41
Iyosepa ietoolovina Itipita goi tetelina
1 E tala aiyuwo sikavava, Pero ikanamimi. Ina kanamimiyana ame nakae: Sákala yoina Nairi kikina goi iitáoya 2 go, sakalayana goi bulumakau dedevidi nakae saabalidi adi badabada ainima aiyuwo sisinalaga. Sisinalaga, limou sikakáika. 3 E niga ituli ta bulumakau adi badabada ainima aiyuwo sisinalaga, bulumakauyadi sigoyo nakae sibagabaga. Sisinalaga, mamaya goi bulumakau dedevidi kikidi sitáoya. 4 Bulumakau goyogoyoidi sitáoya, bulumakau dedevidi sitonoidi. Ameko ina kanamimiyana ikavava, e Pero matana ilala.
5 Tauyana imasisimna, e aiyuwoina ikanamimimna. Ina kanamimiyana ame nakae: Witi tolobo tayamo goi didi ainima aiyuwo sitabo go, witi kutukutuna gagaidi be nakae dedevidi. 6 E niga ituli ta witi itabo go, tolobona goi didi ainima aiyuwo sitabo. Sitabo go, witi kutukutuna giyaidi nakae meemalidi yágira bomatu yaviyavina pasina. 7 Kidi didi goyogoyoidi sitáoya, didi dedevidi sitonoidi. E amoko goi Peroyana ikaliwoisa, itáoya idigo kana,
‘O moitamo akanamimi!’
8 E vanuwo itomo, Peroyana mana kateyova†Dan 2:1-3. inuwonúwana kana,
‘Guna kanamimi kaga adi yagoina?’
Tuwo tomeméyava‡Tomeméyava: Da Itipita adi tomeméyava itoboinedi idi méyava goi anamimi maniyedi sitaligeidi. liliudi be nakae tokabitam liliudi Itipita goi iduduwedi sima, e ina kanamimiyadi ilatuwokoidi. Ilatuwokoidi ikavava, idigo kana,
‘Guna kanamimiyadi kaga adi yagoina?’
Go geya kada tayaamo yaidi goi itoboine anamimiyadi italigeidi. 9 Ago vedi ana tomatakavatayao adi tovakumgo Iyosepa inuwaisi, tuwo ina Pero ilatuwoko idigo kana,
‘Guna tomoya, guna bágala alatuwokoim. Tayamo dogoi anuwoilave alatuwokoim. 10 Boi tokaigábuna be yau im pakonayao kuegamogamoguyema, e im deri ana toyausayao adi tokalikumatana Potipari kulovinae deri goi ivaisiuma. 11 Amoko goi sabamgo tayamo ama taiyuwokova kakanamimi go, anamimiyadi tamo tamo madi yagoina. 12 Ego koroto tayamo, tauyana Iberiu, kai taiyao deriyana goi kakaaiyaka. Korotoyana moe tokalikumatana ina pákwana. Tuwo, tauyana ima kanamimi kalatuwoko, e anamimi tamo tamo adi yagoina italigeidi. 13 E nakonakae anamimiyadi italigeidi, nakae simalatomota. Yau kebagu bogina kuvinimneigu go, kina tokaigabunayana wowona kusiko, e alova goi kuvakosaine ikámasa.’
14 E tuwo Pero ina topaisewayao ilatuwokoidi, idigo kana,
‘Kōna Iyosepa kokābi kōme.’
Tuwo woilidi sina Iyosepayana deri goi sikabi, sime. Ego mainao ana gábula itéui be nakae kwama dedevidi ilosidi. Ilosidi ikavava, ima Pero matana goi itáoya. 15 E Peroyana idigo kana,
‘Iyosepa, akanamimi go, geya vatau tayaamo itoboine italigei. Go yau livala anove bego kom anamimi adi talígava kuuyagoi.’
16 E Iyosepayana idigo kana,
‘Guna tomoya, anamimi adi talígava moe yau toinigu geya itoboineguta. Go sem Yaubada itoboine. Moitamo im kanamimi ana talígava bei ilatuwokoigu namliyeta baige alatuwokoim go, ana taligavayana bei am dedevina manuna.’
17 E Peroyana idigo kana,
‘Kunōve go, guna kanamimi alatuwokoim. Anamimiyana ame nakae: Sákala Nairi goi aatáoya go, 18 sakalayana goi bulumakau ainima aiyuwo dedevidi nakae saabalidi sisinalaga, e limou sikakáika. 19 Sikakáika go, ituli ta bulumakau ainima aiyuwo sisinalaga. Bulumakauyadi sigoyo nakae sibagabaga. Adi kaigigita igoyo. Geya tayaamo tuta Itipita goi bulumakau agite ame tauyadi nakae; sigoyo toina. 20 Ame bulumakau bagabagaidiyadi sitáoya, bulumakau saabalidi sitonoidi. 21 Sitonoidi go, bulumakauyadi adi kaigigita neta geya sitonoidita. Moitamo. Nava adi bíbina sibaagabaga nakae boi mainao sibagabaga. E ameko goi matagu ilala.
