Luke
Vala Dedevina Luke igini
Livala Aba Vaita
Buki ame Luke igini. Tauyana doketa tayamo. Nakona tala 62 sinaena goi Luke tétala ame igini.
Ame bukiyana moe Tiyopilo ana buki. Tauyana Totuyoyowo tayamo be nakae koroto gagaina. Nakona ipaaisewa da Roma idi kaba lovina manuna. Go Luke latuwona kidi Totuyoyowo liliudi nakae sikatuyaivi.
Luke buki aiyuwoina igini yoina Yeisu Ina Vamoleyanayao Idi Guinuwa. Tutayana Luke inumisa Yeisu yaina, Paulo ina vaníbita goi ivaakitau. Tutayana buki ame Luke igini, Paulo nakona bogina deri Roma goi ikaaiyaka.
Luke ana masi buki ame goi ame nakae: Yeisu Tomalatomota go, kidi Diyuu badabadaidi sikatae. Ago Luke ivatulukoida Yeisuyana moe tomota liliuda ada toyava, neta Diyuu o neta Totuyoyowo.
Luke geya tayaamo tuta Yeisu igite, tauna nakona Pita be Meri siivatétala inovedi go, idi vatetalayadi buki ame goi iginidi.
Tétala Luluna
1. Livala Vakuumgoina 1:1-4
2. Yeisu ina bíbina tetelina 1:5—2:52
3. Yeisu ina katubayasi ina paisewa manuna tetelina 3:1—4:13
4. Yeisu ina guinuwa Galili goi tetelina 4:14—9:50
5. Yeisu ituko inonoina Yerusalema tetelina 9:51—19:27
6. Yeisu ina guinuwa Yerusalema goi tetelina 19:28—21:38
7. Yeisu ina kámasa be ina taoyamna tetelidi 22:1—24:53
Livala Vakuumgoina
1
(Luke 1:1-4)
1 Tomoya Tiyopilo,
Tomota badabadaidi bogina sipoikíkina bei Yaubada ina guinuwa boi yaida goi simalatomota tetelidi buki goi siginidi. 2 Kaga kaga boi Vala Dedevina ana topaisewao toinidi matadi goi sigimiigitedi be nakae sivadaamanedi kai yaima, e nakae tomotayadi idi buki goi sikaidamanedokoidi. 3 Tauna yau nakae anuwonúwana itoboinegu bei guinuwayadi buki goi aginidi. Kaga liliuna sigimiisowóduwo boi nimatu go, ima ame tuta bogina adovatusidokoidi, tauna buki goi aginidokoidi kom Tiyopilo manum 4 bego dogoiyadi liliudi boi sivatuulukoim, itoboinem kukamoitamoedokoidi.
Yeisu ina bíbina tetelina
(Luke 1:5—2:52)
Iyoni ina bíbina ana talavaita tetelina
5 E tetalayana ame nakae: Tolovina Erodi ina lovina ana tuta Yudiya‡a Yudiya: Ame Diyuu idi kasa gagaina. Sinaena parovinsi yoidi Galili, Pereya, Yudiya giyaina, Samériya be Siriya sikaaiyaka. goi Tonúwala tayamo yoina Sakarayau‡b Sakarayau: Ame youyana ana yagoina moe Yauwe bogina inuwokavatamna. ikaaiyaka. Sakarayauyana Tonúwala tayamo ina boda yoina Abiya†a 1Te 24:10. yaidi goi ipaaisewa. Tauyana monena yoina Elisabeta. Elisabetayana nakae tubuna Tonúwala yoina Eroni.†b Tat 4:14, 28:1. 6 E adi taiyuwokova kiboobosidi Yaubada matana goi. Nakae yawoidi goi geya adi pikwanamo Yauwe ina Katukeda ana lovina be ina nuwonúwana liliudi sikabikaonedokoidi. 7 Ago Elisabetayana ikágala be nakae adi taiyuwo bogina siwowosobu, tauna geya natudimo.
