2
Iyosepa be Meri sinonoina Bedeliyema goi tetelina
1 E tuta amo goi Sisa Agastasi ina lovina iyato be tomota liliudi aba lovina Roma sinaena adi katuyáiva siguinuwe idi takisi manuna. 2 Amo atuyaivinayana Kureniyasi ina lovina ana tuta Siriya goi sivatowo. 3 E Sisa ina lovina iyato, tuwo tomota adi katuyaivayana manuna tomota liliudi sitáoya sina tubudiyao idi kasa goi. 4 E Iyosepa nakae. Asa Nasareta moe Galili sinaena goi tauyana Meri taiyao sitáoya, situko sina tubuna Devida Ina kasa yoina Bedeliyema goi, Yudiya sinaena. Sina Devida Ina kasa unana tauyana be Devida adi nunu tayamo. 5 Tauyana Meri taiyao sina Bedeliyema goi bei yoidi siginidi. Meriyana Iyosepa ana kamatákwana nava ma keeuwamina.
Yeisu ina bíbina tetelina
(Madiu 1:18-25)
6 E nava amoko goi sikaaiyaka go, Meri ina tuta venátuna isowóduwo. 7 Tuwo ivenátuna, natuna botomoya koroto ivenatuni. Ikavava, areko ikabi, gomanayana iutube. Iutube ikavava, ogaoga adi vabodaupa vada goi geya tayaamo baseko ikaaiyaka, tauna gomanayana ikabi yoguyogu adi valakiki vadayana sinaena goi‡Vadayana sinaena goi: Vada tayamo lamgogonina go, dadava aito. Tayamo vabodaupa moe ogaoga idi kaba masisi. Aiyuwoina moe toni vada idi kaba masisi. Aitonina giyaina isou ina poyapoya moe yoguyogu idi kaba masisi. Neta toni vada ina dadava goi takaaiyaka takandosobu, tagitedi go, idi valakiki toni vada ina kaba masisi kikina goi sikaaiyaka yoguyogu idi dadava dadavina. iyato.
8 Ago sipi adi tomatakavatayao yoyowo dadava amo goi sikaaiyaka, idi sipiyao sabamgo goi simatakaavatedi. 9 Simatakaavatedi go, Yauwe ina anerose yaidi goi isowóduwo, Yauwe ana káeyana tomoeeyalina itapasigikobudi. Tuwo tomatakavatayadi simatoita gagaina toina. 10 Tuwo aneroseyana idigo kana,
‘Taabu koomatōita! Vala Dedevina aba uyáwana gagaina atalavaite yaimi goi. Valayana moe tomota liliumi manumi. Tauna taabu koomatōita! 11 Valayana moe sabamgo ame Devida Ina kasa goi ami Toyava bogina ibíbina. Tauyana moe Guyau, Yaubada ana Vadámana, ida Tomoya. 12 Imi kaba kinana moe ame: Bei kona memeyayana kobabane areko goi bogina siutube be yoguyogu adi valakiki goi iimasisi. Moe gomanayana.’
13 Tuwo matabuwodi anerose badabadaaidi yábana goi sisowóduwo aneroseyana taiyao Yaubada siyaapaliye kadi,
14 ‘Maeko ee, Yaubada diligaema toina aba taimámina!†Luk 19:38. Poyapoya goi tuboina Yaubada ina nuwonúwana ana toguinuwayao yaidi.’
15 Ago tutayana aneroseyadi sikalavedi sina yábana goi, kidi sipi adi tomatakavatayadi taudiva sibobóbwara kadi,
‘Tawou, tāna Bedeliyema goi dogoiyana Yauwe bogina ilatuuwokoida tagīte.’
16 Tuwo moitamo geya mgoninamo sitáoya, sina Bedeliyema goi gomanayana silusale. Silusale, Meri, Iyosepa be gomanayana yoguyogu adi valakiki goi iimasisi sibabanedi. 17 E sigite, anerose ina bóbwara moe gomanayana manuna sitalavaite. 18 Ava tomotava sipi adi tomatakavatayao idi bóbwara sinovedi, madabokidi sikainaopa. 19 E kina go Meriyana vala amo inove, inuwokavate be manuna nuwona goi inuwoleleu. 20 Sipi adi tomatakavatayaoyadi sitalavaita ikavava, sitáoya sikaluvila sina idi kasa go, kaga liliuna siinovedi be siigitedi nakae anerose boi iidigedi manudi Yaubada ina togaga ana káeyana sikamoitamoe be nakae Tauyana siyapaliye.
