7
Yeisu tovayaviya adi tovakumgo
ina pákwana ikideedevine tetelina
ina pákwana ikideedevine tetelina
(Madiu 8:5-13)
1 Tutayana Yeisu ina bóbwara madabokina ilukavavedi bodayadi yaidi, itaoya ina Kapaneumi goi isiu. 2 E tayamo da Roma idi tovayaviyayao adi tovakumgo amoko goi ikaaiyaka mana pákwana. Pakoninayana moe ina kakaya nakae go, ikatówana gagaina nakae giyakainava bei ikámasa. 3 E tovakumgoyana Yeisu valena inove, tuwo Diyuu idi tomoyamoya maniyedi ietunedi sina Tauyana yaina sikawanoi bego ima ina pakonayana ikidedevine. 4 E tuwo moitamo tomoyamoyayadi sima Yeisu yaina sikawanoi makimaki kadi,
‘Tomoya, latuwoma bego kom kuma tana da Roma adi tovakumgo tayamo ina pákwana iikatówana kukidedevine. Tovakumgoyana koroto dedevina, itoboine kuvaite. 5 Moitamo. Tauyana ida bodao Diyuu imatakoiyeda, e ima kaba tugúguna ana yówana iemaisi.’
6 E kina go Yeisuyana itagona taiyao sina. E sinonoina, tovakumgo ina vada bogina sivakakana go, tovakumgoyana senao ietunedi sima Yeisu sivalobode sidigo kadi,
‘Tomoya, ama tovakumgo idigo kana,
“Taabu kunuuwonūwana bego kuma guna vada. Yau toosobugu; yau geya itoboineguta bego guna vada goi kusiu. 7 Moe pasina tauna geya itoboineguta yau toinigu ao yaim, go sem kom mam lovina kubobwarāmo, bei guna pakonayana iboboina. 8 Yau nakae lovina ayagoi. Yau magu tolovinao be nakae tovayaviya maniyedi sobuyekoigu. Neta tayamo alatuwoko kagu, ‘Kūna’, bei ina. Neta tayamo alatuwoko kagu, ‘Kūma’, bei ima. Neta guna pákwana alatuwoko kagu, ‘Ame kuguinūwe’, bei iguinuwe.” ’
9 E ame livalayadi Yeisu inovedi, ikainaopa. Tuwo itugavila, boda sisabookuliye ilatuwokoidi idigo kana,
‘Ame alatuuwokoimi konōve! Isileli tubunao yaidi goi geya vatau tayaamo ababane ina numisa gagaina ame Totuyoyowoyana nakae.’
10 Tuwo tovakumgoyana senao sikaluvilamna sina ina vada goi go, ina pakonayana sigite, bogina idedevina.
Yeisu tubuwau ámasa goi ikaaitáoe tetelina
11 Vanuwo itomo Yeisu itaoya, ina asa tayamo yoina Neni go, ina tovatotowanayao be boda gagaina siikitau. 12 E ima asayana ana kaba siu goi ivaakakana go, koroto kaamasina mana tokavalayao ivalobodedi, tauyadi bego asa goi sisowóduwo. Tokamasayana kóbuya natuna tayamo toito. Ago boda gagaina asa goi kóbuya taiyao sinonoina bego tokamasayana sivaliwoge. 13 Tomoya ivalobodedi go, kobuyayana igite, inuwokapisiye idigo kana,
‘Taabu kutaitāiya!’
14 Yeisu ibala ina tokamasayana ina liyaliyaka ibisikone, e tokavalayadi sitaoya, tuwo idigo kana,
‘Tubuwau, kom alatuwokoim kutāoya!’
15 Tuwo moitamo, tokamasayana itaoya itusobu, ivatowo ibóbwara. Go Yeisu tubuwauyana sinana ilatuwoko idigo kana,
‘Natum goame.’
16 E madabokidi madi wowoina simatoita, tuwo Yaubada ina togaga ana káeyana sikamoitamoe kadi,
‘Yaubada ina tokabivalavala gagaina bogina yaida goi iitaoya!’
Aiyuwoina kadi,
‘Yaubada kita ina bodao bogina ivadadeda!’
