Buki Kimaasabaina MAKI 14

Yeisu ana yóita, ana kotu be ina kámasa tetelidi

(Maki 14:1—15:47)

Yeisu ana nuwotulu ana losinapu tetelina

(Madiu 26:1-16; Luke 22:1-6; Iyoni 11:45—12:8)

1 E maliyalina aiyuwo mlidi moe Basitáwana Aikanina be nakae Beredi Pokaka Aikanina adi tuta.† Ago Tonúwala Gagaidi be Yaubada ina Katukeda ana tovatulukwanayao enao siilusala manakaedi bei idi pola goi itoboinedi Yeisu siyoisigau sikaumate. 2 Moe idi nuwonúwana go, sidigo kadi,

‘Go Basitáwana Aikanina sinaena geya tayoisiyeta, govila bei tomota madi egamogamogu sivakaleyeda.’

3 Yeisu ina Saimoni ina vada Betani goi ikaaiyaka. Saimoniyana boi tolepero tayamo. E Yeisu ikaaiyaka ikakáika go, vavina tayamo ima pútuma ma bootorina dedevina toina iikavale. Putumayana moe nadi‡ maavadaina go, ana maisa gagaina. Ikavale ima botoriyana ikiguyali, Yeisu dabana goi isiwoi.† 4 E tomota maniyedi sikaaiyaka, vavinayana ina guinuwa sigite, tuwo siegamogamogu, toinidi sidigo kadi,

‘Iyaa! Tauyana kogite? Manakae pútuma amo nakae ikavavaluge! 5 Moitamo. Neta putumayana ikaigimone, itoboine maisana mani gagaina toina ikabi; nakae neta tala tayamo ana paisewa ana maisa. Ikaigimone ikavava, maisana ikabi, tookaidi ivinidi. Go kaga unana tauna nakae geya iguinuweyeta?’

Tuwo sivatowo vavinayana siboove. 6 E kina go Yeisu idigo kana,

‘Tauyana kokalāve. Kaga unana mou kovinivini? Ina guinuwa yau yaigu moe guinuwa dedevina toina unana iwowoinegu. 7 Bogina koyagoi. Kidi tookaidi tuta liliuna sikaaiyaka yaimi. Ava tuta latuwomi, e itoboinemi kovaitedi.† Go yau sem tuta kaakupina bei akaaiyaka yaimi. 8 Vavina ame kaga nakae itoboine bogina iguinuwe yau yaigu. Pútuma dabagu goi isiwoi mana wowoina sakavaigu igimikatubayasi guna valiwoga manuna. 9 E moe nakae dedevina iguinuwe go, ame alatuuwokoimi konōve: Poyapoya ana madabokina goi nako Vala Dedevina sitaalavaite, e ina guinuwayana tetelina nakae bei sivateteli go, tauyana sinuwokavate.’

10 Tuwo Yudasa guma Keriota, tauyana Yeisu ina tovatotówana tayamo yawou aiyuwo yaidi go, tuwo itaoya ina Tonúwala Gagaidi yaidi bego Yeisu inuwotuluye. 11 E Yudasa ina livala sinove, ina tagona manuna siuyáwana be nakae sikatótula ina nuwotuluyana siemaisi. Tuwo amo tutayana goi tuta ana toboine iilusale bei Yeisu inuwotuluye.

Yeisu mana tovatotowanayao
Basitáwana Aikanina sikakáika tetelina

(Madiu 26:17-25; Luke 22:7-14,21-23; Iyoni 13:21-30)

12 Beredi Pokaka Aikanina ana maliyalina vakuumgoina bogina ima. Amo tutayana Basitáwana Aikanina ana lami sikaumatedi sikasaledi Yaubada yaina. Maliyalinayana goi Yeisu ina tovatotowanayao sima silumadade sidigo kadi,

‘Nako goi latuwom Basitáwana Aikanina kakatubayasi bei takáika?’

13 Tuwo ina tovatotowanayao adi taiyuwo ilatuwokoidi idigo kana,

‘Kōna Yerusalema goi kosīu go, koroto tayamo aba tega maa bwaena iikavale bei ima ivalobodemi. Korotoyana kosabokulīye. 14 Ava vada goi isiusiu komi kosīu be toni vada kolatuwōko kami,

“Ima tovatulúkwana idigo kana, ‘Im vada sinaena ava dadava kutagone bei magu tovatotowanayao Basitáwana Aikanina kakáika?’ ”

15 Nakae kolatuwōko go, vada diligaemaina vabodaupa tayamo gagaina dadavina katubaayasina bei ivatulukoimi. Moeko goi ida Basitáwana Aikanina kokatubayāsi.’

