Ruti inonoina Boasa ina tánuwo goi tetelina
2
(Ruti 2:1-23)
Ruti iloosinapu bego Naomi ivaite tetelina
1 Bedeliyema goi Naomi yaona tayamo ikaaiyaka. Tauyana toesaesa be nakae koroto gagaina, e yoina Boasa. Boasayana be Elimaleka adi nunu tayamo.
2 E Ruti guma Moabe Naomi ilatuwoko idigo kana,
‘Yaogu, neta kutagonegu bei yau ana tánuwo tayamo goi bali kutukutuna ana totaupa sitamaumaauidi aseo.‡Isileli tubunao idi lovina ame nakae: Totaupa bali kutukutuna sitamaumauidi go, neta kutukutu maniyedi sisou, kóbuya, tokai, gumalau be ogaoga itoboinedi siseo, moe avadi (Vin 19:9-10; Atu 24:19). Ego ava totaupa ikanuuwoiyegu mlina goi bei aseo.’
Naomiyana kana,
‘Yaogu, kūna nakae kuguinūwe.’
3 Tuwo tauyana ina bali tanuina tayamo goi bali ana totaupaupayao isabokuuliyedi bali kutukutuna vaalutudi iseoseo. Ego tanuwoyana moe Boasa ina tánuwo. ¡Boasayana be Elimaleka adi nunu tayamo!
Boasa ina lokata Ruti yaina tetelina
4 E Boasayana makaitaga Bedeliyema goi isowóduwo ima, e ina ina todibayoyayao yaidi ikaipakuyedi, idigo kana,
‘¡Yauwe bei ivakitaumi!’
‘¡Yauwe bei ikaipakuyem!’ tauyadi kaedi.
5 E Boasayana ikandobala, Ruti igite, tuwo ilumadádana ina todibayoyayao adi tovakumgo yaina, idigo kana,
‘¿Woiyai amo avatau osiyana?’
6 E tovakumgoyana idigo kana,
‘Tauyana ogaoga, guma Moabe. Naomi taiyao Moabe goi sima. 7 Maine vavinayana ima ikawanoi yaigu idigo kana,
“¿Neta kutagōna bego bali ana todibayoyayao asabokuuliyedi go, idi bali patumidi kikidi goi kutukutudi vaalutudi aseo?”
Atagona, tuwo tauyana tánuwo goi ipaaisewa gagaina nobuyana go, ima ame tuta. Ego tuta giyaina tauna iwaiwasi.’
8 E tuwo Boasa ina Ruti ilatuwoko idigo kana,
‘Vavina, kunovēgu. Taabu kunonōina ituli ta tánuwo goi kuseoseo, go sem guna topaisewayao vevina kikidi kuvalaabilābina, e taiyao koseosēo. 9 Ago koroto kugitēdi nako goi sipaaisewa go, sitamaumáuwo. Amoko goi kūna vevinayadi taiyao koseosēo. Korotoyadi bei alatuwokoidi geya sikitaitaiyemta. Neta maem isayasaya, kūna nako goi tauyadi bwae sitege siyatoyato, moe kwābi kunīm.’
10 E tuwo, Rutiyana ivatugúyala ikanakabobo go, idigo kana,
‘¿Yau ogaoga go, kaga unana kukanuwoiyegu be yau manugu kunuwonúwana?’
11 E Boasayana idigo kana,
‘Vatetelim madabokina tomota bogina sivateteli anove. Nakae kaga liliuna kuguuinuwedi yaom manuna tutayana monem ikámasa. Ayagoi tamam be sinam kwalavedi be nakae im kasa kwalave, e kuma ameko bego kwaiyako vata go, boi boda ame geya kuyagoiyeta. 12 Bei Yauwe, kai Isileli tubunao ima Yaubada, am vaiwówana ivinim im guinuwa pasina. Bogina kuma Tauyana panepanena goi bego ivainugonem.’
13 ‘Guna tomoya, matam goi anuwóiya bogina ababane. Moitamo. Yau im pákwana bogina kukipaiwolegu be nakae atepatu kuvinigu go, yau im pákwana vevina im pakonayao sobuyekoidi nakae’, Ruti kaena.