17 Tuwo Yeisu ina guinuwa amo tetelina inúnuwo ina Yudiya ana dadava madabokina goi be asa liliudi kikina goi.
Yeisu ina talavaita Iyoni tosayóyova manuna
(Madiu 11:1-19)
18 Iyoni deri goi ikaaiyaka go, ina tovatotowanayao sima Yeisu ina guinuwa liliudi sitalavaitedi tauyana yaina. Iyoni inove, tuwo ina tovatotowanayao adi taiyuwo iduduwedi sima 19 idigo kana,
‘Ami taiyuwo kōna Tomoya kogīte kolumadāde kami,
“Manakae? Kom Guyau Tauyam boi Yaubada ina tokabivalavala sikatotulem katuyaaosim gea, ituli ta koroto nava katuuyaosi?” ’
20 E tuwo korotoyadi sina Yeisu yaina sidigo kadi,
‘Iyoni tosayóyova ietunema kama. Tauyana kana,
“Manakae? Kom Guyau Tauyam boi Yaubada ina tokabivalavala sikatootulem katuyaaosim, gea ituli ta koroto nava katuuyaosi?” ’
21 Amo tutayana Yeisu tomota badabadaidi adi katówana be adi vísiya goi ikidedevinedi be yaidi goi dimoni ivatapiyedi be nakae tokebo ikidedevinedi sigita dókana. 22 Tuwo idigo kana,
‘Segowo, kaga atalavaaitedi bogina konovedi be kaga aguuinuwedi bogina kogitedi. Guinuwayadi ame nakae: Tokebo sigita dókana, topem siketoiyamna, vísiya liliuna tomota sakavaidi sikavava, tauyadi taiyadi patupatudi sitaiyakeka dókana,†aAis 35:5-6. tokámasa sitaoyamna, tookaidi Vala Dedevina sinove.†bAis 61:1. Kōna moe dogoiyadi madabokidi kotalavaitēdi Iyoni yaina bei iyagoi. 23 Aiyuwoina Iyoni kolatuwōko avatauwa neta geya sinanayuwoita yau manugu, bei adi dedevina sibabane.’
24 E Iyoni ina lobutu ana tolokoinayadi sitaoya sinonoina go, Iyoniyana manuna Yeisu boda ilatuwokoidi idigo kana,
‘Boi kona yoyowo goi latuwomi bego avatau kogite? Gea, komi latuwomi koroto taameyaina kogite ina sinapu nakae dumodumo neta yágira itowo, iyaoegeege? 25 Nakae geya, go sem kona latuwomi bego avatau kogite? Gea, komi latuwomi koroto tayamo mana kwama dedevina kogite? Geya ae? Konōve. Tauyadi madi kwama dedevina be madi mani gagaina tolovina idi vada dedevidi goi sikaaiyaka. 26 Tauna kona geya bego nakae kogite geya, go sem kona bego avatau kogite? Bego Yaubada ina tokabivalavala tayamo kogite? U moitamo. Go ame alatuuwokoimi konōve: Tauyana tokabivalavala tayamo go, tokabivalavala kaka geya, go sem tauyana toosakina. 27 Amo tauyana manuna Yaubada ina tokabivalavala igini idigo kana,
“Gwa, guna lobutu ana tolokoina aetune
ivakumgoiyem.†Tat 23:20.
Tauyana bei im kenao ikimavade.”
Malakai 3:1
28 Ame alatuuwokoimi konōve: Tomota liliudi bogina sibíbina, yaidi goi geya vatau tayaamo itoboine Iyoni ikalisave. Go avatauwa neta toosobudi Yaubada ina kalibúbuna sinaena goi, moe tauyadi Iyoni sikalisave.’
29 Kidi go tomota liliudi be nakae kidi takisi ana togogoyao†Mad 21:32; Luk 3:12. Yeisu ina livala sinove, sikamoitamo bego Yaubada toinina nuwona ana tokibóbwata. Kutoto boi sitagona Iyoni isayoyoidi. Moeko goi Yaubada sikamoitamoe. 30 E kidi go Parisi be Yaubada ina Katukeda ana tolumavivitayao geya sitagoneta Iyoni isayoyoidi. Moeko goi Yaubada ina kenao sikatae.
31 E Yeisu ibobwaramna kana,
‘Tomota amo tauyadi nakae kaga goi akatutukoidi? Tauyadi idi sinapu nakonakae? 32 Kidi gogómana nakae neta aba maketi goi siitusobu sipapápala sediyao yaidi sikúluwo kadi,
“Ima kokopi nai manuna kauweuwe go,
geya kolauseta.
Valiwoga goi kataiyakuwokúwala go,
komi geya kotaiyeta.”
Komi nakae. 33 Kogita? Nakonakae kaguuinuwa o kavaatulúkwana, e komi kokataema. Iyoni tosayóyova ima go, awoinu toina geya ikakáika, nakae oine geya inimnim. Nakae go, komi kodigo kami,
“Dimoni tauyana sinaena goi ikaaiyaka.”
