26
Aisake be Abimeleka tetelidi
1 E Bera Lakai Roi goi loga isowóduwo nakae boi Aisake tamana ana tuta. Tuwo Aisake itaoya, ina asa Garara goi da Palisiti adi tolovina Abimeleka igite ikawanoi tuta kaakupina ikaaiyaka. 2 E Aisakeyana ina nuwonúwana bego ina Itipita go, Yauwe toinina isowóduwo tauyana yaina idigo kana,
‘Aisake, taabu kunonōina Itipita, go sem asa bei avatulukoim, moeko goi kwaiyāka. 3 Go ame tuta ameko goi kusuvadavada. Yau bei avakitaum be akaipakuyem. Moitamo. Kom be nakae tubumowo poyapoya ame madabokina bei avinimi. Boi tamam Eberamo yaina akatótula go, ame bei atotulayana akamoitamoe kom yaim.†Abv 22:16-18. 4 Im boda bei akisailidi, adi badabada nakae utuna yábana goi go, poyapoya ame madabokina bei avinidi. Nava boda liliudi poyapoya ame bei siyagoi im boda‡Im boda: Isileli tubunao niyadi goi kadi, ‘Peleleotum’ go, moe tomota idigedige. Livalayana nakona tomota tayamo idigedige o badabadaidi iidigedi go, geya imavadeta. Tauna ana yagoina aiyuwo. Ana yagoina tayamo moe im boda tayamo o tadigo kada, ‘Tubum tayamo.’ Go ana yagoina aiyuwoina moe im bodao o tadigo kada, ‘Tubumowo badabadaidi.’ Neta ana yagoina moe im boda, ame nakona Guyau Yeisu idigedige. Neta ana yagoina im bodao, moe Eberamo tubunao iidigedi. Nakona ana yagoina aiyuwo sikaaiyaka livalayana goi. goi akaipakuyedi 5 unana Eberamo sopagu ikabikaone; guna lovina, guna vatulúkwana, guna liwola be nakae guna livala ikabikaonedi. Tauna boda liliudi bei siyagoi yau akaipakuyedi.’†Abv 12:3, 18:18, 22:18, 28:14; Gui 3:25; Gal 3:8.
6 Tuwo moitamo Aisake Garara goi ikaaiyaka. 7 Amoko goi koroto maniyedi sikandobala Ribeka sigite vavina gumaboina, e Aisake silumadade kadi,
‘Ribeka avakavam?’
Aisakeyana idigo kana,
‘Tauyana niugu.’†Abv 12:13, 20:2.
Bogina kuyagoi. Tauyana imatoita bego ilatuwokoidi kana, ‘Ribeka monegu’, govila bei Ribekayana pasina sikaumate.
8 E Aisakeyana bogina tuta maanawena amoko goi ikaaiyaka, e tuta tayamo ma monena Ribeka siituyuwo. Siituyuwo go, Aisake ibisibala Ribeka wowona ikatumoyasu. Adi taiyuwokova sinuwonúwana kadi, ‘Nakona adetava.’ Kom go avatau? Abimeleka, tauyana da Palisiti adi tolovina, ina vada goi ikaaiyaka, ikandosobu igitedi. 9 Tuwo Aisake iduduwe ima ilatuwoko idigo kana,
‘Aisake, amo vavinayana moitamo monem ae? Kaga unana kupola kam, “Tauyana niugu”?’
Aisakeyana idigo kana,
‘Unana amatoita. Guna nuwonúwana kagu, “Vavinayana pasina bei sikaumategu.” Tauna kagu, “Tauyana niugu.” ’
10 Go Abimelekayana idigo kana,
‘Moe kaga kuguinuwe yaima! Neta koroto tayamo monem imasisiye, e moe goyoyana pasina kai vailai kababane!’
11 E tuwo tauyana lovina tomota liliudi ivinidi idigo kana,
‘Avatau neta koroto ame o monena ibisikone, bei ana kaumata ibabane.’
Aisake iiguyau tetelina
12 E Yauwe Aisake ikaipakuye. Amo asayana goi Aisake ibágula go, niga dibayoya ana tuta goi ina dibayoya gagaina toina ibabane. 13 Tauna Aisake bogina iguyau go, ina esaesa tuta liliuna ivaituwe ana kadókana iguyau gagaina. 14 Ina sipi, ina bulumakau be nakae ina pakonayao vevina be koroto badabadaidi sikaaiyaka, e tauna da Palisiti sigite sivakipikipiye. 15 Tuwo sina doeluyadi tamo tamo Aisake tamana Eberamo ina pakonayao boi siitavidi poyapoya goi sikaubodedi. 16 E Abimeleka ina Aisake ilatuwoko idigo kana,
‘Aisake, kom bogina kutogagasavema, tauna ima kasa kwalāve.’
17 Tuwo moitamo Aisake itaoya, asayana ikalave go, ina Garara butumina goi itunagu. 18 Amo asayana goi boi nimatu Eberamo ina pakonayao doelu sitavidi go, tutayana ina kámasa mlina, e da Palisiti poyapoya sikabi sikaubodemneidi. Tuwo Aisake itavimneidi, e sidau. Doeluyadi ivayoudi nakae boi tamana ivaayoudi.