Ilatuwokoidi ikavava, ietunedi sina. 16 Tuwo moitamo ina tovatotowanayao adi taiyuwokova sitaoya sina Yerusalema goi sisiu go, kaga Yeisu bogina ilatuuwokoidi nakae sibabanedi. Tuwo amoko goi adi Basitáwana Aikanina sikatubayasi. Sikatubayasi ikavava, sikaluvila sima Tauyana yaina goi.

17 Bogina kinanatau, Yeisu mana tovatotowanayao yawou aiyuwo sitaoya sima vadayana goi. 18 Amoko goi situsobu sikakáika go, Tauyana idigo kana,

‘Ame dedevina taiyao takakáika go, ame alatuuwokoimi konōve: Koroto tayamo yaimi goi bei inuwotuluyegu. Tauyana taiyao kakakáika go, nava bei inuwotuluyegu!’†

19 Tuwo kidi ina tovatotowanayaoyadi tamo tamo madi kategeda sidigo kadi,

‘Nakona yau?’

20 E Tauyana kana,

‘Kita mada kabivekoveko noko tayamo goi ida beredi tavakuutuidi go, koroto tayamo komi yawou aiyuwoyami yaimi goi moe yau agu tonuwotulu. 21 Moitamo. Tomalatomota bogina inonoina nakae Gínina Kimaasabaina boi bogina igimitalavaite Tauyana manuna. Ego ana tonuwotuluyana ana toovalugo! Neta boi sinana geya ivenatuniyeta!’

22 E tauyadi sikakáika go, Yeisu beredi ikabi, manuna ikauyagu Yaubada yaina. Ikavava, ikivisi ina tovatotowanayao ivinidi go, idigo kana,

‘Moe wowogu nakae. Kokābi kokāni.’

23 Tuwo sikabi sikáika. Ikavava, oine ma keeigaina ikabi, manuna ikauyagu Yaubada yaina. Ikavava, keigayana ivinidi, e tamo tamo sikabi sinim 24 go, idigo kana,

‘Moe ikaikaigu nakae. Ikaikaiguyana bei idaudau komi manumi be nakae tomota liliudi manudi. Ikaikaiguyana ina dau goi Yaubada ikanasiukoimi.† 25 Moitamo nakae bei isowóduwo go, ame alatuuwokoimi konōve: Oine ame geya tuwaina bei animnim ana kadókana tutayana Yaubada itagonegu akalibúbuna namliyeta baige oine vau bei anim.’

26 Sikáika ikavava, Same vesina sivesiye Yaubada yaina. Sivesi ikavava, sisowóduwo sina Oribe Koyaina goi situko.

Yeisu Pita ina lawoiwoi itaalavaite tetelina

(Madiu 26:31-35; Luke 22:31-34; Iyoni 13:36-38)

27 Niga Yeisu ina tovatotowanayao ilatuwokoidi idigo kana,

‘Sabamgo ame imi numisa goi bei kokapusi yau pasigu. Moe nakae Gínina Kimaasabaina goi Yaubada idigo kana,

“Sipi adi tomatakavata bei aláui go,

ina sipiyadi bei sisapa sisiya.”

Sakarayau 13:7

28 Go geya kada kokapusi vata geya, go sem ámasa goi Yaubada ikaitaoemneigu mlina bei avakumgo ana Galili.’†

29 E kina go Pita idigo kana,

‘Nakona madabokidi idi numisa goi bei sikapusi, go yau sem geya akapusita.’

30 Go kina Yeisu idigo kana,

‘Moe dedevina neta moitamo go, ame alatuuwokoim kunōve: Ame sabamgoyana goi kom bogina bei sivato kulawoiwoiyekoigu namliyeta kamkam bei sivayuwoina itáiya.’

31 Kina Pita sopana imakimaki kana,

‘Neta akámasa kom taiyao, tuwo akámasa go, geya alawoiwooiyem.’

Ame nakae ina tovatotowanayao liliudi sidige.

Yeisu ina kawanoi be ana yóita
Gedesemane goi tetelidi

(Madiu 26:36-56; Luke 22:39-53; Iyoni 18:3-12)

32 Niga Yeisu mana tovatotowanayao sina asa tayamo yoina Gedesemane‡ goi go, maniyedi ilatuwokoidi idigo kana,

‘Ameko kotusōbu kokaaiyāka. Kai kana dobala go, yau bei akawanoi Yaubada yaina.’