8 E Sakarayauyana ina bodao idi tuta paisewa isowóduwo, tauyana Tonúwala nakae Yaubada matana goi ipaaisewa go, 9 kinava ikabi bei Yauwe ina Vada Kimaasabaina goi isiu. Isiu, nakae Tonúwala idi sinapu, e insensi bei iikasale. 10 Kidi go boda madabokina moetala goi sikaaiyaka, insensi ana kasala ana tuta goi liliudi sikaawanoi. 11 E tuwo Sakarayauyana Vada Kimaasabaina isiu go, Yauwe ina anerose isowóduwo insensi ana kaba kasala kakataina goi iitaoya. 12 Sakarayauyana ikandobala anerose igite, ikaliwoisa, tuwo atena iyova gagaina. 13 E aneroseyana idigo kana,
‘Sakarayau, taabu kuumatōita.
Im kawanoi Yaubada bogina inove,
e ame tuta ikatumapu.
Monem Elisabeta bei ivenátuna,
natumiyana koroto.
Tauyana bei kuvayou Iyoni.‡ Iyoni: Ame youyana ana yagoina moe Yauwe tokanuwóiya o yabobona Yaubada goi.
14 Gomanayana manuna bei kuuyáwana gagaina toina.
Ina bibinayana manuna tomota badabadaidi nakae bei siuyáwana.
15 Moitamo. Tauyana bei toolagaina Yauwe matana goi.
Taabu oine be bwae toogagaina iinīmdi.† Yoy 6:3.
Nava sinana gamona goi ikaaiyaka Baloma Kimaasabaina bei ivakayaodei.
16 Niga bei komi Isileli tubunao badabadaimi ikaluvilemneimi,
e Yauwe ida Yaubada komeko.
17 Eliyau nakae Iyoniyana mana katepatu be mana togaga ivakumgo ima Yauwe manuna.
Koroto atedi bei ikayagaviledi natudiyao yaidi goi,† Mal 4:5-6.
tokapipilova nuwodi ikayagaviledi bei tauyadi tokibóbwata nakae,
be tomota ikatubayasidi Yauwe ina sowóduwo manuna.’
18 Go kina Sakarayauyana idigo kana,
‘Kaga goi bei ayagoi moe moitamo? Yau bogina akaitomoya. Monegu nakae bogina ikainamoya go!’
19 Go aneroseyana idigo kana,
‘Yau Gaberiyeli,† Dan 8:16, 9:21. tuta liliuna Yaubada matana goi aataoya ina nuwonúwana aguuinuwe. Tauyana ietunegu ama bei ame vala dedevinayana atalavaite yaim. 20 Go kunōve. Guna livala tuta kaikaila goi bei simalatomota. Go guna livalayadi geya kunumisedita, tauna ame tuta maem imoumou, e geya itoboinemta kubóbwara ana kadókana ame dogoiyadi bogina simalatomota baige.’
21 Go bodayadi nava Sakarayau situuyaosi go, nukotodi siwowówana sinuwonúwana kadi,
‘Kaga unana Vada Kimaasabaina goi nava ikaaimúmuna?’
22 E Sakarayauyana isowóduwo go, geya itoboineyeta ibóbwara boda yaidi. Tauna bodayadi bogina siyagoi Vada Kimaasabaina goi ikaalayáusa. Tuwo nimana goi ikaaukedamo yaidi unana maena imoumou.
23 Tauyana ina tapwaroro ana paisewa bogina ilukavave, ikaluvila ina ina kasa.
24 E tuta amo mlina tauyana monena Elisabeta ikéuwama go, tukówana ainima goi vada sinaena ma keeuwamina anetava ikaaiyaka, e inuwonúwana kana,
25 ‘Yauwe bogina inuwaisigu ame nakae: Guna omayamaya geya natugumo pasina tomota matadi goi bogina ikabi inave.’
Yeisu ina bíbina ana talavaita tetelina
26 E tukówana sikisi Elisabetayana nava ma keeuwamina, Yaubada ina anerose Gaberiyeli ietune ina asa tayamo Galili sinaena, asayana yoina Nasareta. 27 Ietune ina woiyai tayamo geya ana kanaotamo. Woiyaiyana ana kamatákwana moe yoina Iyosepa. Iyosepayana tubuna moe Devida, adi nunu tayamo.† Mad 1:18. Woiyaiyana yoina Meri. 28 E aneroseyana ima Meri ina vada goi isiu ima ilatuwoko idigo kana,
‘Kom Meri Yauwe ikanuuwoiyem, uyagu! Tomoya kom taiyao!’