21 Tutayana gomanayana maliyalina ainima aitonina bogina ibabane, sakavaina sikupo.†aVin 12:3. Ikavava, sivayou Yeisu. Namliyeta sinana bei ikéuwama, moe youyana boi anerose igimivayou.†bLuk 1:31.
Simion ina talavaita Yeisu manuna tetelina
22 Tutayana Iyosepa be Meri adi kimavada ana maliyalina‡Adi kimavada ana maliyalina: Tutayana vavina ivenátuna, tauyana geya imavadeta Yaubada matana goi. Vavina ivadagabu maliyalina 7. Maliyalinayadi sikavava, maliyalina 33 geya itoboineyeta itapwaroro Vada Kimaasabaina goi nakae geya itoboineyeta Vadayana goi isiusiu. Amo maliyalinayadi sikavava, tauyana ina Yerusalema goi bei yoguyogu tayamo ikasale Yaubada yaina. Ikavava, tauyana bogina imavada Yaubada matana goi. bogina sikavava nakae Yaubada ina Katukeda boi Mosese ivini idige, natudi sikabi sime Yerusalema goi bei Yauwe yaina sikasale. 23 Moe nakae Yauwe ina Katukedayana boi sigini kadi,
‘Botomoya koroto liliudi kukimasabēdi Yau Yauwe umagu.’†Tat 13:12,15.
Tateta 13:2
24 Nakae sima Yerusalema goi idi vininabeso sikasale nakae Yauwe ina Katukeda idige. Vininabesoyana moe bunabuna aiyuwo o kesikesipo aiyuwo.†Vin 12:6-8.
25 Go konōve! Koroto tayamo Yerusalema goi ikaaiyaka yoina Simion. Tauyana tokibóbwata be kaasalaina Yaubada yaina. Isileli tubunao adi kipáiwala moe adi Toyava ilootutae bei ima iyavedi. Simionyana yaina goi Baloma Kimaasabaina ikaaiyaka. 26 Baloma Kimasabainayana bogina ivatuluko bei nava geya ikamaseta ana kadókana mainao Guyau, moe Yauwe ana Vadámana, igite baige. 27 E Balomayana Simion nukotona isanayato be Vada Kimaasabaina go, vevina adi dadava goi isiu. Tuwo isiu go, tutayana Iyosepa be Meri natudi Yeisu sime moe dadavayana goi bei manuna siguinuwe nakae Yauwe ina Katukeda idige, 28 Simion ivalobodedi, gomanayana ikabi ikavale go, Yaubada iyapaliye kana,
29-32 ‘Guna Tomoya,
Toinigu matagu goi im yava ana kenao
moe gómana ame bogina agite.
Tauyana tomota liliudi matadi goi
bogina kwatubayasi.
Ame Tauyana mavada tayamo
bei ikaiwoduwem Totuyoyowo yaidi
go, kai Isileli tubunao
im bodao ama taimámina manuna.
Tauna ame tuta yau im pákwana kutagonēgu
magu tuboina akámasa nakae kudige.’†Ais 42:6, 49:6, 52:10.
33 Go gomanayana tamana be sinana Simion ina livala natudi manuna sinovedi, manudi nukotodi siwowówana. 34 Gomanayana kina Simion ikaipakuye. Ikavava, sinana be tamana ikaipakuyedi go, gómana sinana Meri yaina Simionyana idigo kana,
‘Kunōve. Ame gomanayana kina Yaubada ikinave bei tomota badabadaidi Isileli goi ivasobusobuyedi go, maniyedi ikilagasidi bei adi yava sibabane. Aiyuwoina Tauyana aba kinana tayamo Yaubada goi ima go, tomota maniyedi bei sivakaleye, 35 e bei tomota badabadaidi idi nuwogau ikaiwoduwedi. Ego kom nakae bei kukategeda nakae neta sisi iginubasim.’
Tokabivalavala Ana ina talavaita
Yeisu manuna tetelina
Yeisu manuna tetelina
36 Yaubada ina tokabivalavala tayamo yoina Ana ikaaiyaka. Tauyana guma Aseri;‡Aseri: Ame Yakobo natuna tayamo yoina. Aiyuwoina ame Aseri tubunao adi dala yoina. Panuweli natuna. Tauyana bogina ikainamoya nakae tala maanawena bogina ikaaiyaka. Boi nimatu inai, tala ainima aiyuwo goi monena taiyao sikaaiyaka namliyeta monenayana ikámasa. 37 Vavinayana ma koobuina ikaaiyaka aaa, e ana tala 84 bogina ibabane. Tuta liliuna Vada Kimaasabaina goi ikaaiyaka, mana diyakímwana be mana kawanoi itaaimámina Yaubada yaina. 38 Moe tutayana Simion nava ibobóbwara, Anayana ibala ima tauyadi yaidi goi Yaubada iyapaliye be gomanayana manuna itaalavaita da Yerusalema nakae Isileli tubunao liliudi yaidi goi neta adi tateta situuyaosi.
