36
Iso ina bodao adi liliu
1 Ame Iso mana bodao adi liliu, tauyana youyuwoina Idom. Liliuyana ame nakae:
2 Iso Kenani vevinaidi adi taiyuwo inaidi, tayamo yoina Eda, tauyana tamana Eloni†Aba Vatowo 26:34. go, ana dala moe yoina Eta. E monena aiyuwoina yoina Olivama. Tauyana tamana Ena go, tubuna Sibiyoni go, ana dala yoina Ivai. 3 Monena aitonina yoina Basemate, tamana yoina Isimaeli go, niuna yoina Nibayote.†Aba Vatowo 28:9.
4-5 Iso natunao koroto Kenani goi sibíbina ame nakae: Eda ivenátuna, natuna koroto yoina Elipasi. Basemate ivenátuna, natuna koroto yoina Reuweli. Olivama ivenátuna, natunao koroto adi taito, tayamo yoina Yeusi, tayamo yoina Yalam, tayamo yoina Kora.
6-7 E Iso Yakobo madi bodao taiyao Kenani goi sikaaiyaka go, idi yoguyoguyao badabada sisaki, tauna geya itoboinedita amoko adi dedevina sibabane. Tuwo Iso latuwona ina ituli ta kasa. E monenao, natunao, ina bodao, konadi be nakae ina yoguyoguyao Kenani goi ikabidi inavedi asa yoina Seira goi. 8 Tuwo Koya Seirayana goi kidi Iso silokasa. Isoyana youyuwoina moe Idom.
9 E Iso tubunao adi liliu ame nakae:
Tubunaoyadi yoidi Idom go, asa Koya Seira goi sikaaiyaka.
10 Iso natunao koroto ame nakae: Tayamo yoina Elipasi, tauyana sinana yoina Eda. E tayamo yoina Reuweli, tauyana sinana yoina Basemate.
11 E Elipasiyana natunao koroto ame nakae: Temani, Omari, Sepo, Gatam be Kenasi. 12 E vavina paakonina yoina Timna moe Elipasiyana moneyuwoina. Tauyana ivenátuna, natuna koroto yoina Amaleki. Ame tauna Iso monena Eda tubunao.
13 E Reuweliyana natunao koroto ame nakae: Nakate, Serako, Sama, Misa. Ame tauna Iso monena Basemate tubunao.
14 E Iso monena Olivama, tauyana tamana Ena, tubuna Sibiyoni. E ivenátuna, natunao koroto adi taito ame nakae: Yeusi, Yalam be Kora.
15 E nunu aivaudi Iso goi sisowóduwo be nakae idi tovakumgoyao ame nakae:
Nunuyadi Iso natuna Elipasi goi sisowóduwo yoidi ame nakae: Temani, Omari, Sepo, Kenasi, 16 Kora, Gatam be Amaleki. Ame bodayadi asa Idom goi sikaaiyaka go, ame bodayadi moe Eda tubunao be nakae Elipasi tubunao adi tovakumgoyao taiyao.
17 Nunuyadi Iso natuna Reuweli goi sisowóduwo yoidi ame nakae: Nakate, Serako, Sama be Misa. Ame bodayadi tubudi moe Iso monena Basemate.
18 Nunuyadi Iso monena Olivama goi sisowóduwo yoidi ame nakae: Yeusi, Yalam be Kora. Ame bodayadi tubudi Iso monena Olivama, tauyana tamana Ena.
19 Ame bodayadi madabokidi Iso tubunao. Iso youyuwoina moe Idom.
20 E tutayana Iso mana bodao nava geya sinoita asa Idom goi, e Seira tubunao (adi dala yoina Kori) amoko goi nava sikaaiyaka.
Seira natunao koroto nunu vau unadi ame nakae: Lotani, Sobali, Sibiyoni, Ena, 21 Daisoni, Eseri be Daisani. Ame bodayadi Seira tubunao Idom goi sikaaiyaka. Tauyadi dala Kori adi tovakumgoyao.
22 Lotaniyana natunao koroto adi taiyuwo, tayamo yoina Kori, tayamo yoina Emam. Lotani niuna yoina Timna.
23 Sobali natunao koroto ame nakae: Alivani, Manekata, Ebali, Sepo be Onam.
24 Sibiyoni natunao koroto adi taiyuwo ame nakae: Tayamo yoina Aiyaki, tayamo yoina Ena. Enayana boi bwae yaviyavi igitebabane náuna moteoina goi tutayana tamana ina ase imatakaavatedi.
25 Enayana natuna koroto yoina Daisoni go, natuna vavina yoina Olivama.
26 Daisaniyana natunao koroto ame nakae: Kemidani, Esibani, Itelani be Kerani.
27 Eseriyana natunao koroto ame nakae. Bilani, Seyavani be Akana.
28 Daisani natunao koroto adi taiyuwo: Uso be Erani.
29 Dala Kori sinaena nunu vau yoidi ame nakae: Lotani, Sobali, Sibiyoni, Ena, 30 Daisoni, Eseri be Daisani. Ame tauyadi dala Kori ina nunu Seira goi sikaaiyaka.
31 Boi nimatu tutayana Isileli tubunao nava geya adi tolovinamo, e asa Idom ana tolovinao ame nakae:
32 Beora natuna Bela Idom ina kasa Dinaba goi ilovina.
33 Tutayana Belayana ikámasa, ana katumapu Serako guma Bosira natuna Iyobabi ietolovina.
34 Tutayana Iyobabiyana ikámasa, ana katumapu Usam guma Temani itáoya, ilovina.
35 Tutayana Usamyana ikámasa, ana katumapu Bedadi natuna Kadadi ina kasa Avita goi ietolovina. Kadadiyana boi Moabe goi da Midiyani ivasobusobuyedi.
36 Tutayana Kadadiyana ikámasa, ana katumapu Samla guma Masireka ietolovina.
37 Tutayana Samlayana ikámasa, ana katumapu Saulo guma Rekobota ietolovina. Asa Rekobotayana sákala Yuparetisi kikina goi ikaaiyaka.
38 Tutayana Sauloyana ikámasa, ana katumapu Akibori natuna Baala Kanani ietolovina.
39 Tutayana Baala Kananiyana ikámasa, ana katumapu Akibori asa Pau goi ietolovina. Tauyana monena yoina Metabeli. Metabeliyana sinana Matiredi go, tubuna Meseyabi.
40-43 E tuwo Iso tubunao nunu vau yoidi liliudi ame nakae: Timna, Aliva, Yeteta, Olivama, Ela, Pinoni, Kenasi, Temani, Mibisari, Magidiyeli be Iram.
Ame dala Idom ana nunu vau yoidi go, yoidiyadi moe idi kasa tamo tamo yoidi nakae.