29 E livalayana pasina Meri nukotona taitáiya iuyoi, ina nuwonúwana kana,
‘Anerose ina bóbwara kaga nakona ana yagoina?’
30 Go aneroseyana idigo kana,
‘Meri, taabu kuumatōita!
Yaubada bogina ikanuwoiyem.
31 Kunōve. Nava bei kukéuwama.
Niga natum koroto bei kuvenatuni, kuvayou Yeisu.† Mad 1:21.
32 Moe Tauyana nava bei toolagaina,
bei sivayoko Tokanayatanatoina Natuna.
Tuwo tubuna Devida ina kalibúbuna Yauwe Yaubada
nava bei ivadamane Tauyana goi† 2Sa 7:12-13,16; Ais 9:7.
33 be Yakobo ina bodao‡ Yakobo ina bodao: Ame nakae Isileli tubunao. Isileli youyuwoina moe Yakobo. ikalibubuvataedi unana ina kalibubunayana geya ikavaveta.’
34 E Meriyana idigo kana,
‘Yau koroto taiyao geya kamamasisi, tauna moe manakaena bei isowóduwo yaigu?’
35 Go aneroseyana idigo kana,
‘Baloma Kimaasabaina bei iwokoim
o tadigo kada “Tokanayatanatoina ina togaga gaota nakae bei iumaim kukéuwama.”† Tat 40:35; Mad 17:5; Mak 9:7; Luk 9:34.
Moe pasina tauna natum kuveenatuni bei sivayoko Totumasaba, Yaubada Natuna.
36 Go kunōve. Osiyam Elisabeta bogina ikainamoya go, bogina ikéuwama, gómana koroto. Tomota sinuwonúwana tauyana ikágala go, ina keuwamayana goi ina tukówana sikisi bogina sikavava. 37 Geya kada kaga tayaamo imou Yaubada yaina geya, tauna kom be Elisabetayana imi kéuwama itoboinedi.’† Abv 18:14.
38 E Meriyana idigo kana,
‘Yau Yauwe ina pákwana. Moitamo, latuwogu isowóduwo yau yaigu kaga nakae bogina kudige.’
Amo ikavava, aneroseyana itaoya, Meri ikalave ina.
Meri ina Elisabeta iivadade tetelina
39 E Meriyana itaoya, amo tutayana goi woilina ina Yuda‡ Yuda: Isileli natuna tayamo yoina Yuda. Niga Yudayana tubunao adi dala yoina Yuda. Boi tutayana Isileli tubunao Kenani goi sisiu, poyapoya tayamo moe Yuda tubunao idi kaba lovina, e amoko goi sikaaiyaka. Yeisu ina tuta ame dadavayana yoina Yudiya (Mad 2:6). asaina tayamo, asayana koya dadavina goi. 40 Ima asayana goi isowóduwo ina Sakarayau ina vada goi isiu Elisabeta yaina ikauyagu. 41 Tutayana Elisabetayana Meri ina kauyagu inove, memeya gamona goi mana uyáwana imoya go, Baloma Kimaasabaina Elisabeta ivakayaodei. 42 Tuwo niyana gagaina goi iduduwo kana,
‘Vevina yaidi goi kom kaaipakum gagaina.
Gamom keuwoina nakae kaaipakuna.
43 Ame aba wowoina yau yaigu bego kom ida Tomoya sinana go, yau kumekoigu. 44 Ame moitamo. Kunōve. Im kauyagu anovenove, to memeya gamogu goi mana uyáwana imoya. 45 Bogina kunumisa bego moitamo Yauwe ina livalayana yaim goi nava bei imalatomota, tauna am dedevina bogina kubabane.’
46 Tuwo Meriyana idigo kana,
‘Ategu goi Yauwe akilagasi.
47 Nakae Yaubada guna Toyava pasina balomaigu
bogina iuyáwana gagaina
48 bego yau Tauyana
ina pákwana nuwotookaigu go,
inuwokavategu.† 1Sa 1:11.
Moitamo toina.
Ame tuta be nakae tuta simamaima
malamalágata liliudi bei sinuwonúwana
yau guna dedevina bogina bei ababane.
49 Moe kina Tokalika guinuwa toogagaidi
iguinuwedi yau manugu,
Tauyana yoina kaakesaina† Sam 111:9.
50 be nakae ana towowoinayao malamalágata
liliudi yaidi goi inuwokapisiyedi.† Sam 100:5, 103:11,17.
