20
Eberamo be Abimeleka tetelidi
1 E tuwo Eberamo ma monena asa Mamre sikalave go, situliya sina Negevi dadavina moe Kenani sinaena go, youya dadavina. Amoko goi asa Kadesi be Sura nauyayanaidi sikaaiyaka. Niga sina asa Garara goi tuta kaakupina sisuvadavada. 2 Amoko goi sikaaiyaka go, koroto maniyedi sima Eberamo monena sigite kadi,
‘Eberamo, moe ava vavina?’†Abv 12:13, 26:7.
Eberamoyana imatoita, tauna ipoledi idigo kana,
‘Tauyana niugu. Yoina Sera.’
E da Garara adi tolovina yoina Abimeleka ikaaiyaka go, inove Sera moe Eberamo niuna; latuwona ikabi bego monena. Tauna ina pakonayao ilatuwokoidi idigo kana,
‘Kōna Sera kokābi kōme.’
3 Tuwo moitamo sina sikabi sime bego tauyana monena. Niga sabamgo tayamo Abimeleka ina vada goi iimasisi go, ikanamimi, e Yaubada ima Abimelekayana ikatuwoini idigo kana,
‘Abimeleka, kunōve! Kom tokámasa! Vavinayana kukabikabi moe nainaina.’
4 E kina go Abimelekayana idigo kana,
‘Tomoya, tauyana geya abisikoneyeta. Yau koroto kiboobosigu be nakae guna bodao dedevidi. Go manakae? Kwaumatema? 5 Boi Eberamo ikatubaugu kana,
“Ame niugu.”
E vavinayana nakae ipola kana,
“Tauyana niugu.”
Tauna yau guna guinuwa goi nukotogu geya isabutukoeta nakae geya guna pikwanamo.’
6 E aiyuwoina anamimi goi Yaubada idigo kana,
‘Moe bogina ayagoi kom nukotom geya isabutukoeta. E moe pasina asanabodem bei goyo geya kuguinuweyeta yau yaigu. Tauna geya atagonemta bego tauyana kubisikone be kugoyo. 7 Go tuwo! Eberamo Yau guna tokabivalavala, tauna vavinayana kwābi, Eberamo kuvinimnēi bei ikawanoi manum, e bei geya kukamaseta. Go sem neta geya kuviniyeta, moitamo kom be nakae im bodao bei akaumatemi.’
8 Tuwo vanuwo itomo nobuyana giyaina Abimelekayana itaoya, e ina pakonayao madabokidi iduduwedi sima. Sima go, ilatuwokoidi manakaena ikanamimi. Tuwo tauyadi simatoita gagaina. 9 E Abimelekayana Eberamo iduduwe ima, idigo kana,
‘Eberamo, ame kaga kuguinuwe yaima! Ava goyo aguinuwe yaimi, tauna ame nakae kuguinūwe Yau be guna bodao yaidi goi! Moe im guinuwa igoyo toina yaigu. 10 Go kaga unana ame dogoiyana kuguinuwe yaigu?’
11 Eberamoyana idigo kana,
‘Unana anuwonúwana bego ameko goi Yaubada geya kowowoineyeta, tauna amatoita koroto tayamo bei ikaumategu bego Serayana ikabi. 12 Go tauyana moitamo yau niugu. Tamama tayamo go, sinamao ituli. Niga go, kanai. 13 E Yaubada boi ilatuwokoigu bego guna kasa akalave. Tuwo amo tutayana Sera alatuwoko adigo kagu,
“Sera, kom monegu, tauna kulokatēgu ame nakae: Asa tamo tamo goi takaaiyaka tomota liliudi kulatuwokōidi kam, ‘Eberamo niugu.’ ” ’
14 E Abimeleka sipi be bulumakau be nakae paakonidi koroto be vevina ikabidi, Eberamo ivini. E nakae Sera ivinimnei. 15 Go idigo kana,
‘Eberamo kunōve. Kumatavilavīla guna poyapoya kugīte. Nako latuwom kwaiyaka, bogina atagona.’
16 Go Serayana ilatuwoko kana,
‘Kunōve. Nium siriba ana badabada 1,000 moe guna takona bogina avini, e bei im bodao liliudi siyagoi bego kom geya kada tayaamo goyo kuguinuwe. Tomota liliudi matadi goi kom geya im pikwanamo.’
17-18 Ego boi Eberamo monena Sera pasina Yauwe iguinuwa bego vevina madabokidi Abimeleka ina vada goi sikaaiyaka sikágala. Tuwo Eberamo ikawanoi Yaubada yaina, e Abimeleka be monena be nakae ina pakonayao vevina madabokidi ikidedevinedi. Tauna itoboinedi sikéuwama.