33 Tuwo moitamo situsobu go, Pita, Yemesa be Iyoni ikabidi taiyao sina. Sinonoina go, kina Yeisu bogina nukotona taitáiya iuyoi be nakae atena igeda gagaina toina. 34 Tuwo adi taito ilatuwokoidi idigo kana,

‘Nuwogu taitáiya iuyoi, nakae bei akámasa.† Komi ameko goi kokaaiyāka go, koyauyāusa.’

35 Ibóbwara ikavava, ivayavakova ikanakabobo go, ikawanoi Yaubada yaina goi neta itoboine ina gedageda ana tuta geya ibabaneyeta. 36 Ina kawanoiyana goi idigo kana,

‘Abba,† Tamagu, kaga liliuna ikakapu yaim. Tauna neta gedageda keigaina ame kukābi kunāve. Go sem yau geya guna nuwonúwana geya, go sem kom im nuwonúwana kuguinūwe.’

37 Ikawanoi ikavava, ikaluvila ima ina tovatotowanayaoyadi ibabanedi sikanaamatáiya, tuwo iwoinidi, e Pita ilatuwoko idigo kana,

‘Saimoni, manakae? Kom kuumasisi? Manakae? Geya itoboinemta tuta giiyaina goi kuyauyáusa ae?’

38 Ago adi taito ilatuwokoidi kana,

‘Koyauyāusa nakae kokaawanōi bego aba vakakona goi geya kokapusita. Balomaimi latuwodi toina go, wowomi sineneta.’

39 Niga Yeisu ivayavamna ina ikawanoi nakae maine bogina ikawanoi. 40 Niga sivayuwoina ikaluvilamna ima ina tovatotowanayaoyadi ibabanedi sikanaamatáiya. Bogina kuyagoi. Matadi inosedi gagaina. Iwoinidi go, odi imayamaya, tauna geya siyagoiyeta manakaedi bei sikatumapu. E Yeisu ivayava ina ikawanoi. 41 Ikawanoi ikavava, sivatonina ikaluvila ina ina tovatotowanayaoyadi adi taito ibabanedi sikanaamatáiya. Tuwo iwoinidi go, idigo kana,

‘Manakae? Nava koomasisi be kowaaiwasi ae? Moe tuwo. Tomalatomota ina tuta bogina ima. Ana tonuwotulu bei toogoyoidi nimadi goi iyato. 42 Kotāoya tāna. Kogīte; guna tonuwotuluyana bogina imamaima.’

Tuwo moitamo sitaoya go, ina tovatotowanayao ainima aito nakae iduduwedi sima.

43 E Yeisu nava ibobóbwara go, Yudasa isowóduwo ima. Tauyana tovatotówana tayamo yawou aiyuwo yaidi goi. Isowóduwo go, boda madi sisi be madi kepati taiyao sima. Bodayadi kidi Tonúwala Gagaidi be Atukeda ana tovatulukwanayao be nakae Diyuu idi tomoyamoya sietunedi sima. 44 Ego Yeisu ina tonuwotuluyana aba kinana tayamo bogina ivinidi bei siiyagoi ava koroto moe Yeisu, tauna kana,

‘Avatau neta ayowoi, e amo Tauyana koyōisi konāve go, komatakavatedōko.’

45 Tuwo Yudasayana isowóduwo go, mainao iseivata ima Yeisu goi idigo kana,

‘Tovatulúkwana Toolagaim, uyagu!’

Ikavava, iyowoi. 46 E bodayadi sigite, tuwo sibala sima Yeisu siyoisi. 47 E toyoko tayamo ina sisi ibuyagi, ibala ina Tonúwala Toolagaina ina pákwana taiyana kakataina ivakanáupe. 48 Ago Yeisu bodayadi ilatuwokoidi idigo kana,

‘Manakae? Yau bego tokapipilova tayamo, tauna komi mami sisi be mami kepati koma koyoisigu? 49 Maliyalina tamo tamo Vada Kimaasabaina goi akaaiyaka yaimi goi avaatulúkwana†a go, geya koyoisiguta. Yau geya tokapipilova geya, go sem Gínina Kimaasabaidi itoboinedi simalatomotamna.’†b

50 Tuwo Yeisu ina tovatotowanayao liliudi Tauyana sikalave go, sisiya. 51 Ego tubuwau tayamo ma paiwaina ana tanigo itanigoeyamo Yeisu iikitau, e nakae ikaaiyaka. Ago tovayaviya sima bego siyoisi 52 go, ana tanigo kaka siyoisiyamo sikiwowo. Tuwo tubuwauyana ma paiwaina isiya.