51 Tauyana nimana toogagaina goi
ina togaga bogina ikaiwoduwe.
Tonuwatue madi nuwogau goyogoyoidi
atedi goi ikausapesapedi.† Sam 89:10, 98:1, 118:15.
52 Tolovina kebadi goi ivasobusobuyedi go,
tonuwotookaidi ikilagasidi.† Iyb 5:11, 12:19.
53 Kidi madi loga dogoi dedevidi goi
ivakayaodeidi go,
kidi toesaesa, nima kaka ivalilivedi.† Sam 34:10, 107:9.
54 Yaubada ina kitomyao,
moe Isileli tubunao, ivaitedi.
Ina vaitayana moe ina nuwokapisi
Eberamo mana bodao yaidi goi
inuwokavatevatae† Sam 98:3.
55 nakae boi tubudao yaidi ikatótula.’† Abv 17:7.
56 E Meri osiyana taiyao tukówana aito nakae sikaaiyaka namliyeta ikaluvila ina ina kasa.
Iyoni ina bíbina tetelina
57 E kina go Elisabetayana ina tuta venátuna bogina isowóduwo, natuna koroto ivenatuni. 58 Ivenátuna, senao be osenao sinove bego Yauwe Elisabeta inuwokapisiye gagaina, tuwo tauyana taiyao siuyáwana.
59 Niga gomanayana maliyalina ainima aito‡ Maliyalina ainima aito: Kidi Diyuu idi katuyáiva ituli. Kidi idi katuyáiva goi maliyalina gómana ibíbina moe maliyalinayana vakuumgoina. bogina ibabanedi, boda sima sakavaina ana kúpwana siyoko.† Vin 12:3. Sakavaina ana kúpwana ikavava, kidi bodayadi bego gómana sivayou tamana ana ebígana 60 go, kina sinanayana idigo kana,
‘Geya toina, go sem tavayōu Iyoni.’
61 Go bodayadi sidigo kadi,
‘Go geya vatau tayaamo im boda yaimi goi yoina moe youyana.’
62 E tamana yaina goi sikaukeda,‡ Sakarayau nakona geya itoboineyeta ibóbwara be nakae geya itoboineyeta inove. Moe pasina sikaukeda tauyana yaina. latuwodi siyagoi ava you ivayou. 63 Tuwo ikawanoi aba gínina‡ Aba gínina: Ame nakona timba tayamo kakaaraiina be paaevaina go, yatana tayamo dogoi nuwanuwaina ikaaiyaka bei itoboine leta iginidi. tayamo sime. Sime, tauyana ikabi igini kana,
‘Yoina Iyoni.’
Tuwo boda liliudi nukotodi siwówana. 64 E Sakarayauyana sopana be maena mainao sikakapu, nakae itoboine ibobwaramna. Tuwo ivatowo Yaubada iyapaliye. 65 Ago kidi sediyao liliudi sigite, simatoita. Boda Yudiya koyakoyaina dadavina madabokina goi sikaaiyaka moe dogoiyadi sivateetelidi. 66 Ego avatauwa neta tetalayadi siinovedi, manudi sinuwoleleu kadi,
‘Amo gomanayana, gómana tayamo.’
Idi bobwarayadi moitamo. Yauwe nimana ikaaiyaka gomanayana yaina.
Sakarayau ina yapali
67 Kina go gómana tamana Sakarayauyana, Baloma Kimaasabaina ivakayaodei, tuwo Balomayana goi Yaubada ina nuwonúwana ikabivalevale, idigo kana,
68 ‘Yauwe kita Isileli tubunao ida Yaubada aba kaodedevina!† Sam 41:13, 106:48; Rom 1:25, 9:5; 2Ko 1:3, 11:31; Epe 1:3; 1Pi 1:3.
Tauyana bogina ivadadeda
be kita ina bodao itateteda.
69 Ina kitom Devida ina bodao yaidi goi
ada Toyava toogagaina ikaiwoduwe.† Sam 132:17.
70 Moe nakae boi nimatu Yauwe
ina tokabivalavala kimaasabaidi
sopadi goi bogina ikatótula.
71 Ina katotulayana bego ada yava tababane
ida kaleyayao yaidi goi
nakae ada tokaoliliwo nimadi goi.† Sam 106:10.