34 Tomalatomota ima ikakáika be inimnim go, kodigo kami,
“Tauyana kogite? Aiikanina be nakae inim ginagina iiyaluwo. Tauyana takisi ana togogo be ituli ta toogoyoidi siyadi!”
35 Yaubada ina nanamsa Iyoni be yau kavatulúkwana go, nanamsayana ipaaisewa tomota yawoidi goi, e guinuwayadi goi Yaubada natunao toina siyagoi Yaubada ina nanamsa moe moitamo.’
Yeisu Parisi ivaatuluko nuwotao manuna tetelina
36 E Parisi tayamo yoina Saimoni Yeisu iduduwe ima kana,
‘Tovatulúkwana, kūma guna vada goi bego taiyao takáika.’
Tuwo moitamo ina Parisiyana ina vada goi isiu ikanataliya nimana isabadiye ikakáika. 37 Go konōve. Vavina tayamo toogoyoina asa amo goi ikaaiyaka. E vavinayana vala inove bego Yeisu Parisi ina vada goi ikakáika. Tuwo pútuma ma bootorina dedevina toina iikavale†Mad 26:7; Mak 14:3; Iyo 12:3. 38 ima Yeisu mlina goi go, aena kikina itaoya, itaitáiya. Itaitáiya go, mataiuna sitakapusi Yeisu aena ivakanapoivedi. Tuwo kununa ivaligei isakululu Yeisu aenayadi iseekukudi namliyeta iyowoiidi. Ikavava, ina putumayana ikabi, Yeisu aena ikatukoisidi. 39 E kina Parisiyana ikandobala, vavinayana ina guinuwa igite, nukotona goi inuwonúwana kana,
‘Mmm masa koroto amo Yaubada ina tokabivalavala tayamo. Vavina amo itagone ibiisikone. Neta Tauyana moitamo tokabivalavala, bei iyagoi vavinayana toogoyoina tayamo, e tauna itoboine bei ivalilive.’
40 Go kina Yeisuyana idigo kana,
‘Saimoni, latuwogu tamo dogoi alatuwokoim.’
‘Tovatulúkwana, kubōbwara’, Saimoniyana kaena.
41 Tuwo Yeisu ilivalakaibala idigo kana,
‘Koroto adi taiyuwo madi rowaga toesaesa tayamo yaina. Tayamo ana rowaga siriba 500 go, tayamo ana rowaga moe siriba 50. 42 Adi taiyuwokova geya itoboinedita toesaesayana sikatumapu, tuwo bokoyo adi rowaga inuwotaoidi.
Saimoni, koroto adi taiyuwokova yaidi goi ava koroto nakona bei toesaesayana imatakoiye gagaina?’
43 Saimoni idigo kana,
‘Seki, nakona tauyana ana rowaga ivakaigaga ana nuwotao ibabane.’
‘Moe bogina kudigoyabe’, Yeisu kaena.
44 Tuwo ikandovila vavinayana igitegite go, Saimoni ilaatuwoko idigo kana,
‘Saimoni, vavina ame kugite? Kom im vada goi asiu go, aegu ana bwae geya kuviniguta. Ego ame vavinayana toinina mataiuna goi yau aegu ivakanapoivedi. Ikavava, kununa goi isekukudi. 45 Im vada asiu go, geya kuyowoiiguta. E kina go vavinayana boi mainao asiu ima ame tuta yau aegu iyowoiidi. 46 Dabagu goi pútuma besobeso geya kusiwoiyeta. E kina go vavinayana ina pútuma ana maisa gagaina ime aegu goi isiwoi ikatukoisidi. 47 Moe pasina ame alatuuwokoim kunōve: Ame vavinayana ina goyo badabadaidi, e adi nuwotao bogina ibabanedi. Moe tayagoi moitamo unana imatakoiyegu gagaina. Ago avatauwa neta idi goyo adi nuwotao giyaina, e nakae kidi simatakoiyegu giyaina.’
48 E tuwo Yeisu vavinayana ilatuwoko idigo kana,
‘Vavina, yau adigo im goyo ana nuwotao bogina kubabane.’
49 Tuwo tomotayadi sikaaiyaka taiyao sikakáika toinidi sinuwonúwana kadi,
‘Amo Tauyana avatau bego tomota idi goyo inuwotaoidi?’
50 E Yeisu vavinayana ilatuwoko idigo kana,
‘Im numisa pasina am yava bogina kubabane. Mam tuboina kūna.’