Yeisu ana kotu Diyuu idi tomoyamoya
matadi goi tetelina

(Madiu 26:57-68; Luke 22:54-55,63-71; Iyoni 18:12-14,19-24)

53 E tuwo bodayadi Yeisu siyoisi, sinave Tonúwala Toolagaina ina vada goi. Amoko goi Tonúwala Gagaidi, Diyuu idi tomoyamoya be nakae Yaubada ina Katukeda ana tovatulukwanayao bogina sigugúguna.

54 E kina go Pita tupwana masigava goi Yeisu isabookuliye ina Tonúwala Tolagainayana ina vada ana kali goi isiu itusobu Vada Kimaasabaina ana polisi taiyao. Iitusobu go, polisiyadi taiyao yeu goi sibuuvavaya.

55 E kidi go Tonúwala Gagaidi be nakae Diyuu adi kotu ana tolovinao liliudi vadayana sinaena sikaaiyaka Yeisu ana totalavaita polapola siluusaledi bego idi talavaitayadi goi Yeisu sitakino toogoyoina bei sikaumate go, geya tayamo sibabane. 56 Moitamo. Tomota badabadaidi sitalavaita polapola go, idi talavaitayadi geya sivavaseta. 57 Ago maniyedi sitaoya sitalavaita polapola, sidigo kadi,

58 ‘Tauyana kanove, idigo kana,

“Vada Kimaasabaina ame tomota nimadi goi siyowo, e nava bei atauwe go, maliyalina aito mlidi goi ituli ta Vada Kimaasabaina bei ayowo go, geya tomota nimadi goi geya.” ’†

59 Nakae sibóbwara go, idi talavaitayadi nakae geya sivavaseta. 60 Sitalavaita ikavava, tolovina nauyayanaidi goi Tonúwala Toolagaina itaoya, Yeisu ilumadade idigo kana,

‘Manakae kom im katumapu? Ame kaga manuna tauyadi sitalavaaitem?’

61 Go kina Yeisu iitugau, geya tayaamo kaga ikatumapu. E kina Tonúwala Tolagainayana idigo kana,

‘Kom moitamo Guyau, Yaubada aba yapali Natuna?’

62 E kina go Yeisu idigo kana,

‘Yau Tauyagu. Nava Tomalatomota bei kogite mana lovina wowoina basekoina Tokalika kakataina goi iitusobu be nakae yábana geleoina yatadi goi imamaima.’†

63 Go kina Tonúwala Tolagainayana mana egamogamogu ana kwama ikiise giyaina go, idigo kana,

‘Kaga ana dedevina totalavaita tuwaina taalusale? Geya! 64 Ina digopopóita bogina konove! Komi manakaemi koolovina?’†

E liliudi sitakino kina toogoyoina, sidigo kadi,

‘Moitamo Tauyana itoboine ikámasa!’

65 Ago maniyedi sitaoya Yeisu sigiwoli go, maniyedi matana sisikobode. Ikavava, sipwaiki go, sikaiwotete kadi,

‘Kulatuwokōima avatau iilauim!’

Ago Vada Kimaasabaina ana polisi sima Yeisuyana siyoisi sidabi.

Pita ina lawoiwoi tetelina

(Madiu 26:69-75; Luke 22:54b-62; Iyoni 18:15-18,25-27)

66 E Pita tonoko Tonúwala Toolagaina ina vada ana kali sinaena goi ikaaiyaka go, Tonúwala Toolagainayana ina pákwana woiyaina tayamo ima 67 Pitayana igite ibuuvavaya. Tuwo ipotekavate go, idigo kana,

‘Kom woi amo guma Nasareta, Yeisu, ina tosabokuli tayamo!’

68 Go kina Pita ilawoiwoi idigo kana,

‘Moe kaga kudigedige yau geya ayagoiyeta!’

Tuwo, ibala ina aliyana ana kaba siu goi ikaaiyaka go, kamkam itáiya. 69 Woiyaiyana Pita igite, toyokoyadi ilatuwokoidi idigomna kana,

‘Koroto ame Yeisu ina boda tayamo.’

70 Go kina Pita sivayuwoina ilawoiwoimna kana,

‘Yau geya!’

E tuta giyaina toyoko maniyedi nakae sibala sima Pita silatuwoko sidigo kadi,

‘Kom woi Yeisu ina boda tayamo. Moitamo. Kom guma Galili.’

71 Go kina Pita ikanatamada idigo kana,

‘Iyagoida! Neta apola, Yaubada itoboine ilauigu. Amo korotoyana kodigedige yau geya ayagoiyeta geya!’

72 E mainao kamkam sivayuwoina itáiya go, kina Pita Yeisu ina livala inuwopeye boi idigo kana,