72 Nakae iguinuwe
bei ina nuwokapisi tubudao yaidi boi ikaatotule
bogina iguinuwe o tadigo kada,
“Boi ina kanasíuna kaakesaina inuwokavate.”† Sam 106:45.
73 Moe anasiunayana goi ikatótula tubuda Eberamo yaina.† Sam 105:9-10.
74 Ina katotulayana ame nakae:
Ida kaleyayao nimadi goi bei iyaveda,
tauna geya ida matoitamo tataaimámina Tauyana yaina.† Atu 6:13.
75 Ida taimaminayana
moe ma kimaasabaida Tauyana umana
be nakae ma kiboobosida
yawoida madabokina goi.
76 E kom nakae, natugu.
Kom bei Tokanayatanatoina ina tokabivalavala.
Bei kuvakumgo kuna Yauwe ina kenao kuunai† Mal 3:1.
77 be nakae ina bodao kuvatulukoidi
idi goyo ana nuwotao goi ida Yaubada iyavedi
78 ina nuwokapisi gagaina yaida pasidi.
Ina kanuwoiyayadi pasidi mavada olagaema goi
bei ima ivadadeda,
79 e bei tauyadi kokonótuya goi
be nakae ámasa kikina goi itapasigidi.† Ais 9:2.
Aiyuwoina tuboina ana kenao goi bei ivakededa.’
Iyoni ikaituubuwau tetelina
80 E kina go gomanayana ibibíbina be nakae balomaina goi iitogaga. Tauyana yoyowo goi ikaaiyaka ana kadókana ina tuta bego isowóduwo senao kidi Isileli tubunao yaidi goi.
‡a1:5 Yudiya: Ame Diyuu idi kasa gagaina. Sinaena parovinsi yoidi Galili, Pereya, Yudiya giyaina, Samériya be Siriya sikaaiyaka.
‡b1:5 Sakarayau: Ame youyana ana yagoina moe Yauwe bogina inuwokavatamna.
†a1:5 1Te 24:10.
‡1:13 Iyoni: Ame youyana ana yagoina moe Yauwe tokanuwóiya o yabobona Yaubada goi.
†1:15 Yoy 6:3.
†1:17 Mal 4:5-6.
†1:19 Dan 8:16, 9:21.
†1:32 2Sa 7:12-13,16; Ais 9:7.
‡1:33 Yakobo ina bodao: Ame nakae Isileli tubunao. Isileli youyuwoina moe Yakobo.
†1:35 Tat 40:35; Mad 17:5; Mak 9:7; Luk 9:34.
‡1:39 Yuda: Isileli natuna tayamo yoina Yuda. Niga Yudayana tubunao adi dala yoina Yuda. Boi tutayana Isileli tubunao Kenani goi sisiu, poyapoya tayamo moe Yuda tubunao idi kaba lovina, e amoko goi sikaaiyaka. Yeisu ina tuta ame dadavayana yoina Yudiya (Mad 2:6).
†1:48 1Sa 1:11.
†1:49 Sam 111:9.
†1:50 Sam 100:5, 103:11,17.
†1:51 Sam 89:10, 98:1, 118:15.
†1:52 Iyb 5:11, 12:19.
†1:53 Sam 34:10, 107:9.
†1:54 Sam 98:3.
‡1:59 Maliyalina ainima aito: Kidi Diyuu idi katuyáiva ituli. Kidi idi katuyáiva goi maliyalina gómana ibíbina moe maliyalinayana vakuumgoina.
†1:59 Vin 12:3.
‡1:62 Sakarayau nakona geya itoboineyeta ibóbwara be nakae geya itoboineyeta inove. Moe pasina sikaukeda tauyana yaina.
‡1:63 Aba gínina: Ame nakona timba tayamo kakaaraiina be paaevaina go, yatana tayamo dogoi nuwanuwaina ikaaiyaka bei itoboine leta iginidi.
†1:68 Sam 41:13, 106:48; Rom 1:25, 9:5; 2Ko 1:3, 11:31; Epe 1:3; 1Pi 1:3.
†1:69 Sam 132:17.
†1:71 Sam 106:10.
†1:72 Sam 106:45.
†1:73 Sam 105:9-10.
†1:74 Atu 6:13.
†1:76 Mal 3:1.
†1:79 Ais 9:2.