14 E niga áika ana tuta goi Boasa idigo kana,
‘Ruti, kubāla kūma ameko. Ame avam. Oine bwaena yuyuyuna goi kuvaigāde, e kwāika.’
Tuwo moitamo Ruti ibala ina tauyana ina todibayoyayao kikidi itusobu ivaigade, e ikáika. Ago Boasa bali kutukutuna aiigabudi nakae ivini ikáika. Ikakáika, bogina gamona go, kutukutuyadi maniyena sikesa. 15 E Ruti bogina itáoya, ikaluvilamna ina ana bali iseoseo go, Boasa ina pakonayao koroto ilovinaedi idigo kana,
‘¡Kotagōna tauyana bali patumidi kikidi goi iseoseo go, taabu koobōve! 16 Nakae maniyena kobuyagīdi kokaisobuyēdi kokalavēdi, e Ruti itoboine isevedi go, taabu koobōve.’
Yauwe ina lokata Ruti yaina tetelina
17 E tuwo Ruti bali ana tánuwo goi iseoseo ana kadókana lavilavi. Tutayana bali ikausapisapidi ikavava, bayao tayamo nakae ikayaoda. 18 Ikausapisapi ikavava, e ina bali ma bayaoina ikabi, ikaluvilamna ina ina kasa goi baliyana yaona ivatuluko kaga bogina isevedi. Ago kutukutuyadi ikaabogedi yaona ivini ikáika. 19 E Naomi ikandosobu kutukutuyadi igitedi, yaona yaina ilumadádana idigo kana,
‘¿Yaogu, ame nako goi bali kuseoseo? ¿Avatau ina tánuwo goi? Guna kawanoi bego korotoyana ikanuuwoiyem Yauwe bei ikaipakuye.’
Tuwo Rutiyana ina paisewa manuna ivatétala, idigo kana,
‘Korotoyana ina tánuwo goi aseoseo moe yoina Boasa.’
20 Naomiyana mana uyáwana idigo kana,
‘¡Latuwogu Yauwe ikaipakuye! ¡Yauweyana ilokateda, kita maa yawoida be kidi tokámasa!’
Naomi tuwaina kana,
‘¡Amo korotoyana monegu osiyana, ada totateta!‡Ada totateta: Isileli tubunao idi sinapu ame nakae: Avatau neta nunu sinaena mana lovina, tauyana itoboine osiyana kaamasina monena inai go, itoboine tokámasa ina poyapoya be nakae konana madabokidi itatetedi. Ago geya, dogoiyadi bei sitagau unana ituli ta boda sigimonedi. Tauna neta totateta itatetedi dogoiyadi sikaaiyaka adi nunu sinaena (Vin 25:25). Tauna kai Isileli tubunao ima sinapu goi tauyana itoboine imatakavateda.’
21 E Rutiyana guma Moabe idigo kana,
‘Tuwaina korotoyana ilatuwokoigu idigo kana,
“Tuwaina kuseosēo guna pakonayao taiyao ana kadókana guna dibayoya madabokina silukavave.” ’
22 Naomi idigo kana,
‘Natugu, moe dedevina kuna Boasa ina tánuwo goi kuseo ina pakonayao vevina taiyao. Neta kuna ituli ta tánuwo goi kuseo, govila todibayoya koroto sikitaitaiyem.’
23 E tuwo Rutiyana Boasa ina topaisewayao vevina kikidi ivalaabilábina, e witi be bali iseoseo tauyadi taiyao ana kadókana dibayoya ana kaba lukavava. Ikavava, Ruti yaona taiyao sikaaiyaka.
‡2:2 Isileli tubunao idi lovina ame nakae: Totaupa bali kutukutuna sitamaumauidi go, neta kutukutu maniyedi sisou, kóbuya, tokai, gumalau be ogaoga itoboinedi siseo, moe avadi (Vin 19:9-10; Atu 24:19).
‡2:20 Ada totateta: Isileli tubunao idi sinapu ame nakae: Avatau neta nunu sinaena mana lovina, tauyana itoboine osiyana kaamasina monena inai go, itoboine tokámasa ina poyapoya be nakae konana madabokidi itatetedi. Ago geya, dogoiyadi bei sitagau unana ituli ta boda sigimonedi. Tauna neta totateta itatetedi dogoiyadi sikaaiyaka adi nunu sinaena (Vin 25:25).