39 Tutayana Iyosepa be Meri kaga liliuna bogina silukavavedi nakae Yauwe ina Katukeda idige, ma natudi sikaluvila sina toinidi idi kasa Nasareta moe Galili sinaena.†Mad 2:23.
40 E kina go gomanayana ibibíbina be nakae iitogaga, e nanamsa ivakayaaodei. Ago gomanayana kina Yaubada ikanuwoiye.
Yeisu Vada Kimaasabaina goi
tovatulúkwana itaiyaakekedi tetelina
tovatulúkwana itaiyaakekedi tetelina
41 Gomanayana tamana be sinana tala tamo tamo sina situkotuko Yerusalema goi Basitáwana Aikanina†Tat 12:1-27; Atu 16:1-8. manuna. 42 Tutayana Yeisu ana tala yawou aiyuwo bogina ibabanedi, nakae situkomna sina Yerusalema goi nakae tomota idi sinapu Basitáwana Aikanina ana tuta. 43 Niga Aikayana mlina sikatubayasi bego sikaluvila sina idi kasa. Bogina sinonoina go, geya siyagoiyeta natudi Yeisu nava Yerusalema goi ikaaiyaka. 44 E sinuwonúwana kadi, ‘Yeisu nakona boda taiyao siiketoiya’, tuwo maliyalina ana madabokina goi siiketoiya sinonoina. Go lavilavi goi bego sikanaliya go, sediyao be osediyao yaidi goi Tauyana siilusale, geya. 45 Geya sibabaneyeta, tuwo sikaluvilamna sina Yerusalema goi Tauyana siilusale.
46 Siilusale, siilusale, maliyalina aito mlidi Tauyana Vada Kimaasabaina moteoina goi sibabane, tovatulúkwana yaidi iitusobu, itaiyaakekedi be nakae ilumaadadedi. 47 E tomota liliudi sikaaiyaka Tauyana sitaaiyakeke, ina nanamsa be ina katumapu pasidi sikainaopa. 48 Ago tamana be sinana sigite, sikainaopa go, sinanayana idigo kana,
‘Natugu, kunōve. Kaga unana nakae kuguinuwe yaima? Tamam be yau mama kateyova kaluusalem.’
49 Yeisu idigo kana,
‘Kaga unana geya itoboinemita kobabanegu? Manakae? Geya koyagoiyeta itoboine Tamagu ina vada goi akaaiyaka?’
50 Ina bóbwara sinove go, geya siyagoiyeta kaga idigedige. 51 Tuwo isou sinana be tamana taiyao sina Nasareta goi. Ago ikabikaaonedi. Kina go sinana moe dogoiyadi liliudi nuwona goi inuwooleleudi.
52 Yeisu ina nanamsa ibíbina be nakae ikaitubuwaumatuwo go, Yaubada be tomota goi anuwóiya ibabane.†1Sa 2:26; Abi 3:4.
‡2:7 Vadayana sinaena goi: Vada tayamo lamgogonina go, dadava aito. Tayamo vabodaupa moe ogaoga idi kaba masisi. Aiyuwoina moe toni vada idi kaba masisi. Aitonina giyaina isou ina poyapoya moe yoguyogu idi kaba masisi. Neta toni vada ina dadava goi takaaiyaka takandosobu, tagitedi go, idi valakiki toni vada ina kaba masisi kikina goi sikaaiyaka yoguyogu idi dadava dadavina.
†a2:21 Vin 12:3.
‡2:22 Adi kimavada ana maliyalina: Tutayana vavina ivenátuna, tauyana geya imavadeta Yaubada matana goi. Vavina ivadagabu maliyalina 7. Maliyalinayadi sikavava, maliyalina 33 geya itoboineyeta itapwaroro Vada Kimaasabaina goi nakae geya itoboineyeta Vadayana goi isiusiu. Amo maliyalinayadi sikavava, tauyana ina Yerusalema goi bei yoguyogu tayamo ikasale Yaubada yaina. Ikavava, tauyana bogina imavada Yaubada matana goi.
†2:24 Vin 12:6-8.
†2:29-32 Ais 42:6, 49:6, 52:10.
‡2:36 Aseri: Ame Yakobo natuna tayamo yoina. Aiyuwoina ame Aseri tubunao adi dala yoina.
†2:41 Tat 12:1-27; Atu 16:1-8.
†2:52 1Sa 2:26; Abi 3:4.