaluvila ina ina kasa go, kina Ruti yaona imatakanikaniye, e ivalabilabine. 15 E tuwo, Naomi idigo kana,
‘Kunōve. Tuwowom ikaluvilamna ina ina bodao be ina yaubadayao‡Ina yaubadayao: Da Moabe idi yaubada polapola gagaina yoina Kemosi (1To 11:33). yaidi. E kom taiyao kokaluvīla.’
16 Go kina Rutiyana idigo kana,
‘Taabu kukaawanōi yau yaigu bego akalavem, go sem neta kutagonegu bei akitaum.
Nako goi kuna,
yau taiyao tana.
Nako goi kwaaiyaka,
yau taiyao takaaiyaka.
Im bodao moe kita ida bodao.
Im Yaubada moe kita ida Yaubada.
17 Nako goi kukámasa,
yau taiyao takámasa,
e moeko goi bei sivaliwogegu.
Bei ámasa tauna ikupoida go,
geya, bei Yauwe liuna gagaina ivinigu.’
18 E Ruti ibóbwara ikavava, Naomi bogina iyagoi bego Ruti latuwona toina taiyao sina. Tauna itugau. 19a E tuwo adi taiyuwokova siketoiya sinonoina Bedeliyema manuna.
Naomi ikaluvilamna ina Bedeliyema tetelina
19b Tutayana sisowóduwo Bedeliyema goi sisiu, asa butukaona iyata, e vevina liliudi sima adi taiyuwokova sigitedi, sidigo kadi,
‘¡Iyaa! ¿Amo Naomi ae?’
20 Go kina Naomiyana idigo kana,
‘Tokalika ikitaitaiyegu, tauna taabu koduuduwēgu Naomi,‡aNaomi: Isileli tubunao niyadi goi ame youyana ana yagoina moe uyáwana. go sem koduduwēgu Mara.‡bMara: Isileli tubunao niyadi goi ame youyana ana yagoina moe nuwomou o tamatama. 21 Boi akalavemi maa konagu go, ame tutayana Yauwe ikaluvilemneigu nima kaka. ¿Kaga ana dedevina koduduwegu Naomi? Geya. Yauwe Tokalika itugavilegu be nakae ikitaitaiyegu.’
22 Tauna nakae Naomi Moabe goi itáoya yaona Ruti guma Moabe taiyao sina Bedeliyema. Ego tutayana sisowóduwo Bedeliyema goi, moe bali ana tuta dibayoya ana kaba vatowo.
‡1:1-2 Moabe: Ame asa yoina. Boi nimatu Loti natuna vavina taiyao simasisi, ikéuwama. Ikéuwama niga ivenátuna, natuna koroto yoina Moabe. Niga Moabeyana tubunao yoidi Moabe moe nakae adi dala yoina. Aiyuwoina idi kasa sivayou Moabe (Abv 19:30-38).
‡1:4 Opa: Isileli tubunao niyadi goi ame youyana ana yagoina moe tugavila.
‡1:15 Ina yaubadayao: Da Moabe idi yaubada polapola gagaina yoina Kemosi (1To 11:33).
‡a1:20 Naomi: Isileli tubunao niyadi goi ame youyana ana yagoina moe uyáwana.
‡b1:20 Mara: Isileli tubunao niyadi goi ame youyana ana yagoina moe nuwomou o tamatama.