22 E aiyuwoina guna kanamimi goi agite witi tolobo tayamo goi didi ainima aiyuwo sitabo go, kutukutuna gagaidi be dedevidi. 23 Niga ituli ta witi tolobona tayamo goi didi ainima aiyuwo sitabo. Ago kutukutuna kasakasaidi, giyaidi be nakae meemalidi yágira bomatu yaviyavina pasina. 24 Kutukutu giyaidiyadi sitáoya, kutukutu dedevidi sitonoidi. Ame tauna guna kanamimi.
E tomeméyava alatuwokoidi go, geya kada tayaamo vatau yaidi goi itoboine guna kanamimiyadi italigeidi.’
25 Iyosepayana idigo kana,
‘Im kanamimiyadi aiyuwo adi yagoina tayamo. Yaubada bogina ivatulukoim manakaena bei giyakainava iguinuwe. 26 Anamimiyadi adi yagoina ame nakae: Bulumakauyadi ainima aiyuwo dedevidi be witi didina ainima aiyuwo dedevidi moe tala ainima aiyuwo nakae. Im kanamimiyadi adi yagoina tayamo. Talayadi moe tala ainima aiyuwo dedevidi. 27 Kidi go bulumakau bagabagaidiyadi be goyogoyoidi sisinalaga be nakae witi didina ainima aiyuwo meemalidi yágira bomatu yaviyavina pasina moe tala ainima aiyuwo nakae go, talayadi moe loga.
28 Tauna nakae bogina alatuwokoim. Yaubada bogina ivatulukoim manakaena bei giyakainava iguinuwe. 29 Gwa! Bei ame nakae iguinuwe: Tala ana badabada ainima aiyuwo goi asa Itipita ana madabokina bei imáliya gagaina. 30 Go amo talayadi mlidi tala ana badabada ainima aiyuwo goi loga gagaina bei isowóduwo Itipita sinaena, e asayana bei ibugoyai. 31 Talayadi dedevidi bei konuwoilavedi loga pasina. Bogina kuyagoi; logayana bei igoyo toina. 32 E kom boi sivayuwo kukanamimiko moe ana yagoina Yaubada bogina ilovina bego dogoiyana isowóduwo. Tuwo giyakainava bei anamimiyadi simalatomota.
33 E tauna koroto tayamo kukināve, korotoyana mana dovatusi be mana kabitam. Tauyana kuvayōko kina sobuyekoim go, Itipita ana madabokina ilovinae. 34 Aiyuwoina gávana kukinavēdi go, kuvayokōidi kidi asa tamo tamo adi tomatakavatayao. Tala tamo tamo asa imáliya, e tala dedevidi goi tomota idi witi ana dibayoya sikaiguyauye gúguna ainima ainima. 35 E gúguna aivasi tomota sikanidi go, im lovina goi gavanayadi gúguna tayamo boda tamo tamo goi sikabidi simedi sánala gagaidi goi sidodoidi loga ana tala manudi. 36 Moe witiyana ikaaiyaka loga ana tala ainima aiyuwo manudi, e bei tutayana loga isowóduwo Itipita goi, tomota loga geya sikamaseta, go sem witiyana bei ivaitedi.’
37 E Pero be nakae ina tovakumgoyao paakonidi Iyosepa ina nuwonúwana sikaodedevine. 38 Tuwo Pero ilatuwokoidi idigo kana,
‘Manakae? Itoboineda koroto tayamo tababane Iyosepa nakae? Nakona geya. Ame tauyana yaina Yaubada Balomaina ikaaiyaka.’
39 Tuwo Pero Iyosepa ilatuwoko idigo kana,
‘Iyosepa, geya vatau tayaamo mana dovatusi be mana nanamsa nakae kom unana Yaubada ivatulukoim kaga liliuna bei isowóduwo. Tauna im kabitam tomota liliudi idi kabitam ikalisavedi. 40 Kom bei avayokoim guna katumapu, guna vada be nakae da Itipita madabokidi nimam goi ayatoidi bei kuloviinaedi go, tomotayadi bei sopam sikabikaone.†Gui 7:10. Yau aguta ataoyakukuim.’
41 E Pero idigomna kana,
‘Iyosepa, bogina kunove? Ame tutayana avayokoim kom guna katumapu, asa Itipita ana madabokina nimam goi ayato bei kuloovinae.’