19 E tuta tayamo Aisake ina pakonayao doelu vau sitavi, e bwae dedevina ikaaiyaka. 20 Ago doeluyana pasina da Garara idi sipiyao maniyedi adi torugwautayao Aisake ina pakonayaoyadi taiyao sikaumakimaki. Torugwautayadi sidigo kadi,
‘Ame kai ama bwae!’
Tuwo doeluyana Aisake ivayou Eseki‡Eseki: Ame youyana ana yagoina moe aumakimaki. idi kaumakimaki pasina. 21 E Aisake ina pakonayaoyadi doelu aiyuwoina sitavi, e amo doeluyana pasina nakae torugwáuta sima taiyao sikaumakimaki, tauna doeluyana Aisake ivayou Sitina.‡Sitina: Ame youyana ana yagoina moe vakaleya o yaviya. 22 E Aisake ina ituli ta poyapoya goi ina pakonayaoyadi doelu aitonina sitavi go, geya vatau tayaamo ima ikaumakimaki, tauna doeluyana ivayou Rakovota‡Rakovota: Ame youyana ana yagoina moe guna kasa. go, idigo kana,
‘Yauwe abatau bogina ivinida yoiyada, tauna itoboineda takaiyaka, e tasusáila.’
Yauwe ikaanasíuna Aisake goi tetelina
23 E niga amo asayana Aisake ikalave go, ina Bera Siva goi itunagu. 24 Amo sabamgo goi Yauwe isowóduwo Aisakeyana yaina idigo kana,
‘Aisake, yau tamam Eberamo ina Yaubada. Taabu kuumatōita. Yau avakiitaum. Bei akaipakuyem be nakae guna pákwana Eberamo pasina im boda akisailidi.’
25 Tuwo amoko goi dídiya ikaudakodako, aba kasala imadagi. Ikaudakodako ikavava, Yauwe yaina isakululu. E amoko goi ina yoyou parai iyowo be nakae ina pakonayao ina doelu sitavi.
Abimeleka be Aisake siikatótula tetelina
26 E kidi go Abimeleka ina tovaita Ausati be nakae ina tovayaviyayao adi tovakumgo yoina Pikoli asa Garara goi sima bego Aisake sigite.†Abv 21:22. 27 Sima go, Aisakeyana ilumadádana kana,
‘Kaga latuwomi koma? Boi kokaolilivegu be nakae kovalilivegu, tauna kaga unana koma?’
28 Kidi kadi,
‘Kama unana kayagoi Yauwe ivakiitaum. Tauna Yaubada matana goi komi be kai takatōtula nakae takanasīuna. 29 Ame nakae: Kom kukatōtula bego taabu kuyogedegedēma nakae kai boi geya kayogedegedemta, go sem ima sinapu tuta liliuna dedevina yaim be nakae mam tuboina kavalilivemmo. E ame tutayana kayagoi Yauwe ikaipakuyem.’
30 Tuwo Aisake itagona, tauna áika iwodugu, ivinidi sikáika sinim. Áika ikavava, simasisi. 31 Simasisi vanuwo itomo nobuyana giyaina goi sitaoya, e Abimeleka be Aisake Yaubada matana goi sikatótula. Sikatótula ikavava, Aisake ivaduduwedi tauyadi madi tuboina sina.
32 E amo maliyalinayana goi Aisake ina pakonayao sima silatuwoko sidigo kadi,
‘Aisake, tayamo doelu katavi go, bwae bogina kababane!’
33 Tuwo doeluyana ivayou Suva.‡aSuva: Ame youyana ana yagoina moe atótula Yaubada matana goi o ainima aiyuwo. Tauna ame tuta nakae, asayana yoina Bera Siva.‡bBera Siva: Ame youyana ana yagoina moe atótula doeluna o ainima aiyuwo doeluna.
Iso ina nai tetelina
34 E Iso ana tala poti ibabanedi go, Diyudeti inai. Diyudetiyana tamana yoina Beri go, tubuna Eta. Vavina aiyuwoina yoina Basemate Iso taiyao sinai. Basemateyana tamana yoina Eloni go, tubuna Eta. 35 Vevinayadi imedi go, idi sinapu pasina Aisake be Ribeka atedi igeda.
‡26:4 Im boda: Isileli tubunao niyadi goi kadi, ‘Peleleotum’ go, moe tomota idigedige. Livalayana nakona tomota tayamo idigedige o badabadaidi iidigedi go, geya imavadeta. Tauna ana yagoina aiyuwo. Ana yagoina tayamo moe im boda tayamo o tadigo kada, ‘Tubum tayamo.’ Go ana yagoina aiyuwoina moe im bodao o tadigo kada, ‘Tubumowo badabadaidi.’ Neta ana yagoina moe im boda, ame nakona Guyau Yeisu idigedige. Neta ana yagoina im bodao, moe Eberamo tubunao iidigedi. Nakona ana yagoina aiyuwo sikaaiyaka livalayana goi.
†26:5 Abv 12:3, 18:18, 22:18, 28:14; Gui 3:25; Gal 3:8.
‡26:20 Eseki: Ame youyana ana yagoina moe aumakimaki.
‡26:21 Sitina: Ame youyana ana yagoina moe vakaleya o yaviya.
‡26:22 Rakovota: Ame youyana ana yagoina moe guna kasa.
‡a26:33 Suva: Ame youyana ana yagoina moe atótula Yaubada matana goi o ainima aiyuwo.
‡b26:33 Bera Siva: Ame youyana ana yagoina moe atótula doeluna o ainima aiyuwo doeluna.