42 Tuwo Pero ina rini mana kaba kinana ivalilivi go, Iyosepa nimaseliselina goi ivalilivi. Ikavava, kwama dedevina ikabi, Iyosepayana ivini ilosi. Ikavava, búyala goura ikabi, nukotona goi isiko.†Dan 5:7,16,29. 43 Ego Pero ina sariyota aiyuwo, tayamo moe toinina manuna go, tayamo moe ana tosavaiyuwo manuna. Tuwo Iyosepa ilatuwoko idigo kana,
‘Iyosepa, guna sariyota tayamo avinim, e sariyotayana goi kusowōya.’
Tuwo isowoya go, koroto maniyedi sivakumgo sidigo kadi,
‘Toolagaina imamaima; aemi kovatugūyala!’
Ame nakae Iyosepa ivayoko kina ana katumapu bei Itipita ana madabokina iloovinae.
44 E aiyuwoina Pero Iyosepa ilatuwoko idigo kana,
‘Iyosepa, yau Pero, Itipita ana tolovina go, kom guna katumapu. Tauna lovina avinim bego Itipita goi tomota geya tayaamo kaga itoboinedi siguinuwe neta kom geya kutagoneta.’
45 Ibóbwara ikavava, Iyosepa ivayou Sapanadi Paneka go, vavina tayamo ikabi, Iyosepa ivini inai. Vavinayana yoina Asenati go, tamana yoina Potipera, tauyana da Oni idi tonúwala. Tauna nakae Iyosepa ietolovina Itipita ana madabokina goi.
46 Ego kina Iyosepayana ana tala 30 bogina ibabane, e ina paisewa Pero da Itipita adi tolovina manuna ivatowo. E itáoya ina asa tamo tamo Itipita sinaena ivadadedi. 47 Tala ainima aiyuwo goi asa imáliya gagaina. 48 Tuwo Iyosepayana ina lovina goi ina topaisewayao sivaníbita tánuwo liliudi Itipita goi witi kutukutuna silamgogo go, asa tamo tamo adi sánala gagaidi goi sivadodoidi, moe tala ainima aiyuwo goyogoyoidi manudi. 49 Witiyana gagaina sánala goi sidodoidi, nakae witi ma baikidi adi badabada nakae ediédila. Siidodoidi ana kadókana witiyana ivakaigaga, e geya tuwaina ana badabada buki goi siginidi. Bogina kuyagoi. Badabada sisaki, tauna geya itoboineyeta ikatuyaividi.
50 E kina go Iyosepayana nava loga geya isowoduwoita, e monena Asenati ivenátuna, natunao koroto adi taiyuwo. 51 E ina botomoya ivayou Manase‡Manase: Ame youyana Isileli tubunao niyadi goi ana taiyakeka nakae nuwoilova. kana,
‘Unana Yaubada tauna guna nuwomou anuwoilave be nakae osegowo anuwoilavedi.’†Abv 37.
52 E natuna aiyuwoina ivayou Eparaim‡Eparaim: Ame youyana Isileli tubunao niyadi goi ana taiyakeka nakae keuwoina. kana,
‘Unana Yaubada tauna guna kaiyakomou goi keuwoigu dedevina ababane.’
53 E tala ainima aiyuwo dedevidi Itipita goi sikavava 54 go, logayana ana tala ainima aiyuwo ivatowo nakae Iyosepa boi idigedige. Logayana isowóduwo asa liliudi goi go, Itipita ana madabokina goi tomota madi witi.†Gui 7:11. 55 Go niga Itipita goi nakae logayana silotowo. Tuwo tomota sima Peroyana yaina sikawanoi witi manuna. Go Peroyana idigo kana,
‘Kōna Iyosepa kogīte go, kaga ilatuwokoimi nakae koguinūwe.’†Iyo 2:5.
56 E tutayana logayana gagaina isowóduwo Itipita ana madabokina goi, Iyosepa witi sanalidi ikatupaevedi go, witiyadi ikaigimonedi da Itipita yaidi. Logayana bogina gagaina toina. 57 Ago ituli ta kasa liliudi goi tomota sima Itipita bego witi sigimona Iyosepa yaina. Bogina kuyagoi; logayana gagaina poyapoya ana madabokina goi.
†41:8 Dan 2:1-3.
‡41:8 Tomeméyava: Da Itipita adi tomeméyava itoboinedi idi méyava goi anamimi maniyedi sitaligeidi.
†41:42 Dan 5:7,16,29.
‡41:51 Manase: Ame youyana Isileli tubunao niyadi goi ana taiyakeka nakae nuwoilova.
†41:51 Abv 37.
‡41:52 Eparaim: Ame youyana Isileli tubunao niyadi goi ana taiyakeka nakae keuwoina.